Malkəʾa Walatta Ṗeṭros (Image of Walatta Ṗeṭros)

- በስመ፡ እግዚአብሔር፡ ዘሀሎ፡ አመ፡ ኢሀሎ፡ ዘመን፨
- ወኢቀደሞ፡ ሰዓት፡ መጠነ፡ ቅጽበታ፡ ለዐይን፨
- እሰንቁ፡ ለኪ፡ አውታረ፡ ነባቤ፡ ድርሳን፨
- ያብርህ፡ ውስተ፡ ልብየ፡ ለወለተ፡ ጴጥሮስ፡ ምእመን፨
- ጸዳለ፡ አእምሮ፡ ንስቲት፡ ሲኖዳ፡ ካህን፨
- ሰላም፡ ለዝክረ፡ ስምኪ፡ ዘቀጸላ፡ ሞገስ፡ ትርሲቱ፨
- ወለሥዕርትኪ፡ ሥዉጥ፡ ዘቅብአ፡ ቅዳሴ፡ ውስቴቱ፨
- ወለተ፡ ጴጥሮስ፡ እምነ፡ ትንብልናኪ፡ ንፈቱ፨
- ከመ፡ ያድኅነነ፡ እምትንሣኤ፡ አፅራር፡ ሠለስቱ፨
- እስመ፡ መሪራን፡ ፈድፋደ፡ እሙንቱ፨
- ሰላም፡ ለርእስኪ፡ ወለገጽኪ፡ ስቡሐ፨
- እምብርሃናቲሁ፡ ለሰማይ፡ ዘአስተርአየ፡ ብዙኃ፨
- ሥርጉተ፡ ኵለንታ፡ ለጴጥሮስ፡ ወለቱ፡ ዘሃይማኖት፡ እልታኃ፨
- አዕርጊ፡ ስእለተነ፡ ሠርከ፡ ወነግሀ፨
- ኀበ፡ አምላክኪ፡ ማዕሠሮ፡ ለሰይጣን፡ ዘፈትሐ፨
- ሰላም፡ ለቀራንብትኪ፡ ሕማማተ፡ አንብዕ፡ እለ፡ ጾሩ፨
- ወለአዕይንትኪ፡ ሥነ፡ እንተ፡ ኀበ፡ አምላክ፡ ነጸሩ፨
- ወለተ፡ ጴጥሮስ፡ ፍትሕኒ፡ ለጌጋይ፡ እማዕሠሩ፨
- ወአርትዒ፡ አእጋርየ፡ ፍኖተ፡ ንስሐ፡ ይሑሩ፨
- ቅድመ፡ ይዳደቀኒ፡ ሞት፡ ዘፀዋግ፡ ኅብሩ፨
- ሰላም፡ ለአዕዛንኪ፡ ሰማዕያተ፡ ዜና፡ በቋዒ፨
- ወለመላትሕኪ፡ ሱቱፍ፡ ጽፍዐተ፡ አምላክ፡ ተሰበኢ፨
- ወለተ፡ ጴጥሮስ፡ ኀቤነ፡ ሶበ፡ ንጼውዐኪ፡ ንዒ፨
- አጋንንተ፡ ወመናፍስተ፡ ኢይጽብኡነ፡ ትጽብኢ፨
- በሰይፈ፡ አፉኪ፡ ሱራፌል፡ ሠዋዒ፨
- ሰላም፡ ለአእናፍኪ፡ አብያተ፡ ቅታሬ፡ ዘአንክሮ፨
- ወለከናፍርኪ፡ አቅመ፡ እለ፡ ሠርዑ፡ ለተናግሮ፨
- ወለተ፡ ጴጥሮስ፡ በረዊጽ፡ ዮሐንስ፡ ዘበደሮ፨
- ይትፋለስ፡ መንገሌየ፡ እመንገሌኪ፡ አእምሮ፨
