Subjects
Martyr
ሰማዕታት፡
Samāʿtāt
The Martyrs
The Martyrs
Malkəʾ
-
- ገድል፡ ወስም፡ ለስምዐ፡ ክርስቶስ፡ ዘላዕሉ፨
- እንተ፡ ኮነ፡ በበ፡ መዋዕሉ፨
- ለዘአጽሐቀኒ፡ እንግር፡ ዜና፡ ሰማዕታት፡ እሉ፨
- እንበለ፡ እኅድግ፡ አሐደ፡ ከመ፡ በምጽሐፍ፡ አዕሉ፨
- ምክረ፡ ጸላእትየ፡ አምላኪየ፡ እሉ፨
-
- ነገር፡ ወድቀ፡ ውስተ፡ አፉየ፡ ወአስተሐወዝኩ፡ ጣዕሞ፨
- ዝክረ፡ ሰማዕታት፡ እንብብ፡ ለኅሊናየ፡ አደሞ፨
- መንፈሰ፡ ጰራቅሊጦስ፡ የዋህ፡ ወሕሩም፡ እምተቀይሞ፨
- ለአንቀጸ፡ ልብየ፡ እንተ፡ ተዐጽወ፡ ፍትሐ፡ ማሕተሞ፨
- እንበለ፡ ሐኬት፡ ከመ፡ አብጽሕ፡ አቅሞ፨
-
- ሰላም፡ ለዝክረ፡ ስምክሙ፡ ዘቀደመ፡ ዝክሩ፨
- ሰማያት፡ ወምድር፡ እንበለ፡ ይትፈጠሩ፨
- አጋእዝትየ፡ ሰማዕታት፡ ለክርስቶስ፡ ሰብአ፡ ምሥጢሩ፨
- አስተበቍዐክሙ፡ በአስተርክቦ፡ ከመ፡ ኪያየ፡ ታኅድሩ፨
- ኀበ፡ ሤመክሙ፡ በአህጕራት፡ ዐሥሩ፨
-
- ሰላም፡ እብል፡ ለጽዋዔክሙ፡ ኅሬ፨
- በአፍራስ፡ ጸዐድው፡ ከመ፡ ትትልዉ፡ ፈጣሬ፨
- ሰማዕታተ፡ ክርስቶስ፡ ፍትዋት፡ ወጽዱላነ፡ ሥን፡ እምወራውሬ፨
- ለዕበይክሙ፡ እንተ፡ አቅረብኩ፡ ዝማሬ፨
- ኀበ፡ ህላዌክሙ፡ አጋእዝት፡ ክፍሉኒ፡ ድማሬ፨
-
- ሰላም፡ ለርእስክሙ፡ ወለሥዕርትክሙ፡ ዘላዕሉ፨
- በአክሊለ፡ መዊእ፡ እለ፡ ተከለሉ፨
- ሰማዕተ፡ ክርስቶስ፡ ሣህለ፡ በእንቲአየ፡ ተንብሉ፨
- አልቦ፡ አልቦ፡ ዘይስአነክሙ፡ ኵሉ፨
- በከመ፡ ነበበ፡ ኢይኄሱ፡ ለሕያው፡ ቃሉ፨
-
- ሰላም፡ ለምለክእክሙ፡ ዘሐነጾን፡ ኬንያ፨
- በዘዚአሁ፡ አርአያ፨
- ሰማዕታተ፡ ክርስቶስ፡ ንዑ፡ ምስለ፡ ቃለ፡ ስሐት፡ ወሃሌ፡ ሉያ፨
- ለሰላምክሙ፡ ሶበ፡ ታነብብ፡ ዕበያ፨
- ሀብተ፡ ቡራኬክሙ፡ መንፈስየ፡ እንዘ፡ ትጸንሕ፡ ነያ፨
-
- ሰላም፡ ለክላሌክሙ፡ በአፈ፡ አንበሳ፡ መፍርህ፨
- በርስነ፡ ነበልባል፡ ውዑይ፡ ወበልሳነ፡ ሰይፍ፡ በሊሕ፨
- ሰማዕታተ፡ ክርስቶስ፡ ክቡራን፡ ውሉደ፡ ጽባሕ፨
- እምቅድመ፡ ሐተታ፡ አመ፡ ይትገበር፡ ምሳሕ፨
- አብአኒ፡ ምስሌክሙ፡ ውስተ፡ ጽዮን፡ ጽርሕ፨
-
- ሰላም፡ ለተኣምሪክሙ፡ ዘኢይትአመር፡ ወሥኑ፨
- ወኢይትኌለቍ፡ መጠኑ፨
- ሰማዕታተ፡ ክርስቶስ፡ ሥልጣነ፡ እንተ፡ ነሣእክሙ፡ እምሥልጣኑ፨
- ዘእገብር፡ አነ፡ ተገበሩ፡ ይቤለክሙ፡ አኮኑ፨
- ጽድቀ፡ አምላክነ፡ በጽዱቅ፡ ልሳኑ፨
-
- ፈጸምኩ፡ በድርየ፡ ወሃይማኖትየ፡ ዕቁብ፨
- ጽኑሕ፡ ሊተ፡ አክሊለ፡ ምስጋና፡ ዕጹብ፨
- ሰማዕታተ፡ ክርስቶስ፡ ሀቡኒ፡ ለገብርክሙ፡ ዐሳብ፨
- ርስተ፡ በረከት፡ እምጽድቅክሙ፡ መዝገብ፨
- ከመ፡ ንዋየ፡ ቤት፡ ለውሉዱ፡ ያስተዋርስ፡ አብ፨
-
- በኪዳነ፡ ማርያም፡ ድንግል፡ ወበምሕረተ፡ ወልዳ፡ ስቡሕ፨
- እንዘ፡ እትዌከል፡ ፈድፋደ፡ ምስለ፡ ተአምኖ፡ ብዙኅ፨
- ወኪዳነ፡ ሰማዕት፡ ብየ፡ ኪዳነ፡ ተውሳኩ፡ ለኖኅ፨
- ለእመ፡ ዘንመ፡ እምሰማይ፡ ወእመ፡ ነቅዐ፡ እምኰኵሕ፨
- ኢያፍርሀኒ፡ ማዕበሉ፡ ለአይኅ፨