Subjects
Martyr
ገላውዴዎስ፡
Galāwdewos
Claudius
Claudius
Malkəʾ
-
- ናሁ፡ ተወጥነ፡ ለመልክእከ፡ ሰላሙ፨
- እንዘ፡ መንፈስ፡ ቅዱስ፡ ይረድእ፡ ወያበጽሕ፡ እስከ፡ ተፍጸሙ፨
- ገላውዴዎስ፡ ባርክ፡ መንግሥተ፡ ገላውዴዎስ፡ ለለጌሠሙ፨
- ምስለ፡ መንግሥትከ፡ ንግሡ፡ ወምስለ፡ ስምከ፡ ስሙ፨
- እስመ፡ ተሳተፈ፡ እምፀሐይ፡ ቀዲሙ፨
-
- ሰላም፡ ለዝከረ፡ ስምከ፡ ውስተ፡ አፈ፡ ኵሎሙ፡ መሃይምናን፨
- ዘጥዑም፡ ፈድፋደ፡ እምዘትረ፡ ጸቃውዕ፡ ወወይን፨
- ገላውዴዎስ፡ መሥዋዕት፡ ወመዓዛ፡ ቀዱስ፡ ቍርባን፨
- እስከ፡ እሤልጥ፡ ቃለ፡ ሰላም፡ ዘመልክእከ፡ ኵሎን፨
- ውስተ፡ እዝነ፡ ልብየ፡ ይድምፅ፡ ረድኤትከ፡ ቀርን፨
-
- ሰላም፡ ለሥዕርተ፡ ርእስከ፡ እንተ፡ በዲቤሁ፡ ነፍነፈ፨
- ጠለ፡ መንፈስ፡ ቅዱስ፡ ቀዳሲ፡ ከመ፡ ሰሎሞን፡ ጸሐፈ፨
- ገላውዴዎስ፡ ሰማዕት፡ ዘተጋደልከ፡ ትሩፈ፨
- ኦወሬዛ፡ ትዕግሥተ፡ ገድልከ፡ ዘልፈ፨
- ጽጌ፡ ብሩር፡ ይመስል፡ ወወርቀ፡ ንጡፈ፨
-
- ሰላም፡ ለርእስከ፡ ዘቅብዓ፡ መስኮት፡ አጥለሎ፨
- በአከሊለ፡ ሞገስ፡ ወክብር፡ አምሳለ፡ ወልታ፡ ጽድቅ፡ ዘይኬልሎ፨
- ገላውድዎስ፡ ሥርግው፡ በትርሲተ፡ ንጽሕ፡ ወተደንግሎ፨
- ዘይገዝም፡ ጕንደ፡ ወእም፡ አበሳየ፡ ኵሎ፨
- ጕድበ፡ ምሕረት፡ ይሩጽ፡ በእዴከ፡ ዘዘሎ፨
-
- ሰላም፡ ለገጽከ፡ ብርሃነ፡ ቅድስት፡ ሥላሴ፨
- ዘተሠውጠ፡ ቦቱ፡ ከመ፡ ገጸ፡ ነቢይ፡ ሙሴ፨
- ገላውዴዎስ፡ ፀሐይ፡ ወንጉሠ፡ ሌሊት፡ ብናሴ፨
- በዓፀደ፡ ተድላ፡ አመ፡ ትከውን፡ ነጋሤ፨
- ረስየኒ፡ ግብረ፡ ወምእመነ፡ ብእሲ፨
-
- ሰላም፡ ሰላም፡ ለቀራንብቲከ፡ መንታ፨
- ነገረ፡ ጥበብ፡ ሥውረ፡ እንተ፡ ለዘልፍ፡ የሐታ፨
- ገላውዴዎስ፡ ኃያል፡ ተወልታዊ፡ መስቀል፡ ዘጎልጎታ፨
- ሴስየኒ፡ እከለ፡ መንፈስ፡ ስለ፡ ይጸብሕ፡ ሳኒታ፨
- ሰብሐተ፡ ከብርከ፡ እንብብ፡ በብዙኅ፡ ጾታ፨
-
- ሰላም፡ ለአዕይንቲከ፡ እለ፡ ኢኮና፡ ሐማሜ፨
