Subjects
Prophet
ሙሴ፡
Muse
Moses
Moses
Malkəʾ
-
- እስመ፡ አንተ፡ አስተናደፍከ፡ መሠረተ፡ ቤትነ፡ ክርስትና፨
- ጾመ፡ መድኃኒነ፡ ክርስቶስ፡ አመ፡ ጾምከ፡ በደብረ፡ ሲና፨
- መጥምቀ፡ እስራኤል፡ ሙሴ፡ በባሕር፡ ወበደመና፨
- በጎሞረ፡ ልሳን፡ ንስፍር፡ በእንተዝ፡ ሰላመ፡ መልክእከ፡ መና፨
- ለሴስዮ፡ ጽኑስ፡ ልብ፡ ወነዳይ፡ ኅሊና፨
-
- ሰላም፡ ለልደትከ፡ እንበለ፡ ሲፓራ፡ ወፎሐ፨
- እምከርሠ፡ ዕብራዊት፡ እምከ፡ በመርድአ፡ አንስት፡ አኅቲሃ፨
- እጓለ፡ መንክራት፡ ሙሴ፡ ወሠናየ፡ ራእይ፡ ወልደ፡ ፍሥሓ፨
- እንበረም፡ አቡከ፡ በእንተዝ፡ መዐተ፡ ንጉሥ፡ ኢፈርሀ፨
- እስከ፡ ከበተከ፡ ውስተ፡ ቤቱ፡ ሠለስተ፡ አውራኀ፨
-
- ሰላም፡ ለስምከ፡ እንዘ፡ ታወጽአከ፡ እምቀላይ፨
- እንተ፡ ሰመየተከ፡ ሙሴ፡ ወለተ፡ ፈርዖን፡ ዐባይ፨
- እስመ፡ ሙሴ፡ ብሂል፡ እውጻእክዎ፡ እማይ፨
- ወሊተኒ፡ ታውፅአኒ፡ እምጽልመተ፡ ምግባር፡ እኩይ፨
- ወለተ፡ ኢያቄም፡ ሰማይ፡ ማርያም፡ ፀሓይ፨
-
- ሰላም፡ ለትንሣኤከ፡ እምንበለ፡ ትክሥት፡ መቃብረ፨
- ስብሐተ፡ ክርስቶስ፡ ትርአይ፡ ምስለ፡ ኤልያስ፡ ኅቡረ፨
- ሙሴ፡ በታቦር፡ እስመ፡ አስተርአይከ፡ ምዕረ፨
- ሕሉቀሰ፡ ትንሣኤ፡ ወተስፋ፡ ሕይወት፡ ምቱረ፨
- አመ፡ ንፍሐተ፡ ቀርን፡ ትትነሣእ፡ ወተሐዩ፡ ድኅረ፨
-
- ኦአምላከ፡ አብርሃም፡ ወአምላከ፡ ይስሐቅ፡ ወልዱ፨
- ወአምላከ፡ ቅዱስ፡ ያዕቆብ፡ እግዚአብሔር፡ አሐዱ፨
- ለመጋቤ፡ ቤትከ፡ ሙሴ፡ እንዘ፡ ታረፍቀኒ፡ ውስተ፡ ማዕዱ፨
- ሴስየኒ፡ መና፡ ሕይወት፡ ወእክለ፡ በረከት፡ እምእዱ፨
- ለደብረ፡ ገርዜን፡ ቅድመ፡ ዘመልአ፡ በዐውዱ፨
-
- በረድኤተ፡ አብ፡ ወወልድ፡ ወመንፈስ፡ ቅዱስ፡ ሥላሴ፨
- እንዘ፡ ያስተዳሉ፡ ለከ፡ አምኃ፡ ብፅዓን፡ ወውዳሴ፨
- ሙሴ፡ ሙሴ፡ መክብበ፡ ነቢያት፡ ሙሴ፨
- አምሳለ፡ ክርስቶስ፡ ዘይገብር፡ ተዝካረከ፡ አምሳለ፡ ፅሙድከ፡ አውሴ፨
- በረከተ፡ ሰማይ፡ ወምድር፡ ረሰዮ፡ ወራሴ፨