ʾƎm-bəzuḫ Taʾāmmərika (“From Your Many Miracles…”)

Māsgabiyā

- መንክራቲከ፡ ሰማዕነ፡ እንዘ፡ ትነብር፡ አርማንያ፡ መካነ፨
- ኤዎስጣቴዎስ፡ ተኣምር፡ በኢትዮጵያ፡ ዘኮነ፨
- መርበብቶ፡ ኢይስፋሕ፡ ውስተ፡ ማኅበርነ፨
- ትትበአስ፡ መስተቃርነ፡ ብጽሐነ፡ ፍጡነ፨
- ዘተሠርኀከ፡ ሥነ፡ ጳዝዮን፡ አቡነ፨

Malkəʾ

- እምብዙኅ፡ ተኣምሪከ፡ ኣቀድም፡ አሐተ፨
- ኤዎስጣቴዎስ፡ ዘትገብር፡ ዐበይተ፡ ኀይላተ፨
- መኰንን፡ ዝኁር፡ ሶበ፡ ፈቀደ፡ ነሢተ፨
- መቃብሪከ፡ ክብርተ፡ በአእባነ፡ ባሕርይ፡ ሕንፅተ፨
- ምስለ፡ ሠራዊቱ፡ ብዙኅ፡ ረሰይኮ፡ ሐውልተ፨
- ካልእ፡ ተኣምሪከ፡ ኤዎስጣቴዎስ፡ ድንግል፨
- አመ፡ ውስተ፡ ባሕር፡ ተሠጥመ፡ እንዘ፡ ይጐይይ፡ እምቀትል፨
- በከመ፡ አድኀንኮ፡ ለብርሃነ፡ መስቀል፨
- በዐጽፈ፡ ዚአከ፡ እምትንሣኤ፡ ግሩም፡ ማዕበል፨
- መኑ፡ ከማከ፡ ገቢረ፡ ዘይክል፨
- ዐሥር፡ ተኣምሪከ፡ በኍልቈ፡ ቃላት፡ ዐሥር፨
- ኤዎስጣቴዎስ፡ ኀያል፡ ገባሬ፡ ተኣምር፨
- ከመ፡ ታዘንም፡ ሎሙ፡ ለሰብአ፡ አሐቲ፡ ሀገር፨
- በሐሩር፡ ወቍር፡ ወበብዙኀ፡ ዐባር፨
- እንዘ፡ ኵላ፡ ትውዒ፡ ምድር፨
- አናኅኩ፡ ነፍስየ፡ ወከሠትኩ፡ አፈ፨
- ኤዎስጣቴዎስ፡ እዜኑ፡ ተኣምሪከ፡ ትሩፈ፨
- አናብስተ፡ ግርዳም፡ መፍርሃን፡ እንዘ፡ ይትለአኩከ፡ ዘልፈ፨
- አሐዱ፡ ዘይጸውር፡ ዐጽፈ፨
- ወካልኡ፡ ክልኤተ፡ መንጸፈ፨
- ለዝንቱ፡ አበ፡ መንፈስነ፡ ዕበየ፡ ገድሉ፡ አምጽኡ፨
- ዘሰበከ፡ ለነ፡ ተክለ፡ ሃይማኖት፡ ረድኡ፨
- ነጸርክዎ፡ ይቤ፡ ቅድመ፡ መንበረ፡ አብ፡ ወበግዑ፨
- እንዘ፡ ይቀውም፡ በግርማ፡ ምስለ፡ ሊቃናት፡ ሰብዑ፨
- እሙንኬ፡ ወጽድቅ፡ ስምዑ፨
- ኵሉሰ፡ ተኣምሪሁ፡ ሶበ፡ ተጽሕፈ፡ በበ፡ አሐዱ፨
- እመ፡ ኢተገምረ፡ ኍልቈ፡ ወእመ፡ ኢተክህለ፡ ፍቅዱ፨
- ለኤዎስጣቴዎስ፡ አብ፡ ዘገቢረ፡ ምሕረት፡ ልማዱ፨
- ባሕረ፡ ውዳሴሁ፡ አመ፡ ፈቀድኩ፡ እእዱ፨
- ዕፅበት፡ ንስቲተ፡ ከልአኒ፡ ሞገዱ፨

እምብዙኅ፡ ተኣምሪከ፡ ʾƎm-bəzuḫ Taʾāmmərika

“From Your Many Miracles…”