Details
-
- እስመ፡ ብዙኃን፡ እለ፡ አኀዙ፡ ነጊረ፡ ይውጥኑ፨
- ቅድመ፡ ማሕሌትከ፡ ዝንቱ፡ ዘወጠንክዎ፡ እዜኑ፨
- በዘእክል፡ ቂርቆስ፡ ለፈጽሞ፡ ዝንቱ፡ ደርሳኑ፨
- አስተቃኒ፡ ባሕረ፡ አእምሮ፡ ውስተ፡ ልብየ፡ መካኑ፨
- በጽውዐ፡ አፉየ፡ ይትቀዳሕ፡ እምይምኑ፨
-
- ሰላም፡ ለዝክረ፡ ስምከ፡ ዘጥንተ፡ ፊደሉ፡ ሣልስ፨
- ወፍጻሜሁ፡ ሳድስ፨
- ቂርቆስ፡ ሰማዕት፡ ዘውገ፡ ጊዮርጊስ፨
- አንቅሐኒ፡ ለስብሐቲከ፡ በሙቀተ፡ ዐዚዝ፡ መንፈስ፨
- ከመ፡ እምንዋሙ፡ ክቡድ፡ ይነቅህ፡ ፊንክስ፨
-
- ሰላም፡ ለአዕይንቲከ፡ አብያዘ፡ ተድላ፡ ወነፈርዐፅ፨
- ዘአስተዋደዶን፡ ኬንያ፡ በሰማየ፡ መልክእ፡ ሕኑጽ፨
- ቂርቆስ፡ ሕፃን፡ አቍራሬ፡ ነድ፡ ብቁጽ፨
- አንተኑ፡ አናንያ፡ መክብበ፡ ክልኤቱ፡ አብያጽ፨
- ወሚመ፡ መደንግጽ፡ ራብዓይ፡ ገጽ፨
-
- ሰላም፡ ለመላትሒከ፡ ዘኢደመነ፡ ቂሐቶን፨
- እምጢሰ፡ እቶን፨
- ቂርቆስ፡ ሕፃን፡ ወልደ፡ ሠረቃዊ፡ ብርሃን፨
- ሶበ፡ ትትነሣእ፡ ላዕሌየ፡ ስክርተ፡ ደመ፡ ሰብእ፡ ልሳን፨
- እዝነ፡ ረድኤት፡ ኩነኒ፡ በኵሉ፡ አዝማን፨
-
- ሰላም፡ ለበድነ፡ ሥጋከ፡ ሰረገላ፡ መንፈስ፡ ዘከበቶ፨
- እምይትቀበር፡ ምድረ፡ ወይትከደን፡ መሬቶ፨
- ማሕሌተ፡ መልክእከ፡ ቂርቆስ፡ እንዘ፡ እነግር፡ በአእኵቶ፨
- ናሁ፡ ፈጸምኩ፡ መልእክትየ፡ ከመ፡ ጳውሎስ፡ ወቲቶ፨
- ዕሤተ፡ ተስፋ፡ ጽድቅ፡ ሀበኒ፡ ኢይሖር፡ በከንቶ፨
-
- በፍቅደ፡ አርብዓ፡ ወሥልስ፡ ልደተ፡ አበው፡ ኵሉ፨
- ዘአባእኩ፡ ለከ፡ አምኃ፡ ማሕሌት፡ ዘይደሉ፨
- በቀለመ፡ ኪዳን፡ ቂርቆስ፡ ዘኢይደሉሰ፡ ፊደለ፡ ቃሉ፨
- ጸሐፍ፡ በክነፈ፡ ኪሩብ፡ ለዓለመ፡ ዓለም፡ የሀሉ፨
- ወውሂበ፡ ዕሤት፡ ሊተ፡ እምዘ፡ ብከ፡ አትሉ፨
- ተረፈ፡ መልክእ፡
-
- ሰላም፡ ለከ፡ ቂርቆስ፡ ሕፃን፨
- መአድመ፡ መልክእ፡ ወሥን፨
- ዘኢያፍርሀከ፡ ትግርምተ፡ ዕልዋን፨
- ለበዊእ፡ ውስተ፡ እቶን፨
-
- ሰላም፡ ለከ፡ ተኣምሪከ፡ ብዙኅ፡ እምኆፃ፡ ባሕር፡ ወሣዕር፨
- ዘኢይፌጽሞ፡ ቃለ፡ ከናፍር፨
- ወኢመብዝኅተ፡ ነገር፨
-
- ሰላም፡ ለከ፡ ለተኣምሪከሰ፡ እምኢያግመሮ፡ ዓለም፨
- ወሶበ፡ ተጽሕፈ፡ በማየ፡ ቀለም፨
- ቂርቆስ፡ መአድመ፡ ስም፨
-
- ሰላም፡ ለከ፡ ፈለገ፡ ሰላምነ፡ ቂርቆስ፡ ዘመጠንከ፡ ተከዜ፨
- ነዓ፡ ነዓ፡ ዘበበ፡ ጊዜ፨
- ለቡራኬ፡ ወለኑዛዜ፨
- እምሕዝብከ፡ ታሰስል፡ እንባዜ፨