- ለአእምሮትየሰ፡ ዝንጋዔ፡ ሠወሮ፨
- ሰላም፡ ለአፉኪ፡ መፈክረ፡ ሐዲስ፡ ቀኖና፨
- ወለአስናንኪ፡ ሰሐቀ፡ ዘመስተሣልቃን፡ መነና፨
- መስተፍሥሒ፡ አልባብ፡ ድምፅኪ፡ ፈድፋደ፡ እምወይነ፡ ቃና፨
- ሶበ፡ ተኀትመ፡ ጊዜ፡ ሞት፡ ወለተ፡ ጴጥሮስ፡ ዘዮና፨
- ቤተ፡ ክርስቲያን፡ በልብሰ፡ ላሕ፡ ገልበበት፡ ኅሊና፨
- ሰላም፡ ለልሳንኪ፡ ዘኢያንተገ፡ ጸልዮ፨
- ወለመዓርዒር፡ ቃልኪ፡ አርጋኖነ፡ ስብሐት፡ ወተጋንዮ፨
- በእንተ፡ ኢየሱስ፡ ክርስቶስ፡ ዘተሦዓ፡ በቀራንዮ፨
- ኢኃሠሥኪ፡ ወርቀ፡ ወብሩረ፡ ወለተ፡ ጴጥሮስ፡ አጥርዮ፨
- እስከ፡ ለመስሐቲ፡ መልአክ፡ ድንጋፄ፡ አድወዮ፨
- ሰላም፡ ለእስትንፋስኪ፡ ዘመዓዛሁ፡ ስሒነ፨
- ወለጕርዔኪ፡ ዘየብሳ፡ እምአጥልሎተ፡ ማይ፡ ወወይን፨
- ወለተ፡ ጴጥሮስ፡ ይብሉኪ፡ መላእክተ፡ ሰማይ፡ ኄራን፨
- ሚይሤኒ፡ እኅትነ፡ ዘተውህበኪ፡ ብፅዓን፨
- ወዕሤትኒ፡ ዘኢርእየ፡ ዓይን፨
- ሰላም፡ ለክሳድኪ፡ በሀብለ፡ ትሕትና፡ ዘተስሕበ፨
- ወለመታክፍትኪ፡ ዘጾረ፡ አርዑተ፡ ምንዳቤ፡ ዕጹበ፨
- ወለተ፡ ጴጥሮስ፡ ምልዒ፡ ውስተ፡ ልብየ፡ ጥበበ፨
- እንበለ፡ ጥበብሰ፡ ሶበ፡ ተመሰልኩ፡ ርግበ፨
- ኢያበውሐኒ፡ አምላክኪ፡ እትዋረስ፡ መዝገበ፨
- ሰላም፡ ለዘባንኪ፡ መዋጥሐ፡ ትፍግዕት፡ ዘመነነ፨
- ወለእንግድዓኪ፡ ምርፋቅ፡ ለምስኪናን፡ ዘኮነ፨
- መፍቀሪተ፡ ጸሎት፡ ወጾም፡ ወለተ፡ ጴጥሮስ፡ እምነ፨
- ትተንብሊ፡ ቅድመ፡ አምላክ፡ ስርየተ፡ ኃጢአት፡ ለነ፨
- ናስተበቍዓኪ፡ እሊአኪ፡ ንሕነ፨
- ሰላም፡ ለሕፅንኪ፡ ሕፅነ፡ ምንኵስና፡ ክቡር፨
- ወለአእዳውኪ፡ ዘሰፍሓ፡ ለምሒረ፡ ኵሉ፡ ግዩር፨
- ወለተ፡ ጴጥሮስ፡ አክሊላ፡ ለያዕቆባዊት፡ ማኅበር፨
- ይዌድሱኪ፡ አእላፍ፡ ተዓይነ፡ ሰማይ፡ ወምድር፨
- በጽምፀ፡ ማኅሌት፡ ሠናይ፡ ወሐዋዝ፡ ምዝሙር፨
