መልክአ፡ እግዚአብሔር፡ አብ፡
Malkəʾa ʾƎgziʾabəḥer ʾAb
Image of God the Father
-
- እሰግድ፡ ለመለኮትከ፡ እንተ፡ ፈጠርከ፡ ጽልመተ፨
- እምቀድመ፡ ብርሃነ፡ ትግበር፡ ወታሰተባሪ፡ መዓልተ፨
- እግዚአብሔር፡ አሐዱ፡ እንተ፡ ኢኮንከ፡ ክልኤተ፨
- በስምዕ፡ ይሰምዩከ፡ ሠለስተ፨
- እንዘ፡ በመለኮት፡ ዋሕድ፡ ወብሁት፡ አንተ፨
-
- እሰግድ፡ ለመለኮትከ፡ ዘሣረርከ፡ ምድረ፨
- ለእጓለ፡ እመሕያው፡ ይኩን፡ ወለእንስሳ፡ ማኅደረ፨
- እግዚአብሔር፡ ገባሪ፡ ዘእንበለ፡ ትኅሥሥ፡ ምክረ፨
- ትጸውር፡ ድደ፡ በኀይልከ፡ እንዘ፡ ትነብር፡ ጠፈረ፨
- ወእንዘ፡ ተሐንጽ፡ መሠረተ፡ ትፄዐን፡ ቀመረ፨
-
- እሰግድ፡ ለመለኮትከ፡ እምገቦ፡ አዳም፡ ድኅረ፨
- እንተ፡ አውፃእካ፡ ለሔዋን፡ ከመ፡ ትርድኦ፡ ተግባረ፨
- እግዚአብሔር፡ ኪያከ፡ በዘአጸመድ፡ ወትረ፨
- መኑ፡ ያወፅእ፡ እምልብየ፡ ፍትወተ፡ ዓለም፡ ነኪረ፨
- እንበለ፡ ጥበብከ፡ አምላካዊ፡ ዘሰማየ፡ ገብረ፨
-
- እሰግድ፡ ለመለኮትከ፡ ዘአዕረፎሙ፡ ለአይሁድ፨
- በዐለተ፡ ሰንበት፡ ሰብእት፡ እምተግባረ፡ አእጋር፡ ወእድ፨
- እግዚአብሔር፡ አንተ፡ ሰንበተ፡ ክርስቲያን፡ እሑድ፨
- አግዕዘኒ፡ እምቅኔ፡ ሥጋ፡ ለአብጽሐ፡ ንስቲት፡ ሰጊድ፨
- በኍልቈ፡ ዕሥራ፡ ወክልኤቱ፡ ሰሙያን፡ አንጋድ፨
-
- ስብሐት፡ ለከ፡ እግዚአብሔር፡ ለለ፡ ሠርቀ፡ ዕለት፡ ወለያልይ፨
- ስብሐት፡ ለከ፡ እግዚአብሔር፡ በተባርዮ፡ ክረምት፡ ወሐጋይ፨
- ስብሐት፡ ለከ፡ እግዚአብሔር፡ በወርኀ፡ መጸው፡ ወጸደይ፨
- ስብሐት፡ ለከ፡ እግዚአብሔር፡ በኍልቈ፡ ኵሉ፡ ዘይትረአይ፡ ወኢይትረአይ፨
- ስብሐተ፡ ቅድምናከ፡ ዘልፈ፡ ይነግር፡ ሰማይ፨