Malkəʾa Fāsiladas (Image of Basilides)

- በስመ፡ እግዚአብሔር፡ ጸባኦት፡ ወይትዋሐድ፡ በመለኮት፨
- እንዘ፡ ይሤለስ፡ በገጻት፡ ወበአካላት፨
- ውዳሴ፡ መልክእከ፡ እጽሐፍ፡ ፋሲለደስ፡ ሰማዕት፨
- ርድአኒ፡ ለፈጽሞቱ፡ በዘዚአከ፡ ረድኤት፨
- ከመ፡ ኢይምዐኒ፡ ሊተ፡ ሥጋዊ፡ ሀኬት፨
- ሰላም፡ ለዝክረ፡ ስምከ፡ በኍልቈ፡ ቅንዋት፡ ኃምስ፨
- እንተ፡ ተለክአ፡ ፊደሉ፡ በሰሌዳ፡ መስቀል፡ ቅዱስ፨
- ፋሲለደስ፡ ሰማዕት፡ ከመ፡ ስምከ፡ ውዱስ፨
- ጸሐፍ፡ ስመ፡ ዚአየ፡ ዲበ፡ ልብሰ፡ ክርስቶስ፡ ሐዲስ፨
- እንተ፡ አብ፡ ስፍሑ፡ ወፋዕሙ፡ መንፈስ፨
- ሰላም፡ ለሥዕርተ፡ ርእስከ፡ እንዘ፡ ሣዕረ፡ ገዳም፡ ይመስላ፨
- ናሕሰ፡ ርእስከ፡ ይክድና፡ እንተ፡ መልዕልቴሁ፡ በቈላ፨
- ፋሶኤአደስ፡ ሥርግው፡ ከመ፡ ባህለ፡ ስምከ፡ አክሊለ፡ ተድላ፨
- ለዓመት፡ ኅሪት፡ እንተ፡ ትመጽእ፡ ከዋላ፨
- አንተ፡ ቀጸላሃ፡ ወአንተ፡ አክሊላ፨
- ሰላም፡ ለርእስከ፡ ከመ፡ ርእሰ፡ ኪሩብ፡ እለ፡ ቄጥሩ፨
- ልዑል፡ ዝክሩ፡ ወትሩፍ፡ ዕበየ፡ ክብሩ፨
- ፋሲለደስ፡ ርእስከ፡ ለክርስቶስ፡ እንበይነ፡ ፍቅሩ፨
- ሶበ፡ እድነንከ፡ ታሕተ፡ ሰይፍ፡ ሐራ፡ መኰንን፡ ይምትሩ፨
- ዐቢየ፡ ጥብዓተከ፡ መላእክት፡ አንከሩ
- ሰላም፡ ለገጽከ፡ ሥዕለ፡ ገጸ፡ እምላክ፡ ኬንያ፨
- እስመ፡ ተሥዕላ፡ ውስቴቱ፡ በከዊነ፡ አምሳል፡ ወአርአያ፨
- ፋሲለደስ፡ ሰማዕት፡ ንጉሠ፡ ሰማዕታት፡ ዘአንጾኪያ፨
- ተፈሥሐት፡ ምድር፡ ተሐፂባ፡ በደመ፡ ስምዕከ፡ ነያ፨
- ባሕርኒ፡ ወደሰያት፡ ብዙኃ፡ ተኃሥያ፨
- ሰላም፡ ለቀራንብቲከ፡ እለ፡ የዐቅባ፡ ዐቂበ፨
- ከመ፡ ኢይርአያ፡ ከንቶ፡ ብንተ፡ ዐይንከ፡ ክዑበ፨
- ሚመጠነ፡ ፋሲለደስ፡ ዘአልቦ፡ ሐሳበ፨
- መንክረ፡ እስመ፡ ፃመውከ፡ ወተጋደልከ፡ ዕፁበ፨
- እግዚአብሔር፡ ለከ፡ ኪዳነ፡ ወሀበ፨
- ሰላም፡ ለአዕይንቲከ፡ በነጽሮ፡ ዘኢገገጻ፨
- ትግርምተ፡ መኰንን፡ ዕልው፡ እንተ፡ ያፈቅር፡ ዓመፃ፨
- ፋሲለደስ፡ ጳውሎስ፡ ትሩፈ፡ ሥቃያት፡ እምፍቅደ፡ ኆፃ፨
