Subjects
Trinitarian
መስቀል፡
Masqal
The Cross
The Cross
Malkəʾ
-
- ክርስቶስ፡ አምላኪየ፡ ወተስፋየ፡ አንተ፨
- ወእግዝእትየ፡ ማርያም፡ ትስአል፡ ሊተ፨
- እምዘ፡ ሐለይኩ፡ ብዙኅ፡ እስከ፡ እጽሕፍ፡ ንስቲተ፨
- ከመ፡ ይትኀፈር፡ ርእዮ፡ ድርሳነ፡ መስቀልከ፡ ዘንተ፨
- ዘመንፈሰ፡ ቃል፡ ያጠፍእ፡ ወያሜንን፡ ትንቢተ፨
-
- በእንተ፡ ሞገሱ፡ ለመስቀልከ፡ ዘተሳተፈ፨
- በለኒ፡ ክርስቶስ፡ እንዘ፡ ትከሥት፡ አፈ፨
- እምትትፈሣሕ፡ በብዕል፡ እንተ፡ ያፈጥን፡ ኀሊፈ፨
- ተፈሣሕሰ፡ ወተኀሠይ፡ ዘልፈ፨
- እስመ፡ በሰማይ፡ ስምከ፡ ተጽሕፈ፨
-
- ሰላም፡ ለሞገስከ፡ ዘኢየኀብር፡ ግዕዘ፨
- ምስለ፡ ግዕዘ፡ ባዕዳን፡ ዕፀው፡ እለ፡ ይወልዱ፡ ነቀዘ፨
- ለጽሒፈ፡ መስቀል፡ ማሕሌተከ፡ ሐዋዘ፨
- ብርዐ፡ ወቀለመ፡ እዴየ፡ አኀዘ፨
- ሶበ፡ ከመ፡ ንጉሥ፡ ኪያየ፡ ጻሕቀ፡ ልብየ፡ አዘዘ፨
-
- ሰላም፡ ለሞገስከ፡ ዘአስተርአየ፡ ዕበያ፨
- በቅድመ፡ ሰብአ፡ ፅርዕ፡ ወግብጽ፡ ወቅድመ፡ ሰብአ፡ ሮም፡ ወአፍራግያ፨
- ዕፀ፡ ለውዝ፡ መስቀል፡ ዘኢይትማሰለከ፡ ዕፀ፡ ኢጡያ፨
- ሃሌ፡ ሉያ፡ ሃሌ፡ ሉያ፡ ሃሌ፡ ሉያ፨
- እስከ፡ ትቤ፡ ንግሥት፡ ታውዶክስያ፨
-
- ሰላም፡ ለሞገስከ፡ ዘነኪር፡ ግብሩ፨
- እሞገሰ፡ ነቢይ፡ ሙሴ፡ ወለአሮን፡ እምነ፡ ክብሩ፨
- ንጉሠ፡ ዕፀዋት፡ መስቀል፡ እለ፡ ኪያከ፡ ነጸሩ፨
- ለሳብዕ፡ ወርኅ፡ አመ፡ ዓሡሩ፨
- በጸናጽል፡ ፍጹመ፡ ዘመሩ፨
-
- ሰላም፡ ለሞገስከ፡ ዘያስተፌሥሕ፡ እምወይን፨
- ወዘያጸንዕ፡ እምእክል፡ ኀይለ፡ ድኩማን፨
- እሴፈወከ፡ መስቀል፡ ማዕተበ፡ ኪዳን፨
- ከመ፡ ንርከብ፡ መክፈልተ፡ ወርስተ፡ ውስተ፡ በአቶሙ፡ ለቅዱሳን፨
-
- ሰላም፡ ሰላም፡ ለሞገስከ፡ ዘይሤኒ፨
- እሞገሰ፡ ቄድሮስ፡ ወዕፀ፡ አቃኒ፨
