Subjects
Righteous
ዮሴፍ፡
Yosef
Joseph
Joseph
Malkəʾ
-
- ኣቀድም፡ አስተብቍዖተከ፡ እግዚአብሔር፡ አምላክ፨
- ወእትጋነይ፡ ለከ፡ እንዘ፡ ሰግድ፡ በብረክ፨
- ከመ፡ እዜኑ፡ ንስቲተ፡ እምዝክረ፡ ዮሴፍ፡ ቡሩክ፨
- ያንቅሓኒ፡ ጊዜ፡ ጽባሕ፡ ወያትግሃኒ፡ በሰርክ፨
- በቅድመ፡ ገጽከ፡ ዘይተግህ፡ መልአክ፨
-
- ሰላም፡ ለዝክረ፡ ስምከ፡ ሞገሰ፡ ከናፍር፡ ወልሳን፨
- ዜና፡ ፍሥሓ፡ ለእዝን፡ ወሠርጐ፡ መርዓዊ፡ ለዐይን፨
- መዋዕለ፡ ጽጋብ፡ ዮሴፍ፡ ወዘጊዜ፡ ተድላ፡ ዘመን፨
- እምከመሰ፡ ሰረብዎ፡ ለፍቅርከ፡ ወይን፨
- እምልበ፡ ኣግዓዚ፡ ወገብር፡ ይትረሳእ፡ ኀዘን፨
-
- ሰላም፡ ለሥዕርተ፡ ርእስከ፡ ዘኢተቀብአ፡ ለአንኆ፨
- ቅብአ፡ መዐዛ፡ ወተመክሖ፨
- ብዙኀ፡ ምሕረት፡ ዮሴፍ፡ ለምሕረትከ፡ ሰብሖ፨
- አንግረኒ፡ እምአበ፡ ደም፡ ወባልሐኒ፡ ባልሖ፨
- ከመ፡ ኢይርከበኒ፡ በፍኖት፡ ጸኒሖ፨
-
- ሰላም፡ ለቆምከ፡ ዓርዘ፡ ተነብዮ፡ ወኣምሳል፨
- በፈለገ፡ ኦሪት፡ ዘልህቀ፡ ወበነቅዐ፡ ሐዲስ፡ ወንጌል፨
- ዮሴፍ፡ መዋኢ፡ በውስተ፡ ኵሉ፡ ኀያል፨
- መግበኒ፡ በኲናትከ፡ ወበሰይፍከ፡ ስሑል፨
- እስመ፡ ፈድፋደ፡ አስርሐኒ፡ ቀትል፨
-
- ሰላም፡ እብል፡ በበ፡ መሌሊቱ፡ ወስሙ፨
- ለማኅፈደ፡ ሥጋከ፡ ኵሉ፡ ምስለ፡ ኣስራዊኡ፡ ወደሙ፨
- ዮሴፍ፡ ፍቁር፡ በኀበ፡ ኢየሱስ፡ ወእሙ፨
- ገብረተ፡ ዓመፃ፡ እመ፡ በላዕሌየ፡ ቆሙ፨
- ኪዳኖሙ፡ ዘርዝር፡ ወዕሉ፡ ምክሮሙ፨
-
- ሰላም፡ ለፀአተ፡ ነፍስከ፡ እንበለ፡ ፃዕር፡ ወሙስና፨
- ፈጺመከ፡ ሕገ፡ ቀኖና፨
- አስተበቍዓከ፡ ዮሴፍ፡ በእንተ፡ ማርያም፡ ወለተ፡ ሓና፨
- በኃሣር፡ ወኅርትምና፡ ዓመታትየ፡ ኮና፨
- አዕርገኒ፡ በደመና፡ ሀገረከ፡ ሲና፨
-
- ሰላም፡ ለበድነ፡ ሥጋከ፡ ዘኪነ፡ ግንዘቱ፡ መንክር፨
- በአፈወ፡ ወንጌል፡ ምፁዝ፡ ወበልብሰ፡ ክህነት፡ ክቡር፨
- ሀገረ፡ መድኃኒት፡ ዮሴፍ፡ ዘተሐነጽከ፡ በደብር፨
- ምስካይየ፡ ወምጕያይየ፡ በዕለተ፡ ምንዳቤ፡ ወፃዕር፨
- አመ፡ ዴገነኒ፡ አበ፡ ደም፡ ነኪር፨
-
- ሰላም፡ ለመቃብሪከ፡ ዘኢያንቀለቅል፡ ድዳ፨
- በኀይለ፡ አዕፅምቲከ፡ ዮሴፍ፡ እስመ፡ ጸንዐ፡ ፅንጻ፡ ማኅፈዳ፨
- እንዘ፡ የሐቅፍዋ፡ ወትረ፡ ወይትካፈልዎ፡ ለክበዳ፨
- ከመ፡ መቃብሩ፡ ለጊዮርጊስ፡ ዘልዳ፨
- ያመጽኡ፡ ላቲ፡ ነገሥታት፡ ጋዳ፨
-
- ኦዮሴፍ፡ ኀቤከ፡ እንዘ፡ ኣንቀዓዱ፨
- አማኅኩከ፡ እማኄ፡ ለመላክዒከ፡ ዘበበ፡ ፍቅዱ፨
- ወአንተኒ፡ ለብዝኀ፡ ሂሩትከ፡ ከመ፡ ልማዱ፨
- ድሉ፡ ሊተ፡ ዕሤትየ፡ ዘለለ፡ አሐዱ፡ አሐዱ፨
- ለኅሊናየ፡ ከመዝ፡ መፍቅዱ፨