Bibliography
Z
Getatchew Haile. ‘Life’ and ‘Miracles’ of Abunä Akalä Krǝstos. Supplement to Aethiopica 6. Wiesbaden: Harrassowitz, 2017.
-
- ነገሥተ፡ አርያም፡ አብ፡ ወወልዱ፡ ዘአኀዝክሙ፡ ዓለመ፨
- እንዘ፡ ትኵንኑ፡ ጽድቀ፡ ወታበዝተ፡ ሰላመ፨
- ለአካለ፡ ክርስቶስ፡ እጽሕፍ፡ መጽሐፈ፡ ዜናሁ፡ ፍጹመ፨
- አብሁኒ፡ እንሳእ፡ በጸዊረ፡ ሕይወትክሙ፡ ማሕተመ፨
- ዘያበርህ፡ ግልአ፡ ልብየ፡ ዘብዙኀ፡ ጸልመ፨
-
- ሰላም፡ ለዝክረ፡ ስምከ፡ ዘተጸውዐ፡ እምኵሉ፨
- እስመ፡ በጽድቁ፡ ተዐውቀ፡ ወተጠየቀ፡ በግሉ፨
- አቡነ፡ ክቡር፡ አካለ፡ ክርስቶስ፡ ዘላዕሉ፨
- ባርከነ፡ አንተ፡ በቃልከ፡ እንዘ፡ እዴከ፡ ታተሉ፨
- ዘምስሌከ፡ መንፈስ፡ ቅዱስ፡ ምስሌነ፡ የሀሉ፨
-
- ሰላም፡ ለሥዕርተ፡ ርእስከ፡ ዘተኈለቁ፡ ወተሐለዩ፨
- ውስተ፡ ኅሊናሁ፡ ለክርስቶስ፡ ዘኢይትኄለይ፡ ዕበዩ፨
- አካለ፡ ክርስቶስ፡ ተሣሀል፡ ሶበ፡ ኀቤከ፡ ጸለዩ፨
- እምሀገር፡ ሰብአ፡ ፍቅርከ፡ ዘእክለ፡ ሕማም፡ ሲሳዩ፨
- ወእምደቂቅከ፡ ዘበዝኀ፡ ብካዩ፨
-
- ሰላም፡ ለግንዘተ፡ ሥጋከ፡ ወለመቃብሪከ፡ ዛቲ፨
- ዘበውስቴታ፡ ተደፍነ፡ ወርቀ፡ ሥጋከ፡ መዋቲ፨
- አካለ፡ ኢየኡስ፡ ክርስቶስ፡ ንጉሠ፡ ኅሊና፡ ሐታቲ፨
- ተጸይሐ፡ በምኔትከ፡ መካልየ፡ ድርሳን፡ ክልኤቲ፨
- ዘበምድር፡ ክብርት፡ ወቅድስት፡ ይእቲ፨
-
- በአክናፈ፡ ጸጋ፡ ሐውጾትከ፡ ጉባኤ፡ ዛቲ፡ ዐጸድ፨
- ሰርከ፡ ሰርከ፡ ይኩንከ፡ ልማድ፨
- አካለ፡ ክርስቶስ፡ ነገረ፡ ወኀዘነ፡ ልብ፡ ክቡድ፨
- እስመ፡ ቦ፡ እምውሉድከ፡ ዘይነግረከ፡ ወልድ፨
- ዘባዕድ፡ ኢይሰምዖ፡ ወቅሩብ፡ ዘመድ፨
-
- መሐልየ፡ ድርሳን፡ ስድሰ፡ ሱባዔያተ፡ ዘምስለ፡ ዋሕድ፡ ተዐለዱ፨
- ህየንተ፡ አርባሕኩ፡ ለከ፡ ለለ፡ አሐዱ፡ አሐዱ፨
- አካለ፡ ክርስቶስ፡ ዕብራዊ፡ ዘእምዕብራውያን፡ ሙላዱ፨