- ረድኤተ፡ ቈስጠንጢኖስ፡ መስቀል፡ ወዘወላዲቱ፡ እሌኒ፨
- ጽብኦሙ፡ ለጸላእትየ፡ እለ፡ ይጽብኡኒ፨
- ከመ፡ ጸባእኮ፡ ለፈርዖን፡ በጣኒ፨
-
- ሰላም፡ ለሞገስከ፡ እንተ፡ ነጸሮ፡ ወንዕዶ፨
- ዐርከ፡ ገጣሪ፡ አብርሃም፡ በዕለተ፡ ሦዐ፡ ወልዶ፨
- ተቅዋመ፡ ማኅቶቱ፡ መስቀል፡ ለዘካርያስ፡ ዘሐዶ፨
- ዘክሕደ፡ ኪያከ፡ ሶበ፡ ምክረ፡ ሰይጣን፡ አዕበዶ፨
- በሥላሴሁ፡ ለክርስቶስ፡ ክሕዶ፨
-
- ሰላም፡ ለሞገስከ፡ ማኅበረ፡ እስራኤል፡ በኍልቍ፨
- እንተ፡ ነጸርዎ፡ በወርኀ፡ ኃምስ፡ ኵርያቍ፨
- ዕፀ፡ ሥን፡ መስቀል፡ ቢጸ፡ ሰንሰሪቍ፨
- ይሤኒ፡ ሞገስከ፡ እምዕፀ፡ ጳውቄና፡ ወህቍ፨
- እምነ፡ አእባን፡ ከመ፡ ይሤኒ፡ ዕንቍ፨
-
- ሰላም፡ ለሞገስከ፡ ዘእግዚአብሔር፡ አዕበዮ፨
- ኀበ፡ ኢይበጽሕ፡ እግረ፡ ኀልዮ፨
- ዕፀ፡ መድኃኒት፡ ወቤዛ፡ መስቀል፡ ዘቀራንዮ፨
- ረድኤትከ፡ ያስተርኢ፡ ከመ፡ ለዳዊት፡ ተርእዮ፨
- በዓመተ፡ ሞተ፡ ውስተ፡ ጸብእ፡ ኦርዮ፨
-
- ሰላም፡ ለሞገስከ፡ በአምሳለ፡ ሥሙር፡ ወልታ፨
- ዘይኬልላ፡ በስብሐት፡ ለለ፡ ይጸብሕ፡ ሳኒታ፨
- ያፈቅረከ፡ ልብየ፡ መስቀል፡ ዘጎልጎታ፨
- ከመ፡ ያፈቅሮን፡ ክርስቶስ፡ ለአሐተ፡ አልዐዛር፡ መንታ፨
- ዘአስማቲሆን፡ ማርያ፡ ወማርታ፨
-
- ሰላም፡ ለሞገስከ፡ ዘእደ፡ ሳሙኤል፡ ገለፋ፨
- መልዕልተ፡ አቤኔዜር፡ እብነ፡ መሴፋ፨
- መስቀለ፡ ኢየሱስ፡ ክርስቶስ፡ ሞገሰ፡ መስቀሉ፡ ለኬፋ፨
- ኢያጠፍእዋ፡ እምኅሊናየ፡ ማያተ፡ አቦና፡ ወፈርፋ፨
- በላህበ፡ ፍቅርከ፡ ዘእሳት፡ ክንፋ፨
-
- ሰላም፡ ለሞገስከ፡ ወለክብርከ፡ ሱታፉ፨
- ዘአስተብፅዖ፡ ጳውሎስ፡ መምህረ፡ ቂልቅያ፡ ወጳፉ፨
- ኪያከ፡ መስቀል፡ ለመልክአ፡ ብእሲ፡ በጽንፉ፨
- ሶበ፡ ይኔጽር፡ ሰይጣን፡ ከመ፡ የሐምም፡ ለዝሉፉ፨
