Other Titles
-
ዓርኬ፡ ዘተኣምረ፡ ማርያም፡
ʿĀrke za-Taʾāmməra Māryām
ʿĀrke for the Miracles of Mary -
ስብሐተ፡ ድንግል፡ ማርያም፡
Səbḥata Dəngəl Māryām
Praise of the Virgin Mary
Malkəʾ
-
- አኮኑ፡ ብእሲ፡ ሶበ፡ ሐኒጸ፡ ቤት፡ አፍተዎ፨
- ኵሎ፡ ፃዕፃዖ፡ ያቀድም፡ አስተዳልዎ፨
- እስእለኪ፡ ሀብኒ፡ መንፈሰ፡ ጥበብ፡ ወአለብዎ፨
- መንክራተኪ፡ ማርያም፡ ሶበ፡ ፈቀድኩ፡ ዜንዎ፨
- ወለሠናይትኪ፡ ረትዓኒ፡ እትልዎ፨
-
- ሶበ፡ ወሀበኪ፡ ዘልፈ፡ ሰላመ፡ መልአክ፡ ብስራታዊ፨
- ፍቁርኪ፡ ገባራዊ፨
- ከመ፡ ባረኪዮ፡ ቅድመ፡ ማርያም፡ መጽሐፈ፡ ሓዊ፨
- ባርክኒ፡ እግዝእትየ፡ ምስለ፡ ወልድኪ፡ ናዝራዊ፨
- በበረከቶሙ፡ ለይሁዳ፡ ወልዊ፨
-
- ዕብራዊ፡ ብፁዕ፡ ውስተ፡ ምድረ፡ አክሚም፡ ዘልህቀ፨
- እንዘ፡ ይሴብሕ፡ ስመኪ፡ ሶበ፡ ሰገደ፡ ወወድቀ፨
- ከመ፡ አስተርአይኪዮ፡ ቅድመ፡ ወተናበብኪዮ፡ ጽድቀ፨
- ማርያም፡ አስተርእይኒ፡ ኀበ፡ ረሰይኩ፡ ምርፋቀ፨
- እስመ፡ ሕሊናየ፡ ዘንተ፡ ያስተሐምም፡ ጥቀ፨
-
- ለድምያኖስ፡ ዘተፀምደኪ፡ ዲበ፡ መልዕልተ፡ ደብር፡ ነዋኅ፨
- ዘጸሐፍኪ፡ ስሞ፡ ኀበ፡ ዓምደ፡ ወርቅ፡ ቀይሕ፨
- ምሥራቀ፡ ፀሓይ፡ ብሩህ፡ ማርያም፡ ጽባሕ፨
- ጸሐፊ፡ ስመ፡ ዚአየ፡ ዲበ፡ ልብስኪ፡ ንጹሕ፨
- ወበልብሰ፡ ወልድኪ፡ ካዕበ፡ ዘበደም፡ ንዙኅ፨
-
- አመ፡ እዴሁ፡ መተረ፡ ነሢኦ፡ መጥባሕተ፡ ማኅመሜ፨
- አባስ፡ ካህነ፡ ሮሜ፨
- ከመ፡ ፈወስኪዮ፡ ቅድመ፡ ማርያም፡ እኅተ፡ ሰሎሜ፨
- ፈውሲ፡ ቍስለ፡ ነፍስየ፡ ወጸግውኒ፡ ሱላሜ፨
- ጊዜ፡ ተዘመርኩ፡ ስመኪ፡ ቀዋሜ፨
-
- ይስሓቅ፡ መነኮስ፡ እምድኅረ፡ ጽሕቀ፡ ወተመነየ፨
- ገጸኪ፡ ልኁየ፡ በዕለተ፡ ርእየ፨
- ከመ፡ ትቤልዮ፡ ሎቱ፡ እስከ፡ ፈድፋደ፡ ተኃሥየ፨
- በልኒ፡ እግዝእትየ፡ ተፈሣሕ፡ ቍልዔየ፨
- እምድኅረ፡ ዕለታት፡ ሠላስ፡ ትሄሉ፡ ምስሌየ፨
