-
- ተማሕፀንኩ፡ በሐዊሮትከ፡ ፍናወ፡ ዕለታት፡ ምእቱ፨
- ከመ፡ በሥላሴ፡ ትትአመን፡ እምአምላኮ፡ ጣዖት፡ ከንቱ፨
- ሰማዕት፡ ሖር፡ ድካመ፡ ፍኖትከ፡ ዝንቱ፨
- ይኩነኒ፡ ዕረፍተ፡ ነፍስ፡ ውስተ፡ ሰማያዊት፡ መንግሥቱ፨
- ለዘባሕቲቱ፡ ይነግሥ፡ ወካልእ፡ አልቦቱ፨
-
- ተማሕፀንኩ፡ በቀዊሞትከ፡ ቅድመ፡ መኰንን፡ ሄርሜንዮስ፨
- ከመ፡ በእንቲአከ፡ ቆመ፡ ቅድመ፡ ጲላጦስ፨
- እንዘ፡ ትዜከሮ፡ በልብ፡ ለንጹሕ፡ ባሕርይ፡ ክርስቶስ፨
- ብፁዕ፡ ሖር፡ ለፍኖትየ፡ መብዕስ፨
- አስተፋጥን፡ አርትዖቶ፡ ውስተ፡ ባሕር፡ ወይብስ፨
-
- ተማሕፀንኩ፡ በተወይድዮትከ፡ ውስተ፡ ቤተ፡ ሞቅሕ፡ ሙቁሐ፨
- በእንተ፡ ኢየሱስ፡ ክርስቶስ፡ ዘሙቁሓነ፡ ሲኦል፡ ፈትሐ፨
- አስተበቍዐከ፡ ሖር፡ ትትራድአኒ፡ ብዙኀ፨
- ኢይቁም፡ ዐውደ፡ ብካይ፡ አመ፡ ይትወህቦ፡ ፍሥሐ፨
- ለዘዲበ፡ መክሊት፡ ካዕበ፡ መክሊተ፡ አርብሐ፨
-
- ተማሕፀንኩ፡ በተመትሮቶን፡ ለአእዳዊከ፡ ክልኤሆን፨
- በሰይፈ፡ መኰንን፡ ዐላዊ፡ ዘእስክንድርያ፡ መካን፨
- ንብለከ፡ ሖር፡ አግብርተ፡ ክርስቶስ፡ መድኅን፨
- መግበነ፡ በረድኤትከ፡ እስመ፡ መጋቢ፡ ምእመን፨
- ከመ፡ ንርከብ፡ መክፈልተ፡ ወርስተ፡ ውስተ፡ በአቶሙ፡ ለቅዱሳን፨
-
- ተማሕፀንኩ፡ በተዐሥሮትከ፡ ውስተ፡ ሦረ፡ ላህም፡ ድኅሪተ፨
- ወበፈጽሞትከ፡ ህየ፡ ጽጐጐ፡ ሀገር፡ ዐበይተ፨
- ከመ፡ እንሣእ፡ ሖር፡ ዘመንፈስከ፡ ካዕበተ፨
- ሀበኒ፡ ሐሜለተከ፡ እንዘ፡ ታተሉ፡ ረድኤተ፨
- እስመ፡ ከመ፡ ኤልሳዕ፡ አነ፡ ወኤልያስ፡ አንተ፨
-
- ተማሕፀንኩ፡ በጸዊሮትከ፡ ከመ፡ እሳት፡ ዘይነድድ፨
- አምሳለ፡ አክሊል፡ ዲበ፡ ርእስ፡ ፃሕለ፡ ኀጺን፡ ክቡድ፨
- ከመ፡ ጸለይከ፡ ሖር፡ ለሐራ፡ መኰንን፡ አብድ፨
- ቀተልኮሙ፡ እምሕይወቶሙ፡ በኀይለ፡ አምላክከ፡ ወልድ፨
- ሕይወተ፡ ፀርየ፡ ኰንን፡ ወቅትል፡ በዐውድ፨
-
- ተማሕፀንኩ፡ በስትዮትከ፡ ፍሉሐ፡ ኵለንታ፡ ዐረረ፨
- እንዘ፡ በእንተ፡ ጽድቅ፡ ትትዔገሥ፡ ምንዳቤያተ፡ ወጻዕረ፨
- ጻድቅ፡ ሖር፡ ለዘእስእለከ፡ ወትረ፨
- ምርሐኒ፡ ፍኖተ፡ ጽድቅ፡ ወአለብወኒ፡ ምክረ፨
- በዓለመ፡ ሕይወት፡ እንግሥ፡ ምስሌከ፡ ኅቡረ፨
-
- ተማሕፀንኩ፡ በተገድፎትከ፡ ውስተ፡ ግበ፡ ሥቃይ፡ ግሩም፨
- ዘውሣጤሁ፡ አክይስት፡ ወአንበሳ፡ መፍርህ፡ ገዳም፨
- ባርከኒ፡ ሖር፡ በበረከት፡ ፍጹም፨
- እግዚአብሔር፡ ንጉሠ፡ ከዋላ፡ ወፍጽም፨
- ውስተ፡ ቤተ፡ ነፍስየ፡ ይኅድር፡ ለወልድከ፡ ሴም፨
