Details
Other Titles
-
ተፈሥሒ፡ ማርያም፡
Tafaśśǝḥi Māryām
Rejoice Mary
-
- ተፈሥሒ፡ ማርያም፡ ድንግልተ፡ ሥጋ፡ ወኅሊና፨
- ተፈሥሒ፡ ማርያም፡ ወለተ፡ ኢያቄም፡ ወሐና፨
- ጳጦስ፡ አንቲ፡ ዘአስተርአይኪ፡ በደብረ፡ ሲና፨
- ጎሞረ፡ ወርቅየ፡ መስፈርቱ፡ ለመና፨
- ማርያም፡ ለዕበይኪ፡ ይደሉ፡ መሐና፨
-
- ተፈሥሒ፡ ማርያም፡ ድንግልተ፡ ኅሊና፡ ወሥጋ፨
- ተፈሥሒ፡ ማርያም፡ እንበለ፡ ሕፀት፡ ወንትጋ፨
- ተፈሥሒ፡ አንቀጽ፡ ዘኢተርኅወ፡ መንስጋ፨
- ለነፍሰ፡ ዚአየ፡ ውስተ፡ ሲኦል፡ ኢይኅድጋ፨
- ፍሬ፡ ማሕፀንኪ፡ ወልድ፡ ይክፍለኒ፡ ጸጋ፨
- ኀበ፡ ይገብሩ፡ ኅሩያን፡ እንግልጋ፨
-
- ተፈሥሒ፡ ማርያም፡ ይደልወኪ፡ ተፍሥሖ፨
- ተራኅርኂ፡ ድንግል፡ ዘልማድኪ፡ ተራኅርኆ፨
- ገብርኪ፡ ኃጥእ፡ ሶበ፡ ጸራኅኩ፡ በክልሖ፨
- ለቃለ፡ አፉየ፡ ተወኪፈኪ፡ ጽራሖ፨
- ኦሆ፡ ኦሆ፡ በልኒ፡ ኦሆ፨
- ለቤተ፡ መርዐ፡ እሁበከ፡ መርኆ፨
-
- ተፈሥሒ፡ ማርይማ፡ ወለተ፡ ሳራ፡ ወርብቃ፨
- ተፈሥሒ፡ ማርያም፡ ለደወለ፡ ርስት፡ ማዕንቃ፨
- ለረዲኦትየ፡ ፍጡነ፡ እንዘ፡ ትሰወጢ፡ ከመ፡ ባዜቃ፨
- ብጽሒ፡ በኢጐንድዮ፡ ኀበ፡ ሀሎኩ፡ ጥቃ፨
- ከመ፡ ትፈጽሚ፡ ለልብየ፡ ጻሕቃ፨
-
- ተፈሥሒ፡ ማርያም፡ እንተ፡ አልብኪ፡ ምሳሌ፨
- ተፈሥሒ፡ ማርያም፡ ታቦተ፡ ሕርመት፡ ዘጽሌ፨
- ተፈሥሒ፡ ጽሪት፡ ዘዕፍረትየ፡ ቢረሌ፨
- አስተበፅዕ፡ አንሰ፡ በጉባኤ፡ ዘለኪ፡ ድንጋሌ፨
- በኢውልዋሌ፡ እንዘ፡ እብል፡ ሃሌ፨
- አንግፍኒ፡ በትንባሌ፡ እምብካይ፡ ወወይሌ፨
-
- ተፈሥሒ፡ ማርያም፡ በአክናፈ፡ ንጽሕኪ፡ ምንታዌ፨
- ዘአምሠጥኪ፡ ቅድመ፡ እምቂአተ፡ ሕምዙ፡ ለአርዌ፨
- መጽሐፈ፡ ብስራት፡ ይብሉኪ፡ ለእለ፡ ሀለዉ፡ ምድረ፡ ፄዋዌ፨
- መክፈልተ፡ ርስትየ፡ አንቲ፡ ማርያም፡ እንተ፡ አልብኪ፡ ምንሳዌ፨
- ዘፈለጠ፡ ሊተ፡ ኢያሱ፡ ዘነዌ፨
-
- ተፈሥሒ፡ ማርያም፡ ወለተ፡ አዳም፡ ወሔዋ፨
- ተፈሥሒ፡ ማርያም፡ ሐዳስዩ፡ ጣዕዋ፨
- ርጢነ፡ መድኀኒት፡ ወልድኪ፡ ለቍስልየ፡ ዘየሐይዋ፨
- አውቅይዮ፡ በሰይፍኪ፡ ሐርየ፡ ነዋ፨
- ሰይጣን፡ ስሙ፡ ለንፍስየ፡ ዕድዋ፨
-
