Details
-
- ሰላም፡ ለፅንሰትከ፡ ውስተ፡ ከርሠ፡ ቅድስት፡ መርኬዛ፨
- ወለልደትከ፡ ሰላም፡ ምስለ፡ መዓዛ፨
- ያዕቆብ፡ ማማስ፡ ምሉዓ፡ ጥበብ፡ ወሬዛ፨
- ለዓለም፡ ዓውደ፡ ትካዝ፡ ከመ፡ ኢይርከብከ፡ ትካዛ፨
- ስዋስወ፡ ኃሤት፡ ነጸርከ፡ በፃን፡ ሎዛ፨
-
- ሰላም፡ ለዝክረ፡ ስምከ፡ ምክሕ፡ ሕዘበ፡ ነቢይ፡ ሙሴ፨
- አምጣነ፡ ይናዝዝ፡ ነግደ፡ ወያስተፌሥሕ፡ ፈላሴ፨
- ተመሳሌ፡ መልአክ፡ ማማስ፡ እንዘ፡ ትከውን፡ ብእሴ፨
- ከመ፡ በሥላሴ፡ ተዋሕዶ፡ ወበተዋሕዶ፡ ሥላሴ፨
- አልብወነ፡ ዘለከ፡ ቅዳሴ፨
-
- ሰላም፡ ለመቃብሪከ፡ እስመ፡ አውፅአ፡ ማየ፡ ጸዓዳ፨
- ዘይምዕዝ፡ እምጽጌ፡ ረዳ፨
- ማማስ፡ ወርቅ፡ ምክሐ፡ ልበ፡ ዕቤር፡ ጐድጐዳ፨
- ጸሊ፡ ለውሉድከ፡ አመ፡ ዕለተ፡ ደይን፡ ወፍዳ፨
- ለዐጸድከ፡ ይረሱ፡ ዐጸዳ፨
- ተረፈ፡ መልክእ፡
-
- ሰብአ፡ ሰሰዌ፡ ሀገር፡ እለ፡ አብዝኁ፡ ሥላቀ፨
- ዘኢይደሉ፡ ነገረ፡ ሶበ፡ ተናገሩከ፡ ጥቀ፨
- አምላክከ፡ ማማስ፡ እስመ፡ አሥመርኮ፡ ጻድቀ፨
- ውስተ፡ ገራህቶሙ፡ ፈነወ፡ መብረቀ፨
- ወእደ፡ ሙስና፡ መፍርህ፡ ዲቤሆሙ፡ ወድቀ፨
-
- ሰላም፡ ለተኣምሪከ፡ ዘይፌውስ፡ ሕሙማነ፨
- ወያስተፌሥሕ፡ መካነ፨
- ተስፋ፡ ምእመናን፡ ማማስ፡ አምጣነ፡ ኮንከ፡ ምእመነ፨
- አርአይከ፡ ጊዜ፡ ጸሎት፡ መደንግፀ፡ ግርማ፡ ብርሃነ፨
- ወአጽፈ፡ ብርሃን፡ ሥርጋዌከ፡ ኮነ፨
-
- ሰላም፡ ለከ፡ ማማስ፡ ኀያል፨
- ሰላም፡ ለከ፡ ማማስ፡ ትርጓሜ፡ ናዝራዊ፡ ወንጌል፨
- ሰላም፡ ለከ፡ ማማስ፡ ምዑዘ፡ ምግባር፡ ኮል፨
- ጸሊ፡ ለውሉድከ፡ ኀበ፡ ማርያም፡ ድንግል፨
- ወኀበ፡ ወልዳ፡ ክርስቶስ፡ ዘቆመ፡ በመስቀል፨