Details
-
- እትመሐፀን፡ በእኅዘትከ፡ ወበእስረትከ፡ ድኅሪተ፨
- አመ፡ ዐገቱከ፡ አይሁድ፡ ከመ፡ ሠራቂ፡ ሌሊተ፨
- ቤዛ፡ ኃጥኣን፡ ክርስቶስ፡ ዘኢሐፈርከ፡ መዊተ፨
- ተዘከረኒ፡ እግዚኦ፡ ወመሐረኒ፡ ሊተ፨
- ዘከመ፡ ተዘከርኮ፡ ለፈያት፡ በመስቀል፡ አንተ፨
-
- እትመሐፀን፡ በቀዊሞትከ፡ ቅድመ፡ ገጸ፡ ሐና፡ ወቀያፋ፨
- አመ፡ ሐተቱከ፡ አይሁድ፡ ምስለ፡ ቃለ፡ ፅርፈት፡ ወዘለፋ፨
- አምላከ፡ ርኅራኄ፡ አንተ፡ ለምሕረት፡ ዘትትዐጸፋ፨
- ተወክፍ፡ ንስሓ፡ ዚአየ፡ ከመ፡ ንስሓሁ፡ ለኬፋ፨
- እስመ፡ አሚን፡ ይድኅን፡ በአሚን፡ ወተስፋ፨
-
- እትመሐፀን፡ በስቅለትከ፡ ጊዜ፡ ሰዓተ፡ ዐርብ፡ ቀትረ፨
- ውስተ፡ ቀራንዮ፡ መካን፡ ኀበ፡ ርእሰ፡ አዳም፡ ተቀብረ፨
- ሕፃነ፡ ማርያም፡ ክርስቶስ፡ እንተ፡ ትሰመይ፡ በኵረ፨
- ምርሐኒ፡ እግዚኦ፡ ፍኖትአ፡ ትእዛዝከ፡ ወትረ፨
- ወአለብወኒ፡ ጥበበ፡ ወምክረ፨
-
- እትመሐፀን፡ በፀአተ፡ ነፍስከ፡ ጊዜ፡ ፱ሰዓት፨
- ድኅረ፡ ሰተይከ፡ ብሒአ፡ ዘምስለ፡ ሐሞት፨
- አምላከ፡ ኀያላን፡ ክርስቶስ፡ ወእግዚአ፡ ኵሉ፡ ፍጥረት፨
- አድለቅለቀት፡ ምድር፡ በሞትከ፡ ወተከሥቱ፡ መቃብራት፨
- እስከ፡ መልአክ፡ ፍርሀ፡ ወደንገጸ፡ ሞት፨