መልክአ፡ ጻድቃን፡ Malkəʾa Ṣādqān

Image of the Righteous

- እምዮሐንስ፡ እስከ፡ ዮሐንስ፡ ለለ፡ ይገውሕ፡ ብሔር፨
- አንብብዋኬ፡ ተዐይነ፡ ሰማይ፡ ወምድር፨
- ለማሕሌተ፡ ጻድቃን፡ ዛቲ፡ ከመ፡ ስንክሳር፨
- አኮኑ፡ ይኄይስ፡ ወጥቀ፡ ይትበደር፨
- ዘልፋ፡ ክሡት፡ እምክቡት፡ ፍቅር፨
- ለጻድቃን፡ ዕደው፡ ንወድሶሙ፡ በእሪና፨
- እለ፡ አሥመዩ፡ ስመ፡ በበ፡ መዋዕሊሆሙ፡ መዋዕለ፡ ዜና፨
- እንዘ፡ አልቦቱ፡ አእጋረ፡ ወጽንፈ፡ መልክእ፡ ሰኰና፨
- ለወድሶቶሙሰ፡ በአምሳለ፡ ቀሊል፡ ደመና፨
- ይረውጽ፡ ልብ፡ ወየዐውድ፡ ኅሊና፨
- በስመ፡ እግዚአብሔር፡ አምላክ፡ እንተ፡ አምጽአ፡ ብርሃነ፨
- ለአርእዮ፡ ሥርዓት፡ ዐቢይ፡ ወለከሢተ፡ ግብር፡ ዘኮነ፨
- ማኅበረ፡ ክርስቶስ፡ ጻድቃን፡ እስመ፡ ሥመርኩክሙ፡ አነ፨
- በሉኒ፡ ነዓ፡ ወትሉ፡ ኪያነ፨
- ኅድጎሙ፡ ለሙታን፡ ይቅብሩ፡ ሙታነ፨
- ሰላም፡ ለፅንሰትክሙ፡ በሩካቤ፡ ሰብሳብ፡ ንጹሕ፨
- ለረኪበ፡ ተስፋ፡ ድልው፡ ወለዕሤተ፡ ጽድቅ፡ ጽኑሕ፨
- ማኅበረ፡ ክርስቶስ፡ ጻድቃን፡ ዘክፍልክሙ፡ ስቡሕ፨
- ይስርቅ፡ በልብየ፡ ዘሕገ፡ ጽድቅክሙ፡ በርህ፨
- መንፈቀ፡ ሳብዕ፡ እድ፡ ከመ፡ ይስርቅ፡ ወርኅ፨
- ሰላም፡ ሰላም፡ ለልደትክሙ፡ መንታ፨
- ዘሥጋ፡ አሐቲ፡ ወዘመንፈስ፡ ቅዱስ፡ ካልእታ፨
- ማኅበረ፡ ክርስቶስ፡ ጻድቃን፡ ብዙኃን፡ ሐሳብ፡ ወጾታ፨
- አቅሙኒ፡ ኀበ፡ ቆምክሙ፡ አመ፡ ይከውን፡ ሐተታ፨
- በዕለተ፡ ዕለታት፡ ዋሕድ፡ ዘአልቦ፡ ሳኒታ፨
- ሰላም፡ ለአስማቲክሙ፡ እንበለ፡ ተፈልጦ፡ ወኵፋሌ፨
- እለ፡ ተጽሕፋ፡ ኅቡረ፡ ውስተ፡ አርያማዊት፡ ጽሌ፨
- ማኅበረ፡ ክርስቶስ፡ ጻድቃን፡ እለ፡ እገሊት፡ ወእለ፡ እገሌ፨
- አዕድው፡ ኪያየ፡ እምባሕረ፡ ትካዝ፡ ወወይሌ፨
- በአስተምሕሮታት፡ ዓሥር፡ ወአርባዕ፡ ትንባሌ፨
- ሰላም፡ ለሥዕርትክሙ፡ ለለ፡ አሐቲ፡ አሐቲ፨
- ዘኢትወድቅ፡ ለዝሉፉ፡ ውስተ፡ ምድር፡ ዛቲ፨
