Subjects
Prophet
ዳዊት፡
Dāwit
David
David
Malkəʾ
-
- እምሥርወ፡ ዕሤይ፡ እስመ፡ ሠረጽከ፡ ወእማሕፀና፡ ለሩት፨
- ያስተበፅኡከ፡ በእንተ፡ ዝ፡ በንባበ፡ ኵሉ፡ ስብሐት፨
- ኦብፁዕ፡ ንጉሠ፡ እስራኤል፡ ዳዊት፨
- ሶበ፡ ተረክበ፡ ወተከሥተ፡ ባሕርየ፡ ውሳጣይ፡ ሕይወት፨
- እመዝገበ፡ ከርሣ፡ ለማርያም፡ ለከ፡ ወለት፨
-
- ሰላም፡ ለዝክረ፡ ስምከ፡ ውስተ፡ ረቀ፡ መዝሙር፡ ዘተዋደደ፨
- ወለሥዕርተ፡ ርእስከ፡ ሰላም፡ በቅብአ፡ ትሕትና፡ ዘጽሕደ፨
- ፍኖተ፡ ሰማይ፡ ዳዊት፡ ጊዜ፡ አርታዕኩ፡ መንገደ፨
- አስተፋጥን፡ ለቀበላየ፡ እንዘ፡ ታስተናሥእ፡ እደ፨
- እስመ፡ ፍና፡ ዝንቱ፡ መጽብብ፡ እፈርህ፡ ፈድፉደ፨
-
- ሰላም፡ ለርእስከ፡ በአክሊለ፡ መንግሥት፡ ዘከብረ፨
- ወለሥነ፡ ገጽከ፡ እምፀሓይ፡ ዘያበርህ፡ ወትረ፨
- ፍኖተ፡ ሰማይ፡ ዳዊት፡ ጊዜ፡ አርታዕኩ፡ ሐዊረ፨
- አስተሣኒ፡ ሊተ፡ መሰንቆ፡ ወአስተዋድድ፡ መዝሙረ፨
- ከመ፡ ለጻድቃን፡ ታስተዳሉ፡ ወትረ፨
-
- ሰላም፡ ለመቃብሪከ፡ ዘምዕዝት፡ በዐልው፨
- በከመ፡ ሕጎሙ፡ ለቀደምት፡ አበው፨
- ዳዊት፡ ጸሊ፡ ቅድመ፡ ገጸ፡ አምላክ፡ ሕያው፨
- ከመ፡ እድኀን፡ በጸሎትከ፡ እምንሳዌ፡ እግር፡ ከዋው፨
- ወእማዕቀፁ፡ ለብእሲ፡ ጽልሕው፨
-
- መጽሐፈ፡ ልደቱ፡ ለክርስቶስ፡ ወልደ፡ ዳዊት፡ ንጉሥ፨
- ዘይቤ፡ ማቴዎስ፡ በመንፈስ፡ ቅዱስ፨
- ከመ፡ ኪያከ፡ ይረሲ፡ መልዕልታ፡ ለቍድስ፨
- ዳዊት፡ ነቢይ፡ ዳዊት፡ ንጉሥ፨
- ያስተበፅዐከ፡ በእንተ፡ ዝ፡ ኵሉ፡ ዘነፍስ፨
-
- ቃልየ፡ ስማዕ፡ ወለቡ፡ ጽራኅየ፨
- ወአጽምዐኒ፡ ቃለ፡ ስእለትየ፨
- ትስአል፡ ሊተ፡ ዳዊት፡ ኀበ፡ አምላኪየ፨
- እግነይ፡ ከመ፡ ከማከ፡ በኵሉ፡ ልብየ፨
- እስመ፡ አልቦ፡ ኃጥእ፡ ዘከማየ፨
-
- እምአዳም፡ አበ፡ ዓለም፡ ወሄኖክ፡ አበ፡ ኖኅ፨
- እምአብርሃም፡ ወሙሴ፡ እስከነ፡ ዳዊት፡ የዋህ፨
- እምሳሙኤል፡ ካህን፡ ወዘካርያስ፡ ንጹሕ፨
- ተዘከሩኒ፡ ለለ፡ ጊዜ፡ ቅድመ፡ ገጸ፡ ክርስቶስ፡ መሲሕ፨
- እስእለክሙ፡ ጊዜ፡ ሰርክ፡ ወነግህ፨