- ከመ፡ ትፈጽም፡ በሥጋከ፡ ለሕማመ፡ ክርስቶስ፡ ታሕፃፃ፨
- ቀኖተ፡ ልጓም፡ ማሕምም፡ በጽሐከ፡ በዕፃ፨
- ሰላም፡ ለአእዛኒከ፡ ፩፡ ወካልኡ፨
- ጸሎተ፡ ነዳያን፡ ኅቡረ፡ እለ፡ ያጽምኡ፨
- ፋሲለደስ፡ ወትረ፡ ለእዝንከ፡ ውስተ፡ ምስማዑ፨
- ጊዜ፡ እወዲ፡ ጸሎትየ፡ ወስእለትየ፡ እከዑ፨
- ከመ፡ መሥዋዕተ፡ ሰርክ፡ ሥሙር፡ ሱራፌል፡ ይሡዑ፨
- ሰላም፡ ለመላትሒከ፡ ካልእ፡ ፍኖተ፡ መስሕተ፨
- እለ፡ በሕሳል፡ ወልጓም፡ እንተ፡ ዐበያ፡ ሚጦተ፨
- በፃዕኩ፡ ለከ፡ በእንተ፡ ዝ፡ ፋሲለደስ፡ ብፅዓተ፨
- በመላትሕየ፡ ከመ፡ ኢየሀብ፡ ዕፍረተ፨
- ዘወጠንኩ፡ ውዳሴከ፡ እስከ፡ እፌጽም፡ ዘንተ፨
- ሰላም፡ ለአእናፊከ፡ እንተ፡ በውስቴቱ፡ ተሠውጠ፨
- መዐዛ፡ ፍቅሩ፡ ለክርስቶስ፡ ዘነፍሳተ፡ ጻድቃን፡ መሠጠ፨
- ፋሲለደስ፡ ዘኮንከ፡ መልዕልተ፡ ሥልጣናት፡ ሥሉጠ፨
- ሀበኒ፡ በረከተከ፡ ዘየአክለኒ፡ ኅዳጠ፨
- እንዘ፡ እምኀቤየ፡ ምንተ፡ ኢተኀሥሥ፡ ሤጠ፨
- ሰላም፡ ለከናፍሪከ፡ እንበለ፡ ጽርዓት፡ ወአርምሞ፨
- እለ፡ ይሴብሓ፡ ወትረ፡ ለእግዚአብሔር፡ ስሞ፨
- ሶበሰ፡ ሀሎኩ፡ አሜሃ፡ ፋሲለደስ፡ ስመ፡ አበሞ፨
- ለከናፍሪከ፡ እምተአማኅኩ፡ ልጓሞ፨
- ወለዘነጠለ፡ እምኔሁ፡ እምሰአምኩ፡ ደሞ፨
- ሰላም፡ ለአፉከ፡ ሙሐዘ፡ ዐልው፡ ወከርቤ
- በተዐግሦ፡ ዘጾረ፡ ልጓመ፡ ሥቃይ፡ ወምንዳቤ፨
- ፋሲለደስ፡ አፉከ፡ ከመ፡ ኢይኩን፡ ነባቤ፨
- ክርስቶስ፡ ወልደ፡ አምላክ፡ ብሂለ፡ ነገር፡ ዘይቤ፨
- መኰንነ፡ ሀገር፡ ሤመ፡ ውስቴቱ፡ ዐቃቤ፨
- ሰላም፡ ለአስናኒከ፡ እምሥነ፡ ጽዕዳዌ፡ እለ፡ ይኄይሱ፨
- ወእምጽዕዳዌ፡ በረድ፡ ዘዘንመ፡ ለሰልሞን፡ መልዕልተ፡ ርእሱ፨
- ፍሉሐ፡ ሩጸት፡ ፋሲለደስ፡ ለመንፈስ፡ ቅዱስ፡ ፈረሱ፨
- ርእዮሙ፡ በድረ፡ ዚአከ፡ ጊዜ፡ ዐጸደ፡ ስምዕ፡ ታንሶሱ፨
- እለ፡ አፍራሰ፡ ፀብዕ፡ ይፄዐኑ፡ ኵሎሙ፡ ደቀሱ፨
- ሰላም፡ ለልሳንከ፡ ጽድቀ፡ እግዚአብሔር፡ ዘነገረ፨
- ወስብሐቲሁ፡ ኵሎ፡ አሚረ፨
- ፋሲለደስ፡ ሥቃየ፡ አንተ፡ ረሰይከ፡ ተግባረ፨