- ማኅበረ፡ ክርስቶስ፡ ጻድቃን፡ አዝዝዋ፡ ላቲ፨
- ለነፍስየ፡ ፍቅርትክሙ፡ ለባሲተ፡ ሥጋ፡ መዋቲ፨
- ፍሬ፡ ምግባረ፡ ጽድቅ፡ ትለድ፡ ወአኮ፡ ትበስቲ፨
- ሰላም፡ ለመልክእክሙ፡ ለለ፡ አሐዱ፡ አሐዱ፨
- በበ፡ ኍላቌሁ፡ ወፍቅዱ፨
- ማኅበረ፡ ክርስቶስ፡ ጻድቃን፡ ለኂሩትክሙ፡ ከመ፡ ልማዱ፨
- ቅድሳተክሙ፡ ለከለባት፡ ኢተሀቡ፡ ይኂዱ፨
- ወባሕርየክሙ፡ አኅርው፡ ይኪዱ፨
- ሰላም፡ ሰላም፡ ለኵሎን፡ መልክእክሙ፨
- በበ፡ መሌሊቱ፡ ወስሙ፨
- ማኅበረ፡ ክርስቶስ፡ ጻድቃን፡ ወዘማርያም፡ እሙ፨
- እክለ፡ ማሕሌት፡ እንተ፡ አቅረብኩ፡ ለክሙ፨
- እንበለ፡ ትሕትቱ ኅቡረ፡ ጣዕሙ፨
- ሰላም፡ ሰላም፡ ለመልክእክሙ፡ ዘተከድነ፨
- ገርዜነ፡ ንጽሕ፡ ጽጉየ፡ ወዘቅድስና፡ ሰንዱነ፨
- ማኅበረ፡ ጻድቃን፡ በሉኒ፡ ድሜጥሮስ፡ ወልድነ፨
- ለምንትኑ፡ እንዘ፡ ሀሎናከ፡ ንሕነ፨
- ውስተ፡ ትፍሥሕትከ፡ ታበውዕ፡ ኀዘነ፨
- ሰላም፡ ለግንዘትክሙ፡ በዘዘ፡ ዚአሁ፡ አልባስ፨
- እንዘ፡ ይላህውክሙ፡ ላሐ፡ ደቂቀ፡ ክርስቶስ፨
- ማኅበረ፡ ጻድቃን፡ ንዑ፡ ኀበ፡ ትጸንሐክሙ፡ ነፍስ፨
- ተጽዒነክሙ፡ መልዕልተ፡ ጸዐድው፡ አፍራስ፨
- እማኅደርክሙ፡ ማኅደር፡ ቅዱስ፨
- ሰላም፡ ለትንሣኤክሙ፡ በዘይትፈቀድ፡ ጊዜ፨
- ለነሢአ፡ ትፍሥት፡ ክቡድ፡ ዘኢይቀርቦ፡ ትካዜ፨
- ማኅበረ፡ ክርስቶስ፡ ጻድቃን፡ ዘትካት፡ ወዘይእዜ፨
- አይድዑኒኬ፡ ለአይ፡ ወለማእዜ፨
- ዘሰማዕክሙ፡ ሊተ፡ ይውሕዝ፡ ተከዜ፨
- ሰላም፡ ለቀዊሞትክሙ፡ ሶበ፡ ተጸዋዕክሙ፡ ስመ፨
- እምድኅረ፡ ተንሣእክሙ፡ በሥጋ፡ ኀበ፡ በድንክሙ፡ ኖመ፨
- ማኅበረ፡ ጻድቃን፡ አባግዕ፡ ዘአልብክሙ፡ ድካመ፨
- ክፍሉኒኬ፡ ምስሌክሙ፡ በየማነ፡ ንጉሥ፡ ቀዊመ፨
- አመ፡ ይቀውሙ፡ አጣሌ፡ ፀጋመ፨
- ሰላም፡ ለዕሤትክሙ፡ ዘዐይን፡ ኢርእዮ፨
- እዝን፡ ኢስምዖ፡ ወኅሊና፡ ልብ፡ ዘኢኀለዮ፨
- ማኅበረ፡ ክርስቶስ፡ ጻድቃን፡ ኪያሁ፡ እስከ፡ ትሁቡኒ፡ በኢያንክዮ፨
- ነዮ፡ ነዮ፡ እስእለክሙ፡ ነዮ፨