- እመ፡ ተደለወ፡ ለገባአት፡ ዲናረ፡ ዐስበ፡ ጽድቅ፡ ዲድርክሜ፨
- ገላውዴዎስ፡ ኅሩይ፡ እምሳለ፡ ጳውሎስ፡ ዘብሔረ፡ ሮሜ፨
- አይድዐኒ፡ ምክረ፡ ጥበብ፡ ወነገረ፡ ሕይወት፡ ቀጥሜ፨
- እምገነተ፡ ስምከ፡ እኩን፡ አፈወ፡ ቀሳሜ፨
-
- ሰላም፡ ለአእዛኒከ፡ ዘያጸምኣ፡ ስእለቶ፨
- ለነዳይ፡ ብእሲ፡ ዘጥቅመ፡ ምንዳቤ፡ ዓገቶ፨
- ገላውዴዎስ፡ ነዓ፡ ሶበ፡ ጸዋዕኩከ፡ በተሐግርቶ፨
- ከመ፡ ትምርሐኒ፡ ወታርአየኒ፡ ፍኖቶ፨
- ለዘብእሲ፡ ጥበብ፡ ሐነጸ፡ ዲበ፡ ኰነሕ፡ ቤቶ፨
-
- ሰላም፡ ለመላትሒከ፡ ከመ፡ ቃለ፡ መጽሐፍ፡ ዚነወ፨
- ዘርኄ፡ ወረዳ፡ እለ፡ ይፈርያ፡ አፈወ፨
- ገላውዴዎስ፡ ሰማዕት፡ እንተ፡ ደምከ፡ ተክዕወ፨
- በላህበ፡ ጌጋይ፡ አመ፡ ፈድፋደ፡ መጽለወ፨
- ላዕለ፡ መላትሕየ፡ ንዛን፡ ላህየከ፡ ቅድወ፨
-
- ሰላም፡ በአእናፊከ፡ ዕፍረተ፡ ስምዓ፡ ጽድቅ፡ ወገድል፨
- ዘአፄነዋ፡ ፈድፋደ፡ አምሳለ፡ አበሜ፡ ወኮል፨
- ገላውዴዎስ፡ ፍሡሕ፡ ወወሬዛ፡ መንግሥት፡ ኃያል፨
- ናዝዘኒ፡ በፍሥሓከ፡ እምብካየ፡ ብዙ፡ ኃጕል፨
- አመ፡ ለቃለ፡ አብ፡ ይሰፋሕ፡ ሞጣሕቱ፡ በቀል፨
-
- ሰላም፡ ለከናፍሪከ፡ እለ፡ ያፈቅራ፡ ነቢበ፨
- ነገረ፡ የውሃት፡ ዘርግብ፡ ወዘአርዌ፡ ምድር፡ ጥበበ፨
- ገላውዴዎስ፡ ሰማዕት፡ ዘተጋደልከ፡ ዕፁበ፨
- ምስለ፡ አብያጺከ፡ ጊዜ፡ ትገብር፡ ከብካበ፨
- ፍርፋየ፡ ስብሐቲከ፡ አጽግብ፡ ከርሥየ፡ ርኁበ፨
-
- ሰላም፡ ለአፉከ፡ ዘጣዖታተ፡ ዝሰፈ፨
- እለ፡ ኢይነቡ፡ ሕቀ፡ እንዘ፡ ቦሙ፡ አፈ፨
- ገላውዴዎስ፡ ባሕርይ፡ ዘኢትትከደን፡ ሰይፈ፨
- ነኰርኳርከ፡ ዝዋካ፡ አመ፡ ምድረ፡ ጽልመት፡ ኃለፈ፨
- ብርሃነ፡ ሕይወት፡ በሴድራ፡ ተርፈ፨
-
- ሰላም፡ ለአስናኒከ፡ በኆኅተ፡ ሥጋከ፡ ሕንጻ፨
- ማዕዎ፡ ጽድቀ፡ ቃል፡ ዝኮና፡ እምነቢበ፡ ኵሉ፡ ዓመፃ፨
- ገላውዴዎስ፡ ሰማዕት፡ ወትሩፈ፡ ገድል፡ አምኆፃ፨
- ኵነኒ፡ ቀስተ፡ መዊዕ፡ ወዘረድኤት፡ አሕዋ፨
