Bibliography
Z
Sokolinskaia, Evgenia, and Ute Pietruschka. “Mäzmurä Dǝngǝl.” In Encyclopaedia Aethiopica, edited by Siegbert Uhlig, III:896b–97. Wiesbaden: Harrassowitz Verlag, 2007.
- ማስገቢያ፡
-
- ውዳሴ፡ ዕበይኪ፡ ማርያም፡ እንተ፡ ጸሐፈ፡ በዓቅሙ፨
- እስመ፡ ዖፈ፡ ሕለት፡ ገብርኪ፡ ለወልድኪ፡ ሤጠ፡ ደሙ፨
- መዝሙረ፡ ድንግል፡ ይኩን፡ እንዘ፡ ይብል፡ ትርጓሜ፡ ስሙ፨
- እምቃለ፡ ዳዊት፡ አስተዋፂኦ፡ እምጥንቱ፡ እስከ፡ ተፍጻሙ፨
- ዘወደሰኪ፡ ባርኪዮ፡ እሙ፨
-
- ነዓ፡ ኀቤየ፡ ዳዊት፡ ንጉሠ፡ እስራኤል፨
- በዐለ፡ መዝሙር፡ ሠናይ፡ ወጥዑመ፡ ቃል፨
- ታለብወኒ፡ ነገረ፡ ወፍካሬ፡ ኵሉ፡ አምሳል፨
- ከመ፡ እወድሳ፡ ለማርያም፡ ድንግል፨
- እንዘ፡ አነ፡ እጸርሕ፡ ወእብል፨
-
- ብፁዕ፡ ብእሲ፡ በምክረ፡ ዚአኪ፡ ዘሖረ፨
- ወዘያነብብ፡ ሕገኪ፡ ኵሎ፡ አሚረ፨
- ማርያም፡ ስቅይኒ፡ ዘውዳሴኪ፡ ምንሐረ፨
- ከመ፡ እኩን፡ ተክለ፡ ገነት፡ ወዕፀ፡ ሥሙረ፨
- ዘምስለ፡ ፍሬ፡ ወቈጽል፡ ዘይትረከብ፡ ወትረ፨
-
- ለምንት፡ ማርያም፡ አሕዛበ፡ ምድር፡ አንገለጉ፨
- አኮኑ፡ ይንብቡ፡ ውዳሴ፡ ዚአኪ፡ ዘበበ፡ ሕጉ፨
- እለ፡ ወረዱ፡ ቀላየ፡ ወእለ፡ ሰማያተ፡ ዓርጉ፨
- ሶበ፡ ኀየሎሙ፡ ለስብሐትኪ፡ ፈለጉ፨
- እንበለ፡ ይጽብቱ፡ መብዝኅቶ፡ ኀደጉ፨
-
- ሚበዝኁ፡ እለ፡ ይሣቅዩኒ፡ እሙ፨
- ወበላዕሌየ፡ ብዙኃን፡ ቆሙ፨
- ማርያም፡ ርድእኒ፡ ለወልድኪ፡ በእንተ፡ ደሙ፨
- ከመ፡ ይትኀፈሩ፡ እለ፡ ይብሉኒ፡ ኵሎሙ፨
- ማእዜ፡ ይመውት፡ ወይሠዓር፡ ስሙ፨
-
- ሶበ፡ ጸዋዕኩኪ፡ ማርያም፡ ስምዕኒ፡ ጸሎተ፨
- ወእምንዳቤየ፡ አርኅቢ፡ ሊተ፨
- ወካዕበ፡ ደዪ፡ ውስተ፡ ልብየ፡ ትፍሥሕተ፨
- ከመ፡ ይትዓወቅ፡ በላዕሌየ፡ ወያስተርኢ፡ ክሡተ፨
- ብርሃነ፡ ገጽኪ፡ ዘአልቦ፡ ጽልመተ፨
-
- ቃልየ፡ አጽምኢ፡ ወጽራሕየ፡ ለብዊ፨
