Subject
Malkəʾ
-
- ጐሥዐ፡ ልብየ፡ ቃለ፡ ማሕሌት፡ ወይባቤ፨
- ከመ፡ ድኁኃን፡ አድባር፡ እለ፡ ደብረ፡ ከርቤ፨
- ሰማዕተ፡ ጰራቅሊጦስ፡ ጻድቃን፡ ሐውጹኒ፡ በከርሠ፡ ኑቤ፨
- ከመ፡ እቤ፡ ለለ፡ ሶቤ፡ ርድኡኒ፡ እምንዳቤ፨
- ከመ፡ ታዕርፉኒ፡ ሊተ፡ ኀበ፡ ቦ፡ ይባቤ፨
-
- ዘርአ፡ ገራህቱ፡ ቅድስት፡ ከመ፡ ዘይሴፎ፡ ሐረሳዊ፨
- እንዘ፡ ይትዔገስ፡ ጸኒሐ፡ በጊዜ፡ ማእረር፡ እስከ፡ ትሰዊ፨
- እሴፈወክሙ፡ አንሰ፡ ሰማዕተ፡ ጰራቅሊጦስ፡ ማሕየዊ፨
- በረከትክሙ፡ ሀቡኒ፡ ሰማያዊ፨
- ከመ፡ ባረኮ፡ ያዕቆብ፡ ለሌዊ፨
-
- ሰላም፡ ለልደትክሙ፡ እምቤተ፡ ክህነት፡ ወመንግሥት፨
- እስራኤላውያን፡ ዘይት፨
- ሰማዕተ፡ ጰራቅሊጦስ፡ ጻድቃን፡ ዘለለ፡ ዕለት፡ ወዓመት፨
- ሀቡኒ፡ ዐስበ፡ ሰማይ፡ ወሀብተ፡ ቡራኬ፡ ፍጽምት፨
- ወበረከታ፡ ለኑኃሜት፡ ዘነሥአት፡ ሩት፨
-
- ሰላም፡ ለፀአትክሙ፡ በከመ፡ ሰማዕክሙ፡ ዜና፨
- እንበይነ፡ መና፡ በገዳመ፡ ሲና፨
- እነግረክሙ፡ ገሃደ፡ በስብሐት፡ ወበቃለ፡ ጕሕና፨
- ፍቅረ፡ ጰራቅሊጦስ፡ ከመ፡ ዘቀሊል፡ ደመና፨
- ዘእንበለ፡ እግር፡ አርወጾሙ፡ ፍና፨
-
- ሰላም፡ ለዝክረ፡ ስምክሙ፡ እምነ፡ ጸቃውዕ፡ ጥዑም፨
- ሚሠናይ፡ ወጥቀ፡ አዳም፨
- ሰማዕተ፡ ጰራቅሊጦስ፡ ናር፡ እለ፡ ቅቡኣን፡ በደም፨
- አንትሙ፡ አጋእዝትየ፡ ተናበቡኒ፡ ሰላም፡ በሰላም፨
- በጺሐክሙ፡ በገሀድ፡ ወሕልም፨
-
- ሰላም፡ ለብሔርክሙ፡ ምርፋቀ፡ ጸቃውዕ፡ ሐዲስ፨
- አመ፡ ዕርገቱ፡ ለሬስ፨
- አስተማስልክዎ፡ አንሰ፡ በልሳነ፡ ሥጋ፡ ወነፍስ፨
- እሕተ፡ ዮርዳኖስ፡ ካልእተ፡ ሳሌም፡ መቅደስ፨
- ጥብርያዶስ፡ ጥብርያዶስ፡ ለጻድቃን፡ መርስ፨
-
- ሰላም፡ ለሥዕርትክሙ፡ በቅብአ፡ መንፈስ፡ ዘጠለ፨
- ወለድምድማክሙ፡ ሰላም፡ እማየ፡ ናጌብ፡ ዘበቈለ፨
- ሰማዕተ፡ ጰራቅሊጦስ፡ ናር፡ ለክብርክሙ፡ ተብህለ፨
- ንስረ፡ ኢትዮጵያ፡ አመ፡ ይግብር፡ በዓለ፨
- መንጰለ፡ ወአንጰልጰለ፡ መስቀለ፨
-
- ሰላም፡ ለአእጋሪክሙ፡ በአክናፈ፡ መንፈስ፡ እለ፡ ሖራ፨
- ወለሰኳንዊክሙ፡ ሰላም፡ ዘዲበ፡ ኰኵሐ፡ ወንጌል፡ ዘበደራ፨
- ሰማዕተ፡ ጰራቅሊጦስ፡ ጻድቃን፡ አሕዛበ፡ ድዮስ፡ ጶራ፨
- ሕንጽዋ፡ ለመንፈስየ፡ ለፍቅርክሙ፡ ማኅደራ፨
- ከመ፡ ኢያኤል፡ ዘሞአ፡ ሲሳራ፨
-
- ሰላም፡ ለመቃብሪክሙ፡ ዘኮነተነ፡ ፍሥሓ፨
- በስዒም፡ እንዘ፡ ንኤምኃ፨
- ሰማዕተ፡ ጰራቅሊጦስ፡ ጻድቃን፡ ዘንጽሕክሙ፡ ንሥሓ፨
- ደመ፡ ስምዕክሙ፡ ወይነ፡ አእምሮ፡ ቶሢሐ፨
- ታስትየኒ፡ ታስተይክሙ፡ በስያፍ፡ ቀዲሐ፨
-
- ሰላም፡ ለንብረትክሙ፡ እለ፡ ተአምራ፡ ህላዌ፨
- ወለደመ፡ ስምዕክሙ፡ ሰላም፡ ሰዓሬ፡ ሕማም፡ ወደዌ፨
- ሰማዕታተ፡ ጰራቅሊጦስ፡ ጻድቃን፡ ቤዝዉኒ፡ እምነ፡ አርዌ፨
- ከመ፡ ቤዘዎሙ፡ በምሕልላሁ፡ ማሕየዊ፨
- ከመ፡ ባረኮ፡ ያዕቆብ፡ ለሌዊ፨