Subjects
Righteous
እድና፡
ʾƎdnā
ʾƎdnā
ʾƎdnā
Malkəʾ
-
- ለወሀቤ፡ ሀብታት፡ እግዚአብሔር፡ ዘሠናይ፡ ሀብቱ፡
- ወለወላዲቱ፡ ድንግል፡ ወሀቢተ፡ ጸጋ፡ በከንቱ፨
- አስተብቍዒዮሙ፡ እድና፡ ወአልዕሊዮሙ፡ በእንተ፡ ዝንቱ፨
- የሀቡኒ፡ ሀብተ፡ ክሂል፡ ዘግብረ፡ ተሥእኖ፡ አልቦቱ፨
- መሐልየ፡ መልክዕ፡ ለኪ፡ ከመ፡ እኅሊ፡ ቦቱ፨
-
- እምብእሲተ፡ ሄኖክ፡ እድና፡ ወእምሄውቱ፡ ለለሜሕ፡
- ወእሙ፡ ለማቱሳላ፡ ዘመዋዕሊሁ፡ ብዙኅ፨
- ትከብሪ፡ እድና፡ ወዐብዪ፡ በንጽሕ፨
- እስመ፡ አንጽሐኪ፡ እምርስተ፡ ዓለም፡ ልሱሕ፨
- በደመ፡ ገቦሁ፡ ቀይሕ፡ ወልደ፡ አብ፡ መሲሕ፨
-
- ሰላም፡ ለዝክረ፡ ስምኪ፡ ዘኍልቈ፡ ፊደሉ፡ ሠላስ፨
- ወይሄሉ፡ ጽሑፈ፡ በሰሌዳ፡ ህልው፡ ሞገሥ፨
- ንግሥትየ፡ እድና፡ ወለተ፡ ሮማዊ፡ ንጉሥ፨
- ሴስይኒ፡ እክለ፡ ሣህልኪ፡ በመዋዕለ፡ ረኀብ፡ ዘከርስ፨
- ወበጊዜ፡ እርቃን፡ ይክድነኒ፡ ምሕረትኪ፡ ልብስ፨
-
- ሰላም፡ ለመቃብርኪ፡ ዘኢተከስተ፡ ለዓይነ፡ ሰብእ፡
- ከመ፡ መቃብሩ፡ ለሙሴ፡ ነቢየ፡ ምሥጢር፡ ኅቡዕ፨
- መቅደሰ፡ ቅድሳት፡ እድና፡ ቅድስተ፡ ቅዱሳን፡ ታስዕ፨
- እስይኒ፡ ዕሴተ፡ ጽድቅ፡ ለብእሴ፡ ኃጢአት፡ ኃጥእ፨
- በፍጻሜ፡ ዝንቱ፡ ማኅሌት፡ ወዝኩ፡ መልክዕ፨
-
- በእንተ፡ ብካዮን፡ ለአኀት፡ ወሰቆቃዎሙ፡ ለአኃው፨
- አመ፡ ሞተ፡ ዚአኪ፡ ዮም፡ እምነ፡ ሐይው፨
- ለባዊት፡ እድና፡ እመ፡ አረጋዊ፡ ልብው፨
- ናዝዝኒ፡ እምትካዝየ፡ በኑዛዜኪ፡ ፍትው፨
- ወአስተፍሥሕኒ፡ እምላሕዎ፡ ለብእሲ፡ ልሕው፨
-
- ስብሐት፡ ይደሉ፡ ለክርስቶስ፡ ወለማርያም፡ እሙ፨
- እስመ፡ አብሑኒ፡ እንብብ፡ ለፍቅደ፡ መልክዕኪ፡ ቃለ፡ ሰላሙ፨
- ቅድስተ፡ ባሕርይ፡ እድና፡ ካልእተ፡ ቅዱሳን፡ ኵሎሙ፨
- ኅትሚ፡ ገጽየ፡ ወፍጽምየ፡ በማኅተመ፡ ገጹ፡ ወፍጽሙ፨
- ለበዐለ፡ ወንጌል፡ ዮሐንስ፡ ዘተአኵተ፡ ስሙ፨