መልክአ፡ ዓለም፡ Malkəʾa ʿĀlam

Image of the World

- ናሁ፡ ለልብየ፡ አስተናሥኦ፡ ዘመኑ፨
- ዜና፡ መልክእኪ፡ ዓለም፡ ከመ፡ እጽሐፍ፡ ዘበበ፡ በይኑ፨
- ባሕቱ፡ ሐሰተ፡ ከመ፡ ኢይቶስሕ፡ ውስተ፡ ድርሳኑ፨
- ኢየሱስ፡ ክርስቶስ፡ ለእግዚአብሔር፡ የማኑ፨
- ጸጋ፡ መንፈስ፡ ቅዱስ፡ ላዕሌየ፡ ይፈኑ፨
- ሰላም፡ ለዝክረ፡ ስምኪ፡ ውስተ፡ አፈ፡ አብዳን፡ ጥዑም፨
- በአፈ፡ ማእምራን፡ እኪተ፡ ጽዋዔ፡ ዓለም፨
- እለ፡ ግሑሳን፡ እማኅበርኪ፡ ዘሥጋ፡ ወደም፨
- ኢየሐምዩ፡ ማኅሌትየ፡ ሶበ፡ ይብሉኪ፡ ሰላም፨
- እስመ፡ በውስቴቱ፡ ዘለፋ፡ ወብዙኅ፡ መርገም፨
- ሰላም፡ ለሥዕርተ፡ ርእስኪ፡ እለ፡ ተቀብአ፡ መዐዛ፨
- ለነፍሰ፡ አብዳን፡ ዘይሔውዛ፨
- አረጊት፡ ዓለም፡ ዘታስተሐውዚ፡ ፍቅረ፡ ወሬዛ፨
- ኢይኩን፡ ድዉየ፡ ወሕሙመ፡ ለሥራይኪ፡ በሕምዛ፨
- ዐቃቢተ፡ ሥራይ፡ ማርያም፡ ትኩነኒ፡ ቤዛ፨
- ሰላም፡ ለርእስኪ፡ እንተ፡ እምኔሁ፡ አስተርአዩ፨
- ለሥጋ፡ ኃጢአት፡ መለያልዩ፨
- ማኅደረ፡ እኩያን፡ ዓለም፡ ወለመልአኮሙ፡ ቤተ፡ እከዩ፨
- ጻድቃንሰ፡ እለ፡ እማሕፀን፡ ተኀርዩ፨
- ከመ፡ ኢየሀልዉ፡ ውስቴትኪ፡ ማኅደረ፡ ሌላዩ፨
- ሰላም፡ ለገጽኪ፡ እንተ፡ አፍአሁ፡ ንጹሕ፨
- ወውሳጤሁ፡ ርሱሕ፨
- ረዳኢተ፡ ዲያብሎስ፡ ዓለም፡ ወንዋየ፡ ሐቅሉ፡ መፍርህ፨
- ዘኢቈስለ፡ በሐጽኪ፡ ወመጥባሕትኪ፡ በሊኅ፨
- አልቦ፡ ጠቢብ፡ ወአልቦ፡ የዋህ፨
- ሰላም፡ ለቀራንብትኪ፡ ዘነበስባሶን፡ አዖቀ፨
- ምግባረ፡ ዘማዊት፡ ብእሲት፡ ማእከለ፡ ወራዙት፡ ረፈቀ፨
- ማኅደረ፡ አብዳን፡ ዓለም፡ እንተ፡ ለመድኪ፡ ስላቀ፨
- ምስሌኪ፡ ሰብእ፡ ማእምራን፡ ኢሀለወ፡ ልጹቀ፨
- ነበሩ፡ በገዳም፡ ወቀነቱ፡ ሠቀ፨
- ሰላም፡ ለማኅቶተ፡ ሥጋኪ፡ እንተ፡ ኀረየ፡ ወአብደረ፨
- መትሕተ፡ ዐራት፡ ይንበር፡ ወይከድንዎ፡ ከፈረ፨
- ዕውርተ፡ አዕይንት፡ ዓለም፡ ዘትመርሒ፡ ዕዉረ፨
- ክልኤክሙ፡ ትትዐቀፉ፡ ወትትወደቁ፡ ኅቡረ፨
- ከመ፡ ዜናክሙ፡ አማናዊ፡ በወንጌል፡ ተነግረ፨