- ንግሥትየ፡ አንቲ፡ እመ፡ ንጉሥ፡ ሰማያዊ፨
- ማርያም፡ ታቦት፡ ኅቢቶሙ፡ ለሕዝበ፡ ሌዊ፨
- ዕቀብኒ፡ ወሠውርኒ፡ እመሥገርተ፡ ልሳን፡ ነዓዊ፨
- ከመ፡ ዘሠናይ፡ ወትጉህ፡ ኖላዊ፨
-
- ኦማርያም፡ ኢትቅሥፈኒ፡ በመዓቱ፨
- ይገሥጸኒ፡ በጽድቁ፡ ወይዛለፈኒ፡ በምሕረቱ፨
- አበ፡ ጠቢባን፡ ወልድኪ፡ ወገባሬ፡ ፍጥረት፡ ባሕቲቱ፨
- ለዘያፈቅር፡ ኪያኪ፡ ከመዝ፡ ሥርዓቱ፨
- ለኃጥእሰ፡ ጸዋግ፡ ሞቱ፨
-
- ብኪ፡ ተወከልኩ፡ ኢትግድፍኒ፡ ገዲፈ፨
- አድኅንኒ፡ እምኵሎሙ፡ እለ፡ ይረውዱኒ፡ ዘልፈ፨
- ሶበ፡ እጼውዕ፡ ስመኪ፡ ከሢትየ፡ አፈ፨
- በላዕለ፡ ፀርየ፡ እንዘ፡ ትመልሒ፡ ሰይፈ፨
- እምቅድመ፡ ገጽየ፡ ማርያም፡ አንትዒ፡ አእላፈ፨
-
- ጥቀ፡ ተሰብሐ፡ ስምኪ፡ መዋኢ፨
- ወበኵሉ፡ ረዳኢ፨
- ሰማያተኒ፡ ግብረ፡ ወልድኪ፡ ንሬኢ፨
- በእንተ፡ ጸላኢ፡ ወበእንተ፡ ኵሉ፡ ገፋዒ፨
- ማርያም፡ ተንሥኢ፡ ወፍጡነ፡ ንዒ፨
-
- እገኒ፡ ለኪ፡ በኵሉ፡ ልብየ፨
- ወእነግር፡ ኵሎ፡ ዘውዳሴኪ፡ ዕበየ፨
- ከመ፡ እትፈሣሕ፡ ብኪ፡ ማርያም፡ እምየ፨
- ይድወዩ፡ ወይትኀጐሉ፡ እምቅድመ፡ ገጽየ፨
- እለ፡ ያዓብዩ፡ አፉሆሙ፡ ላዕሌየ፨
-
- በእግዚአብሔር፡ ተወከልኩ፡ እፎ፡ ይብልዋ፨
- ለነፍስየ፡ ነአስ፡ እለ፡ ይፀብእዋ፨
- በሐኪ፡ ማርያም፡ ሐዳስዩ፡ ጣዕዋ፨
- ከመ፡ ይቅትሎ፡ ለፀርየ፡ ወለፀረ፡ እምየ፡ ሔዋ፨
- ጽንዓ፡ ምክረ፡ ብእሲት፡ ሀብኒ፡ ዘትነብር፡ ቤጤልዋ፨
-
- አድኅንኒ፡ እግዝእትየ፡ እስመ፡ ሐልቀ፡ ኄር፨
- ወውሕደ፡ ሃይማኖት፡ እምነ፡ ምድር፨
- እመኒ፡ ተንሥኡ፡ ለተፃብኦትየ፡ ፀር፨
- በእኪት፡ ወበኃሣር፡ ትተልዎሙ፡ ወግር፨
- ወበላዕሌሆሙ፡ ይደቁ፡ አድባር፨
-
- እስከ፡ ማእዜኑ፡ እግዝእትየ፡ ትረስዕኒ፡ እብል፨
- ወትፄዕረኒ፡ ልብየ፡ በኵሉ፡ መዋዕል፨
- ነጽሪ፡ ኀቤየ፡ ወተመየጢ፡ በሣህል፨
- እሴብሖ፡ ለዕበይኪ፡ ድንግል፨
- ወእዜምር፡ ለስምኪ፡ ልዑል፨
-
- ይብል፡ አብድ፡ እግዚአብሔር፡ አልቦ፨
- በእንቲአኪ፡ ዘይነብብ፡ ነገረ፡ ሐሜት፡ ወተሐዝቦ፨
