Subject
Malkəʾ
-
- አኰቴተ፡ አብ፡ ወወልድ፡ ቃለ፡ መደንግፅ፡ አምላክ፨
- ወሞገሰ፡ መንፈስ፡ ቅዱስ፡ ሡራሔ፡ መተንብል፡ መልአክ፨
- ውስተ፡ ጽርሐ፡ ድርሳን፡ ዘለኪ፡ ተስፋ፡ ልበ፡ ያዕቆብ፡ ዓርክ፨
- ማርያም፡ መግደላዊት፡ ወለተ፡ ይስሐቅ፡ ቡሩክ፨
- ያዕርፉ፡ እንዘ፡ አልቦ፡ ዘዔሳው፡ ሐከክ፨
-
- ሰላም፡ ለዝክረ፡ ስምከ፡ በስመ፡ ማርያም፡ ዘተጸውዓ፨
- ማዕደ፡ ማርያም፡ ድንግል፡ እስመ፡ ለባሕቲቱ፡ ተሠርዓ፨
- መግደላዊት፡ ማርያም፡ በልብስኪ፡ ትርሲተ፡ መርዓ፨
- ፊደለ፡ ስንዓዌ፡ ዘትርጓሜሁ፡ ፍግዓ፨
- አማኑኤል፡ ካህንኪ፡ ሰዓለ፡ ርቱዓ፨
-
- ሰላም፡ ለሥእርትኪ፡ ፈትለ፡ ሜላተ፡ ወርቅ፡ ዘተመሰለ፨
- ወለርእስኪ፡ ምሉእ፡ በረከተ፡ አብርሃም፡ ጠለ፨
- መግደላዊት፡ ማርያም፡ ድኅረ፡ መስቀለ፡ ዓርብ፡ ተተክለ፨
- መንገለ፡ ነጸርኪ፡ ትንሣኤ፡ መለኮት፡ ልዑለ፨
- ቅዱሳነ፡ ሰማይ፡ ኪያኪ፡ ሰመዩ፡ ወንጌለ፨
-
- ሰላም፡ ለገጽኪ፡ ገጸ፡ መዓልታዊ፡ ፀሐይ፨
- ወለቀራንብትኪ፡ አውያን፡ ዘጣዕመ፡ ፍሬሆን፡ ዕበይ፨
- መግደላዊት፡ ማርያም፡ ዕለተ፡ ፋሲካ፡ ኅሩይ፨
- ይትፌሥሑ፡ በበዓልኪ፡ አብትረ፡ ሙሴ፡ ሰማይ፨
- ወምስለ፡ ነገዱ፡ ይዬብብ፡ ኢያሱ፡ ቀላይ፨
-
- ሰላም፡ ለአዕይንቲከ፡ አዕይንተ፡ የዋህ፡ ርግብ፨
- ወለአእዛንኪ፡ ክልኤ፡ መዳልወ፡ ብሩር፡ ጥበብ፨
- መግደላዊት፡ ማርያም፡ ትምክህተ፡ ነዳያን፡ ሕዝብ፨
- እምበረከትኪ፡ ዮርዳኖሳዊ፡ መዝገብ፨
- አግብርተ፡ ቤትኪ፡ ንንሣእ፡ ጊዜ፡ ፍትሕ፡ ዕፁብ፨
-
- ሰላም፡ ለመላትሕኪ፡ ጽጌያተ፡ ሮማን፡ መሐላ፨
- ወለአዕናፍኪ፡ ሰላም፡ መሳክወ፡ ዕፍረት፡ ተድላ፨
- መግደላዊት፡ ማርያም፡ ለርእሰ፡ ሃይማኖት፡ አክሊላ፨
- ተማኅፀንኩ፡ በኂሩትኪ፡ ኢይዳደቱኒ፡ ተኵላ፨
- በግዓ፡ ይሁዳ፡ አቡኪ፡ ዘርስቱ፡ ገሊላ፨
