Subjects
Angelic
ፋኑኤል፡
Fānuʾel
Phanuel
Phanuel
Malkəʾ
-
- በመለኮተ፡ አብ፡ ወወልድ፡ ወመንፈስ፡ ቅዱስ፡ አፈ፡ ዚአየ፡ ወጠነ፨
- ማሕሌተ፡ ፋኑኤል፡ መልአክ፡ ወዘመልክኡ፡ ድርሳነ፨
- እመሰ፡ ላዕላዐ፡ ልሳንየ፡ ኮነ፨
- ፋኑኤል፡ ነዓ፡ ትርድአኒ፡ ወታንብበኒ፡ ፍጡነ፨
- እንዘ፡ ለስምከ፡ እእኅዝ፡ ወእዌጥን፡ አነ፨
-
- ሰላም፡ ለሢመትከ፡ እምእግዚአብሔር፡ ንጉሥ፨
- አመ፡ ሠሉሱ፡ ለወርኀ፡ ታኅሣሥ፨
- ሊቀ፡ መላእክት፡ ፋኑኤል፡ ለባሴ፡ ቁስ፡ መንፈስ፨
- አንቅሀኒ፡ እምሐሌትየ፡ ለስብሐቲከ፡ ሐዲስ፨
- ወተራድአኒ፡ በሥጋ፡ ወነፍስ፨
-
- ሰላም፡ ለዝክረ፡ ስምከ፡ ዘመንክር፡ ጣዕሙ፨
- ወሐዋዝ፡ ዓዲ፡ ለአዳም፡ እምዝክረ፡ ስሙ፨
- ፋኑኤል፡ ትኩን፡ መተንብለ፡ ሰብእ፡ ኵሎሙ፨
- ኪያከ፡ እመላእክት፡ እለ፡ ምስሌከ፡ ተሕትሙ፨
- ሥላሴ፡ አጋዕዝቲከ፡ ኀረዩ፡ ወሤሙ፨
-
- ሰላም፡ ለሥዕርተ፡ ርእስከ፡ ወለርእስከ፡ ሥርገወ፡ ብርሃን፨
- ወለገጽከ፡ መብረቅ፡ ዘያንጸበርቅ፡ ለዐይን፨
- ሊቀ፡ ካህናት፡ ፋኑኤል፡ ምዑዘ፡ ረድኤት፡ ዕጣን፨
- ሰይፈከ፡ ምላኅ፡ እግዚኦ፡ ዲበ፡ ፀርየ፡ ሰይጣን፨
- ወይክድኖ፡ ለገጽየ፡ ዘገጽ፡ ሥን፨
-
- ሰላም፡ እብል፡ እንተ፡ አካልከ፡ ቆመ፨
- ወለመልክእከ፡ ኣቀርብ፡ አምኃ፡ ወሰላመ፨
- ፋኑኤል፡ ዝክርከ፡ እምቀናንሞስ፡ ዘጥዕመ፨
- አልክፈኒ፡ በጕጠትከ፡ ሥጋ፡ መለኮት፡ ፍሕመ፨
- ከመ፡ እምላዕሌየ፡ ያሰስል፡ ሕማመ፨
-
- ምንተ፡ እዌድስ፡ ኪያከ፡ ውዱሰ፨
- ወምንተ፡ እቄድስ፡ ኪያከ፡ ቅዱሰ፨
- እስመ፡ ረሰይኩከ፡ አበ፡ ወረሰይኩከ፡ መንፈሰ፨
- ፋኑኤል፡ ሀበኒ፡ እሞገስከ፡ ሞገሰ፨
- እንበለ፡ ምግባር፡ ወገድል፡ ዘያጸድቅ፡ ነፍሰ፨
-
- አዕርክተ፡ ንጉሥ፡ ምድራዊ፡ ኀበ፡ ንጉሦሙ፡ ይተነብሉ፨
- ሢመተ፡ ወክብረ፡ ለፍቁራኒሆሙ፡ ዘይደሉ፨
- ፋኑኤል፡ ሰአል፡ እምእግዚአ፡ ኵሉ፨
- አመ፡ ምንዳቤየ፡ ይናዝዘኒ፡ በቃሉ፨
- ወአመ፡ ሞትየ፡ ይርከበኒ፡ ሣህሉ፨