- ከመ፡ ትትዋረስ፡ ሰሚዐከ፡ ተስፋ፡ መልእክተ፡ ጴጥሮስ፡ ድኅረ፨
- ሰማየ፡ ሐዳሰ፡ ወሐዳሰ፡ ምድረ፨
- ሰላም፡ ለቃልከ፡ ከመ፡ ቃለ፡ አምላክ፡ መደንግፅ፨
- ዘያድለቀልቆ፡ ለገዳም፡ ወለሐቅለ፡ ቃዴስ፡ ዓፅ፨
- ፋሲለደስ፡ ቃልከ፡ አምሳለ፡ ነጐድጓድ፡ ድሙፅ፨
- ሶበ፡ ተሰምዐ፡ ውስተ፡ ኵሉ፡ አድያመ፡ ሮምያ፡ ወግብጽ፨
- ተሰብሩ፡ አማልክት፡ ዘአእባን፡ ወዕፅ፨
- ሰላም፡ ለእስትንፋስከ፡ እምኆኅተ፡ ሥጋ፡ ዘውሥጤ፨
- ዘይነፍሕ፡ ወትረ፡ ነፋሰ፡ በረከት፡ ወሥላጤ፨
- ፋሲለደስ፡ አፈው፡ ምዑዘ፡ ምግባር፡ እምሰጡቃጤ፨
- አበውእ፡ ለከ፡ እግዚእየ፡ አምኃ፡ ማሕሌት፡ ፔልስጤ፨
- ውስተ፡ ፍኖተ፡ ፀርየ፡ አንብር፡ ዘኃሣር፡ ቅጥቃጤ፨
- ሰላም፡ ለጕርዔከ፡ ዘተከሥተ፡ ከመ፡ መቃብር፨
- ለሰሪበ፡ ፍሉሕ፡ ዐረር፨
- ፋሲለደስ፡ ኵኑን፡ በውስተ፡ ፭፡ አህጉር፨
- ኦአግዓዚ፡ ወልደ፡ አግዓዚ፡ ክቡር፨
- እፎኑመ፡ ተኰንንከ፡ ከመ፡ ገብር፡ ነኪር፨
- ሰላም፡ ለክሳድከ፡ ዘአውኀዘ፡ በፈቃዱ
- ሐሊበ፡ ወደመ፡ ለጳውሎስ፡ ከመ፡ ክሳዱ፨
- ፋሲለደስ፡ ዕፀ፡ ዘይት፡ ወለአስካለ፡ ወይን፡ ጒንዱ፨
- ሥርወ፡ ክሳድከ፡ ሶበ፡ መተረ፡ እምሐራ፡ መኰንን፡ አሐዱ፨
- በአክናፈ፡ ብርሃን፡ ነፍሰከ፡ መላእክት፡ ወሰዱ፨
- ሰላም፡ ለመታክፍቲከ፡ ከመ፡ ይጹራ፡ እለ፡ አትሐታ፨
- አርዑተ፡ ሕማማት፡ ክቡደ፡ ወጾረ፡ ሥቃያት፡ ዘበበ፡ ጾታ፨
- ነዓ፡ ኀቤየ፡ ፋሲለደስ፡ ለለ፡ ሳኒታ፨
- ምስለ፡ ሰማዕታት፡ ዘአንጾኪያ፡ እለ፡ ተወልዱ፡ ውስቴታ፨
- ወምስለ፡ መናዝዝ፡ ፊቅጦር፡ ወእሙ፡ ማርታ፨
- ሰላም፡ ለዘባንከ፡ ዘተወከፈ፡ ዝብጠተ፡ ማሕመሜ፨
- ወቅሥፈታተ፡ ብዙኃ፡ እንተ፡ አልቦቱ፡ ፍጻሜ፨
- ፋሲለደስ፡ ዋስሊድስ፡ ሊቀ፡ መማክርቱ፡ ለንጉሠ፡ ሮሜ፨
- ክድኖ፡ ለዘባንየ፡ ሞጣሕተ፡ ዘመን፡ ወዕድሜ፨
- አርእስተ፡ አድባር፡ ከመ፡ ይክድን፡ ጊሜ፨
- ሰላም፡ ለእንግድዓከ፡ አምጣነ፡ ድልወቱ፡ ዘኮነ፨
- ለመንፈሰ፡ ጥበብ፡ ማኅደረ፡ ወለአእምሮ፡ መካነ፨
- ፋሲለደስ፡ ኪያከ፡ እስመ፡ ረሰይኩ፡ ፀወነ፨
