Subjects
Angelic
ሚካኤል፡
Mikāʾel
Michael
Michael
Malkəʾ
-
- እግዚአብሔር፡ እግዚእ፡ አመ፡ ፈጠረ፡ ብርሃነ፨
- ዘምስለ፡ ፍጥረታት፡ ስሱ፡ ጥንተ፡ ተፈጥሮትከ፡ ኮነ፨
- ሚካኤል፡ ለሄኖክ፡ እንተ፡ አጽናዕከ፡ ኪዳነ፨
- አጽንዐኒ፡ በረድኤትከ፡ ከመ፡ ኢይኅድግ፡ የማነ፨
- እስመ፡ ፀጋማዊ፡ ልብየ፡ በዓለም፡ ጸነ፨
-
- ሰላም፡ ለዝክረ፡ ስምከ፡ ጥንተ፡ ተጽሕፎ፡ ዘቀደመ፨
- ለአምላከ፡ ብርሃን፡ እዱ፡ አመ፡ ሣረረ፡ ዓለመ፨
- ሚካኤል፡ አንሥእ፡ ዘልማድከ፡ ቀሥታመ፨
- ሀገረ፡ ነፍስየ፡ ከመ፡ ኢይጽባእ፡ ዳግመ፨
- መኰንነ፡ ጽልመት፡ አርዌ፡ በቀላይ፡ ዘቆመ፨
-
- ሰላም፡ ለቆምከ፡ ጥብለለ፡ ጥካ፡ ወሞገስ፨
- ኀበ፡ መቃብሩ፡ ዘቆመ፡ ለበኵረ፡ ትንሣኤ፡ ክርስቶስ፨
- ሚካኤል፡ ሠዋዒ፡ በግዐ፡ ቅዳሴ፡ ሠላስ፨
- እመ፡ በልየ፡ ወርኀ፡ ምግብየ፡ ከመ፡ ሕዝቅያስ፡ ንጉሥ፨
- ፀሓየ፡ ሕይወትየ፡ አጽንዕ፡ በመዐርግ፡ ሐዲስ፨
-
- ሰላም፡ ለመልክእከ፡ ትርሲተ፡ ድንጋፃ፡ ዘተሞጥኀ፨
- ኤሎሄ፡ እንዘ፡ ይብል፡ አመ፡ ቃለ፡ ክርስቶስ፡ ዘጸርሐ፨
- ሚካኤል፡ ቢጹ፡ ለገብርኤል፡ ጥንተ፡ ፍሥሓ፨
- ክንፈ፡ ዘባንከ፡ አየራተ፡ መስቀል፡ ዘበጽሐ፨
- ጸዳለ፡ ፀሓይ፡ አጽለመ፡ ወአድመነ፡ ወርኀ፨
-
- ሰላም፡ ለመልክእከ፡ በወርቀ፡ ሩጸቶን፡ ዘተክህላ፨
- በዓልተ፡ ትንሣኤ፡ አበይት፡ አንስተ፡ ገሊላ፨
- ክብረ፡ አፎምያ፡ ሚካኤል፡ ወፍሡሕ፡ ሞገስ፡ ሥዕላ፨
- እለ፡ አጥረዩ፡ ረድኤተከ፡ ማኅበራነ፡ ጻድቅ፡ ቡላ፨
- መኑ፡ ዘበምድር፡ ፍግዐ፡ ወተድላ፨
-
- ሰላም፡ ለመልክእከ፡ ውስተ፡ ምድረ፡ ጽዱቅ፡ ትንሣኤ፨
- በልብሰ፡ ፍሥሓ፡ ወኀሤት፡ ዘተርእየ፡ ቅድመ፡ ጉባኤ፨
- ሚካኤል፡ ዝክርከ፡ ወፍሡሕ፡ ለጣዕመ፡ ጕርዔ፨
- እመ፡ አብዛኅኩ፡ ማሕሌተከ፡ እምነ፡ ኀምሳይ፡ ሱባዔ፨
- ውስተ፡ ልበ፡ ሥጋ፡ ድኩም፡ እምኮነ፡ ዝንጋዔ፨
-
- ዘአቅረብኩ፡ ለከ፡ በግዐ፡ ንባብየ፡ ላክ፨
- ካህነ፡ ምሥጢሩ፡ ሚካኤል፡ ለእግዚአብሔር፡ አምላክ፨
- ተወከፍ፡ ዘንተ፡ እግዚኦ፡ ለለ፡ ጊዜ፡ ጽባሕ፡ ወሰርክ፨
- በከመ፡ ኮነ፡ ውኩፈ፡ ቍርባነ፡ አቤል፡ ቡሩክ፨
- ወመሥዋዕተ፡ በግዕ፡ ቅድው፡ ዘአብርሃም፡ ዐርክ፨
-
- ተዘከረኒ፡ ሚካኤል፡ ቅድመ፡ ገጸ፡ ንጉሥ፡ መሓሪ፨
- ለለ፡ ትገብር፡ ጸሎተ፡ ጌጋየ፡ ኃጥኣን፡ ታስተሥሪ፨
- ለኵሉ፡ አግዓዚ፡ ወለኵሉ፡ ነባሪ፨
- ምስለ፡ ማርያም፡ እግዝእትከ፡ ትምክሕተ፡ ነገዱ፡ ለኔሪ፨
- ወአምጻኤ፡ ሕይወት፡ ሐዲስ፡ ገብርኤል፡ አብሳሪ፨
-
- ያስተብፅኡከ፡ ሚካኤል፡ ምስለ፡ ገብርኤል፡ ሊቀ፡ መላእክት፨
- ማኅበረ፡ ነቢያት፡ ወሐዋርያት፨
- ማኅብረ፡ ጻድቃን፡ ወሰማዕት፡ ማኅበረ፡ ድናግል፡ ወመነኮሳት፨
- እስመ፡ ልማድከ፡ ወቅዳሴከ፡ ጸሎት፨
- ቅድመ፡ ገጸ፡ ንጉሥ፡ ሕያው፡ ዘሕጉ፡ ምሕረት፨