-
- ሰላም፡ ለከናፍርኪ፡ ጠበብተ፡ ማኅየዊ፡ ቅዳሴ፨
- ወለመጽሐፈ፡ ሕግ፡ አፉኪ፡ ዘምሥጢራቲሁ፡ ሥላሴ፨
- መግደላዊት፡ ማርያም፡ ኦሪተ፡ ንጽሕ፡ ልበ፡ ሙሴ፨
- መለኮት፡ ትዕግሥትኪ፡ መክሐ፡ ቤተ፡ ነቢይ፡ ምናሴ፨
- በተኬንዎቱ፡ ፈጠረ፡ ክብረ፡ ነፍስ፡ ብእሴ፨
-
- ሰላም፡ ለአስናንኪ፡ ዘየዓውዶን፡ ሞገስ፨
- ወለልሳንኪ፡ ክቡር፡ ሐዋርያ፡ ሥርዓት፡ ሐዲስ፨
- መግደላዊት፡ ማርያም፡ ንጽሕተ፡ ኵለንታ፡ እምርኵስ፨
- ያንጽሐኒ፡ እምርስሐትየ፡ ማየ፡ ሣህልኪ፡ ክርስቶስ፨
- ወመቅደሰ፡ ነድስየ፡ ይምላዕ፡ ምሕረትኪ፡ ጢስ፨
-
- ሰላም፡ ለቃልኪ፡ ድምፀ፡ መሰንቆ፡ ኂሩት፨
- ወለእስትንፋስኪ፡ ዝናም፡ ሕይወተ፡ ምውታን፡ አዝርእት፨
- መግደላዊት፡ ማርያም፡ ጽጌ፡ ሰሎሞን፡ ገነት፨
- መሠጦሙ፡ ፄና፡ ፍቅርኪ፡ ለሰማያውያን፡ ኃይላት፨
- ወለዕደወ፡ ኃይል፡ ኮኖሙ፡ ሕይወተ፡ እሞት፨
-
- ሰላም፡ ለጕርዔኪ፡ ለማኅፈደ፡ ወንጌል፡ ኆኅቱ፨
- ወለክሳድኪ፡ ካህን፡ ዘጶዴሬ፡ ስብሐት፡ ትርሲቱ፨
- መግደላዊት፡ ማርያም፡ ፀሐየ፡ አጋእዝት፡ ሠለስቱ፨
- የሐውሩ፡ በብርሃንኪ፡ ነገሥታተ፡ ዓለም፡ ዝንቱ፨
- ወበፀዳልኪ፡ ያንሶስው፡ አሕዛብ፡ እሙንቱ፨
-
- ሰላም፡ ለመትከፍትኪ፡ በአፈ፡ ደናግል፡ ዘተወደሰ፨
- ወለዘባንኪ፡ ንጉሥ፡ ሜላተ፡ ጥዒና፡ ዘለብሰ፨
- መግደላዊት፡ ማርያም፡ ለዘኪያኪ፡ ኃሠሠ፨
- ሐድሲ፡ ዘልፈ፡ ውስተ፡ ከርሡ፡ ዘኪሩባውያን፡ መንፈሰ፨
- ወበራህብ፡ ነፍሱ፡ ትክሊ፡ ደብተራ፡ ሞገሰ፨
-
- ሰላም፡ ለእንግድዓኪ፡ ድርዓ፡ ጽድቀ፡ አበው፡ ዘተረሰየ፨
- ወለክቡረ፡ ስም፡ ሕፅንኪ፡ ምርፋቀ፡ ቅዳሴ፡ ተሰምየ፨
- መግደላዊት፡ ማርያም፡ ዘተመሰልኪ፡ ሰማየ፨
- አሥርቂ፡ ለነ፡ እምጸጋኪ፡ ንስሐ፡ ጴሮስ፡ ፀሐይ፨
- በቍረ፡ አበሳ፡ ኢንድወይ፡ ወኢንሙት፡ ዝየ፨
