Subject
Malkəʾ
-
- ቀዳሚሁ፡ ቃል፡ ውእቱ፡ ቃል፨
- ወውእቱ፡ ቃል፡ ኀበ፡ እግዚአብሔር፡ ልዑል፨
- ወኀበ፡ ኬንያ፡ ሕይወቱ፡ እግዚአብሔር፡ ባዕል፨
- ውእቱኒ፡ እግዚአብሔር፡ ኃያል፨
- እንዘ፡ ትብል፡ መሀርከነ፡ የሐንስ፡ ድንግል፨
-
- ሰላም፡ ለዝክረ፡ ስምከ፡ ለመጽሐፈ፡ ትፍሥት፡ ምሥጢራ፨
- ዘተርጐምዎ፡ ቀዳሚ፡ መምህራነ፡ ቅድስት፡ ደብተራ፨
- ወልደ፡ ነጐድጓድ፡ ዮሐንስ፡ ድምፀ፡ መንፈስ፡ ቅዱዝ፡ ዕንዚራ፨
- ትሕትናከ፡ ባርቅ፡ ተበቀሎ፡ ለጌጋየ፡ አዳም፡ ሲሳራ፨
- ወበኃይለ፡ ጸጋከ፡ ወድቀ፡ ኢያቢስ፡ መከራ፨
-
- ሰላም፡ ለሥዕርትከ፡ ዘይተ፡ ብርሃነ፡ አብ፡ ዘተቀብዓ፨
- በአፃብዒሃ፡ ምዑዛት፡ ለድንግለ፡ ኪሩብ፡ ፍግዓ፨
- ወልደ፡ ነጐድጓድ፡ ዮሐንስ፡ አብአኒ፡ ውሣጤ፡ መርዓ፨
- ለአብዳን፡ ውስተ፡ ቤቶሙ፡ አመ፡ ይከውን፡ ውውዓ፨
- ወጻድቀ፡ ዓለም፡ ዘዝየ፡ ይትረከብ፡ ኃጥአ፨
-
- ሰላም፡ ለርእስከ፡ ርእሰ፡ ንጉሥ፡ ዘሩባቤል፨
- ዘሥርጋዌሁ፡ መብረቅ፡ ጌራ፡ ሕዝቅያስ፡ ፅዱል፨
- ወልደ፡ ነጐድጓድ፡ ዮሐንስ፡ ወሬዛ፡ ኤዶም፡ ወንጌል፨
- መላእክተ፡ ጸጋ፡ እለ፡ ድልዋን፡ ለሣህል፨
- ፈኑ፡ ለነ፡ እስመ፡ ለከ፡ ኃይል፨
-
- ሰላም፡ ለገጽከ፡ ስነ፡ ላህዩ፡ ዘጸልመ፨
- ዲበ፡ ዕፀ፡ መስቀል፡ ክርስቶስ፡ እምእመ፡ ከዓወ፡ ደመ፨
- ወልደ፡ ነጐድጓድ፡ ዮሐንስ፡ እንተ፡ ኰነንከ፡ ዓለመ፨
- ለኪሩቤል፡ በዓለሞሙ፡ ረስየኒ፡ ስዩመ፨
- ወበቅድመ፡ ገጽየ፡ ፍታሕ፡ ሰብዓተ፡ ማሕተመ፨
-
- ሰላም፡ ለቀራንብቲከ፡ ወራዙተ፡ ዳዊት፡ ቀኖና፨
- እለ፡ ዓውደ፡ ትጋህ፡ ቆሙ፡ በተሠርግዎ፡ ለይ፡ ጽሙና፨
- ወልደ፡ ነጐድጓድ፡ ዮሐንስ፡ ኬብሮናዊ፡ ልዕልና፨
- ለልብከ፡ ኢዮር፡ ገልበቦ፡ ንጉሠ፡ ኢዮር፡ ምልክና፨
- በተድላ፡ መንግሥቱ፡ ስፉሕ፡ ዘአዜብ፡ ደመና፨
-
- ሰላም፡ ለአዕይንቲከ፡ ምሥጢረ፡ ሱራፌል፡ እለ፡ ርእያ፨
- ወመረግደ፡ ዕበይ፡ ፅዕድወ፡ መንበረ፡ አግዓዚ፡ ኬንያ፨
- ወልደ፡ ነጐድጓድ፡ ዮሐንስ፡ ለባሕረ፡ ሃይማኖት፡ ዛኅነ፡ ዕበያ፨
