Other Titles
-
ጸሎተ፡ መልክኡ፡ ለመጥምቀ፡ መለኮት፡ ዮሐንስ፡
Ṣalota Malkəʾu la-Maṭməqa Malakot Yoḥannəs
Prayer of the Image of John, Baptizer of Divinity
Malkəʾ
-
- በስመ፡ ግዚአብሔር፡ እሳት፡ በሐቅለ፡ ኅሊና፡ ነዳዲ፨
- ወበስመ፡ ማርያም፡ ድንግል፡ መጥበቢተ፡ ዓለም፡ አባዲ፨
- ማኅቶተ፡ ጥበብ፡ ዮሐንስ፡ ጽልመተ፡ አበሳ፡ ሰዳዲ፨
- ከመ፡ እዜኑ፡ ኂሩትከ፡ ዕዳ፡ ኀጣውእየ፡ ፍዲ፨
- በአየረ፡ ሰማይ፡ ዘይጸርሕ፡ ቃልከ፡ አዋዲ፨
-
- ሰላም፡ ለፅንሰትከ፡ እንበለ፡ ኀጢአት፡ ወግማኔ፨
- ወለልደትከ፡ ሰላም፡ አመ፡ ሠላሳሁ፡ ለሰኔ፨
- ኆኅተ፡ ወንጌል፡ ዮሐንስ፡ በአየረ፡ ሰማይ፡ ኰናኔ፨
- አዝናም፡ መና፡ አእምሮ፡ ወኅብስተ፡ ሕይወት፡ መድኃኔ፨
- ኀበ፡ ሕዝበ፡ ልብየ፡ ኀብሩ፡ ወገብሩ፡ ኵርጓኔ፨
-
- ሰላም፡ ለዝክረ፡ ስምከ፡ ዘተበፅዐ፡ ሕጋ፨
- በአፈ፡ ገብርኤል፡ መልአክ፡ ምሉአ፡ ሞገስ፡ ወጸጋ፨
- ዮሐንስ፡ ሕሩም፡ ለዓለም፡ እምነ፡ ጹጋ፨
- ታስተስሪ፡ ኀጣውእየ፡ ወአበሳ፡ ኵሉ፡ ዘሥጋ፨
- ታስተምህር፡ ጸሎትከ፡ ሰማየ፡ ዐሪጋ፨
-
- ሰላም፡ ለሥዕርተ፡ ርእስኪ፡ እንተ፡ ደለዎ፡ እኳቴ፨
- ወለርእስከ፡ ሰላም፡ ዘተመትረ፡ ከመ፡ ናቡቴ፨
- ርእሰ፡ ዐውደ፡ ዓመት፡ ዮሐንስ፡ ወላዴ፡ መጥቅዕ፡ ወአበቅቴ፨
- መብልዕ፡ ዜና፡ ፍቅርከ፡ ወነገረ፡ ጽድቅከ፡ ስቴ፨
- ያስተፌሥሕ፡ መላእክተ፡ ወሰብአ፡ መዋቴ፨
-
- ሰላም፡ ለግንዘትከ፡ በከመ፡ ጽሑፍ፡ ዘተገንዘ፨
- ወለመቃብሪከ፡ ሰላም፡ ዘተሠርገወ፡ አብያዘ፨
- አመ፡ ተክለ፡ ገነት፡ ዮሐንስ፡ እንተ፡ ፈረይከ፡ ምዑዘ፨
- ለዝ፡ ማሕሌተ፡ ስምከ፡ እመ፡ አኅድጎ፡ አዘዘ፨
- እስከነ፡ መልአክ፡ ወሰብእ፡ ለይኩን፡ ውጉዘ፨
-
- አምኃ፡ ሰላም፡ አቅረብኩ፡ ለመልክእከ፡ በጽዋዔ፨
- እንዘ፡ ኣስተዋድድ፡ ቃለ፡ መጠነ፡ ራብዕ፡ ሱባዔ፨
- ተወከፈኒ፡ ዮሐንስ፡ ምስለ፡ በርተሎሜዎስ፡ ቀርነ፡ ጉባኤ፨
- ከመ፡ ተወክፈ፡ እግዚእከ፡ ቅድመ፡ ወንጌላዊ፡ ትንሣኤ፨
- እምእደ፡ አሐቲ፡ ብእሲት፡ ጸራይቀ፡ ክልኤ፨