Malkəʾa Śəqāyu la-ʾAboli (Image of the Suffering of Apoli)

- ኦዘተቃወምከ፡ ሥልጣነ፡ ንጉሥ፡ ዘሠምረ፨
- ካመ፡ ለጣዖት፡ ትስግድ፡ ዘበእደ፡ ሰብእ፡ ይገብረ፨
- ኣበሊ፡ እምክብር፡ አምጣነ፡ አብዛኅከ፡ ክብረ፨
- ኀቤከ፡ ተማሕፀንኩ፡ ወረሰይኩከ፡ ማእምረ፨
- ዐርከ፡ ሰማዕተ፡ ጽድቅ፡ እሰመይ፡ ወዓዲ፡ ፍቁረ፨
- ተማሕፀንኩ፡ ፍልጠትከ፡ እምዮስጦስ፡ አቡከ፨
- ወእምታውክልያ፡ እምከ፨
- ከመ፡ ባሕረ፡ ገድል፡ ንግድ፡ እንዘ፡ ሕፃን፡ ለሊከ፨
- ኪያከ፡ እሌፎ፡ አቦሊ፡ ወእትመኃፀን፡ ኪያከ፨
- አመ፡ ፍትሐ፡ በቀል፡ ይትፈታሕ፡ >><>ኩነኒ፡ ምስማዕ፨
- ተማሕፀንኩ፡ በብጽሐትከ፡ እንዘ፡ ለእምከ፡ ትትፈለጣ፨
- ቅድመ፡ አብጥልማዎስ፡ ትቁም፡ ለተወክፎ፡ ሥቃይ፡ ሀገረ፡ ብስጣ፨
- አበሊ፡ ሥርግው፡ በልብሰ፡ ትእዝ፡ የውጣ፨
- አጽንዐኒ፡ በድካምከ፡ ዘኃይለ፡ ኃያላን፡ ተውላጣ፨
- ኢይቀብዐኒ፡ ዘቀዳሚ፡ ለሔዋን፡ አስፈጣ፨
- ተማሕፀንኩ፡ በኅድረትከ፡ ውስተ፡ ቤተ፡ ሞቅሕ፡ ዕሠረ፨
- በዘይኴንኑከ፡ ሐራ፡ እስከ፡ ይመክሩ፡ ምክረ፨
- አቦሊ፡ ምስሌከ፡ ከመ፡ ዘተሳተፍኩ፡ ግብረ፨
- አኅድረኒ፡ ማእከሌሃ፡ ለዘረሰይከ፡ ማኅደረ፨
- ወአመ፡ አኮ፡ ከመዝ፡ ረስየኒ፡ ጎረ፨
- ተማሕፀንኩ፡ በተዐሥሮትከ፡ አካለ፡ እግር፡ ወእድ፨
- ምስለ፡ ተስሕቦ፡ በከብድ፨
- ዝብጠተ፡ ሆሳዕና፡ ሐመልሚል፡ እስከ፡ ትትዌከፍ፡ በዐውድ፨
- እፎኑመ፡ አቦሊ፡ ዘእምቤተ፡ መንግሥት፡ ውሉድ
- ተሳለቁ፡ ብከ፡ ንዑሳን፡ ነገድ፨
- ተማሕፀንኩ፡ በአስናኒከ፡ እለ፡ ወድቁ፡ ምድረ፨
- አመ፡ መኰንን፡ ዐላዊ፡ ዐፅመ፡ አፉከ፡ ሰበረ፨
- አሜሃ፡ አቦሊ፡ ከመ፡ ይርዳእከ፡ መንክረ፨
- ሚካኤል፡ ሊቀ፡ ኀይላት፡ ዘበክንፈ፡ ነፋስ፡ ሰረረ፨
- አርአያ፡ ይኩንከ፡ ትርድኣኒ፡ ወትረ፨
- ተማሕፀንኩ፡ በዑደትከ፡ ኵሎ፡ ዐውደ፡ ሀገር
- እንዘ፡ ትጸውሮ፡ በርእስ፡ ለአነጻከ፡ ክቡር፨
- ዕጉሠ፡ ብሂዕ፡ ማሕሙሚ፡ ወዝኅቀተ፡ ሥጋ፡ በጸጉር፨
- ይሕፅበኒ፡ አቦሊ፡ ለብእሴ፡ ጌጋይ፡ ወነውር፨
- ከመ፡ ማየ፡ ክረምት፡ ዘውህዘ፡ ቀደምከ፡ በምድር፨
- ተማሕፀንኩ፡ በቀዊሞትከ፡ ማእከለ፡ ነበልባል፡ ወነድ፨
- እምዕፀ፡ ወይን፡ ዘነደ፡ ወዘይመስሎ፡ እምጒንድ፨
- ዕሠረ፡ ክሳድ፡ አበሊ፡ በጋጋ፡ ሐፂን፡ ክቡድ፨
- ኢይትዐቀፍ፡ ገብረ፡ ዚአከ፡ በእብነ፡ ኃጢአት፡ ዘአብድ፨
- ያንሥአኒ፡ በንጽሕና፡ ጥበብከ፡ እድ፨
- ተማሕፀንኩ፡ በተወድዮትከ፡ ውስተ፡ ቤተ፡ ጽልመት፡ ግሩም፨
- እንዘ፡ በሰናስል፡ ዕውር፡ እመንገለ፡ ይምን፡ ወፅግም፨
- ሕፁበ፡ ኵለንታ፡ አቦሊ፡ እማየ፡ ሃይማኖት፡ ደም፨
- ብርሃነከ፡ አርአይ፡ አግብኦ፡ በፍና፡ ከዋላ፡ ወፍጽም፨
- ጽልመተ፡ ሕሊናየ፡ አብርህ፡ በረድኤት፡ ፍጹም፨
- ተማሕፀንኩ፡ በደም፡ እምዐዘቅተ፡ ክሳድ፡ ዘውሕዘ፨
- አመ፡ መኰንን፡ በሰይፍ፡ ተመትሮተከ፡ አዘዘ፨
- በዓላመ፡ ትፍሥሐት፡ አቦሊ፡ ከመ፡ ኢያእምር፡ ትካዘ፨
- ረስየኒ፡ ላፍቅርከ፡ እምግብርናተ፡ ጋኔን፡ ግዑዘ፨
- አመ፡ ውስተ፡ ሰማይ፡ ትነግሥ፡ መንግሥተ፡ ሐዋዘ፨

