Subjects
Martyr
እስጢፋኖስ፡
ʾƎsṭifānos
Stephen
Stephen
Malkəʾ
-
- በስመ፡ እግዚአብሔር፡ አብ፡ ዘእምቅድመ፡ ዓለም፡ ህላዌሁ፨
- ወበስመ፡ እግዚአብሔር፡ ወልድ፡ ዘእምቅድመ፡ ዓለም፡ ህላዌሁ፨
- ወበስመ፡ መንፈስ፡ ቅዱስ፡ እግዚአብሔር፡ ዘይሤልስ፡ በግጻዌሁ፨
- ዘእምፈቃድየ፡ ወዘእምሥምረትየ፡ ናሁ፨
- ለእስጢፋኖስ፡ እዌጥን፡ ዜናሁ፨
-
- ሰላም፡ ለዝክረ፡ ስምከ፡ በይሁዳ፡ ዘተዐውቀ፨
- በውስተ፡ እስራኤል፡ ዘአብየ፡ ወልህቀ፨
- እስጢፋኖስ፡ ዘትጸብት፡ ትንቢተ፡ ነቢያት፡ ዕሙቀ፨
- ሣህልከ፡ ወረድኤተከ፡ እንዘ፡ አኀሥሥ፡ ጥዩቀ፨
- ልብየኒ፡ ወሥጋየ፡ ሐልቀ፨
-
- ኦእስጢፋኖስ፡ ፈክር፡ እዘዛ፨
- ወእዜምር፡ ላቲ፡ በቃለ፡ መሰንቆ፡ ወበቃለ፡ ብዕዛ፨
- ለርእስከ፡ ሠናይት፡ ስቴ፡ ጽዋዐ፡ ስምዕ፡ ዘአሰአዘዛ፨
- አመ፡ ወገሩከ፡ ካህናተ፡ እስራኤል፡ በሉዛ፨
- በቅድመ፡ ገጹ፡ ለሳውል፡ ወሬዛ፨
-
- እዌድስ፡ ቀራንብቲከ፡ በቃለ፡ ማሕሌት፡ ውዱድ፨
- ዘምስለ፡ ሰጊድ፨
- እስጢፋኖስ፡ ተልሚድ፨
- ለመልእክተ፡ ጻድቃን፡ ጽሙድ፨
- በየማነ፡ አብ፡ ነጸርኮ፡ ለወልድ፨
-
- ለአዕይንቲከ፡ ፍሡሓነ፡ ፀጋማየ፡ ወየማነ፨
- ሰላም፡ እብል፡ እንዘ፡ አቄርብ፡ ድርሳነ፨
- ዘኮንከ፡ ለመልእክተ፡ ጻድቃን፡ ወእምነ፨
- ሀቢኖሙ፡ ሰሚኖሙ፡ ሴሙከ፡ ያቆነ፨
- አርድእተ፡ ዋሕድ፡ ዘቦሙ፡ ስልጣነ፨
-
- ሰላም፡ ለመላትሒከ፡ ዘያቅያሃይ፡ ከመ፡ ጽጌ፨
- እንበለ፡ ኑታጌ፨
- ዲያቆን፡ መዝለፌ፡ ትምህርቶሙ፡ ለቤተ፡ ፋጌ፨
- አንተ፡ ውእቱ፡ ንኡስ፡ ሐርጌ፨
- በጽንዐ፡ ኀይልከ፡ ዘትቀትል፡ ነጌ፨
-
- ለአእናፊከ፡ አስተበፅዖን፡ ፈድፋደ፨
- እንዘ፡ አደንን፡ ክሳደ፨
- እስጢፋኖስ፡ ዲያቆን፡ ከመ፡ ትጸመድ፡ ማእደ፨
- ሶበ፡ አንበሩ፡ ላዕሌከ፡ አርድእተ፡ ኢየሱስ፡ እደ፨
- መንፈስ፡ ቅዱስ፡ እምሰማይ፡ ወረደ፨
-
- ብፁዕ፡ እስጢፋኖስ፡ ለዘባንከ፡ እሳለሞ፨
- በአስተርክቦ፡ ወበአስተሐምሞ፨
- ዕበየ፡ ዘባንከ፡ ለሕሊናየ፡ ገሪሞ፨
- በውግረተ፡ እብን፡ ኅዳጠ፡ ሐሚሞ፨
- ልብሰ፡ ክብር፡ ነሥአ፡ ዘአምላክ፡ አነሞ፨
-
- ለሕፀኒሁ፡ ግናየ፡ አቄርብ፡ በዝየ፨
- ለስእጢፋኖስ፡ አቡየ፨
- እኩያን፡ አይሁድ፡ ዘኢተምህሩ፡ ሠናየ፨
- አመ፡ ወገርዎ፡ እንዘ፡ ይብል፡ ጸለየ፨
- ሥረይ፡ ሎሙ፡ አባ፡ ኢተረሲ፡ ጌጋየ፨
-
- ሰላም፡ ሰላም፡ ለቆምከ፡ ዐርዝ፨
- ወእመ፡ አኮ፡ በለዝ፨
- እስጢፋኖስ፡ የዋህ፡ ለመምህራኒሁ፡ ዕዙዝ፨
- ያስተፌሥሖሙ፡ ከመ፡ ስቴ፡ ወይን፡ ሐዋዝ፨
- መጽሐፈ፡ ገድልከ፡ ለዐረብ፡ ወግዕዝ፨
-
- ሰላም፡ እብል፡ ለኵሎን፡ መልክእከ፡ ምስለ፡ ግናይ፨
- ውዳሴ፡ መልክእከሰ፡ እስጢፋኖስ፡ ኅሩይ፨
- ከመ፡ መኃልይ፨
- በውስተ፡ ስታይ፨
- ናሁ፡ አዳም፡ ወናሁ፡ ሠናይ፨
-
- ሰላም፡ ለግንዘትከ፡ ዘገነዝዎ፡ አበው፨
- በብካይ፡ ብዙኅ፡ ወበሰቆቃው፨
- ወለመቃብሪከ፡ ሰላም፡ እስጢፋኖስ፡ ሥርግው፨
- ባርከኒ፡ አባ፡ በበረከተ፡ አብ፡ ፍትው፨
- እንዘ፡ ይኔጽሩከ፡ ጉቡኣን፡ አኃው፨
-
- እስጢፋኖስ፡ ባሕርየ፡ ስም፡ ለእግዚአብሔር፡ ካህኑ፨
- ስባሔ፡ አምላክ፡ ይዜኑ፨
- መጽሐፈ፡ ገድልከ፡ ካፃ፡ ጸበለ፡ አፈው፡ ዘይጼኑ፨
- መኑ፡ መኑ፡ ከማከ፡ መኑ፨
- ኅቡኣተ፡ በሰማይ፡ ዘርእየ፡ በዐይኑ፨
-
- ኦእስጢፋኖስ፡ አማኅኩከ፡ ወበማኅልይ፨
- ወሪደነ፡ ናሁ፡ እምኑኀ፡ ሰማይ፨
- ለክብር፡ ወለዕበይ፨
- ወለበረከት፡ ሠናይ፨
- ተዳደቀኒ፡ ሰማዕት፡ ኅሩይ፨