- በሲኖዶሶሙ፡ ሐዋርያት፡ ጸሐፉ፨
-
- ሰላም፡ ሰላም፡ ለሞገስከ፡ ኮቶሊካ፨
- እምኀያላነ፡ ሞት፡ ወሲኦል፡ እንተ፡ ትትካፈል፡ ምህርካ፨
- ጸግወኒ፡ መስቀል፡ እንዘ፡ ትብል፡ ህንካ፨
- ሞገስከ፡ ሞገሰ፡ ጽድቅ፡ ወረድኤትከ፡ ተውሳካ፨
- ለቀትረ፡ ሕይወትየ፡ ዛቲ፡ ቅድመ፡ ይብጻሕ፡ ሰርካ፨
-
- ሰላም፡ ለሞገስከ፡ ለእግዚአብሔር፡ ዐተባ፨
- ለዘመነ፡ ትንቢት፡ ዐባይ፡ በዕለተ፡ ተፈጸመ፡ ምግባ፨
- በዓርበ፡ ፋሲካ፡ መስቀል፡ አመ፡ ቆምከ፡ ውስተ፡ መርኅባ፨
- በከየት፡ ፈድፋደ፡ ምስለ፡ እስራኤል፡ ሕዝባ፨
- ርስተ፡ ኃጢአት፡ ዘስማ፡ ሐሊባ፨
-
- ሰላም፡ ሰላም፡ ለሞገስከ፡ እብላ፨
- እሞገሰ፡ ጻድቃን፡ ኵሉ፡ ዘእግዚአብሔር፡ አልዐላ፨
- ኦመስቀል፡ ዕፀ፡ ፍሥሓ፡ ወተድላ፨
- መነኑከ፡ እፎ፡ ከመ፡ ይሜንኑ፡ ገደላ፨
- ቀተልተ፡ ነቢያት፡ ሐሊባ፡ ወሐላ፨
-
- ሰላም፡ ለሞገስከ፡ ለገራህተ፡ ዓለም፡ በምልኡ፨
- በአምሳለ፡ ኅጠት፡ ዘልህቀ፡ ወዘተለዐለ፡ ዘርኡ፨
- ዕፀ፡ ቅድሳት፡ መስቀል፡ ለቍርባነ፡ ወንጌል፡ ምሥዋዑ፨
- ጥቀ፡ ገፍዕዎሙ፡ ለእለ፡ ኪያከ፡ ገፍዑ፨
- አስባስያኖስ፡ ወጢጦስ፡ ካልኡ፨
-
- ሰላም፡ ለሞገስከ፡ በሠርቀ፡ ወርኀ፡ ጽርዕ፡ ኤጳፍሊ፨
- ዘእግዚአብሔር፡ ይቤላ፡ ብሔረ፡ ግብጽ፡ ፍክሊ፨
- በትረ፡ ኀይል፡ መስቀል፡ ሞገሰ፡ ዐዚዝ፡ ቴዎፍሊ፨
- ሠርዎሙ፡ ለአፅራርየ፡ እንበለ፡ ትፍልጥ፡ ወትፍሊ፨
- በከመ፡ ሠረውዎ፡ ምስለ፡ ወልዱ፡ ለሳኦል፡ ኢሎፍሊ፨
-
- ሰላም፡ ለሞገስከ፡ ዘኢይፌጽሞ፡ ፍካሬ፨
- ከመ፡ ሱራሬሃ፡ ሐዋዝ፡ ለዐባይ፡ ድብታሬ፨
- ሠናየ፡ መዐዛ፡ መስቀል፡ እመዐዛ፡ ቀንሞስ፡ ወዕፀ፡ ፐፒሬ፨
- አህጕሎሙ፡ ለአፅራርየ፡ እንተ፡ ኢያድምዑ፡ ኅሬ፨
- ከመ፡ እስራኤል፡ ተሀጕሉ፡ በካሕዱ፡ ለቆሬ፨
-
- ሰላም፡ ለሞገስከ፡ በስብሐተ፡ አፍአ፡ ወውሣጤ፨