ተረፈ፡ መልክእ፡
- ሰላም፡ ለከ፡ ደቂቀ፡ አበስጊሮስ፡ አብ፡ አቦሊ፡ አመ፡ አሞት፡ አንሣእከ፨
- እላፍ፡ ከልሑ፡ በሃይማኖትከ፨
- ወሰገዱ፡ ለዕበይከ፨
- ሰላም፡ ለከ፡ ማዕሰ፡ ዚአከ፡ አቦሊ፡ ወክሉለ፡ ጸጋ፡ ሰማዕት፨
- ትንሣኤ፡ ይኩነኒ፡ በሰዓተ፡ ሞት፨
- ከመ፡ አባእ፡ ውስተ፡ ሕይወት፨
- ሰላም፡ ላከ፡ ምክረ፡ አምላክ፡ አቦሊ፡ እስመ፡ እምክረ፡ ሰብእ፡ ግሩም፨
- ድኅነ፡ ተደለወ፡ ለከ፡ እሳተ፡ ሕማም፨
- በልዖሙ፡ ለሰብአ፡ ደም፨
- ሰላም፡ ለከ፡ ተርኅወት፡ ለከ፡ አቦሊ፡ አንቀጸ፡ ሀገር፡ ዕፁት፨
- እስመ፡ ኢሕፁፅ፡ አንተ፡ በጸጋ፡ ወሀብት፨
- እምጴጥሮስ፡ ሊቀ፡ አርድእት፨
- ሰላም፡ ለከ፡ ላዕለ፡ አምላክከ፡ ቃል፡ አቦሊ፡ አመ፡ ቃለ፡ ጽርፈት፡ ነበበ፨
- መኰንነ፡ ብስጣ፡ ሀገር፡ እስመ፡ ተመንደበ፨
- ኃይላከ፡ አስተዐፀበ፨
- ሰላም፡ ለከ፡ ዘከማከ፡ አልቦ፡ አቦሊ፡ እምቀደምትከ፡ ደቂቅ፨
- ዘእንዘ፡ ሕፃን፡ ተረክበ፡ በዐቅመ፡ ልሂቅ፨
- እስመ፡ አንተ፡ ትሩፈ፡ ጽድቅ፨
- ሰላም፡ ለከ፡ እመኑ፡ ስዕንኩ፡ አቦሊ፡ ላዕበይከ፡ ዘምሮ፨
- ሥራቴሃ፡ ዘንተ፡ በተዘክሮ፨ መንጦላዕተ፡ ሥጋ፡ መሬት፡ ለዘሠወሮ፨
- ኀዘንየ፡ ንግሮ፡ ንግሮ፨

መልክአ፡ ሥቃዩ፡ ለአቦሊ፡ Malkəʾa Śəqāyu la-ʾAboli

Image of the Suffering of Apoli

Subject