- ማርያም፡ ድንግል፡ መቅለሊተ፡ ክበድ፡ ለዘዓፀቦ፨
- ዘሰ፡ እግዚአብሔር፡ ዓተቦ፨
- ለዕበየ፡ ኂሩትኪ፡ ዘልፈ፡ ያቄርብ፡ የብቦ፨
-
- መኑ፡ የኀድር፡ ውስተ፡ ጽላሎትኪ፡ ዓርዝ፨
- ወመኑ፡ ያጸልል፡ ውስተ፡ ቤትኪ፡ ግዑዝ፨
- እንበለ፡ ዘይረውጽ፡ ብእሲ፡ በዕፍረትኪ፡ ምዑዝ፨
- ማርያም፡ ሠናይተ፡ ግዕዝ፡ በዘዚአኪ፡ ትእዛዝ፨
- ዝክረ፡ ሞት፡ ይሠዓር፡ ወይዘርዘር፡ ኅምዝ፨
-
- ዕቀብኒ፡ ማርያም፡ እስመ፡ ተወከልኩኪ፡ አነ፨
- ወጊዜ፡ ሰአልኩኪ፡ ዓዲ፡ ስምዕኒ፡ ፍጡነ፨
- እምዕበይኪ፡ ብዙኅ፡ ዘአልቦ፡ ወሰነ፨
- በምድርሰ፡ ውሑደ፡ ርኢነ፨
- ዘበሰማያት፡ መኑ፡ ፈተነ፨
-
- ጐሥዓ፡ ልብየ፡ ቃለ፡ ሠናየ፨
- ከመ፡ ቀለመ፡ ጸሐፊ፡ ዘጠበጠበ፡ ይጽሕፍ፡ ልሳንየ፨
- እንዘ፡ እዌድስ፡ ስነኪ፡ ወዘዚአኪ፡ ላህየ፨
- ኦማርያም፡ እምየ፨
- እስመ፡ ለኪ፡ ወትረ፡ አየድዕ፡ ግብርየ፨
-
- ምሕረተኪ፡ እሴብሕ፡ እግዝእትየ፡ ማርያም፨
- ለዓለም፡ ወለዓለመ፡ ዓለም፨
- እስመ፡ ጽድቀ፡ ዚአኪ፡ ጸንዓ፡ በአርያም፨
- ለታቦርኒ፡ ወአርሞኔም፨
- ያስተፌሥሖሙ፡ ስመ፡ ዚአኪ፡ ጥዑም፨
-
- ውስተ፡ አፍላገ፡ ባቢሎን፡ ነበሩ፡ ወበከዩ፡ እለ፡ እዝራ፨
- በእንተ፡ ውእየታ፡ ለጽዮን፡ ወበእንተ፡ ኵሉ፡ ኀሣራ፨
- ለኪሰ፡ ማርያም፡ ወለተ፡ ቅሥራ፨
- እንዘ፡ ይዘብጡ፡ ከበሮ፡ ወይነፍሑ፡ እንዚራ፨
- ዳዊት፡ ይሴብሕ፡ ወትዘፍን፡ ዲቦራ፨
-
- ሰብሕዎ፡ ለእግዚአብሔር፡ በቅዱሳኑ፡ ቅዱስ፨
- ሰብሕዎ፡ በጽንዓ፡ ኀይሉ፡ ለእግዚአብሔር፡ ንጉሥ፨
- ለኪኒ፡ ማርያም፡ ዘወለድኪዮ፡ እምከርሥ፨
- ሰብሑኪ፡ በጸናጽል፡ ወበይባቤ፡ ሐዲስ፨
- ኵሉ፡ ነፍስ፡ ወኵሉ፡ መንፈስ፨
-
- ንኡስ፡ አነ፡ እምእኃውየ፡ ኵሎሙ፨
- ከናፍርየ፡ ያስተዋድዳ፡ ዳእሙ፨
- ስብሐታተኪ፡ ማርያም፡ ለመዝሙረ፡ ዳዊት፡ በዓቅሙ፨
- ዝኬ፡ ለነገርየ፡ ተፍጻሙ፨
- ወለጸሎትየ፡ ውእቱ፡ ማኅተሙ፨
-
- ኦማርያም፡ ዘውዳሴኪ፡ ተዝካረ፨
- ጸሐፍኩ፡ ኅዳጠ፡ በአምጣነ፡ ዳዊት፡ ዘመረ፨
