በሰጊድ፡ ስብሐት፡
Ba-sagid Səbḥat
In Prostrating, Glory
-
- በሰጊድ፡ ስብሐት፡ ለዝክረ፡ ስምከ፡ ሰላም፡ እግዚአብሔር፡ ዋሕድ፨
- በከመ፡ ነገረ፡ ወልደ፡ ነጐድጓድ፨
- ጸዐዳ፡ ከመ፡ በረድ፨
-
- በሰጊድ፡ ስብሐት፡ ወለርእስከ፡ ሰላም፡ እግዚአብሔር፡ ቡሩክ፨
- ዘአስተቀጸልዎ፡ ሕዝብ፡ አክሊል፡ ዘሦክ፨
- ወኰርዕዎ፡ በኢምሒክ፨
-
- በሰጊድ፡ ስብሐት፡ ወለጽሕምከ፡ ሰላም፡ እግዚአብሔር፡ አሮን፨
- ዘይወርድአ፡ እስከነ፡ ሕፃን፨
- ምዑዝ፡ ዘእምስኂን፨
-
- በሰጊድ፡ ስብሐት፡ ለመልክእከ፡ ኵሉ፨
- በነጽሮ፡ ዝንቱ፡ ዘጸልመ፡ ለፀሓይ፡ ጸዳሉ፨
- ዕርቃነከ፡ ሶበ፡ ሰቀሉ፨
-
- በሰጊድ፡ ስብሐት፡ ጊዜ፡ ትወፅእ፡ ነፍስከ፡ መንጦላዕተ፡ ምኵራብ፡ ተሠጠ፨
- ፀሓይ፡ ደንገጸ፡ ወወርኅ፡ አንሶጠጠ፨
- እምትስብእት፡ ዘኢተፈልጠ፨
-
- በሰጊድ፡ ስብሐት፡ ሰሐበቶ፡ ፍቅር፡ አገበረቶ፡ ትሕትና፨
- ለበድነ፡ ሥጋከ፡ ዘአልቦ፡ ሙስና፨
- ለመሬት፡ እስከ፡ ተከድና፨
-
- በሰጊድ፡ ስብሐት፡ ለኅደረትከ፡ ሰላም፡ እንተ፡ ትትከደን፡ መሬተ፨
- ውስተ፡ ልበ፡ ምድር፡ ሠሉሰ፡ ዕለተ፨
- ዘትለብስ፡ ብርሃናተ፨
-
- በሰጊድ፡ ስብሐት፡ ለትንሣኤከ፡ ሰላም፡ እግዚአብሔር፡ ዐቢይ፨
- ፄዊወከ፡ ፄዋ፡ ወሆከ፡ ቀለይ፨
- ለዕርገትከ፡ ውስተ፡ ሰማይ፨
-
- በሰጊድ፡ ስብሐት፡ መሓሪት፡ ዐይንከ፡ ትትመየጠነ፡ እንከ፨
- በእንተ፡ ኵሎን፡ መልክእከ፨
- ስእለተ፡ ሕዝብከ፡ ስማዕ፡ ኢይኩን፡ ብከ፨
- ተወከፎን፡ ነግሀ፡ ወሰርከ፨
-
- መሓሪት፡ ዐይንከ፡ ትትመየጠነ፡ እንከ፨
- በእንተ፡ ማርያም፡ ወላዲትከ፨
- ስእለተ፡ ሕዝብከ፡ ስማዕ፡ ኢይኩን፡ ብከ፨
- ተወከፎን፡ ነግሀ፡ ወሰርከ፨
-
- መሓሪት፡ ዐይንከ፡ ትትመየጠነ፡ እንከ፨
- በእንተ፡ ሥጋከ፡ ወደምከ፨
- ስእለተ፡ ሕዝብከ፡ ስማዕ፡ ኢይኩን፡ ብከ፨
- ተወከፎን፡ ነግሀ፡ ወሰርከ፨