Other Titles
-
መልክአ፡ ሥላሴ፡ ካልእ፡
Malkəʾa Śəllāse Kāləʾ
Second Image of the Trinity
Malkəʾ
-
- እስመ፡ ብዙኃን፡ እሙንቱ፡ እለ፡ አኀዙ፡ ይጽሐፉ፨
- ሃይማኖተ፡ ቅድስት፡ ሥላሴ፡ እንተ፡ ተሳተፉ፨
- መጽሐፈ፡ ማሕሌት፡ ሠናየ፡ ዘእለ፡ አትረፉ፨
- ከመ፡ እስብክ፡ አንሰ፡ ወእንግር፡ ለዝሉፉ፨
- አናቅጸ፡ ስብሐት፡ አርባዕ፡ ቅድሜየ፡ ይኅልፉ፨
-
- ሰላም፡ ለህላዌክሙ፡ ዘኢይትዐወቅ፡ ጥንቱ፨
- ወዘኢይትአመር፡ ተፍጻሜቱ፨
- ሥሉስ፡ ቅዱስ፡ ዘኢትመውቱ፨
- እንዘ፡ ሠለስቱ፡ አሐዱ፡ ወእንዘ፡ አሐዱ፡ ሠለስቱ፨
- ለዕበይክሙ፡ ፍጻሜ፡ አልቦቱ፨
-
- ሰላም፡ ለዝክረ፡ ስምከ፡ እግዚአብሔር፡ አብ፨
- ወላዴ፡ ወልድ፡ ዋሕድ፡ እንበለ፡ ካዕብ፨
- እምቅድመ፡ ሰማያት፡ ርቡብ፡ ወእምቅድመ፡ ዓለም፡ ርኂብ
- ይገኒ፡ ለዝክረ፡ ስምከ፡ ኀልዮተ፡ ኵሉ፡ አልባብ፨
- ወበአፈ፡ ኵሉ፡ ፍጥረት፡ ዘሀሎ፡ ንባብ፨
-
- ሰላም፡ ለዝክረ፡ ስምከ፡ እግዚአብሔር፡ ወልድ፨
- ለእግዚአብሔር፡ አቡከ፡ ወአኮ፡ ለባዕድ፨
- ልደትከሰ፡ ዘምነደ፡ እሳት፡ ነድ፨
- በምሥጢር፡ ሐዲስ፡ እንበለ፡ ሕገ፡ እም፡ ዘልማድ፨
- ለዝክረ፡ ስምከ፡ ይደሉ፡ ሰጊድ፨
-
- ሰላም፡ ለዝክረ፡ ስምከ፡ እግዚአብሔር፡ ጰራቅሊጦስ፨
- ኅሊና፡ ልቡ፡ ለክርስቶስ፨
- ወዘነበርከ፡ በርእሱ፡ ርግበ፡ ዮርዳኖስ፨
- ይገንዩ፡ ለስብሐቲከ፡ ወለስምከ፡ ቅዱስ፨
- ከናፍረ፡ ኵሉ፡ መንፈስ፡ ወኵሉ፡ ዘነፍስ፨
-
- ሰላም፡ ለዝክረ፡ ስምክሙ፡ በበ፡ ህላዌሁ፡ ወገጹ፨
- አስማተ፡ ቅድስት፡ ሥላሴ፡ ዘኢተሐፅፁ፨
- ለሰይጣን፡ ዕድውየ፡ ወለመልአከ፡ ሞት፡ ቢጹ፨
- ዘይበረብሮሙ፡ ስረተ፡ ግርማሁ፡ ወድምፁ፨
- እምቀስተ፡ አፉየ፡ ኢይሰስል፡ ሐፁ፨
-
- ሰላም፡ ለሥዕርትክሙ፡ ዘይመስል፡ ጸዐድዒዶ፨
- ብዙተ፡ ፀምረ፡ እንበለ፡ ተብዕዶ፨
- ሥሉስ፡ ቅዱስ፡ ህልዋን፡ በተዋሕዶ፨