- እስከ፡ ማእዜኑ፡ አነብር፡ እግዚኦ፡ ውስተ፡ ልብየ፡ ኀዘነ፨
- ለናዝዞትየ፡ ነዓ፡ ኀበ፡ እሔሊ፡ አነ፨
- ሰላም፡ ለሕፅንከ፡ እንተ፡ ኮነ፡ ተወካፌ
- ከላስስተ፡ ሥቃይ፡ ብዙኃ፡ በአስተጋብኦ፡ ወበሑቃፌ፨
- ፋሲለደስ፡ ኩነኒ፡ እሞገደ፡ ኀዘን፡ ኃዳፌ፨
- ወበሕፅንከ፡ አርፍቀኒ፡ ኀበ፡ ሖርከ፡ ለፌ፨
- በአምሳለ፡ ላእክ፡ እትሉከ፡ ቀኒትየ፡ መክፌ፨
- ሰላም፡ እብል፡ አእደወከ፡ መናትወ፨
- ወሰናስለ፡ ሕማም፡ ወስንዕ፡ እለ፡ ተዐሥሪ፡ ስንዕወ፨
- ፋሲለደስ፡ ዕፍረት፡ አንተ፡ ትፄኑ፡ አፈወ፨
- ከመ፡ እንግር፡ በዳኅናየ፡ ስምዐ፡ ጽድቅከ፡ ፍትወ፨
- ሶበ፡ ሰአልኩከ፡ ሊተ፡ ሀበኒ፡ ሐይወ፨
- ሰላም፡ ለመዛርዒከ፡ አማልክተ፡ ንጉሥ፡ ኃጥእ፨
- እለ፡ ቀጥቀጣ፡ ግብተ፡ ከመ፡ ንዋየ፡ ለብሓ፡ ወብርዕ፨
- መስተፅዕነ፡ ፈረስ፡ መዋኢ፡ ፋሲለደስ፡ ጽኑዕ፨
- ሶበ፡ ትሜርድ፡ ገዳመ፡ ፀብዕ፡ በአምሳለ፡ ያርብሕ፡ ተባዕ፨
- እንዘ፡ አልቦ፡ ዘይሰድዶ፡ ይጐይይ፡ ረሲዕ፨
- ሰላም፡ ለኵርናዕከ፡ ዘኢይትፈታሕ፡ መሌሊቱ፨
- ባሕቱ፡ ስቁል፡ ሰይፈ፡ ሃይማኖት፡ ዲበ፡ መንቅዕቱ፨
- ፋሲለደስ፡ ጸዋሬ፡ ለክርስቶስ፡ መስቀለ፡ ሞቱ፨
- ኵነኔ፡ እሳት፡ ኢያፍርሀከ፡ እስመ፡ ተአመንኮ፡ ቦቱ፨
- ከመ፡ ትትሜሰሎ፡ አእሚረከ፡ በሐዳስ፡ ሕይወቱ፨
- ሰላም፡ ለእመታቲከ፡ በአስተናድፎ፡ ወሐሲብ፨
- እለ፡ ቤተ፡ ሕማም፡ መጠና፡ ከመ፡ ሊቀ፡ ጸረብት፡ ጠቢብ፨
- ፋሲለደስ፡ ሱራፊ፡ ወመንፈሳዊ፡ ኪሩብ፨
- ተለጕሞትከ፡ ከመ፡ በቅል፡ ወአርአያ፡ ፈረስ፡ ዕፁብ፨
- አንተ፡ በኀበ፡ ሰብእ፡ ዕፁብ፡ ቀሊል፡ በኀበ፡ አብ፨
- ሰላም፡ ለእራኃቲከ፡ በስፉሕ፡ እለ፡ ይሜጥዋ፨
- ለከርሠ፡ ርኁባን፡ ኅብስተ፡ ሲሳየ፡ አዳም፡ ወሔዋ፨
- ፋሲለደስ፡ ይሳኮር፡ ለሠናይት፡ ዘትፈትዋ፨
- ክርስቶስ፡ ያዕቆብ፡ ወላዲከ፡ ከመ፡ ባረከከ፡ ነዋ፨
- በረከተ፡ ዚአከ፡ ለነፍስየ፡ ፍጡነ፡ ጸግዋ፨
- ሰላም፡ ለአፃብዒከ፡ ከመ፡ መዝሙረ፡ ስምዕ፡ ያስተዋድዳ
- አምሳለ፡ ጽጌ፡ ዘዐርጋ፡ ለእራኀ፡ እዴከ፡ እምሥርወ፡ ጕንዳ፨