- ሰላም፡ ለአእዛንኪ፡ ዐውያተ፡ ነዳያን፡ ዘይጸመማ፨
- ወእለ፡ ይሰምዓ፡ በጻህቅ፡ ውስተ፡ ቤተ፡ ተውኔት፡ ማሕሌተ፡ ዜማ፨
- ዓለመ፡ ሥጋ፡ ርግምት፡ ኅብስተ፡ ዕለትኪ፡ በሐፈ፡ ጻማ፨
- ለምረርኪ፡ ደኃራዊት፡ ሶበ፡ አእመሩ፡ አቅማ፨
- መነኑ፡ ጠቢባን፡ ለተድላኪ፡ ጣዕማ፨
- ሰላም፡ ለመላትሕኪ፡ ዘአሠነያ፡ ቂሐተ፨
- ከመ፡ ያሠግራ፡ ነፍሳተ፨
- እመ፡ ዘማውያን፡ ዓለም፡ ዘታፈቅሪ፡ ዝሙተ፨
- እምግባርኪ፡ ሰይጣናዊ፡ ዘነፍሰ፡ ንጹሓን፡ አስሐተ፨
- መንፈሰ፡ ቅዳሴ፡ ጰራቅሊጦስ፡ ይዕቀበኒ፡ ሊተ፨
- ሰላም፡ ለአእናፍኪ፡ እመዐዛ፡ አምበር፡ ወምስክ፨
- እለ፡ ይረውጻ፡ ዘልፈ፡ ውስተ፡ ፍናወ፡ ሞት፡ ድሩክ፨
- እኅተ፡ አርዌ፡ ምድር፡ ዓለም፡ ዘረገመኪ፡ አምላክ፨
- ኢይክሀል፡ አውድቆትየ፡ እከየ፡ መስሐቲ፡ መልአክ፨
- ከመ፡ አውደቀኪ፡ ቅድመ፡ እምሣልስ፡ ፈለክ፨
- ሰላም፡ ለከናፍርኪ፡ እለ፡ ኢይቶስሑ፡ ሕቀ፨
- ውስተ፡ ንባቦሙ፡ ጽድቀ፨
- መፍቀሪተ፡ ንዋይ፡ ዓለም፡ እንተ፡ ታስተጋብኢ፡ ወርቀ፨
- ጻድቃንሰ፡ ለመዝገብኪ፡ ሶበ፡ አስቆረርዎ፡ ጥቀ፨
- ኢነሥኡ፡ እምኔሁ፡ አሐተ፡ ጸሪቀ፨
- ሰላም፡ ለአፉኪ፡ ዘኢተዐቅበ፡ በሕግ፨
- እስመ፡ አምሳለ፡ ቤት፡ ውእቱ፡ እንተ፡ አልባቲ፡ መንሠግ፨
- ማኅፈደ፡ ኆፃ፡ ዘይገፍዑኪ፡ አፍላግ፨
- ይባልሓ፡ በጸሎቱ፡ እምድቀትኪ፡ ፀዋግ፨
- አብ፡ ቅዱስ፡ ያዕቆብ፡ ዘሥሩግ፨
- ሰላም፡ ለአስናንኪ፡ ዘበእንቲአሆን፡ ተጽሕፈ፨
- አሌ፡ ሎሙ፡ እንዘ፡ ይብል፡ ለእለ፡ ይሥሕቁ፡ ዘልፈ፨
- መሥገርተ፡ ኃጥኣን፡ ዓለም፡ ዘትሰመዪ፡ ገሪፈ፨
- ወቦ፡ ጊዜ፡ አመ፡ ትትመሰሊ፡ ጸድፈ፨
- ውስተ፡ ፍናዌሆሙ፡ ለጻድቃን፡ ትኩኒ፡ ማዕቅፈ፨
- ሰላም፡ ለልሳንኪ፡ እንተ፡ ትቀልል፡ እምኔሃ፨
- ማኅደረ፡ ኃጥኣን፡ ሲኦል፡ ዘጽልመት፡ መናሥግቲሃ፨
- ዐማፂት፡ ዓለም፡ ለምኵናንኪ፡ በዐውደ፡ ፍትሓ፨
- እንዘ፡ ጻድቀ፡ ትኴንኒ፡ ወትረስሒ፡ ንጹሐ፨
- ጐንደየ፡ መዋዕል፡ ወዘመን፡ ኖኀ፨
- ሰላም፡ ለቃልኪ፡ እምብሂለ፡ ነገር፡ ዘኢያርመመ፨
- ንብላዕ፡ ወንስተይ፡ እስመ፡ ንመውት፡ ጌሰመ፨