- ተፈሥሒ፡ ማርያም፡ በከመ፡ ገብርኤል፡ መልአክ፨
- ቡርክት፡ አንቲ፡ እምአንስት፡ ወፍሬ፡ ከርሥኪ፡ ቡሩክ፨
- ለዕበየ፡ ንግሥኪ፡ ዘልፈ፡ እንዘ፡ እሰድግ፡ በብረክ፨
- አመሥጥ፡ አንሰ፡ በጽንዕኪ፡ ዘእምፀርየ፡ ድሩክ፨
- ዘይፈቅድ፡ ይንዐወን፡ በጽባሕ፡ ወሰርክ፨
-
- ተፈሥሒ፡ ማርያም፡ ሠርጐ፡ አሮን፡ ሌዋዊ፨
- ተፈሥሒ፡ ማርያም፡ ወለተ፡ ዳዊት፡ ሰንቃዊ፨
- ሙካፈ፡ ስእለቱ፡ ለኢዮብ፡ አመ፡ በቍስሉ፡ ይደዊ፨
- ከመ፡ ትሂጵዮ፡ ለፀርየ፡ ነፍሳተ፡ ብዙኃን፡ ነዓዊ፨
- በዲበ፡ አብትር፡ ቅስተኪ፡ ቅስትዊ፨
-
- ተፈሥሒ፡ ማርያም፡ ዘኢየሐልቅ፡ ትፍሥሕትኪ፨
- ተፈሥሒ፡ ማርያም፡ ዘኢይቀብል፡ መዝገብኪ፨
- ተፈሥሒ፡ ማርያም፡ ዘኢይትፌጸም፡ ውዳሴኪ፨
- ኢትመንንኒ፡ ለገብርኪ፡ ዘአጥረየኒ፡ ወልድኪ፨
- እስመ፡ አንቲ፡ ሊተ፡ ወአነ፡ ዘለኪ፨
-
- በመኑ፡ እትሜካሕ፡ ማርያም፡ ዘእንበሌኪ፡ ምክሕየ፨
- ቀርነ፡ መድኀኒትየ፨
- ብኪ፡ ጸናዕኩ፡ እምከርሠ፡ እምየ፨
- ማርያም፡ ጠረጴዛሁ፡ ለቍርባነ፡ ወንጌል፡ ብልዕየ፨
- ውስተ፡ እዴኪ፡ ገደፍኩ፡ ነፍስየ፡ ወሥጋየ፨
-
- በመኑ፡ እከብር፡ ማርያም፡ ዘእንበሌኪ፡ ክብረ፡ ኵሉ፨
- ነቅዐ፡ መድር፡ ለኪ፡ ወጠለ፡ ሰማይ፡ ዘላዕሉ
- አንቲ፡ ውእቱ፡ ለዳዊት፡ ሠርጐ፡ አክሊሉ፨
- ብኪ፡ ኤለ፡ ተወከሉ፡ ኢተኀፍሩ፡ ወኢትኀጕሉ?
- መገቦሙ፡ ወመርሖሙ፡ ለወልድኪ፡ ሣህሉ፨
-
- በመኑ፡ እትፌሣሕ፡ ማርያም፡ ዘእንበሌኪ፡ ፍሥሓ፨
- እንተ፡ ወለድኪ፡ መሲሐ፨
- ከመ፡ እኅሊ፡ ለኪ፡ ምሕረተ፡ ወፍትሐ፨
- ሶበ፡ እዜከር፡ ርኅራኄኪ፡ ንኅኑኀ፡ ወዝኅዙኀ፨
- እምሀኬቱ፡ ኅሊናየ፡ ነቅሀ፨
-
- ምንተኑ፡ ኣዐሥየኪ፡ ዕሤተ፨
- በእንተ፡ ኵሉ፡ ዘገበርኪ፡ ሊተ፨
- ማርያም፡ ሠናይት፡ ዘታፈቅሪ፡ ምሕረተ፨
- ሶበሰ፡ ትትዐቀቢ፡ ዘዚአየ፡ ኃጢአተ፨
- እመ፡ ኢሐየውኩ፡ አሐተ፡ ሰዓተ፨
-
- በሰላመ፡ ገብርኤል፡ መልአክ፡ እግዝእትየ፡ ማርያም፡ ሰላም፡ ለኪ፨
- ድንግልት፡ በኅሊናኪ፡ ወድንግልት፡ በሥጋኪ፨
- እመ፡ እግዚአብሔር፡ ጸባኦት፡ ሰላም፡ ለኪ፨
- ቡርክት፡ አንቲ፡ እምአንስት፡ ወቡሩክ፡ ፍሬ፡ ከርሥኪ፨
- ተፈሥሒ፡ ፍሥሕት፡ ኦምልእተ፡ ጸጋ፡ እግዚአብሔር፡ ምስሌኪ፨