Other Titles
-
መልክአ፡ ሰንበት፡
Malkəʾa Sanbat
Image of the Sabbath
Malkəʾ
-
- ድርሳን፡ ዘደረሰ፡ አሐዱ፡ ርቱዐ፡ ሃይማኖት፨
- ሶበ፡ አገበሮ፡ ኪያሁ፡ ኅሊና፡ ፍትወት፨
- በኵሉ፡ እሑድ፡ ወበሰናብት፨
- ይትነበብ፡ ይቤ፡ መጽሐፈ፡ ዝንቱ፡ ማሕሌት፨
- ዘኍላቌሁ፡ ሰኑይ፡ ወኃምስ፡ አርእስት፨
-
- ሶበ፡ አእመርኩ፡ በስምኪ፡ ከመ፡ ታቦተ፡ ይቄድሱ፨
- ወድሶተኪ፡ ወጠንኩ፡ ለአእምሮትየ፡ መጠነ፡ ናእሱ፨
- ሰንበተ፡ ክርስቲያ፡ ቅድስት፡ ንግሥተ፡ መሳፍንት፡ ስሱ፨
- እለሰ፡ ኪያኪ፡ አርኰሱ፨
- ፈቀዱ፡ ሞተ፡ ወኵነኔ፡ ኀሠሡ፨
-
- ምስለ፡ ዕለታት፡ ኃምስ፡ እለ፡ እምቅድሜሁ፡ ተፈጥሩ፨
- አመ፡ ዕለተ፡ ፍዳ፡ ወደይን፡ ለእግዚአብሔር፡ ዕለተ፡ ምሥጢሩ፨
- እስመ፡ የኀልፍ፡ ጥቀ፡ ወይሠዐር፡ ዝክሩ፨
- ለእስራኤል፡ እምነ፡ ሰንበቶሙ፡ ለሰንበትነ፡ ከመ፡ የዐቢ፡ ክብሩ፨
- ዘኢያእመርክሙ፡ ሰብእ፡ በዝንቱ፡ አእምሩ፨
-
- ሰላም፡ ለሀልዎትኪ፡ እምቅድመ፡ ኦርያሬስ፡ ወብርሃን፨
- ሰንበተ፡ ክርስቲያን፡ ቅድስት፡ ንግሥተ፡ አዝማናት፡ ኵሎን፨
- ኪያኪሰ፡ እለ፡ ይሜንኑ፡ አብዳን፨
- ኢይትባልሑ፡ እምወይሌ፡ ወኢያመሥጡ፡ እምደይን፨
- እመ፡ ቆሙ፡ ኖኅ፡ ወሙሴ፡ መስፍን፨
-
- ሰላም፡ ለተከሥቶትኪ፡ በአትልዎ፡ ዘመድ፡ ሰብዑ፨
- እማሕፀነ፡ ወለት፡ ወእም፡ እምቅድመ፡ ፍጥረታት፡ ይፃኡ፨
- ሰንበተ፡ ክርስቲያን፡ ቅድስት፡ ለእግዚአብሔር፡ ዕለተ፡ ስምዑ፨
- ስብሐተ፡ ዚአኪ፡ አመ፡ ውስተ፡ ዓለም፡ መጽኡ፨
- ነቢያት፡ ዜነዉ፡ ወአርድእት፡ አይድዑ፨
-
- ሰላም፡ ለዝክርኪ፡ ውስተ፡ አፈ፡ ክሉ፡ ዘተሰብሐ፨
- ጎርጎሬዎስ፡ ልዑለ፡ ዜና፡ ከመ፡ ነገረ፡ በሮሃ፨
- ሰንበተ፡ ክርስቲያን፡ ቅድስት፡ ለሰንበተ፡ አይሁድ፡ መናቅዕቲሃ፨
- ወለንጊኖስሂ፡ ኀደገ፡ ሶቤሃ፨
- ሞገሰ፡ ዚአኪ፡ ጽሒፎ፡ ብዙኀ፨
-
- ሰላም፡ ለዐዲዎትኪ፡ እምጽንፈ፡ ዓለም፡ ዛቲ፨
- እስከ፡ ጽንፈ፡ ዓለም፡ እንታክቲ፨
- ሰንበተ፡ ክርስቲያን፡ ቅድስት፡ ዕረፍተ፡ ኵሉ፡ መዋቲ፨
- አንግፊያ፡ ወአድኅኒያ፡ ለበግዕትኪ፡ አሐቲ፨
- እምክረ፡ አርዌ፡ ጸዋግ፡ ደመ፡ ሰብእ፡ ዘይስቲ፨
-
- ሰላም፡ ለተባርኮትኪ፡ በአፈ፡ አምላክ፡ ፈጣሪ፨
- በዓለመ፡ ጌጋይ፡ ዛቲ፡ ወበዓለመ፡ ጽድቅ፡ ዘደኃሪ፨
- ሰንበተ፡ ክርስቲያን፡ ቅድስት፡ ዘኢትሠዐሪ፨
- ተዐብዪ፡ ወትትሌዐሊ፡ ወጥቀ፡ ትከብሪ፨
- እምሰንበተ፡ ነቢይ፡ ዘኮነት፡ በሱሳ፡ ዘባሪ፨
-
- መጽሐፈ፡ ዜናኪ፡ መዐድመ፡ እንዘ፡ እብል፡ ሐፈጥኩ፨
- በበ፡ ግልየቱ፡ ሰላም፡ አኀዘ፡ ሲራኩ፨
- ሰንበተ፡ ክርስቲያን፡ ጽሕፍት፡ ለጸሓፌ፡ ኵሉ፡ በውስተ፡ ታሪኩ፨
- ላዕሌኪሰ፡ ከመ፡ ሐዋርያት፡ ሰበኩ፨
- ዘይጸውም፡ አልቦ፡ ወይሰግድ፡ በብረኩ፨
-
- እምሠርቀ፡ ሰኑይ፡ ወሠሉስ፡ ወእምሠርቀ፡ ረቡዕ፡ ጥንተ፡ ሐሳብ፨
- እምሠርቀ፡ ሐሙስኒ፡ ወእምሠርቀ፡ ዓርብ፨
- ወእምሠርቀ፡ ሰንበት፡ ካዕበ፡ ዕለተ፡ ከብካብ፨
- ለዘቀደስኩ፡ ኪያኪ፡ ሰንበተ፡ ቅዱሳን፡ ሕዝብ፨
- ባርክኒኬ፡ በማዕተበ፡ ዝንቱ፡ ንባብ፨
- በበረከቶን፡ ለማሕፀን፡ ወጥብ፨
-
- ፈጺመነ፡ ዮም፡ ማሕሌተ፡ ሰንበት፡ ሴርኮ፨
- ማኅበረ፡ ክርስቲያን፡ ኵሉ፡ ወዐላውያን፡ አኮ፨
- ንዑ፡ ንበል፡ ኪያሁ፡ በግናይ፡ ወአስተብርኮ፨
- ስብሐት፡ ለእግዚአብሔር፡ ወባርኮ፨
- ኪያነ፡ ለዘፈጠረ፡ ከመ፡ ናምልኮ፨