Subjects
Righteous
ኤዎስጣቴዎስ፡
ʾEwosṭātewos
ʾEwosṭātewos
ʾEwosṭātewos
ʾEwosṭātewos
Malkəʾ
-
- እንዘ፡ ሀሎኩ፡ በተሰዶ፡ ወበተሞቅሖ፡ ዕጹብ፨
- ተዝካረ፡ ዕድወተከ፡ ባሕረ፡ ከመ፡ እዜኑ፡ ለሕዝብ፨
- ኤዎስጣቴዎስ፡ ሀበኒ፡ ልሳነ፡ አግዓዚ፡ ጥበብ፨
- ወአንብር፡ ዲበ፡ ርእስየ፡ ምስለ፡ ቃለ፡ ሐዲስ፡ ንባብ፨
- መንፈሰ፡ በአምሳለ፡ ርእየተ፡ ርግብ፨
- ዘይነሥእ፡ እምወልድ፡ ወዘይወፅእ፡ እምአብ፨
-
- ኤዎስጣቴዎስ፡ ለሚናስ፡ ተላዌ፡ አሠሩ፡ ወመንገዱ፨
- ባሕረ፡ ግሩመ፡ ዘመፍርህ፡ ማዕበለ፡ ሞገዱ፨
- ከመ፡ ኖትያዊ፡ ጠቢብ፡ አመ፡ ዐደወ፡ በዘብዱ፨
- እንዘ፡ ይትባደሩ፡ አድባራት፡ ለለ፡ አሐዱ፨
- ቅድሜሁ፡ ይስግዱ፡ ወረዱ፡ ወሩጸቶሙ፡ አግሀዱ፨
-
- ምስለ፡ ጎርጎርዮስ፡ ሙቁሕ፡ ለእግዚአብሔር፡ አሥመርኮ
- እንበለ፡ አውክኮ፨
- ኤዎስጣቴዎስ፡ ኀረይከ፡ ከመ፡ ሱራፌል፡ ንጽሕ፡ ተልእኮ፨
- በዘብድወ፡ ጠሊ፡ በሐመር፡ አኮ፨
- ለኢያሪኮ፡ እፎኑ፡ አደውኮ፨
-
- ማዕቅበ፡ እግዚእ፡ ብፁዕ፡ ፈሊሶ፡ እምኢትዮጵያ፨
- ለባሕር፡ ግርምት፡ ዘዕሙቅ፡ ቀለያ፨
- ሶበ፡ አደወ፡ እንበለ፡ ሐመር፡ ጽንዐ፡ ሃይማኖቱ፡ ርእያ፨
- እንዘ፡ ትብል፡ ተፈሢሐ፡ ወደሰቶ፡ አርማንያ፨
- ኤዎስጣቴዎስ፡ ሐዲስ፡ ሐዋርያ፨
-
- ፍኖተ፡ ቂርቆስ፡ ሕፃን፡ አመ፡ እግረ፡ ልብከ፡ ኀለፈ፨
- ኤዎስጣቴዎስ፡ ትሣየጥ፡ ምስለ፡ ዕንቈ፡ ባሕርይ፡ ሰደፈ፨
- ሶበ፡ ከልኡከ፡ ሐመረ፡ ወጊረከ፡ ዐጽፈ፨
- እፎኑ፡ ዐዶከ፡ ባሕረ፡ እምከንፊፍ፡ ክንፈፈ፨
- እንዘ፡ ታነብብ፡ መጽሐፈ፨
-
- አመ፡ አድባራት፡ ሮጻ፡ እምቅዋሞን፡ ወአመ፡ እምድሮን፡ አንቀልቀላ፨
- አነ፡ ወአነ፡ እቀድም፡ እንዘ፡ ይትበሀላ፨
- ኤዎስጣቴዎስ፡ ከመ፡ ይትቀበላ፨
- ተፈጸመ፡ ብከ፡ ዘይቤ፡ ክርስቶስ፡ ርእሰ፡ መሐላ፨
- እስመ፡ ብክሙ፡ ሃይማኖት፡ መጠነ፡ ስናፔ፡ አካላ፨
- ታፍልሱ፡ ደብረ፡ ወትመልሑ፡ ስግላ፨
-
- ምስለ፡ አጋቦስ፡ ሐቌሁ፡ በቅናተ፡ ጳውሎስ፡ ዘአሠረ፨
- ምሥጢረ፡ ነገር፡ ይክሥት፡ ዘይከውን፡ ድኅረ፨
- ኤዎስጣቴዎስ፡ ቀዳሚ፡ በከመ፡ አዶከ፡ ባህረ፨
- ታዕድወኒ፡ ባሕረ፡ መከራ፡ ለደቂቅከ፡ ኅቡረ፨
- አስተዳሉ፡ ለነ፡ ዐጽፈከ፡ ሐመረ፨
-
- ከመ፡ ፊልጶስ፡ ዘአፍራቅያ፡ ትሰመይ፡ ሐዋርያ፨
- ወሰማዕተኒ፡ ከመ፡ ኤላውትሮስ፡ ወልደ፡ እንትያ፨
- ኤዎስጣቴዎስ፡ ይብሉከ፡ መምህር፡ ዘአርማንያ፨
- አንተ፡ ውእቱ፡ ለቤተ፡ ክርስቲያን፡ ባሕርያ፨
- አንተ፡ ውእቱ፡ ለዓለም፡ ፀሓያ፨
-
- ለተበርብሮ፡ ንዋይ፡ ወግብረ፡ ተሰዶ፡ አምሳለ፡ ሐዋርያ፡ ድሩክ፨
- ሶበ፡ በጽሑኒ፡ በከንቱ፡ ወረከቡኒ፡ በበክ፨
- ኤዎስጣቴዎስ፡ ሰባኬ፡ ሃይማኖተ፡ ክርስቶስ፡ አምላክ፨
- በጸጋ፡ ዕድወትከ፡ ተማሕፀንኩ፡ እንዘ፡ እጼወን፡ ወአሰምክ፨
- አቅረብኩ፡ ለከ፡ ወለስምከ፡ ቡሩክ፨
- ትሠጠወኒ፡ ጸሎትየ፡ ወስእለትየ፡ ለላእክ፨
- ከመ፡ ዕጣን፡ ዘነግህ፡ ወመሥዋዕት፡ ዘሰርክ፨