- እምኀበ፡ መላእክት፡ አእላፍ፡ ዘይሴባሕ፡ በፊልሙንጤ፨
- ዕፀ፡ ፋሲካ፡ መስቀል፡ ሞገሰ፡ በዓላት፡ ጰንጠቈስጤ፨
- ይሤኒ፡ ሥነ፡ ሞገስከ፡ እምሥነ፡ ዕንቍ፡ አካጤ፨
- ወእምሥነ፡ ሐዋዝ፡ ዕፀ፡ ትንቢት፡ ዘስሙ፡ ኤላጤ፨
-
- ሰላም፡ ለሞገስከ፡ ለእሌኒ፡ ዘአጽሀቃ፨
- እስከ፡ ረከበተከ፡ መስቀል፡ ተነ፡ ጢስ፡ ዕጣን፡ ኀበ፡ አጠየቃ፨
- ወማዕተበ፡ አርባዕ፡ ከዋክብት፡ ጽላሎተ፡ ዚአከ፡ ማእከለ፡ ጣቃ፨
- ቈስጠንጢኖስ፡ ርእየ፡ ነዊሞ፡ ለማየ፡ ባዶስ፡ በሐይቃ፨
- ምስለ፡ ዘላዕሌሆን፡ መጽሐፍ፡ እንተ፡ ይብል፡ ጦንጢቃ፨
-
- ሰላም፡ ሰላም፡ ለሞገስከ፡ ትሩፍ፨
- እሞገሰነገድ፡ ዘቦኡ፡ ባሕረ፡ ሳፍ፨
- በአምሳለ፡ ዚአከ፡ መስቀል፡ ተንከተመ፡ ሰኑይ፡ አጽዳፍ፨
- በርእስ፡ ወበዘነብ፡ ወክልኤ፡ አክናፍ፨
- እንበለ፡ ይትመስቀል፡ ኢይሰርር፡ ዖፍ፨
-
- ሰላም፡ ለሞገስከ፡ ዘኢይትዔረዮ፡ ሐኖስ፨
- ወዘየሐፅፅ፡ ቅድሜሁ፡ ባሕረ፡ ውቅያኖስ፨
- ኢይትማሰለከ፡ መስቀል፡ ጽጌ፡ ሴፎኖስ፨
- ወዘይሄሉ፡ ካዕበ፡ ላዕለ፡ ደብረ፡ ራእይ፡ ማኖስ፨
- ምሥⷃዐ፡ በግዕ፡ እሑር፡ ዕፀ፡ ሥን፡ አብኖስ፨
-
- ሰላም፡ ለሞገስከ፡ ዘእግዚአብሔር፡ ባረኮ፨
- በከመ፡ ዜነዉነ፡ ዜና፡ እለ፡ ርእዩ፡ ሕዝበ፡ አምልኮ፨
- እንዘ፡ በአየራት፡ ትቀውም፡ መስቀለ፡ አምላክ፡ እንበለ፡ አስምኮ፨
- በደሴተ፡ ቆጵሮስ፡ ዘየዐውዳ፡ ባሕረ፡ ኢያሪኮ፨
- ታስተርኢ፡ እስከ፡ ዮም፡ ወትሴወር፡ አኮ፨
-
- ሰላም፡ ሰላም፡ ለሞገስከ፡ መራን፨
- ዘይነብር፡ ቦቱ፡ ሞገሰ፡ መስቀል፡ ብርሃን፨
- ይደልወከ፡ መስቀል፡ ጠረጴዛ፡ ክርስቶስ፡ ቍርባን፨
- እምአፈ፡ እሊአከ፡ ኵሉ፡ በውስተ፡ ኵሉ፡ መካን፨
- ስብሐት፡ ወክብር፡ ወሰጊድ፡ ወአሚን፨
- ለዓለም፡ ወለዓለመ፡ ዓለም፡ አሜን፨