- መፍቀሪተ፡ ሀከክ፡ ዓለም፡ ዘትጸልኢ፡ ሰላመ፨
- እምታውፅኢ፡ ዘንተ፡ እምአፉኪ፡ ቃለ፡ አእምሮ፡ ሕሡመ፨
- ይኄይስ፡ እምውስቴቱ፡ ትደዪ፡ ልጓመ፨
- ሰላም፡ ለእስትንፋስኪ፡ ለነፍሰ፡ ፀጋም፡ ዘይመስሎ፨
- እስመ፡ ንፍኀቱ፡ ዕሩቅ፡ እምጥዒና፡ ሰብእ፡ ወተሣህሎ፨
- ኦዓለም፡ ሀገረ፡ ጽልሑት፡ ወተበቅሎ፨
- ተብህለ፡ በእንቲአሁ፡ አሌሎ፡ አሌሎ፨
- ውስተ፡ ዐጸድኪ፡ ዐጸደ፡ ሀጕል፡ ለብእሲ፡ ዘሀሎ፨
- ሰላም፡ ለጕርዔኪ፡ ዘጥዑመ፡ ኮነ፡ በኀቤሁ፨
- እምነ፡ ኵሎ፡ ጣዕማት፡ ፍቅረ፡ ወራዙት፡ አዕርክቲሁ፨
- ለዕለተ፡ ፍዳኪ፡ እመ፡ ተጐናደየ፡ መዋዕሊሁ፨
- ኢይመስለኪ፡ ዘትድኅኒ፡ ወታመሥጢ፡ እምፍትሑ፨
- በመድረከ፡ ኆኅት፡ ቀዊሞ፡ ናሁ፨
- ሰላም፡ ለክሳድኪ፡ ዘመልዕልተ፡ መትከፍ፡ መንበሩ፨
- ወእደ፡ ወራዙት፡ መጾሩ፨
- ዘማዊት፡ ዓለም፡ ለሰይጣን፡ ዝሙት፡ ማኅደሩ፨
- ጻድቃንሰ፡ እለ፡ ጥበበ፡ መከሩ፨
- ከመ፡ ኢይርአዩኪ፡ ውስተ፡ ጸድፍ፡ ርእሶሙ፡ ወገሩ፨
- ሰላም፡ ለመታክፍትኪ፡ እለ፡ ገደፋሁ፡ በትዕቢት፨
- ለቀሊል፡ ጾር፡ ወለሠናይ፡ አርዑት፨
- ገፋዒት፡ ዓለም፡ በዓልተ፡ አባግዕ፡ እሞት፨
- እፎ፡ ሄድከኒ፡ ለዘአልብየ፡ እንበለ፡ አሐቲ፡ በግዕት፨
- ለምንትኑ፡ ላዕሌኪ፡ ኢይዘንም፡ እሳት፨
- ሰላም፡ ለዘባንኪ፡ ሞጣሕተ፡ ዘማ፡ ተዐጺፎ፨
- ለምግባረ፡ ዝሙት፡ ተሳተፎ፨
- እንተ፡ ኢተአምሪ፡ ዓለም፡ ጊዜ፡ ተራሕቆት፡ ወተሐቅፎ፨
- ላዕለ፡ ዮሴፍ፡ ንጹሐ፡ ነፍስ፡ ተሐበልኪ፡ እፎ፨
- እስከ፡ ጐየ፡ አልባስኪ፡ በእዴኪ፡ ገዲፎ፨
- ሰላም፡ ለእንግድዓኪ፡ እንተ፡ ወለጠ፡ ሕበሪሁ፨
- በኪነ፡ አብዳን፡ አንስት፡ እመልክአ፡ ፍጥረት፡ ዘቀዳሚሁ፨
- ኀዳጊተ፡ ፍቅር፡ ዓለም፡ ወወላጢተ፡ ዐርክ፡ ለለ፡ ጽባሑ፨
- እምነግህ፡ እስከ፡ ሠርክ፡ ከመ፡ ተጽሕፈ፡ ዜናሁ፨
- ይትዐለው፡ መንበርትኪ፡ ወይትፋለስ፡ ናሁ፨
- ሰላም፡ ለሕፅንኪ፡እንተ፡ ውስቴቱ፡ ረፈቁ፨
- ማኅበረ፡ ኃጥኣን፡ ሰብእ፡ እለ፡ በኃጢአት፡ ልህቁ፨