-
- ሰላም፡ ለአእዳውኪ፡ አዕዳወ፡ ሰሎሜ፡ ቅድስት፨
- ወለመዝራዕትኪ፡ ሐፂን፡ መንበረ፡ ኃያላን፡ ነገሥት፨
- መግደላዊት፡ ማርያም፡ ቅብዓ፡ ቀርነ፡ ሳሙኤል፡ ዘይት፨
- ሥውጠ፡ ይኩን፡ ለለ፡ ጊዜ፡ ማኅሌትየ፡ ዕፍረት፨
- ውስተ፡ ሙዳየ፡ ወርቅ፡ ዓንፍኪ፡ ዘግብሩ፡ ትፍሥሕት፨
-
- ሰላም፡ ለኵርናዕኪ፡ ብርተ፡ ሊባኖስ፡ ዘተዛወገ፨
- ወለእመትኪ፡ ቀላይ፡ እምልዓተ፡ ጸጋ፡ ኢነትገ፨
- መግደላዊት፡ ማርያም፡ እንዘ፡ ታለብውኒ፡ ሕገ፨
- ዘወይነ፡ ክብርኪ፡ ረስይኒ፡ ሐረገ፨
- ወበልኒ፡ ጸሎትኪ፡ ሰማያተ፡ ዓርገ፨
-
- ሰላም፡ ለእራኃትኪ፡ በትረ፡ ውሂበ፡ ፍቅር፡ እለ፡ አኃዛ፨
- ወለአፃብዕኪ፡ ዓሥር፡ ከርቤ፡ ንጽሐ፡ ኤልያስ፡ ውሕዛ፨
- መግደላዊት፡ ማርያም፡ መርዓተ፡ ያዕቆብ፡ ነቢየ፡ ሎዛ፨
- ለዓለም፡ ሞአባዊት፡ እምእደ፡ እኩይ፡ ግዕዛ፨
- ያንግፈኒ፡ ረድኤትኪ፡ መዋዒ፡ ወሬዛ፨
-
- ሰላም፡ ለአጽፋረ፡ እዴኪ፡ ዘስነ፡ ፀዳሎን፡ መረግድ፨
- ወለአጥባትኪ፡ አንቅዕት፡ ሙሐዛተ፡ ሐሊብ፡ ፈቃድ፨
- መግደላዊት፡ ማርያም፡ ንግሥተ፡ ስብከቱ፡ ለወልድ፨
- አንሶስዊ፡ ማእከሌነ፡ በሠረገላኪ፡ ነድ፨
- መጽሐፈ፡ ዕበይኪ፡ ንንብብ፡ ቅድመ፡ ሕዝብ፡ እቡድ፨
-
- ሰላም፡ ለገቦኪ፡ ዘዓራተ፡ ሕያወት፡ ምስካቡ፨
- ወለከርሥኪ፡ እሳት፡ ዘብፅዓነ፡ ፋኑኤል፡ ላህቡ፨
- መግደላዊት፡ ማርያም፡ ለመክሊተ፡ ክርስቶስ፡ መዝገቡ፨
- መላእክት፡ በክንፈ፡ ተድላ፡ እለ፡ ኪያኪ፡ ገልበቡ፨
- ጊዜ፡ ፍትሐ፡ አምላክ፡ ዲቤየ፡ ክንፎሙ፡ ይርብቡ፨
-
- ሰላም፡ ለልብኪ፡ ልቡና፡ ኢያቄም፡ ትሕትና፨
- ወለኵልያትኪ፡ ሰላም፡ ኵልያተ፡ ቅድስት፡ ሐና፨
- መግደላዊት፡ ማርያም፡ ደሴተ፡ ሄኖክ፡ ጥዒና፨
- ምርሳየ፡ ሐመር፡ ዘእንቲአየ፡ ጽሙና፨
- አመ፡ ክረምተ፡ ሐጕል፡ ኰንኒ፡ ቅድመ፡ አብ፡ ልዕልና፨
