Other Titles
-
መልክአ፡ መድኃኔ፡ ዓለም፡ ካልእ፡
Malkəʾa Madḫāne ʿĀlam Kāləʾ
(Second) Image of the Saviour of the World
Malkəʾ
-
- እሰግድ፡ ለፅንሰትከ፡ ወለልደትከ፡ መድምም፨
- እምድንጋሌ፡ ሥጋ፡ ሕቱም፨
- ኢየሱስ፡ ክርስቶስ፡ መድኃኔ፡ ዓለም፨
- ልብየ፡ አንቅሕ፡ ወነፍስየ፡ ለስብሐቲከ፡ አዳም፨
- ለሥጋየሰ፡ አኀዞ፡ ድካም፨
-
- እሰግድ፡ ለዝክረ፡ ስምከ፡ መልአከ፡ ምሥጢር፡ ዘተርጐሞ፨
- ቅድመ፡ ማርያም፡ ወዮሴፍ፡ አመ፡ ወርኀ፡ ብስራት፡ ወተሳልሞ፨
- መድኃኔ፡ ዓለም፡ ክርስቶስ፡ ስመ፡ ስብሐቲከ፡ ሶበ፡ አደሞ፨
- ጳውሎስ፡ ከልሀ፡ ወይቤ፡ በዐውደ፡ ኔሮን፡ ቀዊሞ፨
- መኑ፡ ያኀድገነ፡ ለክርስቶስ፡ ስሞ፨
-
- እሰግድ፡ ለትንሣኤከ፡ እንዘ፡ ተኀድገ፡ መንዲለ፨
- ወሰበነኒ፡ እንተ፡ ባሕቲቱ፡ ጥብሉለ፨
- መድኃኔ፡ ዓለም፡ ክርስቶስ፡ ዘኢገፋዕከ፡ መስቀለ፨
- አንሥአኒ፡ በትንሣኤከ፡ ድኅረ፡ ሥጋየ፡ ተቀትለ፨
- ወበዕርገትከ፡ አዕርገኒ፡ ላዕለ፨
-
- እሰግድ፡ ለዕርገትከ፡ ማሕተመ፡ ነገር፡ ወምሳሌ፨
- ወለመጽአትከ፡ ካዕበ፡ በደመና፡ ሰማይ፡ ሉዓሌ፨
- መድኃኔ፡ ዓለም፡ ክርስቶስ፡ ምስለ፡ አባግዒከ፡ ሰብዓ፡ ክላሌ፨
- አቁመኒ፡ በየማንከ፡ እንዘ፡ ታረስአኒ፡ ወይሌ፨
- አመ፡ በፀጋምከ፡ ደርገ፡ ታቀውም፡ አጣሌ፨
-
- ሙሴ፡ ነቢይ፡ በገዳም፡ ሶበ፡ ሞተ፨
- መጠነ፡ በከይዎ፡ ሕዝቡ፡ ሠላሳ፡ ዕለተ፨
- መድኃኔ፡ ዓለም፡ ክርስቶስ፡ እስመ፡ አበ፡ ነፍስየ፡ አንተ፨
- አወትር፡ ብሂሎትየ፡ እስከ፡ እትከደን፡ መሬተ፨
- አምላከ፡ ሰማይ፡ እፎ፡ ተሰቀልከ፡ ሊተ፨
-
- ስብሐት፡ ለከ፡ አምላኪየ፡ በኍልቈ፡ ሰብእ፡ ወመላእክት፨
- ስብሐት፡ ለከ፡ አምላኪየ፡ በኍልቈ፡ ጽዱላት፡ ከዋክብት፨
- ስብሐት፡ ለከ፡ አምላኪየ፡ በኍልቈ፡ ዕለታት፡ ወአዝማናት፨
- ስብሐት፡ ለከ፡ አምላኪየ፡ በኍልቈ፡ ይደሉ፡ ለመስቀልከ፡ ሕይወት፨
- እስመ፡ በመስቀልከ፡ ድኅነ፡ ኵሉ፡ ፍጥረት፨