Details
-
- ይትባረክ፡ እግዚአብሔር፡ ለክብርከ፡ ዘደመራ፨
- በክብረ፡ ዛቲ፡ መቅደስ፡ ለምኅደረ፡ አምላክ፡ ማኅደራ፨
- ህርያቆስ፡ ካህና፡ ለደብረ፡ ሊባኖስ፡ ደብተራ፨
- ባሕቱ፡ ይዘምር፡ ውሣጤሃ፡ ምስለ፡ መንፈሳዊት፡ እንዚራ፨
- ዳዊት፡ ይምጻእ፡ ወኢይይትርፍ፡ እዝራ፨
-
- ሰላም፡ ለልደትከ፡ እማኅፀነ፡ ጸጋ፡ ሐዲስ፨
- ወልዑለ፡ ዝክር፡ ስምከ፡ ከመ፡ ጊዮርጊስ፨
- ህርያቆስ፡ ኤርምያስ፡ ዘተቀደስከ፡ እምከርሥ፨
- ንጉሠ፡ ኮንከ፡ በሥጋ፡ ምስለ፡ ምድራዊ፡ ንጉሥ፨
- ወምስለ፡ ንጉሥ፡ ሰማያዊ፡ ነገሥከ፡ በነፍስ፨
-
- ሰላም፡ ለርእስከ፡ ሥርግወ፡ ሥዕርት፡ ፀዓዳ፨
- ዘአክሊለ፡ ክህነት፡ አግመረ፡ ለሀገረ፡ ንጉሥ፡ በዓውዳ፨
- ህርያቆስ፡ ሰማዕት፡ ሱታፌ፡ ጊዮርጊስ፡ ዘልዳ፨
- እሳደ፡ አዝንም፡ በሮሜ፡ እስመ፡ ዓመፃ፡ ልማዳ፨
- ወፍኖተ፡ ውጉዝ፡ ንስጥሮስ፡ ተመርሑ፡ ውሉዳ፨
-
- ሰላም፡ ለመቃብሪከ፡ ዘአርአያሃ፡ መቅደስ፨
- ወንብረትከ፡ ውስቴታ፡ እስከ፡ ይመጽእ፡ ንጉሥ፨
- ህርያቆስ፡ ይትቀሰም፡ ፍሬ፡ ጽድቅ፡ ዘነፍስ፨
- ፍሬሃሰ፡ ኀበ፡ ተኃጥአ፡ በቃለ፡ ምእመን፡ ክርስቶስ፨
- ህየ፡ ተረግመት፡ እንታክቲ፡ በለስ፨
-
- ኣአምን፡ እምልቡናየ፡ ቅድመ፡ ሕዝብየ፡ ኵሎሙ፨
- ከመ፡ ስምከ፡ ተጽሕፈ፡ ለክርስቶስ፡ በገጸ፡ ስሙ፨
- ህርያቆስ፡ ጻድቅ፡ ዘነጻሕከ፡ በንጽሐ፡ ደሙ፨
- ባሕቱ፡ ሀለዉ፡ እምጽድቅከ፡ በኃይለ፡ ኑፋቄ፡ ዘደክሙ፨
- ፍዳሆሙ፡ በሰማይ፡ ይርከቡ፡ ዳእሙ፨
-
- አምሕለከ፡ እግዚእየ፡ በስመ፡ ጊዮርጊስ፡ ክቡር፨
- ጌጋየ፡ ትስረይ፡ ህርያቆስ፡ መምህር፨
- ዜና፡ መልክዕከ፡ እጽሐፍ፡ ኀበ፡ ጸውዓተኒ፡ ፍቅር፨
- እስመ፡ ተሀበልኩ፡ ወልደ፡ ዓመፃ፡ ወነውር፨
- እንዘ፡ ምሉአን፡ ጻድቃን፡ በምልአ፡ ለምድር፨
- ተረፈ፡ መልክእ፡
-
- ሰላም፡ ለከ፡ ህርያቆስ፡ ዐጽቅ፡ ዘተክለ፡ ሃይማኖት፡ ጕንድ፨
- ቦኑ፡ ይብለከ፡ ዓለም፡ አብድ፨
- ለመስቀል፡ ኢይሰግድ፨
-
- ሰላም፡ ለከ፡ እምክብረ፡ ኤልሳዕ፡ ህርያቆስ፡ ወፊልጶስ፡ ሐዲስ፨
- እምሕዝቅያስኒ፡ ወቴዎድሮስ፨
- ክብርከ፡ ኢይንዕስ፨
-
- ሰላም፡ ለከ፡ ከመ፡ ዮሐንስ፡ ህርያቆስ፡ በክንፋ፡ ከለለተከ፡ ድንግል፨
- ወዮሐንስ፡ ከማ፡ በእንድርያስ፡ ኮል፨
- መአዘከ፡ ያስተማስል፨
-
- ሰላም፡ ለከ፡ መስቀለ፡ ክህነት፡ ህርያቆስ፡ ዘውገ፡ መርሐ፡ ክርስቶስ፡ ጥበብ፨
- መጠውከ፡ ነዋ፡ መስለ፡ ጴጥሮስ፡ አብ፨
- ዕንባቆም፡ ወያዕቆብ፨
-
- ሰላም፡ ለከ፡ ቢጸ፡ ማትያስ፡ ህርያቆስ፡ ምስለ፡ ዮሐንስ፡ ሰማዕት፨
- ወምስለ፡ ካልኡ፡ ዮሐንስ፡ ሊቀ፡ ካህናት፨
- ጸልለኒ፡ ክንፈ፡ ረድኤት፨
-
- ሰላም፡ ለከ፡ ጽድቀ፡ በትረ፡ ወንጌል፡ ትንሣእ፡ ወትሕትና፡ አብርሃም፡ ርእስ፨
- እምድኅረ፡ ዘወንጌል፡ ዘመጽአ፡ በትረ፡ ጊዮርጊስ፨
- አርአየከ፡ ህርያቆስ፨
-
- ሰላም፡ ለከ፡ ዘክርስቶስ፡ ጻድቅ፡ ወየማነ፡ አብ፡ አቡከ፨
- ዘክርስቶስኒ፡ ዘእምቅድሜከ፡ ህርያቆስ፡ ኅዳጠ፡ እስመ፡ ወደስኩከ፨
- ለባርኮትየ፡ ይምጽኡ፡ ምስሌከ፨