- አምነ፡ ልሳን፡ ቀታሊት፡ ዘግሩም፡ ድምፃ፨
-
- ሰባም፡ ለልሳንከ፡ ድኅረ፡ እምሕሊና፡ ሠረፀ፨
- ዘቃለ፡ ሐሤት፡ ይወልድ፡ ወመስተፍሥሔ፡ ልብ፡ ድምፀ፨
- ገላውዴዎስ፡ ሰማዕት፡ አንተ፡ ሠለጥከ፡ ምርዋፀ፨
- ላዕሌየ፡ ሲዘቈጸሩ፡ ምስለ፡ አማዑቶሙ፡ ገጸ፨
- በክሳደ፡ ነፍሶሙ፡ ስቅል፡ ዘአድግ፡ ማኅረፀ፨
-
- ሰላም፡ ለቃልከ፡ ዘጣዕመ፡ ድምፁ፡ ነከራ፨
- ዘይኄይስ፡ እምድምፀ፡ አርጋኖን፡ ወእንዚራ፨
- ገላውዴዎስ፡ መክብብ፡ ዘሰማዕታተ፡ ጽድቅ፡ እለ፡ መርቆራ፨
- እንዘ፡ ያነክሩ፡ ዘተዓግሥከ፡ መከራ፨
- በዓለ፡ ስምከ፡ በሰማይ፡ ይገብሩ፡ ሐራ፨
-
- ሰላም፡ ለእስትንፋስከ፡ እንተ፡ ይነፍሕ፡ መዓዛ፨
- መሳከወ፡ ልብከ፡ ቅቡዕ፡ በደመ፡ መስኮት፡ ከመ፡ ራግዛ፨
- ገላውዴዎስ፡ ኃያል፡ በአርማኃ፡ በቀል፡ ተረጊዛ፨
- እምጽንዕከ፡ ወእምትብዕከ፡ መዋዒ፡ ወሬዛ፨
- አድያመ፡ ቍዝ፡ ቀትረ፡ ተበርበረት፡ ጋዛ፨
-
- ሰላም፡ ለጕርዔከ፡ ዘዝክሩ፡ መዓርዒር፨
- እምዝክረ፡ ወይን፡ ሥሙር፨
- ገላውዴዎስ፡ ፌማ፡ ፍጹመ፡ አእምሮ፡ ወምክር፨
- እንዘ፡ አንተ፡ ወልደ፡ ንጉሥ፡ ወዘመደ፡ ፍጥረት፡ ክቡር፨
- እፎኑ፡ ተዳደቀከ፡ ምናኔ፡ ኀሡር፨
-
- ሰላም፡ ለክሳድከ፡ ዘአርማስቆስ፡ አምሳሉ፨
- በዝግና፡ ባሕርይ፡ ከቡረ፡ ዘተሠርገወ፡ እምላዕሉ፨
- ገላውዴዎስ፡ ፍቁር፡ ሰልበ፡ ፍጥረታት፡ ኵሉ፨
- አምረኒ፡ ፍኖተ፡ ጽድቅ፡ እንዘ፡ ታቀድም፡ ወታተሉ፨
- አመ፡ መሠገርተ፡ ሞት፡ ቅድሜየ፡ ተከሉ፨
-
- ሰላም፡ ለመትከፍትከ፡ እንተ፡ ተፅዕነ፡ ዲቤሁ፨
- አርዑተ፡ ኢየሱስ፡ ሠናይ፡ ወቀሊል፡ ጾረ፡ ዚአሁ፨
- ገላውዴዎስ፡ ሐሊ፡ ሲሳየ፡ መፍቅድየ፡ ለለጽባሑ፨
- ሀካይስ፡ እንተ፡ ኃዋፈ፡ እዴሁ፨
- ደሞ፡ ይሰቲ፡ ወይበልዕ፡ ሥጋሁ፨
-
- ሰላም፡ ለዘባንከ፡ እንተ፡ አፍቀረ፡ ተመይጦ፨
- እምኅራመ፡ ጣዖት፡ ዘወርቅ፡ ዘእደ፡ ነሀቢ፡ ዘበጦ፨
- ገላውዴዎስ፡ ፍንው፡ መልእከተ፡ ክርስቶስ፡ ለአሥልጦ፨