- ዐላዊተ፡ ክርስቶስ፡ ዓለም፡ ወመስተቃርንት፡ ምስለ፡ ደቂቁ፨
- ኀዲጎ፡ አልባስ፡ ዘሥሩዕ፡ ሶበ፡ ጸላዕኪ፡ በሕቁ፨
- አባ፡ በርሱማ፡ ነበረ፡ ዕራቁ፨
- ሰላም፡ ለአእዳውኪ፡ እለ፡ ኢስፉሐት፡ እማንቱ፨
- ከመ፡ ይምሐራ፡ ነዳየ፡ ወከመ፡ ይሠሀላ፡ ላዕለ፡ ንዴቱ፨
- ድንጻዊት፡ ዓለም፡ ወኢመሓሪት፡ ለዘአልቦቱ፨
- ለምንት፡ በከ፡ ትተግሂ፡ ወትጻምዊ፡ በከንቱ፨
- እንዘ፡ ይወርሶ፡ ካልእ፡ ለብዕልኪ፡ ዝንቱ፨
- ሰላም፡ እብል፡ ለመዛርዕኪ፡ መንታ፨
- እለ፡ ይትዐገላ፡ ዘልፈ፡ ንዋየ፡ ምስኪን፡ ወእጓለ፡ ማውታ፨
- ከማኪ፡ ዓለም፡ እስመ፡ ይትዐጹ፡ አንቀጸ፡ ቤታ፨
- ዘተወከፈት፡ አንጋደ፡ በመዋዕለ፡ ኵሉ፡ ሕይወታ፨
- ብፅዕት፡ ይእቲ፡ መሓሪት፡ ማርታ፨
- ሰላም፡ ለኵርናዕኪ፡ በቅሩባኒሁ፡ ዘተኀየለ፨
- ለነኪራንኪሰ፡ መዊኦቶሙ፡ ኢተሐበለ፨
- ጸላዒተ፡ ነዳይ፡ ዓለም፡ ዘታፈቅሪ፡ ባዕለ፨
- ኀጣእኩ፡ በእንቲአኪ፡ ወኢረከብኩ፡ አምሳለ፨
- እንበለ፡ ሰይጣን፡ ወሞት፡ ዘነሥኡኪ፡ ክፍለ፨
- ሰላም፡ ለእመትኪ፡ መስፈርተ፡ ዐመፃ፡ ወአድልዎ፨
- ዘአረፋቲሃ፡ ሰፈረ፡ ለማኅፈደ፡ ፍትወት፡ ወዘምዎ፨
- ግሕሥተ፡ ህላዌ፡ ዓለም፡ እምፍኖተ፡ ፍቅር፡ ወተአኅዎ፨
- ሌሊተ፡ ወፅአ፡ ገሪማ፡ ምግባራተኪ፡ ለቢዎ፨
- ወአንቀጸ፡ ቤቱ፡ ክብርት፡ ኀደገ፡ አርኂዎ፨
- ሰላም፡ ለእራሓትኪ፡ እንተ፡ ዲቤሁ፡ ተለክአ፨
- ኃጢአት፡ ለሞት፡ ቀኖቱ፡ እምቀኖተ፡ ኀጺን፡ ዘጸንዐ፨
- እፎ፡ ዓለም፡ ኢተሐውሪ፡ ርቱዐ፨
- እምፈሪሳውያን፡ ኅብስተ፡ ትትዐቀቢ፡ ወእምሰዱቃውያን፡ ብሑአ፨
- አኮኑ፡ መምህረ፡ ሕግ፡ ላዕሌኪ፡ ሠርዐ፨
- ሰላም፡ ለአጻብዕኪ፡ እለ፡ ጠፊሐ፡ ለመዳ፨
- በሕገ፡ ሰፋኒት፡ ብእሲት፡ ወለተ፡ እኅትኪ፡ ሄሮድያዳ፨
- ቀታሊተ፡ ፍቅር፡ ዓለም፡ ወተመያኒት፡ እመ፡ ይሁዳ፨
- እፎ፡ ይከውን፡ ፍርሀትኪ፡ አመ፡ ዕለተ፡ ግሩም፡ ፍዳ፨
- ሶበ፡ መኳንንት፡ ላዕሌኪ፡ ይፈትሑ፡ ዕዳ፨
- ሰላም፡ ለአጽፋረ፡ እዴኪ፡ እለ፡ ወለጣሁ፡ ለሥራይ፨
- [ኀበ፡ ኀላፊ፡ ንዋይ፨]
- ዘመደ፡ አብዕልት፡ ዓለም፡ ወኢሕዝብኪ፡ ነዳይ፨
