Details
Other Titles
-
ተፈሥሒ፡ ማርያም፡ ዘሰንበት፡ ወዘበዓለ፡ ኀምሳ፡
Tafaśśəḥi Māryām za-Sanbat wa-za-Baʿāla Ḫamsā
Rejoice Mary (For Sabbaths and Pentecost)
-
- ተፈሥሒ፡ ማርያም፡ ለአዳም፡ ፋሲካሁ፨
- ወማዕዶታ፡ ለሔዋን፡ እንተ፡ ይእቲ፡ አፅመ፡ ገቦሁ፨
- እስመ፡ ግዕዛኖሙ፡ ኮነ፡ ለወልድኪ፡ በትንሣኤሁ፨
- በወርኀ፡ ዕብሬትኪ፡ እግዝእትየ፡ ዘኢይትረከብ፡ ከማሁ፨
- መኑ፡ ዘይቴክዝ፡ ወመኑ፡ ዘይላሑ፨
-
- ተፈሥሒ፡ ማርያም፡ ወለተ፡ አሮን፡ ወሙሴ፨
- ዘትትቄጸሊ፡ አብያዘ፡ ወትሴአኒ፡ ብናሴ፨
- ለኀይለ፡ ተአምርኪ፡ ዝንቱ፡ ሶበ፡ ናቄርብ፡ ውዳሴ፨
- ሕትሚ፡ ፍጽመ፡ ዚአየ፡ በማኅተመ፡ ቅድስት፡ ሥላሴ፨
- አርእስተ፡ አቃርብት፡ ንኪድ፡ ወንቀጥቅጥ፡ ከይሴ፨
-
- ተፈሥሒ፡ ማርያም፡ ወለተ፡ ዳዊት፡ ወወልዱ፨
- ጽጌ፡ መዐዛ፡ ዘዐርገ፡ ለአብርሃም፡ እምሥርወ፡ ጕንዱ፨
- ያስተፌሥሐኒ፡ ጥቀ፡ ዜና፡ ተአምርኪ፡ ለለአሀዱ፨
- አይሁድሰ፡ ሶበ፡ መንክራተኪ፡ ክሕዱ፨
- ሕያዋኒሆሙ፡ ሲኦለ፡ ወረዱ፨
-
- ነአኵተኪ፡ ማርያም፡ ወንሴብሐኪ፡ ወትረ፨
- ሰርከ፡ ወነግሀ፡ ኵሎ፡ አሚረ፨
- ለኀይለ፡ ተኣምርኪ፡ ዝንቱ፡ ሶበ፡ ንሬኢ፡ ኅቡረ፨
- ለልበ፡ ጠቢባን፡ መላእክት፡ ዘያረስዖሙ፡ ምክረ፨
- ወለሐፃናት፡ ይከሥት፡ ሥዉረ፨
-
- ኣአኵተኪ፡ ማርያም፡ ወሀቢተ፡ ጸጋ፡ በከንቱ፨
- እስመ፡ አልዐልክኒ፡ ሊተ፡ እመሬተ፡ ምድር፡ እስከነ፡ ታሕቱ፨
- አንሥኦተ፡ ነዳይሰ፡ ወአልዕሎ፡ ምስኪን፡ ጊዜ፡ ድቀቱ፨
- እወ፡ እወ፡ ለልብኪ፡ ከመ፡ ከማሁ፡ ሥምረቱ፨
- እወ፡ ለዘኒ፡ ፈቀድኪ፡ ታሤንዪ፡ ሎቱ፨
-
- ጽብኢ፡ ማርያም፡ ለእለ፡ ይጸብኡኒ፡ በተሀብሎ፨
- ወግፍዒ፡ ካዕበ፡ ለእለ፡ ይገፍዑኒ፡ ኵሎ፨
- ተኣምረኪ፡ ታርኢ፡ ወለወልድኪ፡ በቀሎ፨
- ይብል፡ አብድ፡ አኮኑ፡ እግዚአብሔር፡ ኢሀሎ፨
- ሶበ፡ ላዕሌሁ፡ ፍጡነ፡ ኢያርአየ፡ ኀይሎ፨
-
- ንዒ፡ ማርያም፡ ምስለ፡ ወልድኪ፡ መዋኢ፨
- ከመ፡ ታውድቂ፡ ፍጡነ፡ ርእሰ፡ ፀር፡ ወጸላኢ፨
- እስመ፡ ፈታሒት፡ አንቲ፡ ማዕከለ፡ ግፉዕ፡ ወገፋዒ፨
- ብጹዕ፡ ብእሲ፡ ድቀተ፡ ፀሩ፡ ዘይሬኢ፨
- ወብፁዕ፡ ካዕበ፡ ፍትሐኪ፡ ሰማዒ፨
-
- ዝ፡ ውእቱ፡ እድሜ፡ ሣህልኪ፡ ወዘተኣምርኪ፡ ጊዜ፨
- ማርያም፡ ድንግል፡ ምልእተ፡ ምሕረት፡ ከመ፡ ተከዜ፨