- በስብሐተ፡ ሙሴ፡ ዕብራዊ፡ ታስተበፅዓከ፡ ነያ፨
- ምድረ፡ ስብከትከ፡ አሐቲ፡ ዕስያ፨
-
- ሰላም፡ ለአእዛኒከ፡ ደባትረ፡ ጥበብ፡ ዘላዕሉ፨
- አንጻረ፡ መልአክ፡ ኡርኤል፡ ዘበዓውደ፡ ሰሚዕ፡ ተተክሉ፨
- ወልደ፡ ነጐድጓድ፡ ዮሐንስ፡ ለእደ፡ መለኮት፡ በትረ፡ ወንጌሉ፨
- በኅምዞሙ፡ ለአራዊት፡ እስመ፡ አባላትየ፡ ቈስሉ፨
- በርጢነ፡ መንፈስ፡ ዘለከ፡ ይትፈወሱ፡ እሉ፨
-
- ሰላም፡ ለመላትሒከ፡ በሐሩረ፡ አንብዕ፡ እለ፡ መጽለዉ፨
- ሐራ፡ ጲላጦስ፡ ለወልድ፡ ሶበ፡ እደዊሁ፡ ቀነዉ፨
- ወልደ፡ ነጐድጓድ፡ ዮሐንስ፡ ለልሱሐ፡ ምግባር፡ ፄዉ፨
- እምልቦሙ፡ ሃይማኖታዊ፡ ኀበ፡ ኪያከ፡ ፈተዉ፨
- በሞተ፡ ኢያሱ፡ ሞትከ፡ መላእክት፡ ለሕዉ፨
-
- ሰላም፡ ለአዕናፊከ፡ አፈዋተ፡ ምግባር፡ ወሃይማኖት፨
- ዘእመዓዛሆን፡ ተመሥጠ፡ ልቡና፡ ማርያም፡ ንጽሕት፨
- ወልደ፡ ነጐድጓድ፡ ዮሐንስ፡ መልአከ፡ ገሊላ፡ ሐሤት፨
- ለገብርከ፡ ይትራድአኒ፡ እምነ፡ ምክረ፡ ፀር፡ ንዴት፨
- ሊባኖሳዊ፡ ብዕልከ፡ ጊዮርጊስ፡ ሰማዕት፨
-
- ሰላም፡ ለከናፍሪከ፡ ከዋክብተ፡ ወንጌል፡ ሰማይ፨
- ዘበስነ፡ ሕጎሙ፡ በርሀ፡ ዓለመ፡ እስራኤል፡ ቀላይ፨
- ወልደ፡ ነጐድጓድ፡ ዮሐንስ፡ ሰይፈ፡ ሚካኤል፡ ባሕርይ፨
- ምርሐኒ፡ ሊተ፡ እግዚኦ፡ በፀዳልከ፡ ዕበይ፨
- ኀበ፡ መካነ፡ ሣህል፡ ሀለወ፡ ኤልያስ፡ ነቢይ፨
-
- ሰላም፡ ለአፉከ፡ ሥጋዌ፡ መለኮት፡ ዘተነበየ፨
- ወሥጋ፡ ምድራዊ፡ አዳም፡ ከመ፡ አምላከ፡ ተሰምየ፨
- ወልደ፡ ነጐድጓድ፡ ዮሐንስ፡ ጽንዓ፡ ብርከ፡ ድኩም፡ ልብየ፨
- ስመ፡ ስብሐቲከ፡ ለለ፡ ይጼውዕ፡ አፉየ፨
- ገብርኤል፡ ሞገስከ፡ የሀሉ፡ ምስሌየ፨
-
- ሰላም፡ ለአስናኒከ፡ ዘፅዕዳዌ፡ በረድ፡ አስተሐቅሩ፨
- ፅዕዳዌ፡ በረድ፡ ማሕፈደ፡ እስመ፡ እሙንቱ፡ ሣረሩ፨
- ወልደ፡ ነጐድጓድ፡ ዮሐንስ፡ ለተቅዋመ፡ ክርስቶስ፡ ማኅቶተ፡ ፍቅሩ፨
- በወይነ፡ ፍቅርከ፡ ሕሊናተ፡ ነፍስየ፡ ሰክሩ፨
- ኀበ፡ አማልክቲከ፡ ደርገ፡ ኪያሆሙ፡ ሠምሩ፨
-
- ሰላም፡ ለልሳንከ፡ ካህነ፡ አርያም፡ ቀዳሲ፨
- ሥላሴ፡ አካላት፡ ዘልፈ፡ እንዘ፡ ሥላሴ፡ ይሬሲ፨