- እስመ፡ አንቲ፡ ተመሰልኪዮ፡ ለመምህርኪ፡ ዕቡይ፨
- ከመ፡ አውደቂዮ፡ አውደቁኪ፡ እምሣልስ፡ ሰማይ፨
- ሰላም፡ ለአጥባዕትኪ፡ እለ፡ ሐፀናሁ፡ እምናእስ፨
- ለግዙፍ፡ ሕሊና፡ ወለዕቡይ፡ መንፈስ፨
- ኦዓለም፡ ሐመረ፡ኃጢአት፡ ወርኵስ፨
- መኑ፡ ይጌሥጽ፡ እምቅድሜየ፡ መዋግደ፡ ባሕርኪ፡ ባእስ፨
- ወያበጽሕ፡ ኀበ፡ ዛሕን፡ ወመርስ፨
- ሰላም፡ ለገቦኪ፡ ነጺፈ፡ ዘርቤታት፡ ዘአደሞ፨
- እንተ፡ ላዕሌሁ፡ ነስነሱ፡ መጽርየ፡ ወቀናንሞ፨
- አመ፡ አቤሜሌክ፡ ጸለየ፡ በጥብዐተ፡ ልብ፡ አስተሐሚሞ፨
- ተዋልጦትኪ፡ ዓለም፡ እስመ፡ ፈድፈደ፡ ገሪሞ፨
- መዋዕለ፡ መቅሠፍትኪ፡ ዘአሜሃ፡ አኅላፈ፡ ነዊሞ፨
- ሰላም፡ ለከርሥኪ፡ እንተ፡ ህላዌሁ፡ አርኀበ፨
- ለድዉየ፡ ሕሊና፡ ከመ፡ ይኩኖ፡ ምስካበ፨
- ምግባረ፡ አብዕልትኒ፡ ይመስለኒ፡ ዕፁበ፨
- እፎ፡ ይዘግብ፡ አሐዱ፡ ወኢይትራዳእ፡ ምንዱበ፨
- እንዘ፡ አሐዱ፡ ይመውት፡ ኀዲጎ፡ መዝገበ፨
- ሰላም፡ ለልብኪ፡ ዘኢይሄሉ፡ በሰማይ፨
- እስመ፡ ህላዌሁ፡ ረሰየ፡ ኀበ፡ ሀሎ፡ ንዋይ፨
- በእንተ፡ ምግባርኪ፡ ዓለም፡ ማኅበረ፡ ኵሉ፡ እከይ፨
- እግዚአብሔር፡ አጥፍኦ፡ ቀዳሜ፡ ፍጥረቱ፡ በማይ፨
- ወአውዐዩ፡ መላእክት፡ በእሳት፡ ወተይ፨
- ሰላም፡ ለኵልያትኪ፡ ጊዜ፡ ፈተኖን፡ ፈጣሪ፨
- እንተ፡ ውስቴቶን፡ ረከበ፡ ምግባረ፡ መሠርይ፡ ወተጠያሪ፨
- ዓለመ፡ ሥጋ፡ ዘይእዜ፡ ወአኮ፡ ዘደኀሪ፨
- ተግሕሡ፡ በእንተ፡ ዝንቱ፡ እምፍኖትኪ፡ መሥገሪ፨
- አባ፡ እንጦኒ፡ ወአባ፡ መቃሪ፨
- ሰላም፡ ለሕሊናኪ፡ ዘኢይሔሊ፡ አሠንዮ፨
- እስመ፡ ልማድኪ፡ ዓለም፡ ምግባረ፡ ትምይንት፡ ወአእከዮ፨
- እግዚአብሔር፡ ታሕተ፡ አርዑትኪ፡ ሶበ፡ ርእዮ፨
- እንዘ፡ ይወድቅ፡ እመንበሩ፡ በሃፈ፡ ገጹ፡ ሴስዮ፨
- ወመስተገብረ፡ ብእሴ፡ ለንጉሥ፡ ረሰዮ፨
- ሰላም፡ ለአማዑትኪ፡ እሳተ፡ ቅንአት፡ ዘይበልዖ፨
- መናኔ፡ መፍቅዳት፡ ብእሲ፡ ለጣዕመ፡ ተድላኪ፡ ሶበ፡ ይጸልኦ፨
- ለሕሊና፡ ዚአየኒ፡ ሶበ፡ አፍቅሮትኪ፡ አስተናሥኦ፨
- ጰራቅሊጦስ፡ ዜና፡ መንፈሰ፡ ጽድቅ፡ ዜና፡ ስምኪ፡ ያርስዖ፨
