Details
- ማስገቢያ፡
-
- በስመ፡ አብ፡ ወወልድ፡ ወመንፈስ፡ ቅዱስ፡ ሠለስቱ፨
- ለብሂል፡ ወጠንኩ፡ ነገረ፡ ሥቃዩከ፡ በበ፡ ሥርዓቱ፨
- ጊዮርጊስ፡ ፍታሕ፡ ማዕሠረ፡ ልሳንየ፡ ለአንብቦቱ፨
- እስመ፡ አንተ፡ በላዕሉ፡ ወአንተ፡ በታሕቱ፨
- ዘእትመነከ፡ አንሰ፡ ወለከ፡ እፈቱ፨
-
- ነገረ፡ ፊደላት፡ ሳምን፡ ከመ፡ ዳንኤል፡ ፈከረ፨
- ናሁ፡ እከሥት፡ ዘውዳሴከ፡ ምሥጢረ፨
- ጊዮርጊስ፡ ፍቅርከ፡ አመ፡ ረሰየኒ፡ ገብረ፨
- መኑ፡ ይከልአኒ፡ ዜና፡ ገድልከ፡ ነጊረ፨
- እመ፡ አንቀልቀሉ፡ ነፋሳት፡ ኢልማድ፡ አድባረ፨
-
- ተማሕፀንኩ፡ እግዚእየ፡ በርኅራኄከ፡ ዘቅድም፨
- ጊዜ፡ አድኀንካ፡ ለወለት፡ እምአፈ፡ አርዌ፡ ርጉም፨
- ጊዮርጊስ፡ የዋህ፡ እንበለ፡ መስፈርት፡ ወዐቅም፨
- ተራኅርኅ፡ በላዕሌየ፡ በአምሳለ፡ አብ፡ ወእም፨
- እስመ፡ ሱታፌከ፡ አነ፡ በሥጋ፡ ወደም፨
-
- ተማሕፀንኩ፡ በቀዊሞትከ፡ በቅድመ፡ ዱድያኖስ፡ ንጉሥ፨
- መፍቀሬ፡ ተስናን፡ ወካዕስ፨
- ጊዮግሪስ፡ ጥቡዕ፡ ሰማዕተ፡ ኢየሱስ፡ ክርስቶስ፨
- ዝርዎሙ፡ ለአፅራርየ፡ አምሳለ፡ ጸበል፡ ወጢስ፨
- ኀይለ፡ ረድኤትከ፡ መዋኢ፡ ነፋስ፨
-
- ተማሕፀንኩ፡ በኪዳንከ፡ በዘወሀበከ፡ ወልድ፡ ዋሕድ፨
- ከመ፡ ይምሕር፡ ለከ፡ እስከነ፡ ዐሥርቱ፡ ትውልድ፨
- ጊዮርጊስ፡ ኢትዝክር፡ ኀጢአተ፡ ገብርከ፡ አብድ፨
- አኮኑ፡ አምላክከ፡ እንዘ፡ ቅንወ፡ እግር፡ ወእድ፨
- ኢተዘከረ፡ አበሳሆሙ፡ ለአብዳን፡ አይሁድ፨
-
- ከመ፡ ኢይትርፍ፡ ብከ፡ ንባበ፡ ዝንቱ፡ አፉየ፨
- ወጻማ፡ ነባቢ፡ ልሳንየ፨
- ጊዮርጊስ፡ ለከ፡ ትብለከ፡ ነፍስየ፨
- ዕሥየኒ፡ በሰማያት፡ ዕሤተ፡ ሠናየ፨
- ዘእዝነ፡ መዋቲ፡ ኢሰምዐ፡ ወዘዐይን፡ ኢርእየ፨
-
- ለዐምደ፡ ቤትከ፡ ወይንነ፡ ዘእንስሳ፡ ገዳም፡ ተርዕያ፨
- ወይበልዐ፡ ኵሉ፡ ኀላፌ፡ ፍኖት፡ ዘርእያ፨
- ጊዮርጊስ፡ አሰኒ፡ በላሕይከ፡ ላሕያ፨
- አኮኑ፡ አርአያ፡ ወርቅ፡ በዘይሤኒ፡ አርአያ፨
- ኪነ፡ ጥበቡ፡ ይትነክር፡ ያሤኒ፡ ኬንያ፨