- ሰላም፡ ለመዛርእኪ፡ ወለኵርናዕኪ፡ ምስማክ፨
- ዘኢተእኅዙ፡ ፍጹመ፡ በማእሰረ፡ ጌጋይ፡ ድሩክ፨
- ወለጥተ፡ ጴጥሮስ፡ ማርታ፡ መፍቀሪተ፡ ክርስቶስ፡ አምላክ፨
- ተከድነ፡ ልብሰ፡ ኀፍረት፡ በዕብሬትኪ፡ መልአክ፨
- ለአዳም፡ ዘአውደቆ፡ እምሣልስ፡ ፈለክ፨
- ሰላም፡ ለእመታትኪ፡ ለተገብሮ፡ ጽድቅ፡ ዘተኃየላ፨
- ወለእራኅኪ፡ ብሩህ፡ እምስነ፡ ኦርያሬስ፡ ወእብላ፨
- ወለተ፡ ጴጥሮስ፡ ተንብሊ፡ ኀበ፡ ማርያም፡ ርግበ፡ ገሊላ፨
- ትተንብል፡ በእንቲአነ፡ እመድኃኔ፡ ዓለም፡ እጓላ፨
- ከመ፡ ይዕቀበነ፡ እመርቅያን፡ ተኵላ፨
- ሰላም፡ ለአፃብዕኪ፡ አዕጹቀ፡ ተቅዋም፡ እድ፨
- ወለአርእስቲሆን፡ አጽፋር፡ ዘኅብረ፡ እማንቱ፡ በረድ፨
- ወለተ፡ ጴጥሮስ፡ ወራውሬ፡ ወዕብነ፡ መረግድ፨
- ጥበበ፡ እምተግሣፅኪ፡ አጥረየ፡ አብድ፨
- ወሀብተ፡ ሚጠት፡ ብዙኃን፡ እምካህድ፨
- ሰላም፡ ለአጥባትኪ፡ ዘሐሊበ፡ ጽጋ፡ አንቅዕት፨
- ወኢይውኅዶን፡ ምሕረት፨
- ወለተ፡ ጴጥሮስ፡ መበይን፡ በከፈረ፡ ሞት፨
- ጊዜ፡ ተስወርኪ፡ ማኅቶትነ፡ መብርህት፨
- ውስተ፡ ገጸ፡ የማን፡ ወፀጋም፡ ሰፈነ፡ ጽልመት፨
- ሰላም፡ ለገቦኪ፡ ሥርግወ፡ ዘወርቅ፡ ሐመልማል፨
- ወለከርሥኪ፡ መዝገቡ፡ ለባሕርየ፡ ወንጌል፨
- ወለተ፡ ጴጥሮስ፡ እምሰራ፡ ልዕልተ፡ ዝክር፡ ወገድል፨
- ይጸልላኒ፡ አክናፍኪ፡ ከመ፡ ጸለላ፡ በሐቅል፨
- ለደብተራ፡ ስምዕ፡ ደመና፡ ቀሊል፨
- ሰላም፡ ለልብኪ፡ ወለኵልያትኪ፡ ንስቲተ፨
- ዘኢያሥረጹ፡ ዐመፃ፡ ወኢዘገቡ፡ ጽልሑተ፨
- ወለተ፡ ጴጥሮስ፡ ፈትቲ፡ ኅብስተ፡ በረከት፡ ሊተ፨
- ህየንተ፡ አቅረብኩ፡ ፍሬ፡ ከናፍር፡ ማኅሌተ፨
- ለዕበይኪ፡ ዘአልቦ፡ መስፈርተ፨
- ሰላም፡ ለሕሊናኪ፡ ስቅለተ፡ ፈጣሪ፡ ዘሐለየ፨
- ወለአማዑትኪ፡ ህቀ፡ ዘኢቈጸረ፡ እከየ፨
