Other Titles
-
ልሳነ፡ ሰብእ፡
Ləssāna Sabəʾ
Tongue of Men -
መልክአ፡ ልሳነ፡ ሰብእ፡
Malkəʾa Ləssāna Sabəʾ
Image of the Tongue of Men
Malkəʾ
-
- ናሁ፡ ተማሕፀንኩ፡ በሆህያተ፡ ስምከ፡ ካፍ፨
- ወበቀዳማይ፡ የውጣ፡ ዘጥንተ፡ ፊደሎን፡ አሌፍ፨
- ከመ፡ ታድኅነኒ፡ ክርስቶስ፡ እምትንሣኤ፡ ልሳን፡ ወአፍ፨
- እስመ፡ ልሳን፡ ቀተሎሙ፡ ለማኅበረ፡ ሰማዕት፡ አእላፍ፨
- በነገረ፡ ውዴት፡ ጽኑዕ፡ ዘይበልሕ፡ እምሰይፍ፨
-
- ተማሕፀንኩ፡ በፀዓትከ፡ እምባሕርየ፡ አብ፡ ወላዲ፨
- ወበንብረትከ፡ እምቅድም፡ ለዓለመ፡ ዓለም፡ ወዓዲ፨
- ከመ፡ ታድኅነኒ፡ ክርስቶስ፡ እማዕገተ፡ ልሳን፡ ረዋዲ፨
- ለዳንኤል፡ ዘአድኀንኮ፡ እምናቡከደነጾር፡ ከሀዲ፨
- አመ፡ አኃዊሁ፡ ተወድዩ፡ በእሳት፡ ነዳዲ፨
-
- ተማሕፀንኩ፡ በልሳንከ፡ ወእምልሳነ፡ ሰብእ፡ ነኪራን፨
- አድኅነኒ፡ ክርስቶስ፡ በመስቀልከ፡ መድኅን፨
- እስመ፡ እምልሳን፡ ውእቱ፡ ሙፃአ፡ ኵሉ፡ ኀዘን፨
- ሶበሰ፡ ኢተፈጥረ፡ ለተናግሮ፡ ልሳን፨
- አስሕቶተ፡ አዳም፡ በምንት፡ እምክህለ፡ ሰይጣን፨
-
- እምደቂቀ፡ አዳም፡ ወሔዋን፡ ዘአምሠጠ፡ መኑ፨
- እምልሳነ፡ ርእሱ፡ ቀታሊ፡ ወእምልሳነ፡ ሰብእ፡ ካልአኑ፨
- እንዳዒ፡ አጋቶን፡ ወጠቢባነ፡ ጽድቅ፡ እለ፡ ፌባኑ፨
- አብድሰ፡ እመ፡ አርመመ፡ ልሳኑ፨
- በአጻብዒሁ፡ ይኤምር፡ ወይቀጽብ፡ በዓይኑ፨
-
- ኵሉ፡ ነገር፡ እምአንቀጸ፡ ልሳን፡ ይወፅእ፨
- እመኒ፡ ዘሰላም፡ ወእመኒ፡ ዘጽልእ፨
- ወሐዋርያት፡ ይቤሉ፡ በመልእክተ፡ ያዕቆብ፡ ረድእ፨
- ባቲ፡ ንባርኮ፡ ለእግዚአብሔር፡ እግዚእ፨
- ወባቲ፡ ንረግሞ፡ ለእኁነ፡ ሰብእ፨
-
- ኵሉ፡ ይገርር፡ ለዘመደ፡ ሰብእ፡ መዋቲ፨
- እስከ፡ አራዊት፡ ወአእዋፍ፡ ወእንሰሳ፡ ቀላይ፡ ኢተአታቲ፨
- ልሳነ፡ ዚአነሰ፡ አባለ፡ ዘማ፡ አሐቲ፨
- አልቦ፡ ዘይክል፡ አግርሮታ፡ እስመ፡ እኪት፡ ይእቲ፨
- ወነፍሰ፡ ንጹሐን፡ ዘይቀትል፡ ኅምዘ፡ ሞት፡ ባቲ፨
-
- እስፍንተ፡ ንዜኑ፡ እከያቲሃ፡ ለልሳን፨
- ወበእንተዝ፡ ኃደግነ፡ አንኆተ፡ ዝንቱ፡ ድርሳን፨
- ኅድጉሰ፡ ዘለፋ፡ መዋቲ፡ ምኑን፨
- ዲበ፡ መንፈስ፡ ቅዱስኒ፡ ዘየዓውዶ፡ ብርሃን፨
- ባቲ፡ ጽርፈት፡ ነበቡ፡ ዕልዋን፨
-
- ኣአኵተከ፡ እግዚኦ፡ እማዕምቀ፡ ልብየ፡ አእኳቲ፨
- አምጣነ፡ ህልው፡ አነ፡ በልባዊ፡ ሥጋ፡ መዋቲ፨
- ለዘአድኃንከኒ፡ ክርስቶስ፡ እምልሳነ፡ ዓለም፡ ኢተአታቲ፨
- ፍጹመ፡ ትኩን፡ ባሕቱ፡ ወኢትትርፍከ፡ አሐቲ፨
- በዕለተ፡ ኵነኔ፡ መሐራ፡ ለነፍስየ፡ ዛቲ፨