Malkəʾa Libānos (Image of Libānos)

- በስመ፡ እግዚአብሔር፡ ሕያው፡ ዘኢትመውት፡ አምላክ፨
- ወበስመ፡ ማርያም፡ ድንግል፡ ሰዓሪተ፡ መርገም፡ ወሀውክ፨
- ውዳሴ፡ መልክእከ፡ እጽሕፍ፡ እንዘ፡ አተሉ፡ በተውሳክ፨
- ባርከኒ፡ አባ፡ በመስቀልከ፡ ቡሩክ፨
- በዘወሀበከ፡ ገብርኤል፡ መልአክ፨
- ኦክርስቶስ፡ ዘተወለድከ፡ እምድንግል፨
- መድኃኒተ፡ ነፍሶሙ፡ ትኩን፡ ለሕዝበ፡ ሙስና፡ ወሀጕል፨
- ስብሐተ፡ ሊባኖስ፡ ገብርከ፡ ሐዋርያ፡ ቅዱስ፡ ወንጌል፨
- ባርክ፡ በየማንከ፡ ወበእዴከ፡ መስቀል፨
- አኮኑ፡ ለሊከ፡ ባርኮተ፡ ትክል፨
- ሰላም፡ ለዝክረ፡ ስምከ፡ ዘተበጽዐ፡ ፈድፋደ፨
- ወለሥዕርትከ፡ ጸሊም፡ ዘድላሌሁ፡ ተንእደ፨
- ሊባኖስ፡ በለኒ፡ ወአብስረኒ፡ ገሀደ፨
- ዘበምድር፡ ወድሶትየ፡ ዐቅመ፡ ልብከ፡ ፈቀደ፨
- በዓለመ፡ ጻድቃን፡ ምስሌየ፡ ትከውን፡ አሐደ፨
- ሰላም፡ ለቆምከ፡ ሐመልማለ፡ ገነት፡ ዘኮነ፨
- ወለመልክእከ፡ ሐሤት፡ እንተ፡ ያረስዕ፡ ሐዘነ፨
- ሊባኖስ፡ ፀሓይ፡ ዘተረሰይከ፡ ብርሃነ፨
- ነዓ፡ ነዓ፡ እንበለ፡ ጐንድዮ፡ ፍጡነ፨
- ወበላ፡ ለነፍስየ፡ ረዳኢኪ፡ አነ፨
- ሰላም፡ ለመቃብሪከ፡ እንተ፡ በውስቴቱ፡ ተወድየ፨
- ወርቀ፡ ሰብእናከ፡ ንጹሕ፡ ዘተመሰለ፡ ባሕርየ፨
- ሊባኖስ፡ ፍቁሩ፡ ለዘሰቀለ፡ ሰማየ፨
- በለኒ፡ በንባብከ፡ ጊዜ፡ ትወፅእ፡ ነፍስየ፨
- እንዘ፡ ሀለውኩከ፡ አነ፡ ኢትፍራህ፡ ወልድየ፨
- ከመ፡ ገብረ፡ ክርስቶስ፡ ብፁዕ፡ እምቤተ፡ መርዓ፡ ወፃእከ፨
- ወከመ፡ ዮሐንስ፡ ኅሩይ፡ ገዳመ፡ ትሩፋት፡ ዔልከ፨
- እምነ፡ ቅዱሳን፡ ሊባኖስ፡ መኑ፡ ከማከ፨
- እንዘ፡ እብል፡ ዘልፈ፡ ለለ፡ ጊዜ፡ አነ፡ ገብርከ፨
- በጽርሐ፡ መቅደስከ፡ አባ፡ እገኒ፡ ለክብርከ፨
- አባ፡ እሴብሕ፡ ለስምከ፡ ወእዜምር፡ ለከ፨
- ናሁ፡ ጸሐፍኩ፡ ስብሐተ፡ መልክእከ፡ ኵሉ፨
- በበ፡ መዓርጊሁ፡ ወክፍሉ፨
- አባ፡ ሊባኖስ፡ ለዓለመ፡ ድካም፡ መጽንዔ፡ ኀይሉ፨
- አስተምሕር፡ በኢያርምሞ፡ ከመ፡ ምስሌየ፡ የሀሉ፨
- ለንጉሠ፡ ሰላም፡ ክርስቶስ፡ ምሕረቱ፡ ወሣህሉ፨
- ስብሐት፡ ለእግዚአብሔር፡ ለፈጽሞ፡ ዝንቱ፡ ድርሳን፨
- ዘጸገወነ፡ ሥልጣነ፡ እምዘዚአሁ፡ ሥልጣን፨
- ባርከነ፡ አባ፡ ለደቂቅከ፡ ኄራን፨
- ነጺሮሙ፡ ባርኮተከ፡ ወሰሚዖሙ፡ በእዝን፨
- ቅዱሳን፡ መላእክት፡ ይበሉ፡ አሜን፨

ተረፈ፡ መልክእ፡
- ቅድመ፡ መንበረ፡ አብ፡ ወወልድ፡ ወመንፈስ፡ ቅዱስ፡ ዘይትዐጸፉ፡ ስብሐተ፨
- ሊባኖስ፡ ዘትቀውም፡ ኵሎ፡ ዕለተ፨
- ወታቄርብ፡ ቅዳሴያተ፨
- ሰላም፡ ለከ፡ ሊባኖስ፡ አሐዱ፡ እምነ፡ ቅዱሳን፡ ተስዓቱ፨
- ለክርሶትስ፡ ዋሕድ፡ ወአኮ፡ ክልኤቱ፨
- እንተ፡ ጾርከ፡ መስቀለ፡ ሞቱ፨
- ሰላም፡ ለከ፡ በአምኃ፡ ዝንቱ፡ ማሕሌት፡ ለዘረሰየ፡ ትውክልቶ፨
- ሊባኖስ፡ ጳውሎስ፡ መምህረ፡ ቲቶ፨
- ሥሙረ፡ ረሲ፡ መሥዋዕቶ፨
- ወፍጡነ፡ ተወከፍ፡ ጸሎቶ፨

መልክአ፡ ሊባኖስ፡ Malkəʾa Libānos

Image of Libānos

Subject