- ከመ፡ ባህለ፡ ቅዱስ፡ አርሳኒ፡ ዘልቡ፡ ኢሞኦ፨
- ሰላም፡ ለንዋየ፡ ውስጥኪ፡ እንተ፡ እምኔሁ፡ ሠረጻ፨
- ትዕቢት፡ ወቅንአት፡ ወሐሰት፡ ርእሰ፡ ዐመፃ፨
- ታስተድኅረኒ፡ ዓለም፡ ለነፍስ፡ እምርዋጻ፨
- ለዓለምየ፡ ደኃሪት፡ ዘነሣእክዋ፡ በዕፃ፨
- ዐጻዌ፡ ኀዋኅው፡ ቅድሜየ፡ ኢይዕጹ፡ አንቀጻ፨
- ሰላም፡ ለሕንብርትኪ፡ እስከ፡ በውዳሴ፡ ዘከሮ፨
- በዓለ፡ ማሕሌት፡ ሰሎሞን፡ ፍቅረ፡ ወለተ፡ ፈርዖን፡ ዘአገበሮ፨
- ኦዓለም፡ ምልእተ፡ እበድ፡ በኢያእምሮ፨
- ካልእሰ፡ ኢተዜነውኩ፡ ነገሮ፨
- አምሳለ፡ ካልኣት፡ መለያልይ፡ ከመ፡ እዝክር፡ ነውሮ፨
- ሰላም፡ ለማሕፀንኪ፡ እንተ፡ እምኔሁ፡ ተነክሩ፨
- ኃጥኣን፡ ዕደው፡ እለ፡ ኤሳው፡ ወማኅበሩ፨
- ለተድላ፡ መንበርትኪ፡ ዓለም፡ እንተ፡ ተመውኡ፡ በጣዕመ፡ ፍቅሩ፨
- ተብህለ፡ ቅድመ፡ እግሮሙ፡ አሕባለ፡ መሥገርት፡ ሠተሩ።
- ወበፍኖቶሙ፡ የማናዊ፡ ዕቅፍተ፡ አንበሩ፨
- ሰላም፡ ለሐቌኪ፡ ዘኢደግደገ፡ በጾም፨
- ከመ፡ ሐቌ፡ ጻድቅ፡ ዮሐንስ፡ እንተ፡ ቅናቱ፡ አዲም፨
- አምሳለ፡ ኅልፈቱ፡ ለዕለት፡ ወተፋልሶቱ፡ ለሕልም፨
- እምባቢሎን፡ እስከነ፡ ፋርስ፡ ዘተፋለስኪ፡ ዓለም፨
- ወእምህየኒ፡ ኀለፍኪ፡ ኀበ፡ ጽርዕ፡ ወሮም፨
- ሰላም፡ ለአቍያጽኪ፡ ዘተመስሉ፡ በሐጺን፨
- አመ፡ አስተርአዩ፡ በሕልም፡ ሥዕለ፡ አርባዕቱ፡ ሥልጣን፨
- ኦዓለም፡ መሀደምተ፡ ላህይ፡ ወሥን፨
- ነሢኦ፡ ኪያኪ፡ በእዴሁ፡ ከመ፡ ሐጸ፡ እሳት፡ ርሱን፨
- ቀስቶ፡ ይዌስቅ፡ ወይነድፍ፡ ሰይጣን፨
- ሰላም፡ ለአብራክኪ፡ ዘኢተለዋ፡ ትምህርቶ፨
- ለመምህረ፡ ሕግ፡ ክርስቶስ፡ እምህላዌ፡ አርድእት፡ በተአትቶ፨
- ላዕለ፡ መዝራዕትኪ፡ ዓለም፡ ዘያሰምከ፡ መዝራዕቶ፨
- በመልዕልተ፡ ኆፃ፡ ከመ፡ ዘሐነጸ፡ ቤቶ፨
- በከ፡ ይተግህ፡ ወይጻሙ፡ ከንቶ፨
- ሰላም፡ ለአእጋርኪ፡ ዘየዐውዳ፡ መራሕብተ፨
- ወበቤትኒ፡ ኢየዐርፉ፡ ንስቲተ፨
- ሶበኒ፡ ፀርኪ፡ ወሬዛ፡ እንዘ፡ የኀልፉ፡ ፍኖተ፨
- ነዓ፡ ናንገርግር፡ ትቤልዮ፡ ወናስተሐውዝ፡ ስዕመተ፨