- ወልደ፡ ነጐድጓድ፡ ዮሐንስ፡ ብንተ፡ ዓይነ፡ ዳዊት፡ ነጋሢ፨
- በበትርከ፡ መለኮታዊ፡ ርእሰ፡ መደንግፅ፡ ከይሲ፨
- ተቀጥቀጠ፡ ውስተ፡ ዓውዱ፡ ለባዕል፡ ብእሲ፨
-
- ሰላም፡ ለቃልከ፡ ቃለ፡ ሰማያዊ፡ ሕይወት፨
- ዘበድምፀ፡ ክብሩ፡ ተንሥአ፡ ወሬዛ፡ ሮምና፡ ምውት፨
- ወልደ፡ ነጐድጓድ፡ ዮሐንስ፡ ሕፃነ፡ ዝማሬ፡ ንግሥት፨
- በሐሊበ፡ ንጽሕ፡ ኢየሩሳሌም፡ መርዓት፨
- ሐፀነተከ፡ ምስለ፡ ወይን፡ ትዕግሥት፨
-
- ሰላም፡ ለእስትንፋስከ፡ ገነተ፡ ሌዋዊ፡ ሱላሜ፨
- ዘእምውስቴቱ፡ ይወጽእ፡ መዓዛ፡ ፍቅረ፡ ቢጽ፡ አበሜ፨
- ወልደ፡ ነጐድጓድ፡ ዮሐንስ፡ ሠናየ፡ መዋዕል፡ ወዕድሜ፨
- ኮኖ፡ ለጴጥሮስ፡ ጥበብከ፡ ጥብዓተ፡ መስቀል፡ ዘሮሜ፨
- ወለሐዋርያ፡ ጳውሎስ፡ ደመ፡ ስምዕ፡ ሐታሜ፨
-
- ሰላም፡ ለጕርዔከ፡ ጕሕና፡ ሩፋኤል፡ ምሥያሙ፨
- ወዜማ፡ ሰዳክያል፡ ስነ፡ ሰላሙ፨
- ወልደ፡ ነጐድጓድ፡ ዮሐንስ፡ እምቃለ፡ ስእለትከ፡ ለለ፡ ጌሠሙ፨
- አማኑኤል፡ ይቀድሰኒ፡ በንዝኃተ፡ ክቡር፡ ደሙ፨
- ወያስተሳትፈኒ፡ ክብረ፡ እመክብርት፡ እሙ፨
-
- ሰላም፡ ለክሳድከ፡ ማኅፈደ፡ ልዑል፡ አንቃዕድዎ፨
- ዘተኬነዎ፡ ኬንያ፡ በዕንቈ፡ ቢረሌ፡ ለብዎ፨
- ወልደ፡ ነጐድጓድ፡ ዮሐንስ፡ እግዚአ፡ ነፈርዓፅ፡ ወተደልዎ፨
- ሰላምከ፡ ቂርቆስ፡ ወሬዛ፡ ለልበ፡ ኢያሱ፡ ጼወዎ፨
- ወዜና፡ ነዳዲ፡ እሳት፡ ለሊሁ፡ ዜነዎ፨
-
- ሰላም፡ ለመትከፍትከ፡ መትከፈ፡ አሮን፡ ካህን፨
- ሎገዮ፡ ቅድሳት፡ ዘለብሰ፡ ውስተ፡ ደብተራ፡ ሐግ፡ አሚን፨
- ወልደ፡ ነጐድጓድ፡ ዮሐንስ፡ ጣዕመ፡ ወይነ፡ ሴሬቅ፡ ስን፨
- ለልብየ፡ ብእሴ፡ ትካዝ፡ ዘውገ፡ ያዕቆብ፡ ኅዙን፨
- አስተፋጥን፡ ናዝዞተ፡ በተድላከ፡ ወይን፨
-
- ሰላም፡ ለዘባንከ፡ በበትረ፡ ሮምና፡ ዘቀሥፈ፨
- እስከ፡ ኪያሃ፡ ከደነ፡ እምነተ፡ አብርሃም፡ አጽፈ፨
- ወልደ፡ ነጐድጓድ፡ ዮሐንስ፡ በዓለመ፡ ትውላጠ፡ ኮንከ፡ ግዲፈ፨
- ምንዳቤከ፡ ሰኰና፡ ዕዝራ፡ ፍኖተ፡ ሄኖክ፡ ኃለፈ፨
- ወበቤተ፡ [The remainder of the text is lost.]