Subjects
Martyr
ሚናስ፡
Minās
Menas
Menas
Malkəʾ
-
- በቅድመ፡ ዛቲ፡ ቤተ፡ ክርስቲያን፡ የማነ፡ ፈጣሪ፡ ዘሣረራ፨
- ስብሐተ፡ መሲሑ፡ አየድዕ፡ በአውታር፡ ወበእንዚራ፨
- ወብሂለነገር፡ እሰብከ፡ በእናቅጺሃ፡ ወዘውራ፨
- ዓበየ፡ ሚናስ፡ ፍቁርኪ፡ ከዊነ፡ ዘንጉሥ፡ ሐራ፨
- ብስራትኪ፡ አቅሌስያ፡ ዳግሚት፡ ደብተራ፨
-
- ሰላም፡ ለዝክረ፡ ስምከ፡ ዘየኃብር፡ በጥንቱ፨
- ምስለ፡ ስመ፡ መልአክ፡ አሐዱ፡ እምሊቃናት፡ ፯ቱ፨
- ከመ፡ ትንሥአኒ፡ ሚናስ፡ ወትሰደኒ፡ እፈቱ፨
- ኀበ፡ ሤመከ፡ እግዚእከ፡ በዲበ፡ አህጉር፡ ፲ቱ፨
- እስመ፡ ፍቅረ፡ ሢመት፡ መነንከ፡ ዘዓለም፡ ዝንቱ፨
-
- ሰላም፡ ለሥዕርተ፡ ርእስከ፡ በቅብዓ፡ አእምሮ፡ ጥሉል፨
- ወከመ፡ ሜላት፡ ፍቱል፨
- ብዙኃ፡ ትሩፋት፡ ሚናስ፡ እምኍልቈ፡ ዘዚአከ፡ ገድል፨
- ኍልቈ፡ ፍናዋት፡ ዘመርኅበ፡ ሰማይ፡ ልዑል፨
- መፍቅደ፡ አብያት፡ ዘልበ፡ ምድር፡ በሕቁ፡ ቀሊል፨
-
- ሰላም፡ ለግንዘተ፡ ሥጋከ፡ ወእትሜነይ፡ ፍጹመ፨
- ለእለ፡ ገነዙከ፡ እደው፡ እደዊሆሙ፡ ስዒመ፨
- ስምየኒ፡ ሚናስ፡ በስመ፡ ዕበይ፡ ዳግመ፨
- ለድንግል፡ ሶበ፡ ሰብሐ፡ ወምሥጢረ፡ ንጽሐ፡ ተርጐመ፨
- ከመ፡ አፈ፡ ወርቅ፡ ሰመየቶ፡ ለዮሐንስ፡ ቅድመ፨
-
- ሰላም፡ ለመቃብሪከ፡ ዘዐቢይ፡ ክብሩ፨
- ብዙኃት፡ ኀይላት፡ እስመ፡ እምኔሁ፡ ተገብሩ፨
- ሥዋየ፡ አብያጺከ፡ ሚናስ፡ ያበኪ፡ ለለ፡ አሚሩ፨
- እስመ፡ ቦ፡ መለያልሁ፡ ዘበበክፍሉ፡ መተሩ፨
- ወቦ፡ ዘበሞስርት፡ ሥጋሁ፡ ሰተሩ፨
-
- አኮኑ፡ ኤልያስ፡ እመፈ፡ ቋዕ፡ ተመጠዋ፡ ኅብስት፡ ኢጸልአ፨
- ወኢያስተራኰሰ፡ ማየ፡ እምአፅመ፡ አድግ፡ ዘነቅዐ፨
- እስራኤላዊ፡ ሰምሶን፡ ጊዜ፡ ሐፈወ፡ ወጸምዐ፨
- ሊተኒ፡ አበሳየ፡ አናኅስዩከ፡ በምልአ፨
- መሥዋዕተ፡ ሰላምየ፡ ሚናስ፡ ተወከፍ፡ ጕጕዐ፨