- ምስሌከ፡ ዘልፈ፡ ባሕቱ፡ ፋሲለደስ፡ ሕንባበ፡ ረዳ፨
- እምፈተውኩ፡ የሐውፁኒ፡ በሥርዓተ፡ ፍቅር፡ አንግዳ፨
- ማርታ፡ ጠባብ፡ ወፊቅጦር፡ ወልዳ፨
- ሰላም፡ ለአጽፋረ፡ እዴከ፡ ድኅረ፡ ምትረቶን፡ ሕቀ፡ ከመ፨
- ትንሣኤ፡ ሙታን፡ ያሁቃ፡ እለ፡ ይሠርፃ፡ ዳግመ፨
- ፋሲለደስ፡ ኣነክር፡ ስምዐ፡ ዚአከ፡ መድምመ፨
- መኑ፡ ከማከ፡ በአፉሁ፡ ጸዊሮ፡ ልጓመ፨
- ዘበድሮ፡ ሠለጠ፡ ወገድሎ፡ ፈጸመ፨
- ሰላም፡ ለገቦከ፡ በዓራተ፡ ሥቃይ፡ ወኵነኔ፨
- እንተ፡ አስከቦ፡ መጽሩስ፡ መኰንነ፡ ሕስው፡ ኵርጓኔ፨
- ፋሲለደስ፡ ትንግሥ፡ ምስለ፡ ክርስቶስ፡ አሐተኔ፨
- በመንግሥተ፡ ሰማይ፡ ዘአልቦ፡ ብሂለ፡ ቴቄል፡ ወማኔ፨
- መንግሥተ፡ ምድር፡ ኀደገ፡ ወኮንከ፡ መናኔ፨
- ሰላም፡ ለከርሥከ፡ እስከ፡ ንዋየ፡ ውሥጡ፡ ያስተርኢ
- እንተ፡ አውዐዮ፡ ወአብሰሎ፡ መብስለ፡ እሳት፡ በላዒ፨
- ፋሲለደስ፡ እኁሃ፡ ለእመ፡ አባዲር፡ ወኤራኢ፨
- ኀይለከ፡ አንሥእ፡ ወነዓ፡ ፋሲለደስ፡ መዋኢ፨
- ከመ፡ ታድኅነነ፡ እምእኩይ፡ ጸላኢ፨
- ሰላም፡ ለልብከ፡ እንተ፡ አጥበቦ፡ በጽድቁ፡ ገሣጺ፨
- ዘቀዳማይ፡ ነሣቲ፡ ወዘደኃራይ፡ ሐናፂ፨
- ፋሲለደስ፡ ብጽሐኒ፡ በፈረሰ፡ መንፈስ፡ ረዋፂ፨
- ከመ፡ ታድኅና፡ ለነፍስየ፡ እምከናፍረ፡ ኵሉ፡ ዓማፂ፨
- ወእምልሳን፡ ዘይበልዐ፡ እምስሑል፡ መላፂ፨
- ሰላም፡ ለኵልያቲከ፡ በከውረ፡ ፈተና፡ ወመከራ፨
- እንተ፡ አፅረዮን፡ እሳት፡ አርአያ፡ ፍቱን፡ ወርቀ፡ ኦፌራ፨
- ፋሲለደስ፡ ንጹሕ፡ በአዛበ፡ ንጽሕክ፡ ቀስበ፡ ደሪራ፨
- ንዘሕ፡ ነፍሰ፡ ዚአየ፡ ከመ፡ ተንጽሐ፡ አምነውራ፨
- ወበደመ፡ ስምዕከ፡ አበሳሃ፡ አስተስሪ፡ ለግሙራ፨
- ሰላም፡ ለሕሊናከ፡ ዘይሔሊ፡ ኀበ፡ ላዕሉ፨
- ለረኪበ፡ ዕሤት፡ ሠናይ፡ ለዓለመ፡ ዓለም፡ ዘይሄሉ፨
- ፋሲለደስ፡ ሰማዕት፡ ንጉሠ፡ ሰማዕታት፡ ኵሉ፨
- ፍትወታቲሆሙ፡ ለእለ፡ ከማከ፡ በክርስቶስ፡ ሰቀሉ፨
- ወሥጋሆሙኒ፡ በመንፈስ፡ ቀተሉ፨
- ሰላም፡ ለአማዑቲከ፡ ዘተክዕወ፡ ከመ፡ ማይ፨
- በመስተረ፡ ሐፂን፡ ማሕመሚ፡ ወበሞሰርተ፡ ዕፅ፡ ጠዋይ፨