- ከመ፡ እኩን፡ ገብረ፡ ዚአከ፡ እንዘ፡ አልብየ፡ ተፈልጦ፨
- ለደመ፡ ስምዕከ፡ ረስየኒ፡ ሤጦ፨
-
- ሰላም፡ ለእንግድዓከ፡ ምዕላደ፡ ልቡና፡ ዘኮነ፨
- ወረሰየ፡ ዓዲ፡ ሎግ፡ ምክር፡ ከዳነ፨
- ገላውዴዎስ፡ ዕፍረት፡ አንተ፡ ትምዕዝ፡ ዕጣነ፨
- አድኅነኒ፡ እምአፈ፡ ፀር፡ እንተ፡ የሐቂ፡ አስናነ፨
- አመ፡ ላዕሌየ፡ አንሥአ፡ ዓቢየ፡ ተስናነ፨
-
- ሰላም፡ ለሕፅንከ፡ ምርፋቀ፡ ጥበብ፡ ኅሪት፨
- ዘሕገጊሃ፡ ወንጌል፡ ወሥርዓታቲሃ፡ ኦሪት፨
- ገላውዴዎስ፡ ግሥ፡ እምአፍቅሮ፡ ጥሪት፨
- ውስተ፡ ዓፀድከ፡ ወግነትከ፡ መፍሪት፨
- ትምርሐኒ፡ ለበዊአ፡ ልብከ፡ ጽሪት፨
-
- ሰላም፡ ለአእዳዊከ፡ እለ፡ ሠረዋ፡ አፅራረ፨
- ንጉሡ፡ አረሚ፡ ዘቍዝ፡ አመ፡ ማዕሌተ፡ ገብረ፨
- ገላውዴዎስ፡ ሠርዌ፡ ወርእሰ፡ አእላፍ፡ ወትረ፨
- ጊዜ፡ ቀተሉከ፡ ምስለ፡ ፊቅጦር፡ ኅቡረ፨
- ሰብአ፡ አንጾኪያ፡ ወግብጽ፡ በከዩ፡ መሪረ፨
-
- ሰላም፡ ለመዛርዒከ፡ በሥምረተ፡ ክርስቶስ፡ ሊቅ፨
- እምአጕናደ፡ አባል፡ ዘዓርጋ፡ አምሳለ፡ ሠናያን፡ አዕጹቅ፨
- ገላውዴዎስ፡ ጽጌ፡ ወሕንባበ፡ ዛ ረዳ፡ ዘሐይቅ፨
- ይኄይሰኒ፡ ለገብርከ፡ ሕግ፡ አፉከ፡ ዘጽድቅ፨
- እምነ፡ አእላፍ፡ ብሩር፡ ወቀይሕ፡ ወርቅ፨
-
- ሰላም፡ ሰላም፡ ለዘዚአከ፡ ኲርናዕ፨
- አመ፡ ዕለተ፡ ዐብዕ፡ ዘጸንዓ፡ አምሳለ፡ አርዌ፡ ብርት፡ ጽኑዕ፨
- ገላውዴዎስ፡ ፍሡሕ፡ ወያርብታዊ፡ ተባዕ፨
- ይኩነኒ፡ ማየ፡ ጥምቀት፡ ለብእሲ፡ ኃጥእ፨
- ነ፡ እምዓይነ፡ በቅጥር፡ እኁከ፡ ዘውኅዘ፡ አንብዕ፨
-
- ሰላም፡ ለእመትከ፡ ከመ፡ አዘዘ፡ ክርስቶስ፨
- እንተ፡ አምጣኒሃ፡ ሠፈረ፡ ለኢየሩሳሌም፡ መቅደስ፨
- ገላውዴዎስ፡ ንጉሥ፡ በዕለተ፡ ኵነኔ፡ መብዕስ፨
- ጸግወኒ፡ ሐመረ፡ ተድላ፡ ዘኢየሀውኮ፡ ነፋስ፨
- ምስሌከ፡ ለኃዲር፡ ኀበ፡ ዘዓን፡ ወመርስ፨
-
- ሰላም፡ ለእራኃቲከ፡ እለ፡ ይሰፍሓ፡ ለዘልፍ፨
- ለውሂበ፡ ሀብታት፡ ብዙኅ፡ ወጸግዎ፡ ጸጋ፡ ትሩፍ፨
