Subjects
Angelic
ራጉኤል፡
Rāguʾel
Raguel
Raguel
Malkəʾ
-
- እጼውዕ፡ ስመከ፡ ወኤምኅ፡ በተድላ፨
- ራጉኤል፡ መንፈስ፡ ለዓለም፡ መስተበቅላ፨
- እለ፡ ያንኰረኵሩ፡ ዘልፈ፡ ለጠፈረ፡ ሰማይ፡ በማእከላ፨
- ድኅረ፡ ኀለፈ፡ መዓልት፡ ለጽልመተ፡ ሌሊት፡ በክፍላ፨
- ለሥልጣነ፡ ቃልከ፡ ይትኤዘዙ፡ ከዋክብት፡ ወእብላ፨
-
- ሰላም፡ ለፊደለ፡ ስምከ፡ ዘአዳም፡ ዝክሩ፨
- ዘተለክአ፡ ቅድመ፡ ለሄኖክ፡ ውስተ፡ ጦማሩ፨
- ራጉኤል፡ ፍትው፡ ለመሰንቆ፡ ልብየ፡ ቃለ፡ መዝሙሩ፨
- ዝክረ፡ ገብርከ፡ ጸላኢ፡ እመ፡ መከረ፡ ይሠሩ፨
- እግዚኦ፡ እግዚኦ፡ ዕልዋ፡ ለምክሩ፨
-
- ሰላም፡ ለኍልቈ፡ ሥዕርትከ፡ ለለ፡ አሐቲ፡ አሐቲ፡ በአምኆ፨
- ግዑዛት፡ እምተላጽዮ፡ ወእምተመልሖ፨
- አንተ፡ ውእቱ፡ ፈለገ፡ አኰቴት፡ ወሰብሖ፨
- ራጉኤል፡ በማሕሌትከ፡ ለማሕሌትየ፡ ቶስሖ፨
- ኢያጐንድየኒ፡ ለሰኣሊ፡ እምብሂል፡ ኦሆ፨
-
- ሰላም፡ ለርእስከ፡ እንተ፡ መልዕልቴሁ፡ የዐውድ፨
- ቀጸላ፡ ነከራ፡ ግቡር፡ እምነፋስ፡ ወነድ፨
- ራጉኤል፡ ርእሶሙ፡ ለኢመዋትያን፡ ነገድ፨
- ድማሐ፡ ርእሰ፡ ልብየ፡ እንዘ፡ ትእኅዝ፡ በእድ፨
- ኀበ፡ ነቅዐ፡ ጥበብ፡ ሀሎ፡ ንሥአኒ፡ ለአብድ፨
-
- ሰላም፡ ለአጽፋረ፡ እግርከ፡ ሥነ፡ ምግባሪሆን፡ ብዑድ፨
- እምአጽፋረ፡ እግሩ፡ ለሰብእ፡ ሥጋዊ፡ ነገድ፨
- ራጉኤል፡ ዘትቀውም፡ ውስተ፡ ሰማያት፡ ዐጸድ፨
- በእንተ፡ አጽፋሪከ፡ እለ፡ ይኬልላ፡ አፃብዒከ፡ ዘነድ፨
- ጽፍረ፡ ኃጣውእየ፡ ቅርጽ፡ እምአእጋር፡ ወእድ፨
-
- በቃለ፡ ሰላም፡ ኤምኆ፡ ወበስእመተ፡ መንፈስ፡ እስዕሞ፨
- ለሥነ፡ ቆምከ፡ ራጉኤል፡ ዘርሱይ፡ በተገርሞ፨
- ሶበ፡ ይነብብ፡ ቍልዔከ፡ ውዳሴከ፡ አስተሐሚሞ፨
- ጸግዎ፡ ፍሬ፡ ጻማሁ፡ ለአስካለ፡ ሕይወት፡ ቀስሞ፨
- እምነ፡ ዕለት፡ ዕለተ፡ ከመ፡ ይወስክ፡ ዓም፨
-
- ሰላም፡ ሰላም፡ ለመልክእከ፡ ለለ፡ አሐዱ፡ አሐዱ፨
- ዘበበ፡ ስሙ፡ ወበበ፡ ፍቅዱ፨
- ራጉኤል፡ ኀቤከ፡ ሶበ፡ ያንቀዐዱ፨
- ተወከፍ፡ ስእለተ፡ ገብርከ፡ ለፈጽሞ፡ ኵሉ፡ መፍቅዱ፨
- በከመ፡ ይትዌከፍ፡ አብ፡ ስእለቶ፡ ለወልዱ፨