Details
Other Titles
-
መልክአ፡ አናንያ፡ ዘማይ፡ ለሓም፡
Malkəʾa ʾAnānyā za-Māy Laḥām
Image of ʾAnānyā of Māy Laḥām
-
- ሰላም፡ ለዝክረ፡ ስምከ፡ ዘፍካሬሁ፡ ደመና፨
- ወለሥዕርትከ፡ ሰላም፡ ዘኢተቀብአ፡ ቅብአ፡ ሙስና፨
- አናንያ፡ ጳውሎስ፡ ለቤተ፡ ክርስቲያን፡ ቀርና፨
- ከመ፡ እዜኑ፡ ስብሐቲከ፡ ወዘዚአከ፡ ልዕልና፨
- በዲበ፡ እንግድዓየ፡ አክብድ፡ ወምላእ፡ ልቦና፨
-
- ሰላም፡ ለርእስከ፡ አክሊለ፡ ጻማ፡ ዘተቀጸለ፨
- ወለገጽከ፡ ሰላም፡ ዘተሳተፈ፡ ጸዳለ፨
- አናንያ፡ አቡየ፡ እስእለ፨
- አብያጺከ፡ መነኮሳት፡ ኀበ፡ ረሰዩ፡ መድበለ፨
- አሀሉ፡ ምስሌሆሙ፡ ጸግወኒ፡ ክፍለ፨
-
- ሰላም፡ ለግንዘተ፡ ሥጋከ፡ በእደ፡ ኄራን፡ አበው፨
- ወለመቃብሪከ፡ ሰላም፡ በውሣጤ፡ ገዳም፡ ፍትው፨
- አናንያ፡ ያዕቆብ፡ መፍቀሬ፡ አምላክ፡ ሕያው፨
- ከመ፡ ኢይቅትክጸ፡ ፍትወተ፡ ሥጋ፡ ኤሳው፨
- ቀቲለ፡ ዚአየ፡ ቀደምከ፡ በነገር፡ ህልው፨
-
- ዘንተ፡ ስብሐታተ፡ ዘአቅረብኩ፡ ነያ፨
- ከመ፡ መሥዋዕተ፡ ላህም፡ ሥሙር፡ ሠመርከ፡ አናንያ፨
- አልቦ፡ እምይእዜ፡ ለነፍስየ፡ ዘያጠንያ፨
- ኢጠቢብ፡ ወኢኬንያ፨
- ዕሤተ፡ በረከትከ፡ ምሉአ፡ ዳእሙ፡ እሥያ፨
-
- እስመ፡ ውዳሴሁ፡ ፈጸምኩ፡ ወዘዚአሁ፡ መልክእ፨
- መጠነ፡ ተክህለኒ፡ ሊተ፡ መጠነ፡ ዕሥራ፡ ወርብዕ፨
- ሶበ፡ አናንያ፡ ተዐርግ፡ ጸሎተ፡ ቅዱሳን፡ ሰብእ፨
- ኢታውርድ፡ ተሚኦከ፡ ላዕለ፡ ወልድከ፡ ኃጥእ፨
- አፍሐመ፡ እሳት፡ ውዑይ፡ እምሥር፡ ኅቡእ፨