- ወለተ፡ ጴጥሮስ፡ በልኒ፡ እንዘ፡ ይሰምዑ፡ ሕዝብየ፨
- ማኅደረ፡ በሰማያት፡ ከመ፡ ተሀሉ፡ ምስሌየ፨
- እስመ፡ አስተዳለውኩ፡ ለከ፡ ኢትኅዝን፡ ወልድየ፨
- ሰላም፡ ሰላም፡ ለንዋየ፡ ውስጥኪ፡ ኅቡእ፨
- ወለኅንብርትኪ፡ ዘአፍአ፡ ከመ፡ ዓይነ፡ ማኅተም፡ ልኩዕ፨
- ወለተ፡ ጴጥሮስ፡ ኤልሳቤጥ፡ ወላዲተ፡ መጥምቅ፡ ብፁዕ፨
- ያስተበፅዑኪ፡ ነገደ፡ መላእክት፡ ወሰብእ፨
- እለ፡ ሡሩራን፡ እምጾታ፡ አርባዕ፨
- ሰላም፡ ለማኅፀንኪ፡ ከመ፡ አስካለ፡ ወይን፡ ዘሐረግ፨
- ዘፈረየ፡ ፍሬ፡ እንተ፡ ቅድስና፡ ወሕግ፨
- ለርኡስ፡ ርኡሳን፡ ጴጥሮስ፡ ወለቱ፡ እንበለ፡ ነቲግ፨
- አንቲ፡ ወሲኖዳ፡ ወጻድቃነ፡ ወጺፍ፡ አዕሩግ፨
- መጽርየ፡ በረከት፡ ላዕሌነ፡ ነስንሱ፡ በደርግ፨
- ሰላም፡ ለሐቌኪ፡ በአብዝኆ፡ ጸዊም፡ ዘደግደገ፨
- ወለአቍያጽኪ፡ አዕማድ፡ እለ፡ ይትሌለያ፡ ዘውገ፨
- ወለተ፡ ጴጥሮስ፡ አብርሂ፡ ዓይነ፡ ልቡናየ፡ ሕሙገ፨
- ከመ፡ እነጽርኪ፡ እንዘ፡ ይቀውሚ፡ ደርገ፨
- ምስለ፡ ማኅበረ፡ በኵር፡ ፍሡሓን፡ ዘሠለጡ፡ ሕገ፨
- ሰላም፡ ለአብራክኪ፡ እለ፡ አዝለፋ፡ አስተብርኮ፨
- ወለሐዋርያት፡ ሰላም፡ አእጋርኪ፡ ፍና፡ ተልእኮ፨
- ወለተ፡ ጴጥሮስ፡ ዕቀቢ፡ ማኅበረ፡ ደቂቅኪ፡ እምተሐውኮ፨
- ለሰይጣንሰ፡ ዘኢያፈቅር፡ ተዓርኮ፨
- መሣግሪሁ፡ ብትኪ፡ ወስብሪ፡ ሦኮ፨
- ሰላም፡ ለሰኳንውኪ፡ ምስለ፡ መከየድ፡ ዘቆሙ፨
- ኅብስተ፡ አሰርፎ፡ እምጻማ፡ እንዘ፡ ይጸውሙ፨
- ወለተ፡ ጴጥሮስ፡ ጥቅዒ፡ መጥቅዓ፡ ስእለት፡ ለለጌሠሙ፨
- ለእለ፡ አመነ፡ ያዕቆባውያን፡ በስሙ፨
- ቤዛ፡ ኃጣውኢነ፡ ይኩን፡ ለክርስቶስ፡ በደሙ፨
- ሰላም፡ ለአፃብዓ፡ እግርኪ፡ ኃምስ፡ ክዑባት፡ በኈልቆ፨
- ወለአጽፋርኪ፡ ዐሥር፡ እለ፡ ይነብራ፡ በተላጽቆ፨
- ወለተ፡ አረጋይ፡ ጴጥሮስ፡ ቅረቢ፡ እምተራኅቆ፨