- ገላውዴዎስ፡ መልአክ፡ ወዘውግ፡ ትጉሃን፡ አእላፍ፨
- ዘአስተርኢ፡ ቅድመ፡ ገጽየ፡ እንዘ፡ ትሠርር፡ በክንፍ፨
- አመ፡ ቀርነ፡ ጽራሕ፡ ይነፍሕ፡ ሚካኤል፡ ዖፍ፨
-
- ሰላም፡ ለአጻብኢከ፡ ዘኍላቌሆን፡ ዓሥር፨
- እለ፡ ሥርግዋት፡ እማንቱ፡ በኅልቀተ፡ ሰላም፡ ወፍቅር፨
- ገላውዴዎስ፡ አዚዝ፡ መኰንነ፡ ዕበይ፡ ወክብር፨
- እስመ፡ አሥጠመኒ፡ ፈለግ፡ ኃጢአት፡ ወነውር፨
- በሰሪቦቱ፡ ትርድአኒ፡ ምድር፨
-
- ሰላም፡ ለአጽፋረ፡ እዴከ፡ ዘኑባሬሆን፡ ሉዓሌ፨
- በከተማ፡ አጽባዕት፡ ዓሥር፡ እንዘ፡ ያበርሃ፡ ከመ፡ ቢረሌ፨
- ገላውዴዎስ፡ ተቅዋም፡ ወወጾረ፡ ትእዛዝ፡ ጽሌ፨
- እንዘ፡ ይትአመኑ፡ አድኅኖተከ፡ ከሀሌ፨
- ሙሴ፡ ወአሮን፡ ጸሐፉ፡ ኩፋሌ፨
-
- ሰላም፡ ለገቦከ፡ ዘተዓገሠ፡ ርግዘተ፨
- በአፈ፡ ኲናት፡ በሊሕ፡ እስከ፡ ሠለጥከ፡ መዊተ፨
- ገላውዴዎስ፡ ንጹሕ፡ ዘኢተአምር፡ ርስሐተ፨
- ርእዮሙ፡ ጸላእትነ፡ ከመ፡ ይትኃፈሩ፡ ግብተ፨
- ግበር፡ ላዕሌነ፡ ሠናየ፡ ትእምርተ፨
-
- ሰላም፡ ለከርሥከ፡ መብልዓ፡ ጣዖታት፡ ዘከደ፨
- ረኃበ፡ ኵነኔ፡ ማሕምም፡ እንዘ፡ ይገብር፡ ማዕደ፨
- ፀባኢተ፡ አርማን፡ ወቍዝ፡ አመ፡ አንሥኡ፡ መራደ፨
- ገላውዴዎስ፡ ጽንዓ፡ ኃይልከ፡ ጊዜ፡ ከመ፡ እሳት፡ ነደ፨
- አምሳለ፡ ትንታጋት፡ ጤሱ፡ ወኮኑ፡ ሐመደ፨
-
- ሰላም፡ ለልብከ፡ ዘተመሰለ፡ በአብ፨
- ሕሊና፡ አእምሮ፡ ዘይወልድ፡ ወምክረ፡ ጥበብ፨
- ገላውዴዎስ፡ ጸልል፡ በአክናፊከ፡ ዘላህብ፨
- መልዕልተ፡ ርእስየ፡ እምሐሩረ፡ ጌጋይ፡ ዕፁብ፨
- እስመ፡ መልአከ፡ ምክር፡ እንተ፡ ዘስሙ፡ ኪሩብ፨
-
- ሰላም፡ ለኵልያቲከ፡ ከመ፡ መዘምራን፡ ነበቡ፨
- እንተ፡ ፈተኖን፡ ልዑል፡ በማኅቶተ፡ ፅዱል፡ ጥበቡ፨
- ገላውዴዎስ፡ ሙሴ፡ ለእግዚአብሔር፡ መጋቤ፡ ሕዝቡ፨
- ገዳማት፡ በእንቲአከ፡ ጠላተ፡ በረከት፡ ጸግቡ፨
- ዕንጐታትኒ፡ መዓዛ፡ ወሀቡ፨
-
- ሰላም፡ ለሕሊናከ፡ እምሥርወ፡ ልብ፡ ዘዓርገ፨