- እስመ፡ ኢይክል፡ ፈጽሞ፡ ዘዚአኪ፡ ክብረ፨
- በኍልቈ፡ ከዋክብት፡ ወኆፃ፡ ባሕር፡ እመ፡ አብዛኅኩ፡ ነገረ፨
- ወበኍልቈ፡ አቍጽል፡ ወሣዕር፡ ዘይከድኑ፡ ምድረ፨
-
- በቀዳሚት፡ ዕለት፡ እንተ፡ ትሰመይ፡ እሑደ፨
- እምዘ፡ ገብረ፡ እግዚአብሔር፡ ሰባዕተ፡ ዘመደ፨
- ኦማርያም፡ እምየ፡ እንዘ፡ አቀድም፡ ሰጊደ፨
- አቄርብ፡ ዮም፡ ስብሐታተኪ፡ ፈድፋደ፨
- አሐደ፡ ወካልአ፡ እደ፨
-
- ንሴብሖ፡ ለእግዚአብሔር፡ በስብሐተ፡ ነቢይ፡ ሙሴ፨
- እንዘ፡ ናተሉ፡ ለዕበይኪ፡ ውዳሴ፨
- ማርያም፡ በትር፡ ዘሠረፅኪ፡ እምሠርወ፡ እሴ፨
- መፈውሰ፡ ነፍስ፡ ወዘያነጽሕ፡ አባሴ፨
- እምጕንደ፡ ዚአኪ፡ ጸገየ፡ ቅዳሴ፨
-
- ይትባረክ፡ እግዚአብሔር፡ አምላከ፡ ሠለስቱ፡ ደቂቅ፨
- ዘረሰየኪ፡ ሙባአ፡ ወሙፃአ፡ ለፀሓየ፡ ጽድቅ፨
- ማርያም፡ ኆኅት፡ ዘተቀመርከ፡ በሠርቅ፨
- ማዕከለ፡ ኀዋኅው፡ ወመሳክው፡ ዘኡደቶን፡ ጥንቁቅ፨
- ኀበ፡ ይወፅኡ፡ ቦን፡ ጥዒና፡ ወሞት፨
-
- ታዐብዮ፡ ነፍስየ፡ በአምጣነ፡ ብየ፡ ክሂል፨
- ለእግዚአብሔር፡ ወልድከ፡ ከመ፡ ኣቅደምኪ፡ ብሂል፨
- በእንቲአየ፡ ገብረ፡ ዐቢያተ፡ ኀይለ፨
- ትሑታነሂ፡ በትሕትናሁ፡ አልዐለ፨
- ወለነዳያን፡ አጽገቦሙ፡ እክለ፨
-
- መኃልየ፡ መኃልይ፡ ዝውእቱ፡ ዘሰሎሞን፨
- እመዝሙረ፡ ዳዊት፡ ዘይተሉ፡ ወእምስብሐተ፡ ሙሴ፡ ካህን፨
- አዳም፡ ይቤ፡ ጥበ፡ ዚአኪ፡ እምወይን፨
- ማርያም፡ ጥዕምተ፡ ስም፡ እምነ፡ ዕቍረ፡ ማየ፡ ልብን፨
- ወእምነ፡ ፀበል፡ ዘስሒን፡ ለምሥዋዕ፡ ዕዩን፨
-
- መኑ፡ ይእቲ፡ ዛቲ፡ ትቤ፡ ራእየ፨
- እንተ፡ ትሔውጽ፡ ከመ፡ ጎሕ፡ ድኅረ፡ ለያልይ፨
- በእንቲአኪ፡ ማርያም፡ ሙፃአ፡ ፀሐይ፨
- ክንፈ፡ ፍቅርኪ፡ ክንፈ፡ እሳት፡ ውዑይ፨
- ኢይክል፡ አጥፍኦታ፡ ማይ፨
-
- ስብሐታተኪ፡ ማርያም፡ ከመ፡ እንተ፡ ሕልቀት፡ አዖድኩ፨
- ዘበበአፃብዕ፡ እንዘ፡ ያሰምኩ፨
- ዘተመነይኩ፡ ሀብኒ፡ ወዘኃሠሥኩ፨
- በማሕሌት፡ ወበመዝሙር፡ ስመ፡ ዚአኪ፡ ነገርኩ፨
- ወዘወሀብክኒ፡ ግብረኪ፡ ፈጸምኩ፨