- ለትኩዝ፡ ብእሲ፡ ከመ፡ ትፈጽሚ፡ ጻሕቆ፨
- ወለጻድቅ፡ ትባርኪ፡ ጽድቆ፨
- ሰላም፡ ለቆምኪ፡ ሥነ፡ ቄድሮስ፡ ኅሩይ፨
- ወለመልክእኪ፡ ሰላም፡ ወላዲ፡ ፍሥሐ፡ ፀሓይ፨
- ወለተ፡ ጴጥሮስ፡ ሀቢ፡ ተውላጠ፡ ዝንቱ፡ ንዋይ፨
- ፍተ፡ በረከት፡ በቅድመ፡ ጉባኤ፡ ዓባይ፨
- እምበረከትኪ፡ ዘጥቀ፡ ሠናይ፨
- ሰላም፡ ለፀአተ፡ ነፍስኪ፡ በጣዕመ፡ ዝማሬ፡ ሐዋዝ፨
- ወለበድነ፡ ሥጋኪ፡ ጽዱል፡ እምጸዳለ፡ ባሕርይ፡ እንቡዝ፨
- ወለተ፡ ጴጥሮስ፡ ጠባብ፡ ወሠናይተ፡ ግዕዝ፨
- ለለይሠርቁ፡ ምዕዛራተ፡ ዝክርኪቤዝ፨
- እምልበ፡ ብእሲ፡ ኅዙን፡ ይትረሣዕ፡ ትካዝ፨
- ሰላም፡ ለግንዘተ፡ ሥጋኪ፡ ዘትሩፈ፡ ትሩፍ፡ ዕበዩ፨
- ወለመቃብርኪ፡ ምስካይ፡ ለእለ፡ ቦቱ፡ ሰከዩ፨
- ወለተ፡ ጴጥሮስ፡ ቢረሌ፡ ለዕፍረተ፡ አሚን፡ ሙዳዩ፨
- ቅድሑ፡ ፈልፈለ፡ ሣህል፡ አባግዕኪ፡ ይርወዩ፨
- ጊዜ፡ አንበልበላ፡ ለመርቄ፡ ዋዕዩ፡
- ለቆብዕኪ፡ አክሊለ፡ ሦክ፡ ዲበ፡ ርእሰ፡ ክርስቶስ፡ ዘተሠይመ፨
- አመ፡ ሰቀልዎ፡ አይሁድ፡ ከመ፡ ይቤዙ፡ ዓለመ፨
- ወዓጽፈ፡ ንጽሕና፡ ዓጽፍኪ፡ ወአስኬማኪ፡ ቅድመ፨
- ለቅናትኒ፡ ወቀሚስ፡ ወለተ፡ ጴጥሮስ፡ ዳግመ፨
- ሰላም፡ ሰላም፡ እንዘ፡ እብል፡ ረሰይኩ፡ ማኅተመ፨
- ይትባረኩ፡ እግዚአብሔር፡ አምላከ፡ አማልክት፡ መላኪ፨
- ዘባሕርይሁ፡ ብርሃን፡ ዘመልዕልተ፡ ብርሃናት፡ ያዋኪ፨
- እስመ፡ ዐቀበኒ፡ ሊተ፡ እመሥገርተ፡ ሰይጣን፡ ሐዋኪ፨
- ወአፈጸመኒ፡ ወለተ፡ ጴጥሮስ፡ ወልድኪ፨
- ማኅሌተ፡ ዝክርኪ፡ ዘወጠንኩ፡ ለኪ፨

ተረፈ፡ መልክእ፡
- ሰላም፡ ለኪ፡ ወለተ፡ ጴጥሮስ፡ ገነት፡ ክልልተ፡ መዓዛ፡ ጥዑም፨
- ወምጽላለ፡ አርጋብ፡ አንቲ፡ እመርቁ፡ ሕማም፨
- ዘሰፈነት፡ ውስተ፡ ዓለም፨
- ሰላም፡ ለኪ፡ ወለተ፡ ጴጥሮስ፡ መጽሒት፡ ሃይማኖተ፡ ሥሉስ፡ ቅዱስ፨