- መሥዋዕተ፡ ሰላምየ፡ ለዓለም፡ ወእኁየ፡ አንተ፨
- ሰላም፡ ለሰኮናኪ፡ እለ፡ ልማዶን፡ ረዊጽ፨
- ውስተ፡ ፍና፡ ስሕተት፡ ወዳኅፅ፨
- እኪተ፡ ውሳጤ፡ ዓለም፡ ወሠናይተ፡ አፍአ፡ በገጽ፨
- ሶበ፡ ኢሀሎ፡ መንግሥትኪ፡ ወሥልጣንኪ፡ ሕፁፅ፨
- ፈታዌ፡ ክህነት፡ ኮነ፡ ዖዝያን፡ ዘለምጽ፨
- ሰላም፡ ለመከየድኪ፡ እንተ፡ ልምላሜሁ፡ ሐዋዝ፨
- እምቅኔ፡ ሥጋ፡ ወነፍስ፡ እስመ፡ ውእቱ፡ ግዑዝ፨
- በዓልተ፡ ክሂል፡ ዓለም፡ ዘባሕርይኪ፡ ዐዚዝ፨
- እስመ፡ ኮንኪ፡ ከመ፡ ሰይጠን፡ መሠረተ፡ ሀከክ፡ ወጋእዝ፨
- እፎ፡ ነሣእኪ፡ ፍጥረተ፡ ዘሕምዝ፨
- ሰላም፡ ለአፃብዐ፡ እግርኪ፡ እለ፡ ይሰረገዋ፡ ወትረ፨
- አክሊለ፡ ባሕርይ፡ ጸዐዳ፡ እንተ፡ ኢኮነ፡ ነኪረ፨
- ባሕርየ፡ ፍጥረትኪ፡ ዓለም፡ እንዘ፡ ያኤምር፡ ፈጢረ፨
- ሎቱ፡ ረሰየ፡ ፈጣሪ፡ ሰማየ፡ ሰማያት፡ መንበረ፨
- ወእንተ፡ ውስቴታ፡ አስዋክ፡ ወሀበኪ፡ ምድረ፨
- ሰላም፡ ለአጽፋረ፡ እግርኪ፡ መልዕልተ፡ ዐሠርቱ፡ መራናት፨
- እለ፡ ይጸድላ፡ ዘልፈ፡ ከመ፡ ማኅቶት፨
- እኅተ፡ ሐሊባ፡ ዓለም፡ ዘልማድኪ፡ ዝሙት፨
- ለወለትኪ፡ ኢሥህልት፡ ዘትእምርተ፡ ስማ፡ መቅሠፍት፨
- መኑ፡ እምአድኀነኒ፡ ለብእሲ፡ ስሑት፨
- ሰላም፡ ለቆምኪ፡ እንተ፡ አርትዐ፡ አካሎ፨
- አካለ፡ ውሳጤኪሰ፡ ለጠዋይ፡ ይመስሎ፨
- መፍቀሪተ፡ ዝሙት፡ ዓለም፡ ጸላኢተ፡ ንጽሕ፡ ወተድንግሎ፨
- ሠናየ፡ መከሩ፡ ለበድሮሙ፡ ኢይቁሙኪ፡ ማእከሎ፨
- አእሩገ፡ ምኔት፡ ጠቢባን፡ ዘስማ፡ ሃሌሎ፨
- ሰላም፡ ለመልክእኪ፡ እለ፡ ዘከርነ፡ በምንታዌ፨
- ዘውሳጤሁ፡ ምግባረ፡ ወዘአፍአሁ፡ ግጻዌ፨
- መሥገርተ፡ አብዳን፡ ዓለም፡ በተድላ፡ መብልዕ፡ ወስርጋዌ፨
- ጠቢባንሰ፡ የኀሥሡ፡ እማኅበርኪ፡ ፅማዌ፨
- ወእምጥዒናኪ፡ ማእምራን፡ ያፈቅሩ፡ ደዌ፨
- ሰላም፡ ለፀአተ፡ ነፍስኪ፡ አመ፡ ምጽአቱ፡ ለእግዚእነ፨
- እምድኅረ፡ አብጻሕኪ፡ ዓለም፡ ዘአካለ፡ ርስዓን፡ መጠነ፨
- እስመ፡ አሜሃ፡ ትሰፍን፡ መንግሥተ፡ ሰማያት፡ ተስፋነ፨
- ወኢይክሉ፡ አድኅኖተኪ፡ እለ፡ ተብህሉ፡ ጻድቃነ፨