- ለሥዕርተ፡ ርእስየ፡ ዘተከልክሙ፡ ወፈጠርክሙ፡ ሙላዶ፨
- እንዘ፡ ትዌስኑ፡ ኍልቆሁ፡ ወፍቅዶ፨
-
- ሰላም፡ ለመልክእክሙ፡ አምሳሉ፡ ወራእዩ፨
- ለቤተ፡ ምጥማቅ፡ አሐዱ፡ ዘሠላስ፡ ሙሐዘ፡ ማዩ፨
- ሥሉስ፡ ቅዱስ፡ ለእጓለ፡ እመሕያው፡ ዕበዩ፨
- ውስተ፡ ዮርዳኖስ፡ ለነቅዐ፡ ጥምቀት፡ ሙዳዩ፨
- ለሥላሴክሙ፡ ተዐውቀ፡ አያዩ፨
-
- ሰላም፡ ለመልክእክሙ፡ መልክአ፡ ኵሉ፡ መዋኢ፨
- ወዘባሕርዪሁ፡ እንዳዒ፨
- ሥላሴክሙ፡ አብርሃም፡ እንዘ፡ በትንቢቱ፡ ያርኢ፨
- ይቤላ፡ ለሳራ፡ ተንሥኢ፡ ተንሥኢ፨
- መሣልሰ፡ መስፈርት፡ ዘስንዳሌ፡ ሠለስተ፡ አብሕኢ፨
-
- ሰላም፡ ለመልክእክሙ፡ እምአፈ፡ ቀሳውስት፡ ዘተሰብከ፨
- ጊዜ፡ ይሴብሑ፡ ወይብሉ፡ ንሤልስ፡ ለከ፨
- ዘንተ፡ ስብሐተ፡ እምአፉነ፡ ዘምስለ፡ መንግሥትከ፨
- ሥሉስ፡ ቅዱስ፡ በሉኒ፡ እንከ፨
- ኪያነ፡ ጸልአ፡ ዘጸልአ፡ ኪያከ፨
-
- ሰላም፡ ለባሕርይክሙ፡ እንዘ፡ ይነብር፡ አርያመ፨
- በተዋሕዶ፡ ወትሥልስት፡ እንተ፡ ይኴንን፡ ዓለመ፨
- ሥሉስ፡ ቅዱስ፡ በሥምረትክሙ፡ ክመ፨
- ሥላሴክሙ፡ ለኵሉ፡ ተዐውቀ፡ ፍጽሙ፨
- በምድረ፡ ዮርዳኖስ፡ ቅድመ፡ ወበታቦር፡ ዳግመ፨
-
- ሰላም፡ ለመለኮክሙ፡ ዘውእቱ፡ ንግሥ፨
- አብ፡ ወወልድ፡ ወመንፈስ፡ ቅዱስ፨
- እንዘ፡ ሀሎ፡ አብርሃም፡ ታሕተ፡ ዕፀ፡ ድርስ፨
- አስተርአይክምዎ፡ በሰዓተ፡ ዕለት፡ ሳድስ፨
- በሠርቀ፡ ራብዕ፡ ወርኅ፡ ወአኮ፡ ኃምስ፨
-
- ሰላም፡ ለምሕረትክሙ፡ በከመ፡ መጻሕፍት፡ ይነቡ፨
- እስከ፡ ይትፌሣሕ፡ ቦቱ፡ ለብእሴ፡ ኃጢአት፡ ልቡ፨
- በላዕለ፡ ኵሉ፡ ሥላሴ፡ አክናፈ፡ ምሕረት፡ ትረቡ፨
- አኮኑ፡ ኦሪት፡ ሥላሴክሙ፡ ታሌቡ፨
- ማኅበረ፡ አይሁድ፡ አብዳን፡ ማእዜኑ፡ ይበጡ፨
-
- ሰላም፡ ሰላም፡ ለተዋሕዶ፡ ቅድስት፡ ሥላሴ፨
- ቀዊምየ፡ ቅድመ፡ ሥላሴ፨
- እንበለ፡ ናፍቆ፡ ኣአምን፡ ህላዌ፡ ሥላሴ፨
- ግጻዌሆሙ፡ ሥላሴ፡ ወአካሎሙ፡ ሥላሴ፨
- ወቅዳሴሆሙ፡ ከማሁ፡ ሥላሴ፨