- ፋሲለደስ፡ ባዕል፡ መሴስየ፡ ኵሉ፡ ነዳይ፨
- ለዘፈኖከ፡ ኅብስትከ፡ ውስተ፡ ገጸ፡ ልዑል፡ ሰማይ፨
- ሀለወከ፡ ትርከቦ፡ ለዘመን፡ ጕንዱይ፨
- ሰላም፡ ለንዋየ፡ ውሥጥከ፡ ቅድው፡ ዕንቈ፡ ቢረሌ፨
- እስመ፡ ተዘግበ፡ ውስቴቱ፡ በታቦት፡ ከርሥከ፡ አምሳለ፡ ጽሌ፨
- ፋሲለደስ፡ እንተ፡ አልብከ፡ ምሳሌ፨
- ተማሕፀንኩ፡ በኪዳንከ፡ አመ፡ ሰዓተ፡ ላሕ፡ ወወይሌ፨
- ቤዛ፡ ይኵነኒ፡ ዘለከ፡ ትንባሌ፨
- ሰላም፡ ለኅንብርትክ፡ ፍሑቅ፡ ከመ፡ ማዕከክ፨
- ዘግብረ፡ ኅርወቱ፡ መንክር፡ ግብረ፡ እደ፡ ኬንያ፡ አምላክ፨
- በውሂበ፡ ዲናር፡ ወምናን፡ ፋሲለደስ፡ ቡሩክ፨
- ምስለ፡ እለ፡ ተቀንዩ፡ እምጽባሕ፡ እስከ፡ ፍና፡ ምሴት፡ ወሰርክ፨
- አስተዐርየኒ፡ ለጽሩዕ፡ ወሀካይ፡ ላእክ፨
- ሰላም፡ ለሐቌከ፡ ዘቀነት፡ ኀይለ፡ ወጽንዐ፨
- እምአጽናፈ፡ ምድር፡ ኵሉ፡ ከመ፡ ይሥዐር፡ ፀብዐ፨
- ፋሲለደስ፡ እትሉከ፡ ኀበ፡ ሖርከ፡ አፀደ፡ መርዓ፨
- ፍኖትየ፡ አርትዕ፡ ዘውሣጤ፡ ወሑረትየ፡ ዘአፍአ፨
- ከመ፡ ምንዳፈ፡ ሐጽ፡ የሐውር፡ ፍኖተ፡ ርቱዐ፨
- ሰላም፡ እብል፡ ዘዚአከ፡ አቍያጸ፨
- ውስተ፡ መካነ፡ ገድል፡ ወስምዕ፡ እለ፡ አጥብዓ፡ ረዊጸ፨
- ፋሲለደስ፡ ወሀቢ፡ እንተ፡ ኢትነሥእ፡ ገጸ፨
- በወርኀ፡ እብሬትከ፡ እምድር፡ ርትዕ፡ ሠረፀ፨
- ጽድቅኒ፡ እምሰማይ፡ ሐወፀ፨
- ሰላም፡ ለአብራኪከ፡ ዘኢሰገዳ፡ ዘልፈ፨
- ለዘኢይነቡ፡ አማልክት፡ ከሢቶሙ፡ አፈ፨
- ፈሲለደስ፡ ሐዋሪ፡ ከመ፡ ውስተ፡ መጽሐፍ፡ ተጽሕፈ፨
- እንዘ፡ ታንሥእ፡ ኵያንወ፡ ወእንዘ፡ ትመልሕ፡ ሰይፈ፨
- ተዐይነ፡ ፀርየ፡ አጥፍእ፡ ወስድድ፡ አእላፈ፨
- ሰላም፡ አእጋሪከ፡ እለ፡ ተዐሥራ፡ በደርግ፨
- ውስተ፡ ቤተ፡ ሞቅሕ፡ ዕፅው፡ ወቤተ፡ ብለኔ፡ ንሡግ፨
- ፋሲለደስ፡ ኀያል፡ ተረፈ፡ ኀያላን፡ አእሩግ፨
- አንተኑ፡ ሙሴ፡ መስፍነ፡ ቀዳሚት፡ ሕግ፨
- ዘቀተሎሙ፡ ለሴዎን፡ ወአግ፨
- ሰላም፡ ለሰኳንዊከ፡ ከመ፡ ባህለ፡ ዳዊት፡ ነጋሢ፨
- ዘኢዐገቶን፡ እንከ፡ ኃጢአተ፡ ፀር፡ አባሲ፨