-
- ዘአትለውኪያ፡ ማርያም፡ ወነሣእኪያ፡ ጽሚተ፨
- ለወለት፡ አሓቲ፡ እንተ፡ ትለብስ፡ ሜላተ፨
- ከመ፡ አሣዕነኪ፡ እፁር፡ ወምርጉዘኪ፡ ሕይወተ፨
- ኀበ፡ ሖርኪ፡ እግዝእትየ፡ አትልውኒ፡ ሊተ፨
- ብፁዕ፡ ገብር፡ ዘይትሉ፡ እግዝእተ፨
-
- ምስለ፡ ዓራቱ፡ ዘዕፅ፡ ጊዜ፡ ኅቡረ፡ ተነጽሓ፨
- ከመ፡ ረዳእኪዮ፡ ቅድመ፡ ወባላህኪዮ፡ ኣሜሃ፨
- ለዘሠዓለኪ፡ ብእሲ፡ መካነ፡ ብካይ፡ ወፍሥሓ፨
- ባልህኒ፡ እግዝእትየ፡ እንተ፡ ትሠረገዊ፡ ንጽሓ፨
- ሶበ፡ አኅጕሎትየ፡ ጽህቀ፡ ለሐሰት፡ አቡሃ፨
-
- ዐጸደ፡ ወይን፡ ማርያም፡ ዘጣዕመ፡ ፍሬሃ፡ አዳም፨
- ውስነ፡ ጽጌሃ፡ ልምሉም፨
- ኀበ፡ ተቀብረ፡ ወልድኪ፡ ኢየሩሳሌም፨
- ሶበ፡ ሰአለኪ፡ በተማኅፅኖ፡ ነጋዲ፡ ሕሙም፨
- ከመ፡ አብጸሕኪዮ፡ ለስዒም፡ አብጽሕኒ፡ ዮም፨
-
- ዘካርያስ፡ ወሬዛ፡ ህየንተ፡ ኃምሳ፡ ጽጌ፡ ረዳ፨
- አስትዓ፡ ማኅሌት፡ ለኪ፡ ሶበ፡ አወፈየኪ፡ ጋዳ፨
- ከመ፡ አድኀንኪዮ፡ ቅድመ፡ እምቀትለ፡ ፈያት፡ ማእከለ፡ በዳ፨
- አድኅንኒ፡ እግዝእትየ፡ ወባልህኒ፡ እምዕዳ፨
- አመ፡ ኢያሰልጥ፡ ወርቅ፤ ወባህርይ፡ ፀዓዳ፨
-
- ኃይልኪ፡ ማርያም፡ ስነነ፡ ኃጥአን፡ ሰበረ፨
- ኅብስተ፡ አዋልድ፡ ክልኤቲ፡ ሶበ፡ ተፍዕሙ፡ ኅቡረ፨
- በኃይልኪ፡ ዝንቱ፡ እንተ፡ አርአየ፡ መንክረ፨
- ገብርኪ፡ እግዝእትየ፡ ዘኢያአምር፡ ተግባረ፨
- ውስተ፡ መቅደስኪ፡ እፈቱ፡ ኃዲረ፨
-
- ዐረባውያን፡ ዕደው፡ እለ፡ ውኂዘ፡ ማይ፡ ኃየሎሙ፨
- ማርያም፡ ስመኪ፡ ሶበ፡ ዘከሩ፡ ቀዲሙ፨
- ከመ፡ ኮነ፡ ብእሲ፡ እንተ፡ ተሳለቀ፡ ቦሙ፨
- ፀርኪ፡ እግዝእትየ፡ ለለጌሰሙ፡ ወዓሙ፨
- ሲሳየ፡ ሐርገፅ፡ ይኩን፤ ወይዘርዘር፡ ዓፅሙ፨
-
- ኃይለኪ፡ ጽኑዓ፡ ወመንክረኪ፡ ትክሥቲ፨
- ከመ፡ አፍለስኪያ፡ ቅድመ፡ ለደብረ፡ ዕቆና፡ እንታክቲ፨
- መንገለ፡ ኃሣር፡ ወወይሌ፡ ማርያም፡ ወለተ፡ ማቲ፨
- አፍልሲ፡ ክብረ፡ ፀርየ፡ በጽንዓ፡ እዴኪ፡ ዛቲ፨
