Details
-
- በስመ፡ አብ፡ ወወልድ፡ ወመንፈስ፡ ቅዱስ፡ አምላክ፨
- እንዘ፡ ኣአምን፡ ወአመልክ፡ እንበለ፡ ትአውሳክ፨
- እክሕደከ፡ ሰይጣን፡ አርዌ፡ ተመንግኖ፡ ድሩክ፨
- በቅድመ፡ ዛቲ፡ ቤተ፡ ክርስቲያን፡ መንፈሳዊት፡ ምስማክ፨
- እንተ፡ ይእቲ፡ ማርያም፡ ዳግሚት፡ ፈለክ፨
-
- ኣአምን፡ በአብ፡ እምወልዱ፡ ዘኢቀደመ፡ ዘመነ፨
- ወኣአምን፡ በወልድ፡ ምስለ፡ ወላዲሁ፡ ዘየኀብር፡ ሥልጣነ፨
- ወኣአምን፡ በመንፈስ፡ ቅዱስ፡ እንተ፡ ዘአልቦቱ፡ ፍልጣነ፨
- እንዘ፡ ኣአምን፡ ከመዝ፡ አሐደ፡ ከዊነ፨
- ወእምዝ፡ እወጥን፡ ድርሳነ፨
-
- ሰላም፡ ለህላዌክሙ፡ ዘኢይትበሀል፡ ዘመኑ፨
- እምዝየ፡ ምውጣኑ፡ ወእስከ፡ ዝየ፡ ወሰኑ፨
- ህላዌክሙ፡ ሥላሴ፡ እምዘተፈጥሩ፡ ወኮኑ፨
- እምሰብእ፡ ወመላእክት፡ ዘየአምር፡ መኑ፨
- እስመ፡ ክዋኔሁ፡ ምሥጢር፡ ወኅቡእ፡ ሥልጣኑ፨
-
- ሰላም፡ ለዝክረ፡ ስምክሙ፡ መሠረተ፡ ኵሉ፡ ዓለም፨
- ወስመ፡ መሀላሁ፡ ግሩም፨
- ሥሉስ፡ ቅዱስ፡ ኀይላተ፡ አርያም፨
- ይኩነኒ፡ ዝክረ፡ ስምክሙ፡ አርአያ፡ ሐጹር፡ ወጥቅም፨
- ብአድኅር፡ ወበፍጽም፡ በይምን፡ ወበፅግም፨
-
- ሰላም፡ ለሥዕርተ፡ ርእስክሙ፡ አምሳለ፡ በረድ፡ ወፀምር፨
- ጸዐድዒደ፡ ራእይ፡ ወሕብር፨
- ሥሉስ፡ ቅዱስ፡ ሥሉጣነ፡ ሰማያት፡ ወምድር፨
- ጊዜ፡ ኣቄርብ፡ ውዳሴ፡ ለንግሥክሙ፡ ክቡር፨
- በሉኒ፡ አደመነ፡ ቃልከ፡ ፍቁር፨
-
- ሰላም፡ ለመልክእክሙ፡ ዘኢይትከሀል፡ ለተርጕሞ፨
- እመልክአ፡ መልአክ፡ ወሰብእ፡ በበ፡ ግጻዌሁ፡ ዘሤሞ፨
- ሥሉስ፡ ቅዱስ፡ ህልዋን፡ በተሳልሞ፨
- ለመልክእክሙ፡ ለለ፡ ጊዜ፡ እጼውዕ፡ ስሞ፨
- ውስተ፡ መልክእየ፡ አንብሩ፡ ማሕተሞ፨
-
- በአብ፡ ወወልድ፡ ወመንፈስ፡ ቅዱስ፡ ተማሕፀንኩ፨
- በስመ፡ ሥላሴ፡ አምለኩ፨
- እምከርሠ፡ እምየ፡ በኀይለ፡ ሥላሴ፡ ጸናዕኩ፨
- እመኒ፡ ሞትኩ፡ ወሐየውኩ፡ በምክረ፡ ሥላሴ፡ አስመኩ፨
- በእደ፡ ሥላሴ፡ ነፍስየ፡ ወሥጋየ፡ ገደፍኩ፨
-
- አብ፡ በአካሉ፡ ወልድ፡ በአካሉ፨
- ወመንፈስ፡ ቅዱስ፡ በአካሉ፨
- በሰማይ፡ ወበምድር፡ ህልዋን፡ በውስተ፡ ኵሉ፨
- በአፍአ፡ ወበውሥጥ፡ አመልክ፡ ለኵሉ፨
- አኰቴት፡ ወክብር፡ ለሥሉስ፡ ይደሉ፨
- ተረፈ፡ መልክእ፡
-
- ስብሐት፡ ለክሙ፡ ሥሉስ፡ ቅዱስ፡ ዘበአሐቲ፡ ሥምረት፨
- ብክሙ፡ ቆመ፡ ሥነ፡ ፍጥረታት፨
- በምድር፡ ወበሰማያት፨
-
- ስብሐት፡ ለክሙ፡ ሥሉስ፡ ቅዱስ፡ ዘበአሐቲ፡ ምልክና፨
- ባሕረ፡ ኤርትራ፡ ተከፍለት፡ ከመ፡ ትኩን፡ ፍና፨
- እስከ፡ ቃዴስ፡ ለሕዝበ፡ ሲና፨
-
- ስብሐት፡ ለክሙ፡ ሥሉስ፡ ቅዱስ፡ ዘትወልዱ፡ ሕይወተ፨
- ኵሎ፡ አዝማነ፡ ወዕለታተ፨
- ረድኤተክሙ፡ ትፈንዉ፡ ሊተ፨
- ቅድሜክሙ፡ እጼሊ፡ ጸሎተ፨