Subjects
Martyr
መርምህናም፡
Marməhnām
Mar Behnam
Mar Behnam
Malkəʾ
-
- ኦዘወሀብከ፡ ለእጓለ፡ እመሕያው፡ አፈ፨
- ወውስተ፡ ሰማያት፡ ስመከ፡ ቅዳስያነ፡ አእላፈ።
- እግዚአብሔር፡ ስቡሕ፡ ወቅዱሰ፡ ባሕርይ፡ ዘልፈ፨
- ጸግወኒ፡ ጽዋዓ፡ ዕዝራ፡ ወዘሕዝቅኤል፡ መጽሐፈ፨
- ዜና፡ ሰማዕትከ፡ እስብክ፡ ወእንግር፡ ኅሉፈ፨
-
- ሰላም፡ ለልደትከ፡ እምአበ፡ ዓለማት፡ አብ፨
- ወዘይጼልላ፡ እምከ፡ መንፈስ፡ ቅዱስ፡ ኪሩብ፨
- መርምህናም፡ ደመና፡ ዘሀገረ፡ መርቄ፡ ወላህብ፨
- ይጸልል፡ ዲበ፡ ርእስየ፡ ተሰፍሖትከ፡ ተድባብ፨
- አመ፡ ለጽርሕት፡ ንደታ፡ ዕፁብ፨
-
- ሰላም፡ ለዝክረ፡ ስምከ፡ ሠናየ፡ ዝክር፡ ወስም፨
- ለዘይጼውዖ፡ ቀዳሚ፡ አርአያ፡ ማኅፈድ፡ ወጥቅም፨
- መርምህናም፡ ነጋዲ፡ ዘኢሞአከ፡ ድካም፨
- እፎኑመ፡ አንተ፡ ተሠየጥኮ፡ ወልደ፡ መሬት፡ አዳም፨
- ለዘተሣየጠከ፡ ቃል፡ ንጹሕ፡ ደም፨
-
- ሰላም፡ ለሥዕርተ፡ ርእስከ፡ እንተ፡ ኢወድቀት፡ አሐቲ፨
- እንበለ፡ ያእምር፡ አቡከ፡ ሕሊና፡ መላእክት፡ ሐታቲ፨
- መርምህናም፡ ጳውሎስ፡ ዘትርጓሜ፡ ስሙ፡ አእኳቲ፨
- አድኅነኒ፡ እምአፅራርየ፡ ሰራዊተ፡ አርዌ፡ መስሐቲ፨
- እስመ፡ ወልደ፡ መሬት፡ አነ፡ ወብእሲ፡ መዋቲ፨
-
- ሰላም፡ ለመቃብሪከ፡ ውስተ፡ ንፍቀ፡ ማኅው፡ ብሩህ፨
- ዝኒ፡ ኃሣር፡ ቅድመ፡ ሥጋከ፡ ንጹሕ፨
- ወሬዛ፡ ኤዶም፡ መስቀል፡ መርምህናም፡ መካሕ፨
- አኮኑ፡ ይፀድል፡ አክሊልከ፡ እምፀዳለ፡ ፀሐ፡ ወወርኅ፨
- አመ፡ ለመዋኢ፡ ይገብእ፡ እምሰማይ፡ ፍትሕ፨
-
- ሰላም፡ ለፍልሰተ፡ ሥጋከ፡ አመ፡ ዘመን፡ ደኃሪ፨
- ምስለ፡ ዘአ>ይኮ፡ ሕማመ፡ ኀበ፡ ነጊሠ፡ ትኤሪ፨
- እንዘ፡ መርምህናም፡ ትገኒ፡ ለክብረ፡ ባሕቲቱ፡ ፈጣሪ፨
- አኮኑ፡ ኅሡር፡ በገጸ፡ እግዚኡ፡ ነባሪ፨
- ወተግባረ፡ እዱ፡ ምኑን፡ ኀበቦ፡ ገባሪ፨
-
- ብዙኃን፡ አብዕልት፡ እመ፡ አብኡ፡ ተሪፈ፡ መዛግብት፡ ንዋየ፨
- መርምህናም፡ ተወከፍ፡ ጸሪቀ፡ መበለት፡ ነፍስየ፨
- እመስፍርተ፡ መና፡ ትእምርተ፡ ከመ፡ ዓይነ፡ ልብከ፡ ርእየ፨
- ዘቦ፡ ውሑድ፡ አመ፡ ኢኃጥአ፡ ሲሳየ፨
- ወዘቦ፡ ብዙኅ፡ መስፈርቱ፡ ኢአብየ፨