Subject
Malkəʾ
-
- በስመ፡ ቀዳማዊ፡ አምላክ፡ ወድኅረ፡ ዓለማት፡ ሀላዊ፨
- እንበለ፡ ተሐውኮ፡ ኅዳጠ፡ እመንበረ፡ መንግሥት፡ መለኮታዊ፨
- ውዳሴ፡ መልክእከ፡ ንንግር፡ በመድበለ፡ ካህናት፡ ደቂቀ፡ ሌዊ፨
- ይርከበነ፡ ለውሉድከ፡ በረከትከ፡ ሣህላዊ፨
- እንድርያኖስ፡ አቡነ፡ ጳውሎስ፡ ዕብራዊ፨
-
- ሰላም፡ ለፅንሰትከ፡ ውስተ፡ ከርሠ፡ ኅሪት፡ ማርያም፨
- ለብስራተ፡ መልአክ፡ በልደትከ፡ ሰላም፨
- እንድርያኖስ፡ ሲኖዳ፡ በብሕታዌከ፡ ፍጹም፨
- አስተባሪየከ፡ ደብረ፡ ሊባኖስ፡ እም፨
- ወፈሊሰከ፡ አስቄጥስ፡ ገዳም፨
-
- ሰላም፡ ለዝክረ፡ ስምከ፡ እንተ፡ ተጽሕፈ፡ ውስቴቱ፨
- ፊደላተ፡ ሞገስ፡ ወጸጋ፡ ዘኊላቌ፡ አዝማን፡ ሰብዐቱ፨
- እንድርያኖስ፡ ጴጥሮስ፡ ለቆርኔሊዮስ፡ አመ፡ ዕብሬቱ፨
- ዘወረደ፡ እምሰማያት፡ ሞጣሕተ፡ ራእይ፡ ሎቱ፨
- ሥዕለ፡ እንስሳ፡ ወአራዊት፡ ዘተሥዕለ፡ ቦቱ፨
-
- ሰላም፡ ለግንዘተ፡ ሥጋከ፡ ግንዘተ፡ አርሳኒ፡ ዘተሳተፈ፨
- ወለመቃብሪከ፡ ባቲ፡ እንተ፡ ረሰይከ፡ ምዕራፈ፨
- እንድርያኖስ፡ ፈለስከ፡ እንዘ፡ ታተሉ፡ አእላፈ፨
- ገነት፡ ኀበ፡ ተርኅወ፡ ወዘርቤተ፡ ዕረፍት፡ ተነጽፈ፨
- ምስለ፡ ነፍሰ፡ ጻድቃን፡ አኃው፡ ከመ፡ ትንበር፡ ዘልፈ፨
-
- ለዘበሥምራት፡ አቅረብኩ፡ አምኃ፡ መሓልይ፡ እንግዳ፨
- ለስምከ፡ ዐቢይ፡ አምሳለ፡ ስመ፡ ኪሮስ፡ ወሲኖዳ፨
- እንድርያኖስ፡ ሀበኒ፡ ዐስበ፡ ማሕሌትየ፡ ካዕብተ፡ ፍዳ፨
- ሰብእሰ፡ ተአውቀ፡ አኮኑ፡ በአስቆሮታዊ፡ ይሁዳ፨
- ከመ፡ ሀይማኖቶ፡ ይሠይጥ፡ በብሩር፡ ጸዐዳ፨