- ምሕረተ፡ ነዳያን፡ የሐሊ፡ ወፍትሐ፡ ምስኪናን፡ ደርገ፨
- ገላውዴዎስ፡ አንግፍ፡ እምከሳዴ፡ ነፍስየ፡ ጋገ፨
- ሶበ፡ አክበደ፡ ላዕሌየ፡ አርዑተ፡ ቅኔሁ፡ ጸዋግ፨
- አርዌ፡ ሕማም፡ ጸዋግ፡ ዘይልሕስ፡ ምስሐገ፨
-
- ሰላም፡ ለአማዑቲከ፡ ቅድመ፡ ገጸ፡ ኵሉ፡ ተዓይን፨
- በእሳተ፡ ሃይማኖት፡ ዘነደ፡ ከመ፡ ደርሳይን፨
- ገላውዴዎስ፡ ጽጌ፡ ወአስካለ፡ ተድላ፡ ዘወይን፨
- ጊዜ፡ ቀሰሙከ፡ ባ ወዓልተ፡ ኵነኔ፡ ወደይን፨
- መላእክተ፡ ሰማይ፡ አውኃዙ፡ አንብዓ፡ እምዓይን፨
-
- ሰላም፡ ለንዋየ፡ ውሥጥከ፡ ዘኑባሬሆን፡ አንግዳ፨
- ከመ፡ ቀርነ፡ ነጌ፡ ሐዋዝ፡ ውስተ፡ ከርሥከ፡ ሰሌዳ፨
- ገላውዴዎስ፡ ሥርግው፡ በአክሊለ፡ ሞገስ፡ ፀዓዳ፨
- ኢትትሐየይ፡ ሐወዖትየ፡ ምስለ፡ ጊዮርጊስ፡ ዘልዳ፨
- እመእደ፡ ጸላኢ፡ ወፀር፡ ለነፍስየ፡ ሮዳ፨
-
- ሰላም፡ ለዓንብርትከ፡ አምሳለ፡ ማዕከከ፡ ፍሑቅ፨
- ወአርአያ፡ ማኅተም፡ ኅርው፡ እንተ፡ ተግበረ፡ እምወርቅ፨
- ገላውዴዎስ፡ አብላ፡ ወብርሃነ፡ ሰማይ፡ ምጡቅ፨
- ይደምሰሱ፡ ቅድመ፡ ገጽየ፡ በጸዳልከ፡ መብረቅ፨
- አጋንንተ፡ ጽልመት፡ ዘቀትር፡ ወጸዋግ፡ ድድቅ፨
-
- ሰላም፡ ለሐቌከ፡ እንዘ፡ ይቀንት፡ መዊአ፨
- ውስተ፡ ከብካበ፡ ወልድ፡ መርዓዊ፡ ምስለ፡ ሥነ፡ ብርሃን፡ ዘቦአ፨
- ገላውዴዎስ፡ ቅቱል፡ እምድረ፡ ሙላድከ፡ አፍአ፨
- ጽድቅከ፡ ወኂሩትከ፡ አመ፡ ርኅበ፡ ዓለም፡ መልአ፨
- አምዐይነ፡ ሞት፡ ወሲኦል፡ ፍሥሓ፡ ተኀብአ፨
-
- ሰላም፡ ለአቍያጺከ፡ ዘተመሰላ፡ ድንባዘ፨
- ታቦተ፡ ሥጋ፡ ይጹራ፡ አንዘ፡ የዓቅባ፡ ትአዛዘ፨
- ገላውዴዎስ፡ ቅቡዕ፡ ዕፍረተ፡ ቅዳሴ፡ ምዑዘ፨
- ኲናተ፡ ሕማም፡ ጊዜ፡ ሥጋከ፡ ረገዘ፨
- አንብዐ፡ መላእከት፡ ወሰብእ፡ ከመ፡ ማይ፡ ውኅዘ፨
-
- ሰላም፡ ለአብራኪከ፡ ዘኢፈቀዳ፡ አስተብርኮ፨
- ለምስል፡ ዘወርቅ፡ ዘእደ፡ ነሀቢ፡ ሰበኮ፨
- ገላውዴዎስ፡ ሰማዕት፡ ለአምላከ፡ ሰማይ፡ ዘታመልኮ፨