- አኮኑ፡ ምክህየ፡ ወዝክርየ፡ አንቲ፨
-
- ተወኪፈኪ፡ ስእለቶ፡ እምሐሊብኪ፡ መንፈሳዊ፨
- ዘቀባዕኪ፡ ዓይኖ፡ ለዮሓንስ፡ አረጋዊ፨
- ማርያም፡ ድንግል፡ ወለተ፡ ንጉሥ፡ ሐሴቦናዊ፨
- ተወከፊ፡ ቃለ፡ አፉየ፡ ወጽራኅየ፡ ለብዊ፨
- ወኀበ፡ ስእለትየ፡ ካዕበ፡ ዕዝነኪ፡ ጽልዊ፨
-
- ሕይወተ፡ ሕሙማን፡ ማርያም፡ ዘፈወስኪዮ፡ እምቍስሉ፨
- ለባዕል፡ ጽርዓዊ፡ እንተ፡ ተነድፈ፡ አባሉ፨
- ከመ፡ ተአምረኪ፡ እስብክ፡ ወመንክረኪ፡ እተሉ፨
- ስሕትኒ፡ ምስለ፡ ትፍሥሕት፤ ወምስለ፡ ጥዒና፡ አሀሉ፨
- እስከ፡ አመ፡ እብል፡ ድኅረ፤ ተፈጸመ፡ ኵሉ፨
-
- ለወለተ፡ ብእሲ፡ ባዕል፡ እንተ፡ አዖራ፡ በደዶ፨
- ዘአብራህኪ፡ ዓይና፡ ሶበ፡ ሰአለተኪ፡ በተዓንግዶ፨
- ፈለገ፡ ረድኤት፡ ማርያም፡ ዘትሰመዪ፡ መጌዶ፨
- ለንጉሥ፡ በዕለተ፡ መርዓ፡ ይበልዕ፡ ማዕዶ፨
- በማየ፡ ንጽሕኪ፡ ዘሐፀበ፡ እዶ፨
-
- ማርያም፡ ንግሥት፡ ምስለ፡ ኵሎሙ፡ ደቂቃ፨
- ዘትትሜካህ፡ ብኪ፡ እመ፡ እስራኤል፡ ርብቃ፨
- ለዕቤራይት፡ አሓቲ፡ ክበደ፡ ተፅናስ፡ እንተ፡ አጽዓቃ፨
- ከመ፡ ናዘዝኪያ፡ ወፈጸምኪ፡ ጻህቃ፨
- ናዝዝኒ፡ ጸሎትየ፡ ኢትግባእ፡ ዕራቃ፨
-
- ብኪ፡ ተመይጡ፡ እምፍኖተ፡ ጌጋይ፡ ዘኢመፍትው፨
- እለ፡ ጸሐፉ፡ ስመኪ፡ ክልኤቱ፡ አኃው፨
- ርኂተ፡ ምግባር፡ ማርያም፡ እምፀበለ፡ ኵሉ፡ አፈው፨
- ቅድመ፡ ሠናይትኪ፡ ወርኅራኄኪ፡ ቅድው፨
- አሥምሮ፡ ምኑን፡ ወላህይ፡ ሕስው፨
-
- ሶበ፡ ጊዮርጊስ፡ ኖመ፡ እምጽንዓ፡ ኵነኔ፡ ዕፁብ፨
- ከመ፡ ኣስተርአይኪዮ፡ ሎቱ፡ በአርኣያ፡ ፅዕዱት፡ ርግብ፨
- ወለተ፡ ንጉሥ፡ መክብብ፡ ማርያም፡ ጠባብ፨
- መልዕልተ፡ ምስሐል፡ ከመ፡ ይጼልል፡ ኪሩብ፨
- ጽልልኒ፡ እግዝእትየ፡ ክንፈኪ፡ ዘላህብ፨
-
- ዓቃቢ፡ ምዑክ፡ አመ፡ ምስለ፡ ከጢር፡ ተባአሰ፨
- ዘአጽወስኪ፡ እግሮ፡ እስከነ፡ ፈለሰ፨
- ንግሥተ፡ ሰማይ፡ ማርያም፡ እንተ፡ ወለድኪ፡ ንጉሠ፨
- እግረ፡ ዕድዋንየ፡ ረስዪ፡ ጽቡሰ፨
