ስብሐተ፡ መስቀል፡
Sǝbḥata Masqal
Praise of the Cross
-
- እንዘ፡ ኣኀትም፡ ገጽየ፡ ለመስቀልከ፡ በማሕተሙ፨
- ተዝካረ፡ ማሕሌት፡ እጽሕፍ፡ ዘስብሐተ፡ መስቀል፡ ስሙ፨
- ወስከኒ፡ ክርስቶስ፡ ኀይለ፡ አእምሮትከ፡ ለለ፡ ጌሠሙ፨
- ወምልአኒ፡ መንፈሰ፡ ጽድቅ፡ ዘኢየሐጽጽ፡ ሰላሙ፨
- ከመ፡ ኢይምአኒ፡ ለሥጋየ፡ ድካሙ፨
-
- ናሁ፡ አኀዝኩ፡ ከመ፡ እትናገር፡ ዕበዮ፨
- ለዕፀ፡ መስቀልከ፡ ክቡር፡ ዘተተክለ፡ በቀራንዮ፨
- ኢየሱስ፡ ክርስቶስ፡ ፈጻሜ፡ አምሳል፡ ወተነብዮ፨
- ቶስሕ፡ በላዕሌየ፡ ለመንፈስከ፡ ዋዕዮ፨
- ዘያቀሊ፡ ልበ፡ ወይዔምቅ፡ ኀልዮ፨
-
- ኦዘዐርገ፡ ሰማያተ፡ ምስለ፡ ቃለ፡ ስብሐት፡ ወውዋዔ፨
- ፄዊወከ፡ ፄዋ፡ በመስቀለ፡ ሞትከ፡ ቅድመ፡ ጉባኤ፨
- በዓለ፡ ገራህይት፡ ክርስቶስ፡ መበይነ፡ ክርዳድ፡ በመስዔ፨
- አስተጋብእ፡ በሙዳይከ፡ አምሳለ፡ ጸራ[ይ]ቅ፡ ክልኤ፨
- ኍልቈ፡ ማሕሌትየ፡ ዘኀምስ፡ ሱባዔ፨
-
- ኦዘፈኖከ፡ መንፈሰከ፡ ናዛዜ፨
- ኀበ፡ ሐዋርያት፡ ሀለዉ፡ ውሣጤ፡ ጽርሐ፡ ጽዮን፡ ምስለ፡ እንባዜ፨
- እስመ፡ መልአ፡ ክርስቶስ፡ ስብሐተ፡ መስቀልከ፡ ማየ፡ ተከዜ፨
- ተውላጠ፡ ዝንቱ፡ ስብሐት፡ እንበለ፡ ታጐንዲ፡ ጊዜ፨
- ፈንዎተ፡ ጸጋከ፡ ሊተ፡ አስተፋጥን፡ ይእዜ፨