- ባርከኒ፡ ለጽሙድከ፡ አመ፡ ጊዜ፡ ንጹሕ፡ ተልእኮ፨
- ከመ፡ ለወልዱ፡ ይሁዳ፡ ያዕቆብ፡ ባረኮ፨
-
- ሰላም፡ ለአእጋሪከ፡ ከመ፡ ሩጸተ፡ ዖፍ፡ ወሐፅ፨
- ውስተ፡ ዓውደ፡ ስምዕ፡ ይሥርራ፡ ዘአስተፋጠና፡ ሰረዊጽ፨
- ገላውዴዎስ፡ እኩት፡ ውስተ፡ አናቅጽ፨
- ሶበ፡ ይቀርቡኒ፡ መላእክተ፡ ላኳ፡ ወድንጽ፨
- መድኃኔ፡ ገጽየ፡ ይኰን፡ ዘዚአከ፡ ገጽ፨
-
- ሰላም፡ ለሰኰናከ፡ ዘስዒሞቱ፡ ከሠተ፨
- ለብእሲት፡ አሐቲ፡ ዘኣዕይንቲሃ፡ ዑረተ፨
- ገላውዎዴስ፡ ጸጉ፡ ዘጌጋይዳ፡ ስርየተ፨
- ለጸድቃንሰ፡ አመ፡ ሰአልከ፡ ምሕረተ፨
- ጸሎትከ፡ በቋዒት፡ ኢኮነት፡ መንክርተ፨
-
- ሰላም፡ ለመከየድከ፡ መከየደ፡ ብሩር፡ ጽሩይ፨
- ዘመልዕልቴሆን፡ ተተከላ፡ አዕማደ፡ ጠባይዕ፡ ሰኑይ፨
- ገላውዴዎስ፡ መስፍን፡ ወሠርዐ፡ መንግሥት፡ ኅሩይ፨
- ተብህል፡ በእንቲአከ፡ በአፈ፡ ሆሴዕ፡ ራአይ፨
- ለኢይዝራኤል፡ ዕለቱ፡ ዐባይ፨
-
- ሰላም፡ ለአፃብዓ፡ እግርከ፡ እንዘ፡ ይትወሀቦን፡ አካል፨
- እምድረ፡ መከየድ፡ ዘዓርጋ፡ አምሳለ፡ ሰዊት፡ ወሰብል፨
- ገላውዎዴስ፡ ሰማዕት፡ ሰባኬ፡ ቅዱስ፡ ወንጌል፨
- ይስቅየኒ፡ ጠለ፡ ሣህልከ፡ አሥር፡ ዘይት፡ ዘይክል፨
- ለአውልዓ፡ ገዳም፡ መሪር፡ ወይቡስ፡ ተከል፨
-
- ሰላም፡ ለአጽፋረ፡ እግርከ፡ እምርእሰ፡ አፃብዕ፡ ዘዐርጋ፨
- ፅዕዳዊ፡ በረድ፡ ወስን፡ እንዘ፡ ይዛወጋ፨
- ገላውዴዎስ፡ ውዱስ፡ ማእከለ፡ ብዙኃን፡ አንግልጋ፨
- ያስተበፅዑከ፡ ትዝምደ፡ ኵሉ፡ ዘሥጋ፨
- በረድኤትከ፡ ረኪቦሙ፡ ጸጋ፨
-
- ሰላም፡ ለቆምከ፡ ዘይመስል፡ አርዘ፨
- ዘሠምራተ፡ ምድር፡ ለብሰ፡ ወዘዓየራት፡ ሐዋዘ፨
- ገላውዴዎስ፡ ፀሐይ፡ እንተ፡ ትኳንን፡ አብያዘ፨
- በሐብለ፡ ፍቅርከ፡ ዘኢሕሊናሁ፡ ተእኅዘ፨
- በአፈ፡ ኬፋ፡ ወሳውል፡ ለይኩን፡ ውጉዘ፨
-
- ሰላም፡ ለመልከዕከ፡ ድኅረ፡ በናት፡ ተቀትለ፨
- ኅብረ፡ አርአያ፡ ወርቅ፡ ዘይመስል፡ ወዕንቈ፡ ቢረሌ፡ ዕዱለ፨