- ባርከኒ፡ እንሣእ፡ በረከተከ፡ እስመ፡ ለወላዲ፡ ፈቃዱ፨
- በረከተ፡ በቡራኬ፡ ይንሣእ፡ ወልዱ፨
-
- አመ፡ ውስተ፡ ፈለግ፡ ጸለየ፡ ቅድመ፡ ሥዕላ፡ ጸሎተ፨
- አካለ፡ ክርስቶስ፡ ትምርሖ፡ ፍኖተ፡ ነፍሱ፡ ርትዕተ፨
- ማርያም፡ ድንግል፡ አሜሃ፡ አስተርአየቶ፡ ክሡተ፨
- ወወሀበቶ፡ በፈቃዳ፡ ዛተ፡ ምኔተ፨
- ዘይገብር፡ ባቲ፡ ዐበይተ፡ ኀይላተ፨
-
- ተክለ፡ ሃይማኖት፡ እምብዝኀ፡ ቀዊም፡ ዘተቈልቈለ፡ ፀሓይ፡ አጽሙ፨
- ሰማየ፡ ተሰብሮ፡ ምዕራቦ፡ ለክርስቶስ፡ በእንተ፡ ስሙ፨
- ወአካለ፡ ክርስቶስ፡ በኀጺን፡ አባላቲሁ፡ ዘሐሙ፨
- እንዘ፡ አብ፡ ወወልድ፡ በመንግሥተ፡ ሰማይ፡ ነዮሙ፨
- ምስብዒተ፡ እምፀሓይ፡ ይበርህ፡ ገጾሙ፨
-
- ሰላም፡ ለውሉድከ፡ እለ፡ ውስተ፡ ዛቲ፡ ዐጸድ፨
- ጊዜ፡ መከራሆሙ፡ ብዙኅ፡ ወኀዘኖሙ፡ ክቡድ፨
- ኢተኀዝን፡ አንተ፡ አካለ፡ ክርስቶስ፡ ዋሕድ፨
- እስመ፡ ጥቀ፡ አብ፡ ወላዲ፡ በእንተ፡ ብዙኃን፡ ውሉድ፨
- የኀዝን፡ ለአሐዱ፡ አሐዱ፡ ለዘመድ፨
-
- አካለ፡ ክርስቶስ፡ ነዓ፡ ኀቤየ፡ እምገነትከ፨
- ወእመ፡ አኮ፡ እምውሉድከ፡ እለ፡ ሀለዉ፡ ምስሌከ፨
- በደመና፡ ብርሃን፡ ወሬዛ፡ አእምሮ፡ ወልድከ፨
- ይምጻእ፡ ይርአይ፡ ሕማምየ፡ በከመ፡ ርእየ፡ ይንግርከ፨
- ወኵሎ፡ ነገረ፡ ከመ፡ ያምጽእ፡ ለከ፨
- ተረፈ፡ መልክእ፡
-
- ሰላም፡ ለከ፡ ሀገረ፡ ሕይወት፡ ዘትትዋረስ፡ በቀለመ፡ ሕይወት፡ ቀለሙ፨
- ጸሐፈከ፡ ወልድ፡ ቅድመ፡ ዓለሙ፨
- አካለ፡ ክርስቶስ፡ ጸዋሬ፡ ስሙ፨
-
- ሰላም፡ ለከ፡ ኖትያ፡ ማዕምር፡ አካለ፡ ኢየሱስ፡ ክርስቶስ፨
- ተራወጸ፡ ለከ፡ በትዕግሥት፡ ተርሴስ፨
- ንጽሕናከ፡ ሐመረ፡ ነፍስ፨
-
- ሰላም፡ ለከ፡ አካለ፡ ክርስቶስ፡ ለከ፡ እስመ፡ በዘምሮ፡ ተቀንየ፨
- ርቱዕ፡ ገብር፡ ልሳንየ፨
- እንዘ፡ እምውስጠ፡ ልብ፡ ትብለኒ፡ ወልድየ፡ ወልድየ፨
- እምዐስብከ፡ ሀበኒ፡ ዐስብየ፨