-
- ሰላም፡ ለሕሊናኪ፡ ምክረ፡ መንፈስ፡ ቅዱስ፡ ዘተውህቦ፨
- ወለአማዑትኪ፡ ጽጌ፡ ሠናየ፡ መዓዛ፡ የብቦ፨
- መግደላዊት፡ ማርያም፡ እምደመና፡ ቅዱስ፡ ፀልቦ፨
- አዝንሚ፡ በኂሩትኪ፡ ዝናመ፡ ፍቁር፡ ተረክቦ፨
- መልዕልተ፡ ገራህትየ፡ ልብ፡ ዘትካዝ፡ ዓቀቦ፨
-
- ሰላም፡ ለንዋየ፡ ውስጥኪ፡ መካነ፡ አእምሮ፡ ፍሉጥ፨
- ወለኅንብርትኪ፡ ባሕርይ፡ ዘኢይትረከብ፡ በሤጥ፨
- መፍደላዊት፡ ማርያም፡ ኂሩተ፡ መለኮት፡ ሥሉጥ፨
- በጸጋኪ፡ እድኃን፡ ኵለሄ፡ እምአይሁዳዊ፡ ተውላጥ፨
- እምነ፡ መቅሠፍታ፡ ለሰዶም፡ ከመ፡ ድኅነ፡ ሎጥ፨
-
- ሰላም፡ ለማኅፀንኪ፡ ማኅፀነ፡ ማርያም፡ ዘቀደሶ፨
- ወለድንግልናኪ፡ ወልዳ፡ ዘእምብልየቱ፡ ሐደሶ፨
- መግደላዊት፡ ማርያም፡ መዓዛ፡ ትሩፋት፡ አንክሶ፨
- ለሥጋኪ፡ እግዚአ፡ ሣ፡ ዓፀደ፡ ሕይወቱ፡ አውረሶ፨
- ወለወልደ፡ ንጉሥ፡ ክብርኪ፡ ምስሌሁ፡ አንገሦ፨
-
- ሰላም፡ ለሐቌኪ፡ ዘኅለተ፡ ወርቅ፡ መጠኑ፨
- መግደላዊት፡ ማርያም፡ ለክርስቶስ፡ ስነ፡ ብርሃኑ፨
- ምሶበ፡ ጥዒና፡ ሀብኒ፡ ኅብስተ፡ ነፈርዓፅ፡ እለ፡ ዘመኑ፨
- ለብንያምሰ፡ ኢይሁበኒ፡ የማኑ፨
- ወኢያስትየኒ፡ ኤፍሬም፡ እምጽሩይ፡ ወይኑ፨
-
- ሰላም፡ ለአቍያጽኪ፡ ሱቱፋነ፡ አዕማድ፡ ክልኤ፨
- ዘተክሎሙ፡ መክብብ፡ ውስተ፡ መቅደሰ፡ ጽዮን፡ ዓውደ፡ ትንሣኤ፨
- መግደላዊት፡ ማርያም፡ በዕለተ፡ ዓባይ፡ ጉባዔ፨
- ያስምዓኒ፡ ቃለ፡ ጽድቅኪ፡ ዜና፡ አልዓዛር፡ ጽዋዔ፨
- ወይረስየኒ፡ ዕበይኪ፡ ዘአብርሃም፡ ቍልዔ፨
-
- ሰላም፡ ለአብራክኪ፡ ለክብረ፡ ሥላሴ፡ እለ፡ ሰገዳ፨
- ወለአእጋርኪ፡ ሰላም፡ አድያማተ፡ መስቀል፡ ዘዖዳ፨
- መግደላዊት፡ ማርያም፡ ድንግለ፡ መሲሕ፡ ይሁዳ፨
- ውስተ፡ ክብካብኪ፡ ዘሞገሰ፡ ዳዊት፡ ማዕዳ፨
- ገርዜነ፡ ልዕልና፡ ክድንኒ፡ ኢይኩን፡ እንግዳ፨