-
- ተማሕፀንኩ፡ በስኪቦትከ፡ መልዕልተ፡ ዐራት፡ ዘብርት፨
- እንዘ፡ ታሕቴሁ፡ ንጹፍ፡ ፍሕመ፡ ነዳዲ፡ እሳት፨
- መንክረ፡ ሥቃይ፡ ሖር፡ ወትሩፈ፡ ዕበይ፡ ሰማዕት፨
- ሐዲስ፡ ሐራዊ፡ በሃይማኖት፡ ርትዕት፨
- ከማከ፡ ረስየኒ፡ ለክርስቶስ፡ ሐይወት፨
-
- ተማሕፀንኩ፡ በተልዕሎትከ፡ ውስተ፡ መካን፡ ልዑል፨
- እስከ፡ ይመክሩ፡ ብከዕፀበ፡ ኵነኔ፡ ወገድል፨
- ሠራዊተ፡ ጣዖት፡ አጵሎን፡ ወካህናቲሁ፡ ለምስል፨
- ዮሐንስ፡ ሖር፡ ሰባኬ፡ ሐዲስ፡ ወንጌል፨
- አብስረኒ፡ ሥጋዌሁ፡ ለክርስቶስ፡ ቃል፨
-
- ተማሕፀንኩ፡ በደመ፡ ስምዐ፡ ለእምከ፡ ዲቦራ፨
- ዘአብሰረተከ፡ ሖር፡ ፍጻሜ፡ ስምዕከ፡ ድኅረ፡ መከራ፨
- ከመ፡ ታኅድረኒ፡ ሊተ፡ ውስተ፡ ሰማያዊት፡ ደብተራ፨
- ወታንብር፡ ዲበ፡ ርእስየ፡ ዕሤተ፡ ገድልከ፡ ጌራ፨
- ብርሃነ፡ ፀሓይ፡ ዘይመስል፡ ሕብራ፨
-
- ተማሕፀንኩ፡ በዕርገትከ፡ ውስተ፡ ጤገነ፡ ዘይት፡ ፍሉሕ፨
- ወበትረግዞትከ፡ ህየ፡ በኲናተ፡ ኀጺን፡ ነዊኅ፨
- ቅዱስ፡ ሖር፡ ሰማዕተ፡ ክርስቶስ፡ ስቡሕ፨
- አድኅነኒ፡ ወባልሐኒ፡ እምግርማ፡ ሲኦል፡ መፍርህ፨
- አመ፡ እምኃጥኣን፡ ይገብእ፡ ለጻድቃን፡ ፍትሕ፨
- ተረፈ፡ መልክእ፡
-
- ሰላም፡ ለከ፡ ሥጋ፡ መሐዋዊ፡ ሥጋከ፡ ለመላኪሃ፡ ክርስቶስ፨
- እስመ፡ አሥመረቶ፡ ሖር፡ በሥርዓተ፡ ነፍስ፨
- አንሶሰውከ፡ በፍና፡ ንግሥ፨
-
- ሰላም፡ ለከ፡ ለመጽሐፈ፡ ዳዊት፡ መዝሙር፡ እንዘ፡ ትሬስዮ፡ በጽድቅ፨
- ዝሙረ፡ ቃልከ፡ ሖር፡ በዐውደ፡ ስላቅ፨
- ኢሰገድከ፡ ለምስለ፡ ወርቅ፨
-
- ሰላም፡ ለከ፡ ሐራ፡ መኰንን፡ ሐርየ፡ በጸሎትከ፡ ቅድስት፨
- ሰምዕተ፡ መንክራት፡ ሖር፡ ውስተ፡ ዐውደ፡ ቅስት፨
- ይኩኑ፡ ከመ፡ አብድንት፨
-
- ሰላም፡ ለከ፡ መንገለ፡ ምሁረ፡ ኮንከ፡ ቃለ፡ መጽሐፍ፡ ወንጌል፨
- ኢያኅዘነከ፡ ሖር፡ ተመትሮ፡ አባል፨
- እምትትሐጐል፡ ውስተ፡ ሲኦል፨
-
- ሰላም፡ ለከ፡ ለሕምዘ፡ አክይስት፡ ቀታሊ፡ ወኀይለ፡ አንበሳ፡ ኪያከ፨
- እስመ፡ ኢወሀበ፡ ሖር፡ ኀይለ፡ አምላክከ፨
- መኰንነ፡ አስተኀፈርከ፨
-
- ሰላም፡ ለከ፡ ርኢኩከ፡ ሠናየ፡ ሶበ፡ ትቤለከ፡ እም፨
- ተጋደልከ፡ ሖር፡ ዘእንበለ፡ ዐቅም፨
- ወአጥባዕከ፡ ለስምዐ፡ ደም፨
-
- ሰላም፡ ለከ፡ እንዘ፡ ርእሰከ፡ ተዐትብ፡ በትእምርተ፡ መስቀል፡ ቅዱስ፨
- ዘፈጸምከ፡ በትረ፡ በዐውደ፡ ኂስ፨
- ውስተ፡ ዓለምከ፡ ሖር፡ መንግሥተ፡ ክርስቶስ፨
- ዕሥየኒ፡ ዕሤተ፡ ዘነፍስ፨