Details
Subject
Clavis Aethiopica: 3076
CAe: 3076
MC: 356 | HK: 80
Permalink: https://w3id.org/malke/3076/
Last modified:
MC: 356 | HK: 80
Permalink: https://w3id.org/malke/3076/
Last modified:
-
- እወጥን፡ ስብሐተ፡ ለስብሐቲከ፡ ወአስተዋድድ፡ መዝሙረ፨
- ለቃለ፡ መሰንቆ፡ ጸጋከ፡ እንዘ፡ ይከውኖ፡ አውታረ፨
- ተራድአኒ፡ ፊልጶስ፡ እስከ፡ ፍጻሜ፡ ቃል፡ ድኅረ፨
- እመሰ፡ ኢፈጸምኩ፡ ወኢኀተምኩ፡ ነገረ፨
- ቅድመ፡ ጠቢባን፡ ደቂቅከ፡ ኢይከውን፡ ዝክረ፨
-
- ሰላም፡ ለዝክረ፡ ስምከ፡ መፍቀሬ፡ አምላክ፡ ስሙ፨
- በርእሰ፡ ቀዳማይ፡ ፊልጶስ፡ እንተ፡ ነበረ፡ ቀዲሙ፨
- ፊልጶስ፡ ሕቱም፡ ለሙሴ፡ በማሕተሙ፨
- እስራኤል፡ ሕዝብከ፡ አእላፈ፡ አእዛን፡ ኵሎሙ፨
- መና፡ ውዳሴከ፡ በትፍሥሕት፡ ይጥዕሙ፨
-
- ሰላም፡ ለመልክእከ፡ እንተ፡ መጽለወ፡ ላሕዩ፨
- እስመ፡ ኮነ፡ ሎቱ፡ እምሣዕረ፡ እንስሳ፡ ሲሳዩ፨
- ፊልጶስ፡ አቡየ፡ ለወልድከ፡ ንንግር፡ ዕበዩ፨
- ዘወለደኒ፡ በጸጋ፡ እስከ፡ በጸጋሁ፡ አሐዩ፨
- ውዳሴ፡ ይደሉ፡ ለዕበዩ፨
-
- ሰላም፡ ለመልክእከ፡ በአምሳለ፡ ሥኑ፡ ወራእዩ፨
- ለክርስቶስ፡ አምላክ፡ ዘአዳም፡ ሥነ፡ ላህዩ፨
- ሐረሳዊ፡ ፊልጶስ፡ መላኤ፡ ሥርናይ፡ ውስተ፡ ሙዳዩ፨
- አመ፡ ይወፅእ፡ ቃል፡ በግርማሁ፡ ወዕበየ፡ ዕበይ፡ ዕበዩ፨
- ፀረ፡ ሕይወትየ፡ ቅትል፡ ወኪያየ፡ አሕዩ፨
-
- ሰላም፡ ለመቃብሪከ፡ በመካነ፡ ቅድስት፡ አዕንቆ፨
- ለክርስቶስ፡ አምላክ፡ ድኅረ፡ ፈጸምከ፡ ጻህቆ፨
- ኦፊልጶስ፡ ጳውሎስ፡ ዘደማስቆ፨
- እዜምር፡ ለከ፡ እግዚኦ፡ በልሳነ፡ ሠናይ፡ መሰንቆ፨
- እስመ፡ እምአምላክ፡ ኀሠሥከ፡ መንግሥቶ፡ ወጽድቆ፨
-
- አመ፡ ትቀውም፡ በሥልጣንከ፡ እግዚአብሔር፡ ፈጣሪ፨
- እምዓለመ፡ አበው፡ ቀደምት፡ እስከነ፡ ምጽአትከ፡ ዘደኃሪ፨
- ክበደ፡ ጌጋዩ፡ ወንጽሑ፡ እንዘለለ፡ ርእሱ፡ ያጠሪ፨
- ኦመሓሪ፡ ወወልደ፡ አምላክ፡ መሓሪ፨
- በእንተ፡ ፊልጶስ፡ ረድእ፡ አበሳየ፡ ስሪ፨
- ተረፈ፡ መልክእ፡
-
- ስብሐት፡ ለከ፡ ኢየሱስ፡ እምአፈ፡ አርድእት፡ ልኡካን፨
- ስብሐት፡ ለከ፡ ኢየሱስ፡ እምአፈ፡ ጻድቃን፨
- ስብሐት፡ ለከ፡ ኢየሱስ፡ ንጉሠ፡ ግሼና፡ መካን፨
- ስብሐት፡ ለከ፡ ኢየሱስ፡ እምአፈ፡ አበው፡ ገዳማውያን፨
- ስብሐት፡ ለከ፡ እምአፈ፡ ኄራን፡ ይነግር፡ ስብሐቲከ፡ ፊልጶስ፡ ካህን፨