-
- ሰላም፡ ለሰኰናኪ፡ ወለመከየድኪ፡ እለ፡ ጌሡ፨
- ኀበ፡ መቃብሩ፡ ለክርስቶስ፡ ዘአክሊለ፡ ሦክ፡ ቀፀላ፡ ርእሱ፨
- መግደላዊት፡ ማርያም፡ ለኅጡአ፡ ምግባር፡ ትውክልተ፡ ነፍሱ፨
- ሕሊናት፡ ካህናትየ፡ እስመ፡ ኪያኪ፡ ቀደሱ፨
- መንግሥተ፡ ኢየሱስ፡ ተስፋነ፡ ምስሌኪ፡ ይረሱ፨
-
- ሰላም፡ ለአፃብዕኪ፡ ወለአጽፋርኪ፡ ሰላም፨
- እለ፡ ኢደወያ፡ ምዕረ፡ በኅምዘ፡ አርዌ፡ ርጉም፨
- መግደላዊት፡ ማርያም፡ ቡራኬ፡ ዕበዩ፡ ለሴም፨
- ንዒ፡ እምሊባኖስ፡ ኅዝአተ፡ አንበሳ፡ ግሩም፨
- ሰላመ፡ ሥላሴ፡ ተሀቢ፡ ለሕዝብኪ፡ ዮም፨
-
- ሰላም፡ ለቆምኪ፡ መአድመ፡ ራእይ፡ ዓርዝ፨
- ወለመልክዕኪ፡ ሰላም፡ ፀዳለ፡ ማርያም፡ ቤዝ፨
- መግደላዊት፡ ማርያም፡ ዘመቅደሰ፡ ልዑል፡ በለዝ፨
- ይገንዩ፡ ለዕበይኪ፡ ኖሎተ፡ ቀዋሚ፡ ትእዛዝ፨
- ወኪያኪ፡ ይሴብሑ፡ በመዝሙር፡ ሐዋዝ፨
-
- ሰላም፡ ለፀዓተ፡ ነፍስኪ፡ በድምፀ፡ ነጐድጓድ፡ ወመባርቅት፨
- ወለበድነ፡ ሥጋኪ፡ ኮል፡ ዘመዓዛሁ፡ ሰንበልት፨
- መግደላዊት፡ ማርያም፡ ማሕፈደ፡ ነጋሢ፡ ዳዊት፨
- ሐነፁኪ፡ በወርቀ፡ ተድላ፡ ነደቅተ፡ አሐቲ፡ ሥርዓት፨
- ውስተ፡ ሀገሮሙ፡ መዋዒ፡ መንግሥት፨
-
- ሰላም፡ ለግንዘትኪ፡ በልብሰ፡ ክታን፡ ይባቤ፨
- ወለመቃብርኪ፡ ሰላም፡ ውሣጤ፡ ደብረ፡ ሣህል፡ ከርቤ፨
- መግደላዊት፡ ማርያም፡ ብርህተ፡ ምግባር፡ ክርስቲሎቤ፨
- ለገብርኪ፡ ኅጡአ፡ ተስፋ፡ እምዋዕየ፡ ሐጋይ፡ ምንዳቤ፨
- መንዲለ፡ ርእስኪ፡ ይኵነኒ፡ ግልባቤ፨
-
- አአኵቶ፡ ለአብ፡ ወእሴብሖ፡ ለወልዱ፨
- ወአሌዕሎ፡ ፍጹመ፡ ለመንፈስ፡ ቅዱስ፡ አሐዱ፨
- መግደላዊት፡ ማርያም፡ ለስብሐተ፡ ስምኪ፡ ውስተ፡ ዓፀዱ፨
- ከመ፡ እኅድር፡ በፍጻሜሁ፡ እስመ፡ እሙንቱ፡ ፈቀዱ፨
- ወፍና፡ ሐልዮ፡ ርቱዕ፡ ምስሌየ፡ ነገዱ፨