- ወበዲበ፡ ፀርየ፡ ካዕበ፡ ፈንዊ፡ ተፅናሰ፨
-
- እንዘ፡ ገብረ፡ ዚአኪ፡ አነ፡ እንበለ፡ ሕፀፅ፡ ወንትጋ፨
- ዘእትቀነይ፡ ለኪ፡ አምሳለ፡ አኃው፡ ዘብሔረ፡ ደልጋ፨
- ማርያም፡ ግንግል፡ ማርያም፡ ምልዕተ፡ ጸጋ፨
- ተገደፍኩኑ፡ እምቅድመ፡ አዕይንትኪ፡ እንጋ፨
- ሶበ፡ ተዳደቀኒ፡ ግብተ፡ ለዘመን፡ ፁጋ፨
-
- ለአፍርንጋዊ፡ ብእሲ፡ ሶበ፡ ኀቤኪ፡ ተማኅፀነ፨
- ዘአሕየውኪ፡ እግሮ፡ እንተ፡ ኮነ፡ ዕብነ፨
- ማርያም፡ ለኪ፡ ጊዜ፡ አዓርግ፡ ቍርባነ፨
- ውስተ፡ ትፍሥሕትየ፡ ኢትቶስሒ፡ ኀዘነ፨
- ከወ፡ ይቶስሑ፡ ምስለ፡ ማይ፡ ወይነ፨
-
- ለመርቆሬዎስ፡ ካህን፡ ዘአንጻሕኪ፡ ለምጾ፨
- ወአሕየውኪዮ፡ ፍጹመ፡ እምነ፡ ሕማም፡ ዘታረምጾ፨
- ማርያም፡ ምልሒ፡ ለሕሊናየ፡ ሕፀፆ፨
- ለወልድኪ፡ መምህረ፡ ሕግ፡ ከመ፡ ኢይርሣዕ፡ ተግሣጾ፨
- ከመ፡ ዘይሬኢ፡ በመጽሔት፡ ገጾ፨
-
- ለብእሲት፡ ስብርት፡ ዘአሕየውኪያ፡ እምጻማ፨
- ሶበ፡ ሰአለተኪ፡ አስተሓሚማ፨
- ንጉሠ፡ እስራኤል፡ አቡኪ፡ ለእለ፡ ውስተ፡ ጌት፡ ወኖባማ፨
- ከመ፡ ወሀበ፡ አስትዓ፡ በጊዜ፡ ነሥአ፡ ሰቂማ፨
- ጸጋ፡ መንፈስ፡ ቅዱስ፡ ሀብኒ፡ ማርያም፡ ዘራማ፨
-
- መቅደሰ፡ ኦሪት፡ ማርያም፡ ወወንጌላዊት፡ ሕንፃ፨
- ጰራቅሊጦስ፡ ዘይሔውጻ፨
- እምከርሠ፡ ሶፍያ፡ ፍጡነ፡ ዘሠዐርኪ፡ ፅንሰ፡ ዓመፃ፨
- ይሠዓር፡ ኃጢአትየ፡ ለስእለትኪ፡ በድምፃ፨
- ከመ፡ ምክረ፡ ባሕር፡ ተሥዕረ፡ በኆፃ፨
-
- እምብልሀ፡ አስይፍት፡ ወኵያንው፡ እስከ፡ ነስሓ፡ ወተጋነየ፨
- ዘዐቀብኪዮ፡ ለባሮክ፡ እንተ፡ ይሰመይ፡ ጠዋየ፨
- ኵሎ፡ ዘመነ፡ እንበለ፡ ዳእሙ፡ ሠናየ፨
- ዕቀብኒ፡ እግዝእትየ፡ ከመ፡ ኢይርኣይ፡ ጌጋየ፨
- ወለእመኒ፡ ጌገይኩ፡ ምሕረትኪ፡ ብየ፨
-
- ታቦተ፡ አምላክ፡ ማርያም፡ ዘትትከደኒ፡ ውቱረ፨
- ወርቀ፡ ቅድስና፡ ጽሩየ፡ ወአኮ፡ ብሩረ፨
- አንስጣስዮስ፡ ገብርኪ፡ አመ፡ በደዌሁ፡ ተፅዕረ፨
- ከመ፡ አብሰርኪዮ፡ ዘያስተፌሥሕ፡ ነገረ፨