- ገላውዴዎስ፡ ክቡር፡ እስእለከ፡ ስኢለ፨
- እስመ፡ ተዘርወ፡ በድነ፡ ሥጋየ፡ ወኮነ፡ ወበለ፨
- ስብሐተ፡ ትንሣኤ፡ ምልኦ፡ ወጸግዎ፡ ኀይለ፨
-
- ሰላም፡ ለአተ፡ ነፍስከ፡ በዕለት፡ ዛቲ፨
- ቅዱሳነ፡ ሰማይ፡ ወምድር፡ እንተ፡ ይትፌሥሑ፡ ባቲ፨
- ገላውዴዎስ፡ መልአከ፡ ዑቃቤ፡ ሕይወት፡ ለመዋቲ፨
- አምሕለከ፡ እግዚኦ፡ በዕበይከ፡ እንታከቲ፨
- ጊዜ፡ ተወፅአ፡ ነፍስየ፡ ኢትመንና፡ ላቲ፨
-
- ሰላም፡ ለበድነ፡ ሥጋከ፡ ዘጥቀ፡ የሐቱ፨
- የሐውዕዎ፡ መላእከት፡ ዘያፈትዎሙ፡ ሥነ፡ ርእየቱ፨
- ገላውዴዎስ፡ ቡሩክ፡ ለእግዚአብሔር፡ መከፈልተ፡ ርስቱ፨
- ሚጠኒ፡ በምሕረትከ፡ እምፍኖተ፡ ጌጋይ፡ ዝንቱ፨
- አሥዋከ፡ ደዌ፡ ወሞት፡ ዘተሐፅረ፡ ቦቱ፨
-
- ሰላም፡ ለግንዘተ፡ ሥጋከ፡ ዘእደ፡ ምእመናን፡ ገንዞ፨
- በልብሰ፡ ቅዳሴ፡ ንጹሕ፡ ድኅረ፡ አፈ፡ ኲናት፡ ረገዞ፨
- ገላውዴዎስ፡ ስቡሕ፡ ሕገ፡ ጽድቅ፡ ወተአዝዞ፨
- ሠውረኒ፡ በምሕረትክ፡ ወናዝዘኒ፡ ናዝዞ፨
- እምብካየ፡ ወይሴ፡ መሥጥም፡ ወዓቢይ፡ ተከዞ፨
-
- ሰላም፡ ለመቃብሪከ፡ መካነ፡ ገቦ፡ ደብር፡ ልዑል፨
- ድኅረ፡ ሠሰጥከ፡ መዊተ፡ በናተ፡ ሕማም፡ ስሑል፨
- ገላውዴዎስ፡ ተባዕ፡ ወወሬዛ፡ መንግሥት፡ አዛል፨
- ትበክየከ፡ አንጾኪያ፡ እንዘ፡ ትኬልሕ፡ ወትብል፨
- እፎኑ፡ ታሕተ፡ ከፈር፡ ተኃብአ፡ ጸዳል፨
-
- ናሁ፡ ተግህደ፡ ዘመልክእክ፡ ፍጻሜ፨
- እንተ፡ ያረውፅ፡ ፈድፋደ፡ ፄና፡ መዓዛሁ፡ አበሜ፨
- ገላውዴዎስ፡ ነፍኒፍ፡ በርእሰ፡ ገላውዴዎስ፡ አምሳለ፡ ጊሜ፨
- ጽባሐ፡ በረከተ፡ ወሰዓተ፡ ምሴት፡ ሱላሜ፨
- ዘይዌስከ፡ መዋዕለ፡ ወያነውን፡ ዕድሜ፨
-
- ዓፀደ፡ መልክእከ፡ እግዚኦ፡ እንዘ፡ አኃሥሥ፡ ተግባረ፨
- ጊዜ፡ ፍና፡ ምሴት፡ ወነግህ፡ እስመ፡ እግረ፡ ልብየ፡ ሖረ፨
- ገላውዴዎስ፡ ምክር፡ ወአስተሐይፅ፡ ነገረ፨
- ከመ፡ ትጸግወኒ፡ ዕሤተ፡ ተስፋ፡ ጽድቅ፡ ወትረ፨
- ምስለ፡ ብእሴ፡ ቅንየት፡ ለዕለት፡ ከበዳ፡ ዘጾረ፨