- ፋሲለደስ፡ ዕቀብ፡ ሰኰና፡ እግርየ፡ ለፈላሲ፨
- ኢይንስከኒ፡ ጸኒሖ፡ በመርገመ፡ አቡየ፡ ብእሲ፨
- ሰኰና፡ ፈረሱ፡ ለዳን፡ ዘነሰከ፡ ከይሲ፨
- ሰላም፡ ለመከየድከ፡ ነበልባለ፡ እሳት፡ ዘተስዕና፨
- እለ፡ ስፉሐት፡ እማንቱ፡ ዲበ፡ ኤዶምያስ፡ ወሲዶና፨
- ፋሲለደስ፡ በጽድቅ፡ ለዓለም፡ ዘትኴንና፨
- በዓለመ፡ ሥጋ፡ ማሳኒ፡ ከመ፡ ኢይርአይ፡ ሙስና፨
- ውስተ፡ ዘኢይማስን፡ መንፈስከ፡ ይምርሐኒ፡ ፍና፨
- ሰላም፡ ለአፃብዒከ፡ ዘኢተዐቅፉ፡ በፍናዌ፨
- አመ፡ ኀለፍከ፡ ለስምዕ፡ ውስተ፡ ዐውደ፡ ሕማም፡ ወታዕካ፡ ደዌ፨
- ፋሲለደስ፡ ሐመር፡ ዘኢታንቀለቅል፡ ሰርዌ፨
- አዕድወኒ፡ እምባሕረ፡ ደይን፡ እንተ፡ ያመጽእ፡ ምንሳዌ፨
- አመ፡ ምስለ፡ ሕዝባ፡ በበ፡ ግጻዌ፡ ትትፋታሕ፡ ነነዌ፨
- ሰላም፡ እብል፡ ለአጽፋረ፡ እግርከ፡ በሐ፨
- በመንፈሳዊት፡ አምኃ፨
- ፋሲለደስ፡ ሰማዕት፡ ዘተኰነንከ፡ ብዙኀ፨
- ናሁ፡ እክለ፡ ውዳሴከ፡ ለማዕረር፡ በጽሓ፨
- ምስለ፡ አድኅኖትከ፡ ዕሥየኒ፡ ዐስብየ፡ ፍሥሓ፨
- ሰላም፡ ለቆምከ፡ ከመ፡ ዕፀ፡ በቀልት፡ ወአርዝ፨
- እንተ፡ ሠቀዮ፡ ወአልሐቆ፡ ፈለገ፡ ዮርዳኖስ፡ ውሒዝ፨
- ፋሲለደስ፡ ያቁም፡ ፋሲለደስ፡ በለዝ፨
- ዘተከለከ፡ ውስተ፡ ቤቱ፡ ወጽርሐ፡ መንግሥቱ፡ ሕዋዝ፨
- ክርስቶስ፡ ሰሎሞን፡ ወንጉሥ፡ ዐዚዝ፨
- ሰላም፡ ለመልክእከ፡ ዘተለክአ፡ ቦቱ፡ በጽድቅ፨
- መልክአ፡ አዳም፡ ሥጋዊ፡ ወባሕርየ፡ መንፈስ፡ ረቂቅ፨
- ፋሲለደስ፡ ሥቃየ፡ እንተ፡ ፈጸምከ፡ በጻህቅ፨
- አጽንዐኒ፡ በነቢብከ፡ እምነ፡ ኵሉ፡ ወዲቅ፨
- ከመ፡ ሐመረ፡ ያጸንዕ፡ መልህቅ፨
- ሰላም፡ ለፀአተ፡ ነፍስከ፡ እምቤተ፡ ሥጋሃ፡ ንጹሕ፨
- በስሑል፡ መጥባሕት፡ ወበኣፈ፡ ሰይፍ፡ በሊሕ፨
- ሊቀ፡ ሰማዕታት፡ መርዓዊ፡ ፋሲለደስ፡ ፍሡሕ፨
- ለነፍስከ፡ ጊዜ፡ ፀአታ፡ ምስለ፡ ቃለ፡ ወይሌ፡ ወላሕ፨
- ስብአ፡ ሀገር፡ በከዩ፡ እንዘ፡ ይብሉ፡ አህ፨
- ሰላም፡ ለበድነ፡ ሥጋከ፡ በድነ፡ ክርስቲያናዊ፡ አንፎራ፨
- ዘተቀደሰ፡ በደሙ፡ ለበግዐ፡ ምሥጢር፡ ጵርስፎራ፨
