Details
-
- ኦፍጡነ፡ ረድኤት፡ ለጽኑዕ፡ ወለድኩም፨
- ለነፍሰ፡ ኵሉ፡ ቃውም፨
- ጊዮርጊስ፡ የዋህ፡ እንበለ፡ መስፈርት፡ ወዐቅም፨
- ከመ፡ እግዝእትከ፡ ቡርክት፡ ማርያም፨
- ርኅሩኀ፡ ልብ፡ እምበቀል፡ ወቂም፨
-
- ኦፍጡነ፡ ረድኤት፡ በብዙኅ፡ ጾታ፨
- ከመ፡ እግዝእትከ፡ ርግበ፡ ኤፍራታ፨
- በሰማይ፡ በላዕሉ፡ ወበምድር፡ በታሕታ፨
- አምሕለከ፡ ጊዮርጊስ፡ በስመ፡ እምከ፡ ቴዎብስታ፨
- ሞገሰ፡ ስም፡ ሀበኒ፡ በስምከ፡ መንታ፨
-
- ኦፍጡነ፡ ረድኤት፡ እምሩጸተ፡ ነፋስ፡ ወዓውሎ፨
- ለዘጼውዓከ፡ በተወክሎ፨
- ጊዮርጊስ፡ ቅረብ፡ ለምሕረት፡ ወተሣህሎ፨
- ተወከፈከ፡ ጸሎትየ፡ ወቃለ፡ ጽራኅየ፡ ኵሎ፨
- እስመ፡ ልበ፡ አምላክ፡ ርኅሩኅ፡ በኀቤከ፡ ሀሎ፨
-
- ኦፍጡነ፡ ረድኤት፡ ጊዮርጊስ፡ ለእግዚአብሔር፡ ሰማዕቱ፨
- ተራድአኒ፡ ለለ፡ ዕለቱ፨
- እምፍቅርከ፡ አባ፡ ትመጽውተኒ፡ እፈቱ፨
- እንበለ፡ ረባሕ፡ ለነጋዲ፡ ሑረቱ፨
- ኀፍረትኬ፡ ወኃሳር፡ ውእቱ፨
-
- ኦፍጡነ፡ ረድኤት፡ ኢትረሰየኒ፡ ሠሐቀ፡ ለፀርየ፨
- ወኢስላቀ፡ ለጸላእትየ፨
- ጊዮርጊስ፡ ስምዐኒ፡ ቃልየ፨
- እንዘ፡ እነግረከ፡ ኀዘነ፡ ልብየ፨
- በኢመንኖ፡ በለኒ፡ ገብርየ፡ ገብርየ፨