- ሱቱፋነ፡ ክብርኪ፡ ወብዕልኪ፡ ዘይማስን፡ ፍጡነ፨
- ሰላም፡ ለበድነ፡ ሥጋኪ፡ አምሳለ፡ ካልእት፡ አብድንት፨
- ዘኢይረክቦ፡ ትንሣኤ፡ አመ፡ ተነፍሑ፡ አቅርንት፨
- እኪተ፡ ርስዓን፡ ዓለም፡ ዘኀለፈኪ፡ ውርዙት፨
- እንዘ፡ አንቲ፡ እቤራይት፡ በዓልተ፡ ሰብአ፡ ክረምት፨
- ምስለ፡ ወራዙት፡ ማኅበረ፡ አጽናዕኪ፡ ለምንት፨
- ሰላም፡ ለግንዘተ፡ ሥጋኪ፡ ዘኢይዌስኩ፡ ባቲ፨
- እንበለ፡ ሰበን፡ አሐቲ፨
- መዋቲት፡ ዓለም፡ ወኀዳጊተ፡ ብዕል፡ ለመዋቲ፨
- እንዘ፡ ነአምር፡ ሙስናኪ፡ ወኅልፈተ፡ ብዕልኪ፡ ዛቲ፨
- እፎ፡ የኀይጠነ፡ ፍቅርኪ፡ መስሐቲ፨
- ሰላም፡ ለመቃብርኪ፡ ውስተ፡ ውሳጤ፡ ልብ፡ ቂቁይ፨
- ዘኢይከሥቶ፡ ርኅራኄ፡ እስመ፡ ማኅተሙ፡ እከይ፨
- አስከሬነ፡ ወርቅ፡ ዓለም፡ ወመዝገበ፡ ብሩር፡ ጽሩይ፨
- እስከ፡ ማእዜኑ፡ ተዐጽዊ፡ አንቀጸ፡ ኀላፊ፡ ንዋይ፨
- እንዘ፡ በአፍአኪ፡ ዘልፈ፡ ይግዕር፡ ነዳይ፨
- ሰላም፡ ለፍልሰተ፡ ሥጋኪ፡ እምዝንቱ፡ ውስተ፡ ዝንቱ፨
- ለዘያፈቅረኪ፡ ብእሲ፡ እንበለ፡ ትፈጽሚ፡ ዓቅመ፡ ፍትወቱ፨
- እስክንድርኒ፡ ንጉሠ፡ አናስር፡ አርባዕቱ፨
- እንዘ፡ የኀሥሥ፡ መፍቅዳተ፡ ከመ፡ ዘምኔት፡ አልቦቱ፨
- ወእንበለ፡ ይጸግብ፡ እምኔኪ፡ ፈለሰት፡ ሕይወቱ፨
- [ዓለም፡] ፍቅርትየ፡ በአምኃ፡ ጕሕሉት፡ አማኅኩኪ፨
- አምሳለ፡ ይሁዳ፡ ረድእኪ፨
- ወቃለ፡ ዘለፋ፡ ቶሳሕኩ፡ በውስቴቱ፡ እንዘ፡ እጌሥጽ፡ ኪያኪ፨
- እመ፡ ኢነሳ|ሕኪሰ፡ ወታጸንዒ፡ ልበኪ፨
- መቅሠፍተ፡ ወኵነኔ፡ ትዘግቢ፡ ለኪ፨

Bibliography Z

Dickinson, Augustine, and Michael Hensley. “Malkəʾa ʿālam (‘Image of the World’): An Ethiopic Hymn in Praise of Monasticism.” Aethiopica 28 (2025): 93–133.

ገብረ ሥላሴ. መልክዐ ጉባኤ ከ380 በላይ የተለያዩ መልክዐ መልኮችንና ምስጋናዎችን አጠቃሎ የያዘ በግዕዝ እና በአማርኛ. 2 vols. አዲስ አበባ, ፳፻፲፮ ዓ/ም.