መልክአ፡ ሕፃናት፡ ቅዱሳን፡
Malkəʾa Ḥəḍānāt Qəddusān
Image of the Holy Innocents
-
- እንዘ፡ እሴፎ፡ ረድኤተክሙ፡ በጊዜ፡ ምንዳቤ፡ ወተፅናስ፨
- ከመ፡ ይርድአኒ፡ ሊተ፡ በአፀደ፡ ሥጋ፡ ወነፍስ፨
- ሕፃናት፡ ኄራን፡ ወንጹሓን፡ እምርኵስ፨
- ናሁ፡ ወጠንኩ፡ ሰላመክሙ፡ በብርሃነ፡ ጥበብ፡ ቅዱስ፨
- ጽልመተ፡ ኅሊናየ፡ ያብርህ፡ ኢየሱስ፡ ክርስቶስ፨
-
- ሰላም፡ ለዝክረ፡ ስምክሙ፡ በሰላመ፡ አምላክ፡ እብኖዲ፨
- ወሰላም፡ ካዕበ፡ ለሥዕርተ፡ ርእስክሙ፡ ዓዲ፨
- ሕፃናት፡ ኄራን፡ አዝማደ፡ ዮሐንስ፡ ቃለ፡ ዐዋዲ፨
- እፎ፡ ተክዕወ፡ ደምክሙ፡ በትእዛዘ፡ ሄሮድስ፡ ከሓዲ፨
- ማሕተመ፡ ሞት፡ ዘነሥአ፡ እምሰይጣን፡ ረዋዲ፨
-
- ሰላም፡ ለመቃብሪክሙ፡ ውስተ፡ ከርሠ፡ ምድር፡ ወአራዊት፨
- አመ፡ ቀተሉክሙ፡ ሐራ፡ በልሳነ፡ በሊኅ፡ መጥባሕት፨
- ሕፃናት፡ ቅዱሳን፡ ከመ፡ መላእክት፨
- ናሁ፡ ጼነወ፡ ጼናክሙ፡ እመዐዛ፡ ምዑዝ፡ ዕፍረት፨
- ስእመ፡ ንጹሓን፡ አንትሙ፡ እምኵሉ፡ ፍጥረት፨
-
- ሕፃናት፡ ንኡሳን፡ እንዘ፡ ይከልኡ፡ እምአፉክሙ፨
- አጥባተ፡ እምክሙ፨
- እስከ፡ ትረዊ፡ ምድር፡ እምውሒዘ፡ ቅዱስ፡ ደምክሙ፨
- እፎ፡ እፎ፡ ሠራዊተ፡ ሄሮድስ፡ ቀተሉክሙ፨
- ወእፎ፡ ግብረ፡ ርኅራኄ፡ አጥፍአ፡ ልቦሙ፨
-
- ኦሕፃናት፡ በኍልቈ፡ ዓመታት፡ ክልኤ፨
- ዘፈጸምክሙ፡ ስምዐ፡ ቅድመ፡ ገጸ፡ ኵሉ፡ ጉባኤ፨
- በእንተ፡ ኢየሱስ፡ ክርስቶስ፡ ዘተሰምየ፡ በኵረ፡ ትንሣኤ፨
- ስመ፡ ዚአክሙ፡ ሶበ፡ እጼውዐክሙ፡ በጽዋዔ፨
- እምላዕለ፡ ነፍስየ፡ አእትቱ፡ ግፍታዔ፨
-
- ናሁ፡ አብጻሕኩ፡ ሰላመክሙ፡ በኍልቈ፡ ውሳኔ፡ ሠላሳ፨
- ዘውእቱ፡ መንፈቀ፡ ስሳ፨
- ሕፃናት፡ ኄራን፡ ኅሩማነ፡ በቀል፡ ወአበሳ፨
- ቅድመ፡ አምላክ፡ ኰናኒ፡ አመ፡ ይከውን፡ ኀሠሣ፨
- አክሊለ፡ ጽድቅ፡ ለነፍስየ፡ አንብሩ፡ በርእሳ፨