- እስከ፡ ማእዜኑ፡ እሄሉ፡ ማዕከለ፡ ብካይ፡ ወእንባዜ፨
- ኦናዛዚት፡ እንተ፡ ወለድኪ፡ ናዛዜ፨
- ኦንግሥት፡ በቋዒት፡ ብቊዕኒ፡ ይእዜ፨
-
- ሙሴ፡ ነቢይ፡ አመ፡ ሕዘቢሁ፡ ቈስሉ፨
- ተኣምረ፡ ገብረ፡ ለአርዌ፡ ብርት፡ በምስሉ፨
- እምዝኒ፡ የዐቢ፡ ኀይለ፡ ተኣምርኪ፡ ንግሥተ፡ ኵሉ፨
- ወኀበ፡ ተተክለ፡ ለዋሕድኪ፡ መስቀሉ፨
- ሠራዊተ፡ ደዌ፡ ወሞት፡ ቀሪበ፡ ኢይክሉ፨
-
- ፈሪሆትኪ፡ ማርያም፡ ቀዳሜ፡ ኵሉ፡ ተዐውቆ፨
- ወአፍቅሮትኪ፡ ካዕበ፡ መሠረተ፡ ጥበብ፡ ወአጠይቆ፨
- ተኣምረኪ፡ እሴብሕ፡ በቃለ፡ መዝሙር፡ ወመሰንቆ፨
- በውስተ፡ ተኣምርኪ፡ እግዝእትየ፡ ለዘአብአ፡ ናፍቆ፨
- አፍቲዎ፡ መዊተ፡ ወሲኦለ፡ አጽሐቆ፨
-
- ምንተ፡ ረከቡ፡ ካህናተ፡ ሐሊባ፡ ወሐላ፨
- መንክራተ፡ አምላክ፡ ዘርእዩ፡ እምሰኪኖን፡ እስከ፡ ገልገላ፨
- ካህናተ፡ ቤትኪሰ፡ ማርያም፡ ርግበ፡ ገሊላ፨
- እንዘ፡ ይትአመኑ፡ ለተአምርኪ፡ ኀይላ፨
- ያፈልሱ፡ ደብረ፡ ወይመልሑ፡ ሰግላ፨
-
- ይቴክዝ፡ አብድ፡ ሶበ፡ ልበ፡ ጥበብ፡ ውሕዶ፨
- በኢያእምሮቱ፡ አብዝኀ፡ ሕማመ፡ ዘይፈድፍዶ፨
- ፍሡሕሰ፡ ለፍቅርኪ፡ ዘይፀመዶ፨
- በቅድመ፡ ሥዕልኪ፡ እግዝእትየ፡ ለለጊዜ፡ ያነሥእ፡ እዶ፨
- ተስፋሁ፡ ይረክብ፡ ወይፌጽም፡ መፍቅዶ፨
-
- ዕቀብኒ፡ በተኣምርኪ፡ ወአድኅንኒ፡ እምማቴ፨
- በከመ፡ አድኀኖ፡ ወልድኪ፡ ለዮናስ፡ ወልደ፡ አማቴ፨
- መዋዕለ፡ ዕረፍት፡ አንቲ፡ ማርያም፡ ጰንጠቈስቴ፨
- እምኀይለ፡ ድካም፡ ያጸንዕ፡ መዋቴ፨
- ኅብስት፡ ስብሐትኪ፡ ወፍቅርኪ፡ ስቴ፨
-
- ሴስይኒ፡ ማርያም፡ ለጸማድኪ፡ ዐሳብ፨
- ኅብስተ፡ አእምሮ፡ ሠናየ፡ ወወይነ፡ ጥበብ፨
- እመኒ፡ ፈድፈደ፡ ኃጢአትየ፡ እምሕዝብ፨
- ተዘከሪ፡ እግዝእትየ፡ በርኅራኄኪ፡ ዕጹብ፨
- ከመ፡ አስተኪዮ፡ ማየ፡ ለጽሙእ፡ ከልብ፨
-
- ወላዲተ፡ አምላክ፡ ማርያም፡ እንበለ፡ ሰብሳብ፡ ወሩካቤ፨
- በይነ፡ ዘአቅረብኩ፡ ለኪ፡ ንስቲተ፡ ቃለ፡ ይባቤ፨
- ፈትቲ፡ እሙ፡ በረከተ፡ አፉኪ፡ ሙሐዘ፡ ከርቤ፨
- ለነዳይ፡ ብእሲ፡ ወለዘረከቦ፡ ምንዳቤ፨
- ኅብስተከ፡ ፈትት፡ ኢሳይያስ፡ ይቤ፨
-
- አፍጣኒተ፡ ረድኤት፡ ማርያም፡ በጊዜ፡ ምንዳቤ፡ ወዐጸባ፨
- ለዐይን፡ እምቀራንባ፨
- አንቲ፡ ይእቲ፡ ረዳኢተ፡ ያዕቆብ፡ በቤተ፡ ላባ፨
- በኵሉ፡ ኅሊናሃ፡ ወበኵሉ፡ አልባባ፨
- ዘኢታፈቅረኪ፡ ነፍስ፡ ትሠሮ፡ እምሕዝባ፨