- ዘተከሥተ፡ ልኪ፡ ለዘነብ፡ ወርእስ፨
- ኅዱራን፡ መልዕልተ፡ የብስ፨
- ሰላም፡ ለኪ፡ ወለተ፡ ጴጥሮስ፡ ብርሃን፡ ስብከትከ፡ አመ፡ ውስተ፡ ጽልመት፡ አብርሃ፨
- ለመክፈልተ፡ አብዳን፡ ዓለም፡ አእርክቲሃ፨
- ተባደሩ፡ ኀበ፡ ንስሐ፨
- ሰላም፡ ለኪ፡ ዘዓይን፡ ኢርእየ፡ ወእዝን፡ ኢሰምዓ፨
- ከመ፡ ትረስዪ፡ ትርሲተ፡ መርዓ፨
- ገደፍኪ፡ ሠርጐ፡ ፍግዓ፨
- ሰላም፡ ለኪ፡ ምስለ፡ ሲኖዳ፡ አቡኪ፡ ሥርግወ፡ ሎግዮን፡ ድንጋሌ፨
- ለናዝዞትየ፡ ንዒ፡ እምኀዘን፡ ወይሌ፨
- ወሐውጺ፡ ከመ፡ ውላውሌ፨
- ሰላም፡ ለኪ፡ ወለተ፡ ጴጥሮስ፡ እምነ፡ ተኃየልኪ፡ ለበዊአ፡ ጽባብ፡ ምሕላፍ፨
- ከመ፡ ተኃየሉ፡ ቅድመ፡ ሰማዕታት፡ አእላፍ፨
- ወጻድቃን፡ እለ፡ ወጺፍ፨
- ሰላም፡ ለኪ፡ ሞገሰ፡ ረድኤትኪ፡ ኃይል፡ ወለተ፡ ጴጥሮስ፡ ሱላሜ፨
- እመከራ፡ ሰይጣን፡ ወሰብእ፡ በኢፍጻሜ፨
- ይክድነኒ፡ አምሳለ፡ ጊሜ፨
- ሰላም፡ ለኪ፡ ረድኤትኪ፡ ፀወን፡ እንዘ፡ ንሬስዮ፡ አረፍተ፨
- መራዕየ፡ ረሲዓን፡ አጽራር፡ ኢንፈርህ፡ ምንተ፨
- ጊዜ፡ ሠርዑ፡ ተቃውሞተ፨
- ሰላም፡ ለደቂቅኪ፡ አኃው፡ ወለኵሎን፡ አሐት፨
- ቅድመ፡ ገጸ፡ አምላክ፡ ተንብሊ፡ እንበለ፡ ጽርዓት፨
- ኢይባኡ፡ ውስተ፡ መንሱት፨
- ሰላም፡ ለኪ፡ እመሣግሪሁ፡ አምሰጥኪ፡ ለአርዌ፡ ዓመፃ፡ መስገሪ፨
- አረቦን፡ መዊእ፡ መስቀለ፡ እንዘ፡ ትጸውሪ፨
- ዘጾርዎ፡ እለ፡ መቃሪ፨
- ሰላም፡ ለኪ፡ ወለተ፡ ጴጥሮስ፡ አዕርሂ፡ ዕጣነ፡ ማኅሌተነ፡ ዝንቱ፨
- እምእንስሳ፡ ሰማይ፡ አርባዕቱ፨
- ኀበ፡ ይትቄደሱ፡ አካላት፡ ሠለስቱ፨
- በማዕጠንት፡ ዘብርሃን፡ ግብረቱ፨

መልክአ፡ ወለተ፡ ጴጥሮስ፡ Malkəʾa Walatta Ṗeṭros

Image of Walatta Ṗeṭros

Subject