- ብስራተ፡ ሰላም፡ አስምዕኒ፡ ወትረ፨
-
- እንበለ፡ ማኅፄ፡ ወመፍጽሕ፡ አመ፡ ገዳመ፡ ፈለሰ፨
- ዘሰቈርኪ፡ ሎቱ፡ አረፍተ፡ ዕብን፡ ይቡሰ፨
- ለዘሰአለኪ፡ ብእሲ፡ እንተ፡ ይሰመይ፡ ሣሉሰ፨
- ስቍሪ፡ ገቦ፡ ፀርየ፡ ወዘጸላእትየ፡ ከርሠ፨
- ነሢአኪ፡ ማርያም፡ መጥባሕተ፡ ሐዲሰ፨
-
- ፍቅርኪ፡ አድኀኖ፡ ለበላዔ፡ ሰብእ፡ ጊጉይ፨
- በእንተ፡ ኅፍነ፡ ማይ፡ ዘቆመ፡ በገቦ፡ ነዳይ፨
- ከንቱ፡ ከንቱ፡ ዘታሕተ፡ ሰማይ፨
- ምንትኑ፡ ለእጓለ፡ እመሕያው፡ ሠናይ፨
- እንበለ፡ ፍቅርኪ፡ ማርያም፡ ባህርይ፨
-
- ኦንግሥት፡ ወላዲተ፡ ንጉሥ፡ ፈራቂ፨
- ከመ፡ አድኀንኪዮ፡ ቅድመ፡ ለወልደ፡ መበለት፡ ሠራቂ፨
- ማርያም፡ ዘልፈ፡ አድኅኖትየ፡ ጸሐቂ፨
- ለፀርየኒ፡ እስከ፡ አስናኒሁ፡ የሐቂ፨
- ላዕሌሁ፡ ፈንዊ፡ ጋኔነ፡ ዘይሣቂ፨
-
- ለብእሲት፡ ፅንስት፡ በሰዓተ፡ ወሊድ፡ ወሐሪስ፨
- ማእከለ፡ ሞገድ፡ መፍርህ፡ ዘከደንኪያ፡ በልብስ፨
- ከማሃ፡ ክድንኒ፡ ኢያጽዕቀኒ፡ ተጽናስ፨
- ማርያም፡ እግዝእትየ፡ ዘአጥረይክኒ፡ እምከርሥ፨
- አዕዳለ፡ ብርሃን፡ ወአኮ፡ ዘማዕስ፨
-
- ሴስይኒ፡ ማርያም፡ ለፀማድኪ፡ ዐሳብ፨
- ኅብስተ፡ አእምሮ፡ ሠናይ፡ ወወይነ፡ ጥበብ፨
- እመኒ፡ ፈድፈደ፡ ኃጢአትየ፡ እምሕዝብ፨
- ተዘከሪ፡ እግዝእትየ፡ በርኅራኄኪ፡ ዕፁብ፨
- ከመ፡ አስተይኪዮ፡ ማየ፡ ለጽሙዕ፡ ከልብ፨
-
- መላእክተ፡ ሰማይ፡ ኵሎሙ፡ እለ፡ ስብሓተ፡ ለመዱ፨
- ወጠቢባነ፡ ምድር፡ ዓዲ፡ እለ፡ ኅቡረ፡ ተዓለዱ፨
- ጽሒፈ፡ ውዳሴኪ፡ እሙ፡ እንዘ፡ ይፈቅዱ፨
- ኢይክሉ፡ ጥንቁቀ፡ ፈጽሞ፡ ለለአሓዱ፡ አሓዱ፨
- እስመ፡ ከመ፡ ኆፃ፡ ብዙኅ፡ ኢውሱን፡ ፍቅዱ፨
-
- ወላዲተ፡ አምላክ፡ ማርያም፡ እንበለ፡ ሰብሳብ፡ ወሩካቤ፨
- በይነ፡ ዘአቅረብኩ፡ ለኪ፡ ንስቲተ፡ ቃለ፡ ይባቤ፨
- ፈትቲ፡ እሙ፡ በረከተ፡ አፉኪ፡ ሙሐዘ፡ ከርቤ፨
- ለነዳይ፡ ብእሲ፡ ወለዘረከቦ፡ ምንዳቤ፨
- ኅብስተከ፡ ፈትት፡ ኢሳይያስ፡ ይቤ፨