Subjects
Righteous
ሊቃኖስ፡
Liqānos
Liqānos
Liqānos
Malkəʾ
-
- ጐሥዐ፡ ልብየ፡ ቃለ፡ ሠናየ፨
- ከመ፡ እዜኑ፡ ግብረከ፡ ሊቃኖስ፡ አቡየ፨
- እስመ፡ ፍቅርከ፡ ሐፀነኒ፡ እምከርሠ፡ እምየ፨
- ሢም፡ እግዚኦ፡ ዐቃቤ፡ ለአፉየ፨
- ወማዕፆ፡ ዘዐቅሞ፡ ለከናፍርየ፨
-
- ሰላም፡ ለዝክረ፡ ስምከ፡ ዘተሴረከ፡ ፊደሉ፨
- በጽላተ፡ ሰማይ፡ ዘላዕሉ፨
- ሊቃኖስ፡ ቅዱስ፡ መትልወ፡ ቅዱሳን፡ ኵሉ፨
- መፍትው፡ ዘልፈ፡ ደቂቅከ፡ በእንቲአከ፡ ይብሉ፨
- ዝክረ፡ ጻድቅ፡ ለዓለም፡ ይሄሉ፨
-
- ኣየድዕ፡ አንሰ፡ ዘምስለ፡ ግናይ፡ ለክሳድከ፡ ሰላማ፨
- ወበአፈ፡ ለብየ፡ እስዕማ፨
- ሊቃኖስ፡ አንተ፡ ለማኅቶትየ፡ ተቅዋማ፨
- ፌማ፡ ፌማ፡ ሶበ፡ አፍቀረከ፡ ፌማ፨
- በክሳድከ፡ ወደየ፡ አስኬማ፨
-
- ኦአቡየ፡ ሊቃኖስ፡ ለአብራኪከ፡ ሰላም፡ እብሎሙ፨
- ዕሥራ፡ ዓመተ፡ ወኀምስቱ፡ እለ፡ በእንተ፡ ጽድቅ፡ ደክሙ፨
- ንጉሠ፡ እስራኤል፡ ዳዊት፡ በከመ፡ ይቤ፡ ቀዲሙ፨
- እንዘ፡ እግዚአብሔር፡ በኀይለ፡ መንፈሱ፡ ያጸንዖሙ፨
- ለጻድቃን፡ ብዙኅ፡ ሕማሞሙ፨
-
- ሰላም፡ ለመቃብሪከ፡ ወለዝኅርከ፡ ሐዲስ፨
- ዐፀደ፡ ፍሥሓ፡ ወሞገሥ፨
- ሊቃኖስ፡ ጠቢብ፡ ሊቀ፡ ደናግል፡ ኃምስ፨
- ጸግወኒ፡ አባ፡ በረከተ፡ አስማት፡ ሠላስ፨
- አብ፡ ወወልድ፡ ወመንፈስ፡ ቅዱስ፨
-
- ኀበ፡ ተቀብረ፡ ሥጋሁ፡ ለክርስቶስ፡ ቃል፨
- ከመ፡ ኢተረክበ፡ ዐፅሙ፡ እምድኅረ፡ ሠላስ፡ መዋዕል፨
- እንበለ፡ ዳዕሙ፡ መግነዙ፡ ወሰበነ፡ ርእሱ፡ ጥብሉል፨
- በድነ፡ ሥጋከ፡ ከማሁ፡ ሊቃኖስ፡ ኮል፨
- ኢትረክበ፡ በውስተ፡ ዝኅር፡ ለከሢተ፡ መንክር፡ ወኀይል፨
- እስመ፡ እምኀበ፡ አብ፡ ኮነ፡ ሕይወትከ፡ ጠል፨
-
- ስብሐት፡ ለእግዚአብሔር፡ ፈጽሞ፡ ዘአክሀለኒ፨
- በኀይለ፡ መንፈሱ፡ ቅዱስ፡ እንዘ፡ ይረድአኒ፨
- ሊቃኖስ፡ ምልክያስ፡ ዘካዕበተ፡ ስምከ፡ ተምዐኒ፨
- ውዳሴ፡ መልክእከ፡ ዝንቱ፡ እምነ፡ ኵሉ፡ ዘይሤኒ፨
- መባአኒ፡ ወቍርባነኒ፨
-
- ኣእኵቶ፡ ለእግዚአብሔር፡ ወዘልፈ፡ እባርኮ፨
- በሰጊድ፡ ወአስተባርኮ፨
- እስመ፡ ድልወ፡ ረስየኒ፡ ለነቢብ፡ ወሴርኮ፨
- ዜና፡ ዝክርከ፡ ሊቃኖስ፡ እምልበ፡ አእሩግ፡ ዘሠወርኮ፨
- እስከ፡ በአፉየ፡ ይትከሠት፡ ሠመርኮ፨
-
- ስብሐት፡ ለእግዚአብሔር፡ ዘአክሀለኒ፡ ፈጽሞ፨
- ዜና፡ ዝክርከ፡ ዘወጠንኩ፡ በጽሒቅ፡ ወአስተሐምሞ፨
- ሊቃኖስ፡ ጠቢብ፡ መዝገበ፡ ትዕግሥት፡ ወአርምሞ፨
- ለቃለ፡ አፉየ፡ ውስተ፡ ልብከ፡ ሕትሞ፨
- ከመ፡ ቃለ፡ ነጐድጓድ፡ ሐተመ፡ ዮሐንስ፡ በፍጥሞ፨