- ከመ፡ ብእሲ፡ ርኁብ፡ ይስእል፡ ሲሳዮ፨
- ሰላም፡ ለኍልቌክሙ፡ ዘእጓለ፡ እመሕያው፡ ኢይክሎ፨
- ከመ፡ ይንግር፡ በተሀብሎ፨
- ማኅበረ፡ ጻድቃን፡ ኅቡረ፡ በኢታንትሎ፨
- ተራኅርኁ፡ ሊተ፡ በኵሉ፡ ተረፈ፡ ሕይወትየ፡ ኵሎ፨
- እስመ፡ ልበ፡ ክርስቶስ፡ ርኅሩኅ፡ ላዕሌክሙ፡ ሀሎ፨
- ሰላም፡ ለረድኤትክሙ፡ ውስተ፡ ቤተ፡ ባዕል፡ ወነዳይ፨
- ዘይሔውጽ፡ ዘልፈ፡ ከመ፡ እግረ፡ ጽዱል፡ ፀሓይ፨
- ማኅበረ፡ ክርስቶስ፡ ጻድቃን፡ አብዕልተ፡ ሰማይ፨
- ኅድጉሰ፡ በዘመጠነ፡ ዝ፡ ንዋይ፨
- ብዕለ፡ ጽድቅ፡ ብዙኅ፡ ይትረከብ፡ በሰማይ፨
- ሰላም፡ ለተኣምሪክሙ፡ ለሕዝበ፡ አረሚ፡ ወአይሁድ፨
- ዘይመይጦሙ፡ ወትረ፡ መንገለ፡ አሚን፡ እምካሕድ፨
- ማኅበረ፡ ክርስቶስ፡ ጻድቃን፡ ውስተ፡ ፍና፡ ኄራን፡ ዘመድ፨
- እንዘ፡ የሐውር፡ ኵሉ፡ ኀበ፡ መካነ፡ ሞት፡ ዋሕድ፨
- ምንት፡ ፍድፉዴሁ፡ ለጠቢብ፡ እምአብድ፨
- ሰላም፡ ለህላዌክሙ፡ በኢየሩሳሌም፡ ዘላዕሉ፨
- ዐይነ፡ አንስርት፡ ኀበ፡ አንጽሮቶ፡ ኢይክሉ፨
- ማኅበረ፡ ኢየሱስ፡ ክርስቶስ፡ ጻድቃን፡ ክሉ፨
- በሉኒ፡ ለለ፡ አሐዱ፡ እስመ፡ ይረትዕ፡ ወይደሉ፨
- በከዊነ፡ ዐርከ፡ ወቢጽ፡ ምስሌነ፡ ተሀሉ፨
- ማኅበረ፡ ክርስቶስ፡ ጻድቃን፡ አልቦ፡ አልቦ፨
- ለውዳሴክሙ፡ ኆፃ፡ እንተ፡ ይፌጽም፡ መክብቦ፨
- ዘይፈቅድ፡ ብእሲ፡ በአስተሐምሞ፡ ወበአስተርክቦ፨
- እመሰ፡ አእምሮ፡ ተውህቦ፨
- ከዋክብተ፡ ሰማይ፡ ኍልቈ፡ ወለዝናም፡ ነጥቦ፨

Details

Subject

Righteous ጻድቃን፡
Ṣādqān
The Righteous

Clavis Aethiopica: 3054 CAe: 3054
MC: 334 | HK: 214
Permalink: https://w3id.org/malke/3054/
Last modified: 11 February 2025

XML JSON src BetMaṣ

Remarks

Perhaps composed by a monk named Dəmeṭros, named in the 53rd stanza.