- ፋሲለደስ፡ ሰማዕት፡ አበ፡ አውሳብዮስ፡ ወመቃራ፨
- አሰስል፡ ዘልፈ፡ እምኔየ፡ ወአእትት፡ ለግሙራ፨
- ኵሎ፡ ቅንዓተ፡ ወኵሉ፡ መከራ፨
- ሰላም፡ ለግንዘተ፡ ሥጋከ፡ ዘጠብለልዎ፡ ጻድቃነ፡ ልዑል፨
- በልብሰ፡ ገርዜን፡ ንጹሕ፡ ወበደመ፡ አስካል፨
- ፋሲለደስ፡ ይሁዳ፡ እጓለ፡ አንበሳ፡ ኀያል፨
- ዕርግ፡ እምኅዝአትከ፡ ወግበብከ፡ ስሑል፨
- ዕድዋነ፡ ሕይወትየ፡ ትቅትል፡ በገዳም፡ ወሐቅል፨
- ሰላም፡ ለመቃብሪከ፡ አበው፡ ቀደምት፡ ኀበ፡ አዕረፉ፨
- ለባሕርየ፡ ሥጋከ፡ ዕንቍ፡ እስመ፡ ውእቱ፡ ሰደፉ፨
- ውዳሴ፡ መልክእከ፡ እጽሐፍ፡ ፋሲለደስ፡ እስከ፡ ለዝላፉ
- በሎሙ፡ ለአኃዊከ፡ ዲበ፡ ልብሰ፡ ክርስቶስ፡ ጸሐፉ፨
- ከመ፡ ደርገ፡ ያንብቡ፡ መላእክት፡ አእላፉ፨
- አምኃ፡ ሰላም፡ አቅረብኩ፡ ለመልክእከ፡ በፍቅዱ፨
- እምርእስ፡ እስከ፡ እግር፡ እንዘ፡ አስተታሉ፡ ለለ፡ አሐዱ፨
- ፋሲለደስ፡ ክቡር፡ ለእግዚአብሔር፡ ሰማዕተ፡ ወልዱ፨
- ተወከፍ፡ ዘንተ፡ ማሕሌትየ፡ ከመ፡ ፄና፡ ምዑዝ፡ ናርዱ፨
- ወከመመሥዋዕት፡ ዘተሦዐ፡ በዓውዱ፨

ተረፈ፡ መልክእ፡
- ሰላም፡ ለከ፡ ተፀዓኔ፡ ፈጣን፡ ፈረስ፨
- ዘኢይበድሮ፡ ነፋስ፨
- ለጸቢአ፡ ፀር፡ በመስቀል፡ ቅዱስ፨
- ብእሲ፡ ኃይል፡ ፋሲለደስ፨
- ሰላም፡ ለከ፡ ዘውዋዔከ፡ ድሙፅ፡ እስከ፡ ፍኖት፡ ርሑቅ፨
- ልፁቀ፡ ሮማን፡ ጸናጽለ፡ ወርቅ፨
- ትግምርትከ፡ በልብሰ፡ ጽድቅ፨
- ሰላም፡ ለከ፡ ለኅጠተ፡ ሥርናይ፡ ዝርእት፡ ፋሲለደስ፡ አምሳላ፨
- ድኅረ፡ ሙተትከ፡ ዘረከብከ፡ ተድላ፨
- በኪዳን፡ ምስለ፡ መሐላ፨
- ሰላም፡ ለከ፡ በጊዜ፡ ጽብእ፡ ወቀትል፨
- ፋሲለደስ፡ ኀያል፨
- ሶበ፡ ትፄዐኖ፡ እንቋዕ፡ ፈረስከ፡ ይብል፨
- እስመ፡ አንተ፡ ስቡሐ፡ ገድል፨
- ሰላም፡ ለከ፡ በከመ፡ ልማድከ፡ ተንሥእ፡ ፋሲለደስ፡ በቋዒ፨
- ግብረከ፡ መድምመ፡ እስከ፡ ንሬኢ፨
- ለጸላኢ፡ ትንሥቶ፡ ወለገፋዒ፨
- በኀይልከ፡ ኀይለ፡ ፀር፡ መዋኢ፨

መልክአ፡ ፋሲለደስ፡ Malkəʾa Fāsiladas

Image of Basilides

Subject